အတည်တကျမနေထိုင်ပဲ ရွှေ့ပြောင်းနေထိုင်သူတွေကို နိုင်ငံသားစိစစ်ရေးကတ်ပြား ပြုလုပ်ပေးဖို့ ခက်ခဲနေတယ်လို့ လ၀က ဒုဝန်ကြီးက ပြောပါတယ်။
ဒီဇင်ဘာ ၃၁ ရက်နေ့က ကျင်းပတဲ့ ပြည်သူ့လွှတ်တော်အစည်းအဝေးမှာ ပြောခဲ့တာပါ။
ရွှေ့ပြောင်းနေထိုင်သူအများစုဟာ လိုအပ်တဲ့ နေထိုင်မှုဆိုင်ရာ အချက်အလက်နဲ့ ကိုယ်ရေးအချက် အလက်တွေကို ပြည့်စုံမှန်ကန်စွာ မပေးနိုင်ဘူးလို့ သူက ပြောပါတယ်။
“လက်ရှိနေထိုင်ရာ အရပ်မှာ အမြဲနေထိုင်တဲ့ အထောက်အထားမရှိသလို သက်ဆိုင်ရာကလည်း မထောက်ခံနိုင်၊ မကြာခဏ ရွှေ့ပြောင်းအလုပ်လုပ်ကိုင်ပြီး နေထိုင်ကြတဲ့အတွက် အိမ်ထောင်စု စာရင်းနဲ့ နိုင်ငံသား စိစစ်ရေး ကတ်ပြားလုပ်ပေးဖို့အတွက် အိမ်ထောင်စုအလိုက် လူဦးရေ စာရင်းကိုတောင် မှန်မှန်ကန်ကန် မလုပ်နိုင်ပဲ ခက်ခဲနေတယ်” လို့ ဒုဝန်ကြီးက ဆက်ပြောပါတယ်။
လက်ရှိမှာတော့ တည်ဆဲ ဥပဒေ၊ နည်းဥပဒေတွေဖြစ်တဲ့ ၁၉၄၉ ခုနှစ် ပြည်ထောင်စု မြန်မာနိုင်ငံအတွင်း နေထိုင်သူများ မှတ်ပုံတင်ခြင်း အက်ဥပဒေ၊ ၁၉၅၁ ခုနှစ် ပြည်ထောင်စုမြန်မာနိုင်ငံအတွင်း နေထိုင်သူများ မှတ်ပုံတင်ခြင်း နည်းဥပဒေနဲ့ နိုင်ငံသား စိစစ်ရေးကတ်ပြား ထုတ်ပေးနိုင်ရေးအတွက် မြန်မာနိုင်ငံသားဥပဒေတွေနဲ့ ဆောင်ရွက်ပေးနေတယ်လို့ သူက ဆိုပါတယ်။
၂၀၁၃ ခုနှစ် ကောက်ယူခဲ့တဲ့ စာရင်းအရ ရန်ကုန်တိုင်းဒေသကြီးတခုလုံးမှာ အိမ်ထောင်စု စာရင်း မရှိပဲ လာရောက်နေထိုင်သူ ခန့်မှန်းခြေ အိမ်ထောင်စု ၃၇၇၈၃ စု၊ လူဦးရေ ၁၆၅ ၄၃၇ ရှိတယ်လို့လည်း ဒုဝန်ကြီးက ပြောပါတယ်။
“လက်ရှိကြုံတွေ့နေရတာဟာ ဥပဒေ၊ နည်းဥပဒေတွေကြောင့် မဟုတ်ဘဲ အိမ်တိုင်စွပ်မနေထိုင်ပဲ ရွှေ့ပြောင်းနေတာ၊ ကိုယ်ရေးအချက်အလက်နဲ့ အထောက်အထားတင်ပြနိုင်တဲ့ အခြေအနေတွေကို မူတည်ပြီး ခက်ခဲနေတာကြောင့် ပြင်ဆင်ပေးဖို့ အစီအစဉ်မရှိပါဘူး။ ဒီအတွက် တခြား ၀န်ကြီးဌာနတွေ၊ တိုင်းနဲ့ ပြည်နယ် အစိုးရတွေ ပူးပေါင်းဖို့လိုပါတယ်” လို့လည်း သူက ပြောပါတယ်။
မြန်မာနိုင်ငံတ၀န်းမှာ အခြေချနေထိုင်တာ မရှိပဲ ရွှေ့ပြောင်းသွားလာနေထိုင်သူ ခန့်မှန်း ၁၁၆၂၅၀၀ ယောက် ရှိပါတယ်။
No comments:
Post a Comment