လူမှုကွန်ရက် စာမျက်နှာ ဖေ့စ်ဘုတ်တွင် ဒေါ်အောင်ဆန်းစုကြည်ကို ရိုင်းစိုင်းစွာ ပြောဆိုသည်ဟု ဆိုကာ ဆက်သွယ်ရေး ဥပဒေ ပုဒ်မ ၆၆(ဃ)ဖြင့် အမှုဖွင့်ခံထားရသူ မစန္ဒီမြင့်အောင် နှင့် တရားလို မလင်းလဲ့လဲ့လှိုင် တို့ကို စစ်ချက် ရယူနေဆဲ ဖြစ်ကြောင်း ပဲခူးမြို့ အမှတ် ၂ ရဲစခန်းက သတင်းရရှိသည်။
အမှုစစ် ဒုရဲအုပ် သန်းထွန်းက “ကျနော်တို့ သက်သေတွေခေါ်ပြီး နှစ်ဖက် စစ်ချက်ယူတယ်၊ သက်သေမခိုင်သေးလို့ ဖမ်းဆီး လို့ မရသေးဘူး၊ CID က အကြောင်းပြန်လာတဲ့ အပေါ် မူတည်ပြီး ဆက်လုပ်သွားမှာပါ”ဟု ဧရာဝတီ သို့ ပြောသည်။
လက်ရှိတွင် မစန္ဒီမြင့်အောင် သုံးစွဲခဲ့သည့် လက်ကိုင်ဖုန်းနှင့် Facebook အကောင့်တို့အား ရဲစခန်းက သိမ်းယူထားပြီး မှုခင်း တပ်ဖွဲ့ (CID) ထံ ပေးပို့မည်ဖြစ်ကြောင်း သိရသည်။
မစန္ဒီမြင့်အောင်သည် ဒေါ်အောင်ဆန်းစုကြည်ကို လူမှုကွန်ရက် စာမျက်နှာမှတဆင့် ရိုင်းစိုင်းစွာ ပြောဆိုသည်ဟုဆိုကာ ပဲခူးမြို့တွင်နေထိုင်သူ မလင်းလဲ့လဲ့လှိုင်က တရားလိုပြုလုပ်၍ အောက်တိုဘာ ၂၈ ရက်နေ့က ပဲခူးမြို့အမှတ် ၂ ရဲစခန်း တွင် အမှုဖွင့် တိုင်ကြားခဲ့ခြင်း ဖြစ်သည်။
ထို့နောက် ရဲစခန်းက တရားလို နှင့် အမှုဖွင့် ခံရသူ ၂ ဦးစလုံးကို သီးခြားစီ ခေါ်ယူပြီး စစ်ချက်ယူနေခြင်း ဖြစ်ကြောင်း သိရ သည်။
တရားလို မလင်းလဲ့လဲ့လှိုင်၏ ဖခင်ဖြစ်သူ ဦးဌေးနိုင်က “သမီးက ဒေါ်အောင်ဆန်းစုကြည်အပေါ် ဖေ့စ်ဘုတ် မှာ ရိုင်းစိုင်းစွာ ပြောဆို နေတာတွေကို မခံနိုင်လို့ တိုင်ကြားခဲ့တာပါ၊ သက်သေ အထောက်အထား အနေနဲ့လည်း ဓာတ်ပုံ ၁၈ ပုံကို ရဲ ထံ ပေးထား ပါတယ်”ဟု ပြောသည်။
အမှုဖွင့်တိုင်ကြားခံရမှုနှင့် ပတ်သက်၍ ကိုယ်တိုင် ရဲစခန်းတွင် ၂ ကြိမ်ထွက်ဆိုချက် ပေးခဲ့ကြောင်း၊ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် ၏ ပြောဆိုချက်ဖြစ်သည့် လွတ်လပ်စွာ ပြောဆိုခွင့် အတိုင်း ပြောဆို ဝေဖန်ခဲ့ခြင်း ဖြစ်ကြောင်း မစန္ဒီမြင့်အောင် က ပြောဆိုသည်။
မစန္ဒီမြင့်အောင် က “နိုင်ငံတော်အတိုင်ပင်ခံကို ကျမအနေနဲ့ ဖေ့စ်ဘုတ်မှာ ပို့စ်တင်ပြီး ရိုင်းရိုင်းစိုင်းစိုင်း ဆဲဆိုခဲ့တာ မရှိ ပါ ဘူး၊ Comments တွေမှာ ကျမကို တိုက်ခိုက်လာတာတွေ ရှိရင်တော့ ပြန်လည်တုံ့ပြန် ပြောဆိုခဲ့တာတွေ ရှိပါတယ်၊ အမှု ဖွင့်ခံရတဲ့အပေါ် အမှား မလုပ်ထားတဲ့အတွက် ကြောက်တာမျိုး၊ နောင်တ ရတာမျိုး မရှိပါဘူး”ဟု ဧရာဝတီသို့ ပြောသည်။
အမှုဖွင့်ခံထားရသည့် မစန္ဒီမြင့်အောင်သည် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) ပါတီကို အားပေး ထောက်ခံသူဖြစ်ပြီး ပဲခူးတက္ကသိုလ်တွင် ပထဝီ ဘာသာရပ်ဖြင့် ပထမနှစ် စာမေးပွဲ ဖြေဆိုထားသူ ဖြစ်ကြောင်း သိရသည်။
ပဲခူးအမှတ် ၂ ရဲစခန်းက အမှုနှင့်ပတ်သက်၍ ခေါ်ယူစစ်ဆေးချိန်တွင် တိုင်ကြားခံရသူ မစန္ဒီမြင့်အောင်ကို USDP ပါတီဝင် များက လာရောက် အားပေးထောက်ခံခဲ့ကာ တိုင်ကြားသူ မလင်းလဲ့လဲ့လှိုင် အား အမျိုးသား ဒီမိုကရေစီ အဖွဲ့ချုပ် (NLD) ပါတီဝင်များနှင့် လွှတ်တော် ကိုယ်စားလှယ်များက လာရောက် အားပေးခဲ့သည်။
ထို့နည်းတူ ဦးနေမျိုးကျော် ဆိုသူက ဇော်ဇော်(ခ) ငဖာ ဆိုသူကို ဒေါ်အောင်ဆန်းစုကြည်အား လူမှုကွန်ရက် စာမျက်မှာတွင် ပုတ်ခတ် ပြောဆိုမှုများ ပြုလုပ်ခဲ့သည်ဟု ဆိုကာ မကြာသေးခင်က ရန်ကုန်တိုင်း မြောက်ဒဂုံ ရဲစခန်းတွင် ဆက်သွယ်ရေး ဥပဒေ ပုဒ်မ ၆၆(ဃ) ဖြင့် အမှုဖွင့်ခဲ့ပြီး ရုံးတင် တရားစွဲမှု တခုလည်း ဖြစ်ပွားနေသည်။
No comments:
Post a Comment