မင်းမင်း
ဖားကန့်ဒေသတွင် မြေစာပုံပြိုကျမှုကြောင့် ပြည်သူများ သေဆုံးနေရခြင်းနှင့် စက်ယန္တယားကြီးများဖြင့် သယံဇာတများ တူးဖော်နေမှုအပေါ် ဖြေရှင်းရန် စီစဉ်ထားသော အစိုးရ၏ နည်းလမ်းများမှာ စနစ်မကျဘဲ တိကျသည့်အဖြေ မဟုတ်ဟု လွှတ်တော်အမတ်များက ဝေဖန်ခဲ့ကြသလို လွှတ်တော်နာယက သူရဦးရွှေမန်းကလည်း အဆိုပါ နည်းလမ်းအား လက်မခံခဲ့ပေ။
ဒီဇင်ဘာ ၂၈ရက် ပြည်ထောင်စုလွှတ်တော်အစည်းအဝေးတွင် သတ္တုတွင်းဝန်ကြီးဌာန၊ ဒုဝန်ကြီး ဦးသန်းထွန်းအောင် လွှတ်တော်သို့ တင်ပြလာသော လုံခင်း၊ ဖားကန့်ရတနာနယ်မြေတွင် ကျောက်စိမ်းတူးဖော်ခြင်း လုပ်ငန်း လုံးဝရပ်နားခြင်း (သို့မဟုတ်) ထိုဒေသအား ပုဒ်မ ၁၄၄ထုတ်ပြန်ကာ ရဲတပ်ဖွဲ့ဖြင့် ထိန်းသိမ်းခြင်း (သို့မဟုတ်) စစ်အုပ်ချုပ်ရေးအမိန့်ထုတ်ပြန်ခြင်းဟူသည့် ဖြေရှင်းရန် နည်းလမ်းများကို လွှတ်တော်က လက်မခံခဲ့ခြင်း ဖြစ်သည်။
ဒုဝန်ကြီး၏ တင်ပြချက်အပေါ် ပြည်ထောင်စုလွှတ်တော်နာယက သူရဦးရွှေမန်းက "ဒုဝန်ကြီး တင်ပြသွားတာ ကောင်းပါတယ်၊ ပြည့်စုံပါတယ်။ သို့ရာတွင် မကောင်းတာတွေလည်း ပါပါတယ်။ ဒါတွေ သတိပြုပြီး ဆင်ခြင်ဖို့ လိုပါတယ်" ဟုဆိုကာ "ဘက်ပေါင်းစုံက ပြန်လည်သုံးသပ်ပြီးတော့ အလေးအနက်ထား ဆောင်ရွက်သွားရန် လိုအပ်ပါတယ်" ဟု ဆုံးဖြတ်ခဲ့သည်။
ထို့ပြင် ဒုဝန်ကြီး တင်ပြလာသည့် ဖြေရှေင်းရန်နည်းလမ်းများကို လွှတ်တော်အမတ်များကလည်း ဝိုင်းဝန်းကန့်ကွက်ခဲ့ရာ လွှတ်တော်က အတည်မပြုဘဲ မှတ်တမ်းအဖြစ်သာ ထားရှိခဲ့သည်။ ဒုဝန်ကြီးတင်ပြသကဲ့သို့ ဖားကန့်ဒေသရှိ ကျောက်စိမ်းတူးဖော်ရေးလုပ်ငန်းများကို အပြီးသတ်ရပ်နားကာ ပုဒ်မ ၁၄၄နှင့် စစ်အုပ်ချုပ်ရေးအမိန့်များ ထုတ်ပြန်ကာ တရားဥပဒေစိုးမိုးရေးအတွက် ကြိုးပမ်းမည့်အစား ဒေသခံပြည်သူများ၏ အကျိုး၊ သယံဇာတများကိုပိုင်ဆိုင်သည့် တိုင်းရင်းသားများ၏ အကျိုးနှင့် နိုင်ငံအတွက် အကျိုးရှိအောင် လုပ်ဆာင်ပေးသင့်သည်ဟု အမျိုးသားဒီမိုကရေစီအဖွဲ့ချုပ်မှ အမျိုးသားလွှတ်တော်၏ဥပဒေကြမ်းကော်မတီ အတွင်းရေးမှူးဖြစ်သူ ဒေါက်တာမြတ်ဥာဏစိုးက လွှတ်တော်တွင် ပြောသည်။ "ဒုဝန်ကြီးတင်ပြသွားတဲ့ သုံးချက်ထဲမှာ လုံလောက်တဲ့ အဖြေမပါဘူး" ဟု ဒေါက်တာမြတ်ဥာဏစိုး က ဝေဖန်သည်။
