ကော့ကရိတ်ခရိုင်၊ ကော့ကရိတ်မြို့နယ်ရှိ တောင်ကြာအင်းကျေးရွာနှင့် မြောက်ကြာအင်းကျေးရွာသွား ဟောင်သရော မြစ်ကူးတံ တားကို ၂၀၁၆ ဇန်နဝါရီလ ၁၄ရက်နေ့တွင် ဖွင့်လှစ်သွားမည်ဖြစ်ရာ ဒေသခံများလွယ်ကူစွာ ဖြတ်သန်းသွားလာခွင့် ရရှိတော့မည် ဖြစ်ကြောင်း တံတားဆောက်လုပ်ရေးတွင် ပါဝင်သည့် အငယ်တန်းအင်ဂျင်နီယာတစ်ဦးက ပြောသည်။
SAE အငယ်တန်းအင်ဂျင်နီယာ ကိုထွန်းထွန်းခိုင်က “ကျနော်ကတော့ ဒီတံတားလုပ်ငန်းမှာ တံတားသံဘောင်တပ်ဆင်ခြင်း လုပ် ငန်းကို တာဝန်ယူလုပ်ဆောင်ပေးတဲ့ အပိုင်းက ပါဝင်ရပါတယ်။ အခုတော့ အချောသတ်လုပ်ငန်း လုပ်ဆောင်နေပြီ ဒီတံတား ကြောင့် ဒေသခံတွေ မြစ်ကူး၊ ချောင်းကူး သွားလာရတဲ့ဒုက္ခတွေ လွန်ကင်းတော့မှာမို့ ကျနော့်အနေနဲ့ ဝမ်းသာပီတိဖြစ်ရပါတယ်” ဟု ပြောသည်။
၂၀၁၃ – ၂၀၁၄ ဘဏ္ဍာနှစ်၊ ၂၀၁၃ခုနှစ် မေလ ၁ရက်နေ့မှ စတင်တည်ဆောက်ခဲ့သည့် အဆိုပါတံတားနှင့်လမ်းပိုင်းအနက် တံတားတည်ဆောက်မှုအပိုင်းမှာ ယခုအခါ ၉၅ရာခိုင်နှုန်းခန့် ပြီးစီးနေပြီဖြစ်ပြီး မကြာမှီဖွင့်လှစ်နိုင်ရန် အပြီးသတ်လုပ်ငန်းများ လုပ်ဆောင်နေကြောင်းလည်း ၎င်းက ပြောသည်။
အဆိုပါဟောင်သရောတံတားမှာ အရှည်ပေ ၉၂၀ရှိပြီး ကော့ကရိတ်မှ ကြာအင်းဆိပ်ကြီးမြို့နယ်သို့ ၃၅မိုင် ၅ဖာလုံ ရှည်လမ်းနှင့် မော်လမြိုင် မုဒုံမြို့သို့ ၅၉မိုင်အထိ ကျေးရွာ၊ မြို့နယ်နှင့် ပြည်နယ်တွင်း ချိတ်ဆက်ဖောက်လုပ်နေသော အဓိကလမ်းမကြီးပေါ်ရှိ မြစ်ကူးတံတားကြီးဖြစ်သည်။
ယခင် ဒေသမငြိမ်းချမ်းချိန်ကာလက တောင်ကြာအင်း/မြောက်ကြာအင်း ကျေးရွာအုပ်စုများရှိ ဒေသခံများမှာ မြစ်ရေကျချိန် နွေအခါတွင်ဟောင်သရောမြစ်အတွင်း ယာယီ တံတားထိုးကာ သွားလာခဲ့ရသလို မိုးတွင်း၌ စက်လှေများ၊ ဒေသလုပ် တိုင်ကီ ဖောင်များဖြင့် ကူးတို့ကူးကာ သွားလာခဲ့ကြရသည်။
No comments:
Post a Comment