မဇ္ဈိမ
မွတ်စလင်များအပေါ် အခွင့်အရေးအလွဲသုံးစား လုပ်ခြင်းနှင့် နေအိမ်ပိုင်ဆိုင်မှုများ ဖျက်ဆီးခြင်း သတင်းများ ပျံ့နေခြင်းနှင့် ပတ်သက်ပြီး ရခိုင်ပြည်နယ်တွင် လူအခွင့်အရေးစောင့်ကြည့်သူများနှင့် လွတ်လပ်သော ဂျာနယ်လစ်များကို မြန်မာအစိုးရအနေဖြင့် ခွင့်ပြုပေးသင့်ကြောင်း လူ့အခွင့်အရေးစောင့်ကြည့်ရေးအဖွဲ့က ထုတ်ပြန်လိုက်သည်။
နိုဝင်ဘာ ၁၃ ရက်က မောင်တောခရိုင်ရှိ မွတ်စလင်ရွာသုံးရွာတွင် အိမ်ခြေပေါင်း ၄၃၀ ဖျက်ဆီးခံရကြောင်း ဂြိုဟ်တုဓာတ်ပုံများ အားကိုးဖြင့် လူ့အခွင့်အရေးစောင့်ကြည့်ရေးအဖွဲ့က အစီရင်ခံစာထုတ်ပြန်ခဲ့သည်ကို တုံ့ပြန်သည့် သတင်းစာရှင်းလင်းပွဲအား နိုင်ငံတော်အတိုင်ပင်ရုံးက နိုဝင်ဘာ ၁၆ ရက်တွင် ပြုလုပ်ခဲ့သည်။
သတင်းစာရှင်းလင်းပွဲတွင် သမ္မတရုံး ဒုတိယညွန်ကြားရေးမှူးချုပ် ဦးဇော်ဌေးက အဆိုပါ ကျေးရွာသုံးရွာတွင် အိမ်ခြေများ မီးရှို့ခံရကြောင်း၊ သို့သော် နိုဝင်ဘာ ၁၅ ရက်က စစ်ရဟတ်ယာဉ်ဖြင့် ရိုက်ယူထားသည့် ပုံများအရ အရေအတွက်က ထိုမျှမရှိကြောင်း ဆိုသည်။ ဖြစ်ပွားရာနယ်မြေဒေသများသို့ နိုင်ငံပိုင်မဟုတ်သည့် မီဒီယာများကို တားမြစ်ထားခြင်းအား အစိုးရက ပြန်လည်ရုပ်သိမ်းမည်ဖြစ်ကြောင်း ဦးဇော်ဌေးက ပြောသော်လည်း မည်သည့်အချိန်တွင် မီဒီယာများအား ပြန်လည်သွားရောက်ခွင့် ပြုမည်ကိုမူ အချိန်အတိအကျ ပြောခြင်းမရှိပေ။
“အိမ်ခြေတွေ မီးလောင်တဲ့သတင်း မြန်မာအစိုးရက အတည်ပြုပါတယ်။ ပြီးတော့ အခြေအနေမှန်ကို သိရှိနိုင်ဖို့ မီဒီယာတွေကို ဝင်ခွင့်ပေးမယ်လို့လည်း ပြောပါတယ်။ ဒါပေမယ့် ဒါက အချိန်တောင် တော်တော်လေးနှောင်းနေပြီ။ လွတ်လပ်တဲ့ စုံစမ်းစစ်ဆေးမှုအတွက် မီဒီယာနဲ့ လူအခွင့်အရေးအဖွဲ့တွေကို ဝင်ခွင့်ပြုရမှာက တကယ့်ကို အရေးကြီးပါတယ်။”ဟု လူ့အခွင့်အရေးစောင့်ကြည့်ရေးအဖွဲ့မှ အာရှရေးရာဒါရိုက်တာဖြစ်သူ Brad Adams က တိုက်တွန်းလိုက်သည်။
အောက်တိုဘာ ၉ ရက်တွင် မောင်တောရှိ ကျေးရွာသုံးရွာ တိုက်ခိုက်ခံရ၍ ရဲ ကိုးဦး ကျဆုံးခဲ့ရပြီးနောက်ပိုင်း စစ်တပ်က ယင်းနယ်မြေကို တားမြစ်ကာ လူသားချင်းစာနာထောက်ထားရေး အကူအညီအဖွဲ့များ၊ လွတ်လပ်သောမီဒီယာနှင့် အခွင့်အရေးစောင့်ကြည့်သူများအား ဝင်ခွင့်တားမြစ်ထားခြင်းဖြစ်သည်။
အောက်တိုဘာ ၂၂ ရက်၊ နိုဝင်ဘာ ၃ ရက်နှင့် နိုဝင်ဘာ ၁၀ ရက်နေ့များက အရည်အသွေးမြင့်ဂြိုဟ်တုပုံရိပ်အရ ပြောင်ပိုက်ကျေးရွာတွင် အဆောက်အအုံ ၈၅ လုံး၊ ကြက်ရိုးပြင်ကျေးရွာတွင် ၂၄၅ လုံးနှင့် ဝါးပိတ်ကျေးရွာတွင် အလုံး ၁၀၀ ပျက်စီးကြောင်း လူ့အခွင့်အရေးစောင့်ကြည့်ရေးအဖွဲ့က အကဲဖြတ်များက မှတ်တမ်းတင်ခဲ့ကြောင်း၊ ပျက်စီးမှုပုံစံအရ မီးလောင်ခြင်း ခံရခြင်းဖြစ်ကြောင်း လူ့အခွင့်အရေးစောင့်ကြည့်ရေးအဖွဲ့က ထုတ်ပြန်ထားသည်။