ဒုဝန်ကြီး၏ တင်ပြချက်အပေါ် ပြည်သူ့လွှတ်တော်အမတ် ဦးခိုင်မောင်ရည်ကမူ "ထမင်းရည်ပူလျှာလွှဲ ပြောဖို့ မသင့်ပါဘူး" ဟု လွှတ်တော်တွင် ဝေဖန်သည်။ ဒုဝန်ကြီး လွှတ်တော်သို့တင်ပြလာသည့် ဖြေရှင်းမည့်နည်းလမ်းများမှာ အုပ်ချုပ်ရေးဆိုင်ရာ နည်းလမ်းများ ပါဝင်နေသောကြောင့် ငြိမ်းချမ်းရေးရရှိရန် အဓိကလိုအပ်နေသည်ဟု ကချင်ပြည်နယ်၊ အင်ဂျန်းယန်မဲဆန္ဒနယ်မှ ဒေါ်ဒွဲဘူကလည်း ဆွေးနွေးသည်။
"ဖြေရှင်းမယ့် နည်းလမ်း(၃)သွယ်မှာဆိုရင် ပထမဦးဆုံး ဖွဲ့စည်းပုံကိုလည်း ပြင်ရပါမယ်။ ဒေသခံတွေ လုပ်နိုင်၊ ကိုင်နိုင်အောင် ဆောင်ရွက်ဖို့ လိုပါတယ်။ နောက်တစ်ခုက ငြိမ်းချမ်းရေးရှိဖို့လည်း လိုပါတယ်။ ဒီဒေသဟာဆိုရင် မငြိမ်းချမ်းတဲ့အတွက် တရားဥပဒေ မစိုးမိုးတာ ဖြစ်ပါတယ်။ အဲ့တော့ ငြိမ်းချမ်းရေးမရဘဲနဲ့တော့ တရားဥပဒေစိုးမိုးရေး လုပ်ငန်းကို ဘယ်လိုမှ ဆောင်ရွက်လို့ ရမှာမဟုတ်ပါဘူး။ အဲ့တော့ ဖြေရှင်းရမယ့် နည်းလမ်းထဲမှာ ပထမဦးဆုံးက ငြိမ်းချမ်းရေးရဖို့ လိုပါတယ်" ဟု ဒေါ်ဒွဲဘူက ဆိုသည်။ ဖားကန့်ဒေသတွင် မြေစာပုံပြိုကျမှုများကြောင့် ပြည်သူများ သေဆုံးနေမှုအပေါ် လွှတ်တော်သို့ ဒုဝန်ကြီး လာရောက်ရှင်းလင်းခြင်းမှာ ယင်းကိစ္စအပေါ် အမြန်ဆုံးရှင်းလင်းပေးရန် ပြည်ထောင်စုလွှတ်တော်နာယက သူရဦးရွှေမန်းက သမ္မတဦးသိန်းစိန်ထံ ဒီဇင်ဘာ ၂၁ရက်က သ၀ဏ်လွှာပေးပို့ထားမှုကြောင့် ဖြစ်သည်။
“ကချင်ပြည်နယ်၊ ဖားကန့်ဒေသတွင် မြေစာတောင်ပြိုကျမှုများကြောင့် ပြည်သူများ၏ အသက်အိုးအိမ်စည်းစိမ်များ မကြာခန ဆုံးရှုံးမှု ဖြစ်ပေါ်နေခြင်း၊ ဖားကန့်ဒေသသို့ ရောက်ရှိနေသော စွမ်းအားကြီးမားသည့် မြေသယ်ယာဉ်ကြီးများ ရောက်ရှိနေခြင်းနှင့် သဘာဝသယံဇာတများ ထုတ်လုပ်နေခြင်းတို့အပေါ် ပြည်သူတို့၏ စိုးရိမ်ပူပန်မှုများကို အမြန်ဆုံးရှင်းလင်းဖြေကြားပေးရန်” ဟု သမ္မတဦးသိန်းစိန်ထံ သူရဦးရွှေမန်းက သ၀ဏ်လွှာပေးပို့ခဲ့ခြင်း ဖြစ်သည်။ ဖားကန့်ဒေသတွင် ၂၀၁၅ ခုနှစ်အတွင်းမှာပင် မြေစာပုံပြိုကျမှု အနည်းဆုံး ၃၇ကြိမ်ရှိခဲ့သည်ဟု ကချင်ပြည်နယ်မှ အမျိုးသားလွှတ်တော်အမတ်တစ်ဦးက လွန်ခဲ့သည့် ရက်သတ္တပတ်အတွင်း ပြောဆိုထားပြီး မြေစာပုံပြိုကျမှုကြောင်း လူပေါင်း ရာဂဏန်းထိ သေဆုံးခဲ့ရသည်။
No comments:
Post a Comment