စည်သူမောင်မောင်
တစ်နိုင်ငံလုံးရှိ ကျောင်းပေါင်း ၃၃၁၁ ကျောင်းကို ကျောင်းဖွင့်ချိန်အမှီ အဆင့်တိုးမြင့်သတ်မှတ်ရန် ခွင့်ပြုထားပြီးဖြစ်ကြောင်း ပညာရေးဝန်ကြီး ဒေါက်တာမျိုးသိမ်းကြီးက ပြောသည်။ "အထူးသဖြင့်ကျေးလက်နဲ့ ဝေးလံဒေသတွေကို ဖြေလျော့ဆောင်ရွက်ပေးခဲ့တာ။"ဟု ပြည်ထောင်စုဝန်ကြီးက ပြောသည်။ ကျောင်းအဆင့်တိုးမြင့်သတ်မှတ်ရာတွင် မူလတန်းလွန်၊ အလယ်တန်းကျောင်းခွဲ၊ အထက်တန်းကျောင်းခွဲများကို ဖြေလျော့လုပ်ဆောင်ပေးထားပြီး ပတ်ကားအလယ်တန်းကျောင်းများ နှင့် အထက်တန်းကျောင်းများကို မူနှင့် ကိုက်ညီမှသာ ခွင့်ပြုပေးမည်ဟု ၎င်းက ပြောသည်။
ကျောင်းများကို အဆင့်တိုးမြင့် သတ်မှတ်သည် ဆိုရာ၌ မူလတန်းလွန်ကျောင်းတွင် ဆဋ္ဌမတန်းအထိ ပညာသင်ကြားနိုင်ခြင်း၊ အလယ်တန်းကျောင်းခွဲတွင် အဋ္ဌမတန်းအထိ ပညာသင်ကြားနိုင်ခြင်း နှင့် အထက်တန်းကျောင်းခွဲတွင် ဒသမတန်းအထိ ပညာသင်ကြားနိုင်ခြင်းကို ဆိုလိုသည်။ ဧရာဝတီတိုင်းဒေသကြီးအတွက် အထက်တန်းကျောင်း ၁၀ကျောင်း၊ အထက်တန်းကျောင်းခွဲ ၃၃ကျောင်း၊အလယ်တန်းကျောင်း ၄ကျောင်း၊ အလယ်တန်းကျောင်းခွဲ ၁၃၁ကျောင်း၊ မူလတန်းကျောင်း ၁၂၇ကျောင်း၊အမကကျောင်း၁၂ကျောင်းနှင့် အ.မ.ကကျောင်းခွဲ ၄၃ ကျောင်းကို အဆင့်တိုးမြှင့် သတ်မှတ်ရန် စီစဉ်ဆောင်ရွက်နေကြောင်း သိရသည်။
ကျောင်းများကို အဆင့်တိုးမြှင့် သတ်မှတ်ပေးမှုမှာ စစ်ကိုင်းတိုင်းက အများဆုံးဖြစ်ပြီး မကွေးတိုင်းက ဒုတိယအများဆုံးဖြစ်ကြောင်း နှင့် ဧရာဝတီတိုင်းမှာ ၁၀ ရာခိုင်နှုန်းကျော် ရှိကြောင်း ပညာရေးဝန်ကြီး ဒေါက်တာမျိုးသိမ်းကြီးက ပြောသည်။ မေလ ၂၁ရက်က ပုသိမ်မြို့ ပညာရေးမှူးများ၊ ကျောင်းအုပ်များ၊ မိဘဆရာအသင်းဝင်များနှင့် တွေ့ဆုံပွဲတွင် ကျောင်းဆရာ၊ ဆရာမများ လစာငွေမဖြတ်ရန်နှင့် တာဝန်ရှိသူများမှ ကြီးကြပ်ဆောင်ရွက်ရန် ဝန်ကြီးက တိုက်တွန်းပြောကြားခဲ့သည်။ ပြည်ထောင်စုဝန်ကြီးနှင့် တွေ့ဆုံပွဲအား မေလ၂၁ရက်က ပုသိမ်မြို့၊ အ.ထ.က၁ ရတနာတန်ဆောင်ခန်းမတွင် ပြုလုပ်ခဲ့ပြီး တိုင်း၊ခရိုင်၊မြို့နှင့်ကျောင်းအုပ်များ၊ မိဘဆရာအသင်းဝင်များ တက်ရောက်ခဲ့သည်။
No comments:
Post a Comment