မင်းမင်း
ဌာနပေါင်း ၂၁ခုဖြင့် ဖွဲ့စည်းထားသော ပြည်ထောင်စုဝန်ကြီးဌာနများ၏ ဖွဲ့စည်းပုံပြင်ဆင်ရေးဆွဲရေးနှင့်ပတ်သက်ပြီး ဧပြီလ ၂၁ရက်၊ နံနက်ပိုင်းတွင် ပြည်ထောင်စုဝန်ကြီးများက ညှိနှိုင်းအစည်းအဝေးတစ်ရပ် ပြုလုပ်သွားမည်ဖြစ်သည်။ သမ္မတရုံးဝန်ကြီး ဒေါ်အောင်ဆန်းစုကြည် ဦးဆောင်ကာ ကျင်းပပြုလုပ်မည့် အဆိုပါ ညှိနိုင်းအစည်းအဝေးကို သမ္မတအိမ်တော် Bဆောင်ရှိ သမ္မတရုံးဝန်ကြီး အစည်းအဝေးခန်းမတွင် နံနက် ၁၀နာရီအချိန် စတင်မည်ဖြစ်သည်။
အဆိုပါ ညှိနှိုင်းအစည်းအဝေးနှင့်ပတ်သက်ပြီး သမ္မတရုံးဝန်ကြီးဌာန၏ ပြောခွင့်ရသူ ဦးဇော်ဌေးက “ဝန်ကြီးဌာနတွေရဲ့ ဖွဲ့စည်းပုံပေါ့။ ဥပမာ - ဝန်ကြီးဌာနတွေရဲ့ ဖွဲ့စည်းပုံကို ပေါင်းလိုက်တယ်ဗျာ။ နောက်တစ်ခါ တိုင်းရင်းသားရေးရာဝန်ကြီးဆိုတာက အသစ်ဆိုတော့ ဘယ်လိုဖွဲ့စည်းမလဲဆိုတာလုပ်တဲ့ အစည်းအဝေးပါ” ဟု မဇ္ဈိမကို ပြောသည်။ သို့သော် ယင်းအစည်းအဝေးတွင် ပုဂ္ဂလိက သတင်းမီဒီယာများ သတင်းယူခွင့် ရရှိမည်မဟုတ်ပေ။ “ဒါက internal အစည်းအဝေးဖြစ်တဲ့ Bဆောင်မှာလုပ်တဲ့ အစည်းအဝေးဖြစ်လို့ သတင်းယူလို့ မရပါဘူး” ဟု ဦးဇော်ဌေးက ဆိုသည်။
ယခုလဆန်းတွင် စတင်တာဝန်ယူထားသော NLDဦးဆောင်သည့် အစိုးရအနေဖြင့် သမ္မတဦးသိန်းစိန်အစိုးရလက်ထက်က ဖွဲ့စည်းထားသော ဝန်ကြီးဌာနများအား အချို့ကို ဖျက်သိမ်းလိုက်သလို အချို့ဝန်ကြီးဌာနများကို ပေါင်းစပ်ကာ ဝန်ကြီးဌာနပေါင်း ၂၁ခု၊ ဝန်ကြီးဦးရေ ၂၀ဦးဖြင့် ဖွဲ့စည်းထားခြင်း ဖြစ်သည်။ အသစ်ဖွဲ့စည်းလိုက်သည့် “တိုင်းရင်းသားရေးရာဝန်ကြီးဌာန” ကိုမူ မွန်တိုင်းရင်းသား နိုင်သက်လွင် ကို တာဝန်ပေးအပ်ထားသည်။ -
No comments:
Post a Comment