နိုင်ငံထဲကို အကြမ်းဖက်သမားတွေ မ၀င်ရောက်နိုင်ဖို့အတွက် ဘက်ပေါင်းစုံကနေ စောင့်ကြပ်ကြည့်ရှု နေပြီး ဖြစ်လာခဲ့ရင်လည်း အမြန်ဆုံးကယ်ဆယ်၊ ချေမှုန်းနိုင်ရေး ဆောင်ရွက်နေတယ်လို့ ပြည်ထဲရေးဝန်ကြီးဌာန ဒုတိယ၀န်ကြီးက ပြောပါတယ်။
နိုင်ငံထဲမှာ နိုင်ငံတကာအကြမ်းဖက်အဖွဲ့တွေနဲ့ ဆက်နွယ်နေတဲ့ ဖောက်ခွဲဖျက်ဆီးမှုအပါအ၀င် တိုက်ခိုက်တာတွေ မရှိခဲ့ပေမယ့် အကြမ်းဖက်သမားတွေ ခိုလှုံတဲ့နေရာနဲ့ လေ့ကျင့်ရေးစခန်းတွေ လုံးဝမရှိစေဖို့ ကြိုတင် ကာကွယ်နေတယ်လို့ ပြည်ထဲရေးဝန်ကြီးဌာန ဒုတိယ၀န်ကြီး ဗိုလ်မှူးချုပ် ကျော်ဇံမြင့်က ဆိုပါတယ်။
ဇန်န၀ါရီ ၁၃ ရက်က ကျင်းပတဲ့ အမျိုးသားလွှတ်တော်မှာ ကိုယ်စားလှယ်တယောက်ရဲ့ အမေးကို ဖြေကြား ခဲ့တာပါ။
“နေပြည်တော်၊ ရန်ကုန်၊ မန္တလေးတို့မှာ အရေးကြီးနေရာအဖြစ် သတ်မှတ်ပြီး အထူးလေ့ကျင့်ပေးထားတဲ့ ခေတ်မီလက်နက်ကိရိယာတပ်ဆင်ထားတဲ့ အကြမ်းဖက်မှုနှိမ်နင်းရေး တပ်ဖွဲ့စုတွေကို ဖွဲ့စည်းတာဝန်ချထားပြီး ဖြစ်ပါတယ်။ အရေးကြီးအဆောက်အအုံ၊ ဘာသာရေးအဆောက်အအုံ၊ စက်ရုံအလုပ်ရုံနဲ့ တံတားတွေရဲ့ လုံခြုံရေး စီမံချက်ရေးဆွဲပြီး လုံခြုံရေးတာဝန်တွေ ထမ်းဆောင်နေပါတယ်” လို့ ဗိုလ်မှူးချုပ် ကျော်ဇံမြင့်က ဆိုပါတယ်။
အကြမ်းဖက်လုပ်ရပ်တွေရဲ့ အရင်းအမြစ်ဖြစ်တဲ့ ငွေကြေးခ၀ါချတာကိုလည်း ဥပဒေတွေ ပြဋ္ဌာန်းဆောင်ရွက်ခဲ့တယ်လို့ သူက ပြောပါတယ်။
အပြည်ပြည်ဆိုင်ရာ ၀င်ထွက်ပေါက်တွေနဲ့ လေဆိပ်တွေ၊ နယ်စပ်ဝင်ပေါက်တွေကိုလည်း သက်ဆိုင်ရာ နိုင်ငံ တွေနဲ့ ပူးပေါင်းစောင့်ကြည့်နေတယ်လို့လည်း ဆိုပါတယ်။
“နိုင်ငံတကာအကြမ်းဖက်မှုသတင်းတွေကို အချိန်နဲ့ တပြေးညီ သိရှိနိုင်ဖို့ အင်တာပိုလ်(Interpol)၊ အာဆီယံနာပိုလ်(Aseanapol)အပါအ၀င် နိုင်ငံတကာအဖွဲ့အစည်းတွေ၊ မိတ်ဘက်အဖွဲ့အစည်းတွေနဲ့ ချိတ်ဆက် သတင်းဖလှယ်တာ၊ နိုင်ငံတကာ အကြမ်းဖက်မှုတွေနဲ့ ပတ်သက်ပြီး အင်တာနက်သတင်းတွေ၊ သတင်းဌာနတွေရဲ့ အသံလွှင့်ချက်တွေကတဆင့် သတင်းစုဆောင်းတာ၊ Open Sources Media တွေက အကြမ်းဖက်မှုဖြစ်စဉ်နဲ့ ပတ်သက်တဲ့ သတင်း စုဆောင်းတာတွေကို ပြုလုပ်ပြီး ကြိုတင်ကာကွယ်ရေး အစီအမံတွေကို စိစစ်သုံးသပ် ဆောင်ရွက်နေပါတယ်” လို့လည်း ဗိုလ်မှူးချုပ် ကျော်ဇံမြင့်က ဆက်ပြောပါတယ်။
အကြမ်းဖက်တာတွေကို အချိန်နဲ့ တပြေးညီတုန့်ပြန်နိုင်ဖို့အတွက် တိုင်းနဲ့ပြည်နယ်တွေကို အွန်လိုင်းချိတ်ဆက် ထားတဲ့ ယူရို ၁၀ သန်းတန် သတင်းနည်းပညာသုံး အထောက်အကူပြုပစ္စည်းတွေကို တပ်ဆင်အသုံးပြုနေ တယ်လို့လည်း သူက ပြောပါတယ်။
No comments:
Post a Comment