စစ်တပ်၏ True News Information Team က နိုဝင်ဘာ ၁၅ ရက်တွင် ထုတ်ပြန်ရာ၌ အကြမ်းဖက်တိုက်ခိုက်ရေးသမားများက အဆောက်အအုံများကို မီးရှို့ခြင်းဖြစ်ကြောင်း ဖော်ပြသည်။ ဦးဇော်ဌေးကလည်း စစ်တပ်၏ နယ်မြေရှင်းလင်းရေးစစ်ဆင်ရေးများအတွင်း မွတ်စလင်အမျိုးသမီးများနှင့် မိန်းကလေးများအား အဓမ္မပြုကျင့်သည်ဆိုသော စွပ်စွဲချက်များကို ငြင်းဆန်သည်။
“ရဟတ်ယာဉ်ပေါ်က ရိုက်ယူတဲ့ ပုံက တိုက်ရိုက်ရှုထောင့်က မဟုတ်တော့ အပျက်အစီး တွေ့ရှိရမှုမှာ အပြစ်အနာအဆာရှိပြီး လုံလောက်မှုလည်း မရှိပါတယ်။ တိုက်ခိုက်မှု မဖြစ်ခင်နဲ့ ဖြစ်ပြီး စုယူထားတဲ့ အလွန်ပုံထွက်ကောင်းတဲ့ ဂြိုဟ်တုဓာတ်ပုံတွေကပဲ ပျက်စီးဆုံးရှုံးမှုကို ပိုပြီး မှန်မှန်ကန်ကန် တိတိကျကျ ဖော်ပြနိုင်ပါတယ်။ ဒါပေမယ့်လည်း ခုလိုမျိုး သတင်းအချက်အလက် အကန့်အသတ်ရှိနေတာက လူ့အခွင့်အရေးအဖွဲ့တွေနဲ့ မီဒီယာတွေရဲ့ ဘက်မလိုက်တဲ့ စုံစမ်းစစ်ဆေးမှုတွေအတွက် လွတ်လွတ်လပ်လပ်ဝင်ခွင့်ပေးဖို့ အရေးတကြီးလိုအပ်နေတာကို ပြနေတာပါပဲ။”ဟု Adam က ပြောသည်။
နေအိမ်များ မီးလောင်ပျက်စီးခဲ့သည့် အခြေအနေများအပေါ် HRW ၏ ထုတ်ပြန်ချက်သည် မြေပြင်အခြေအနေနှင့် ကွဲလွဲပြီး မှန်ကန်မှုမရှိဟု နိုင်ငံတော်အတိုင်ပင်ခံရုံး သတင်းထုတ်ပြန်ရေးကော်မတီ အတွင်းရေးမှူး ဦးဇော်ဌေးက နိုဝင်ဘာ ၁၆ရက်၊ ညနေပိုင်းတွင်ပြုလုပ်သည့် သတင်းစာရှင်းလင်းပွဲတွင် ပြောကြားထားသည်။
ယင်းအပြင် မောင်တောနယ်မြေအတွင်း အကြမ်းဖက်လှုပ်ရှားနေသော ဘင်္ဂါလီအကြမ်းဖက်သမားများအနေဖြင့် နယ်မြေရှင်းလင်းရေးဆောင်ရွက်နေသော လုံခြုံရေးတပ်ဖွဲ့များအပေါ် အထင်အမြင်လွဲမှားစေရေး၊ ကျေးရွာများအား မီးရှို့ဖျက်ဆီးလျက်ရှိကြောင်းနှင့် ထိုသို့ ဆောင်ရွက်ပြီးပါက အချို့သတင်းမီဒီယာများဖြင့် ချိတ်ဆက်၍ လိမ်လည် သတင်းဖြန့်ချိခြင်း၊ နိုင်ငံတကာမှ အထောက်အပံ့များရရှိအောင် လုပ်ကြံဖန်တီးခြင်းများ ပြုလုပ်လျက်ရှိသည်ဟု နိုင်ငံတော်အတိုင်ပင်ခံရုံး သတင်းထုတ်ပြန်ရေးကော်မတီက ထုတ်ပြန်ထားသည်။
ရခိုင်ကိစ္စနှင့် ပတ်သက်ပြီး သတင်းမှန်များ အချိန်နှင့် တပြေးညီထုတ်ပြန်နိုင်ရေးအတွက် နိုင်ငံတော်အတိုင်ပင်ခံရုံး သတင်းထုတ်ပြန်ရေးကော်မတီကို နိုဝင်ဘာ ၁၇ရက်က အဖွဲ့ဝင် ၇ဦးဖြင့် ဖွဲ့စည်းလိုက်သည်။
No comments:
Post a Comment