ဆလိုင်းဟံသာစန်း
နယူးဒေလီ (မဇ္ဈိမ)။ ။ တယ်လီဖုန်း ခေါ်ဆိုခကို လာမည့်နှစ်ဆန်း ၁ ရက်နေ့မှ စတင်ကာ တနိုင်ငံလုံးတွင် တိုးမြှင့် ကောက်ခံသွား မည်ဟု မြန်မာ့ ဆက်သွယ်ရေး လုပ်ငန်းက ယနေ့ ပြောသည်။
လက်ရှိ ဈေးနှုန်းသည် ကြိုးဖုန်းဆိုလျှင် မြို့တွင်း တမိနစ်ခေါ်ဆိုမှာ ၁၅ ကျပ်၊ နယ်ဝေးဆိုပါက တမိနစ်လျှင် ၂၅ ကျပ်နှင့် မိုဘိုင်းဖုန်းမှာ (မြို့တွင်း တမိနစ်) ၂၅ ကျပ်၊ နယ်ဝေး ၃၅ ကျပ်ဟု သတ်မှတ်ထားရာမှ အဆိုပါ ဖုန်းနှစ်မျိုးလုံး မြို့တွင်း (သို့မဟုတ်) နယ်ဝေး မည်သည့်နေရာသို့ ခေါ်ဆိုသည်ဖြစ်စေ တမိနစ်လျှင် ကျပ် ၅၀ သို့ တိုးမြှင့် ကောက်ခံသွားမည်ဟု ပြောဆိုခြင်းဖြစ်သည်။
“ဖုန်းခတွေ တိုးမြှင့် ကောက်ခံသွားမယ် ဆိုတာ ဟုတ်ပါတယ်။ မြို့တွင်း၊ နယ်ဝေး ဘယ်ကိုခေါ်ခေါ် တမိနစ်ကို ၅၀ (ကျပ်) ပါ။ ဒါနဲ့ ပတ်သက်ပြီး ဆက်သွယ်ရေး လုပ်ငန်းက ၁ ရက်၊ ၂ ရက်အတွင်း အားလုံးသိအောင် ထုတ်ပြန်ပေးသွားမှာပါ” ဟု ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာန လက်အောက်ရှိ မြန်မာ့ဆက်သွယ်ရေး လုပ်ငန်း (ငွေစာရင်း) ဌာနမှ တာဝန်ရှိသူတဦးက မဇ္ဈိမကို ပြောသည်။
ပြည်တွင်း ဖုန်းခေါ်ဆိုခများကို ယခုလို တိုးမြှင့် လိုက်သော်လည်း ပြည်ပသို့ ခေါ်ဆိုခများကိုမူ ပြောင်းလဲခြင်း မရှိဘဲ သက်ဆိုင်ရာ နိုင်ငံအလိုက် မူလသတ်မှတ်နှုန်းများအတိုင်း ဆက်လက်ထားရှိသွားမည်။
“အခုတောင် ဖုန်းဘီလ် (ကျသင့်ငွေ) က တလကို သောင်းဂဏန်း ရှိနေတာ။ တမိနစ် ၅၀ (ကျပ်) ဆိုရင်တော့ ပြဿနာပဲဗျာ။ ဘယ်တတ်နိုင်မလဲ၊ ဖုန်းကို လျှော့ပြောရတော့မှာပေါ့” ဟု ကျောက်တံတားမြို့နယ်မှ လက်ကိုင်ဖုန်း သုံးစွဲသူ တဦးက ပြောသည်။
ဖုန်းခေါ်ဆိုခများကို ယခုလို တိုးမြှင့်လိုက်သဖြင့် လမ်းဘေး ဖုန်းဆိုင်များတွင်ပါ ခေါ်ဆိုခနှုန်းများ ပိုမို မြင့်တက်လာဖွယ်ရှိကြောင်း ပဲခူးမြို့ခံတဦးက ပြောသည်။
“မြို့တွင်း တမိနစ် ၁၅ ကျပ်၊ နယ်ဝေး ၂၅ ကျပ်ဆိုတာက ရုံးမှာသွင်းရတဲ့ ဈေးနှုန်းပါ။ တကယ်က လမ်းဘေးဆိုင်တွေမှာ မြို့တွင်း ၅၀ (ကျပ်) ၊ နယ်ဝေး ၁၀၀ (ကျပ်)။ ဒီပုံဆိုရင်တော့ မြို့တွင်း ၁၀၀ (ကျပ်)၊ နယ်ဝေး ၁၅၀၊ ၂၀၀ တွေ ဖြစ်ကုန်တော့မှာပေါ့” ဟု ပြောသည်။
သူက ဆက်ပြီး “တကယ်ဆို အစိုးရက ပြည်သူတွေကို ငဲ့သင့်ပါတယ်။ ဒီလို ချက်ချင်းကြီး တက်သွားတာတော့ မကောင်းဘူးဗျာ။ အားလုံးက စီးပွားရေးတွေ ကြပ်တည်းနေကြတဲ့အချိန်မှာ ထပ်ဖိသလို ဖြစ်နေပြီ” ဟု ပြောသည်။
၂၀၀၃ ခုနှစ် ဇန်နဝါရီလ ၁ ရက်နေ့တွင်လည်း ကြိုးဖုန်းများ ပြည်တွင်းခေါ်ဆိုခကို တမိနစ်လျှင် ၃ ကျပ်မှ ၁၅ ကျပ်သို့ တိုးမြှင့်ခဲ့သေးသည်။
မြန်မာနိုင်ငံတွင် အသုံးပြုနေသည့် ကြိုးဖုန်းမှာ အလုံးရေ ၄ သိန်းခန့်ရှိကြောင်း ၂၀၀၆ ခုနှစ် အောက်တိုဘာတွင် ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာန ဝန်ကြီး ဗိုလ်မှူးချုပ်သိန်းဇော်က နေပြည်တော်၌ ကျင်းပသော အစည်းအဝေး တခုတွင် ထုတ်ဖော် ပြောဆိုခဲ့သည်။
မဇ္ဈိမ၏ သုတေသန မှတ်တမ်းတခုအရ မြန်မာ့ဆက်သွယ်ရေး လုပ်ငန်းသည် ၂၀၀၈ ခုနှစ်တွင် တယ်လီဖုန်း တပ်ဆင်မှုမှာ အလုံးရေ တသန်းနီးပါးအထိ ရှိလာကြောင်း သိရသည်။ လက်ရှိ အမျိုးအစားစုံ မိုဘိုင်းဖုန်း အသုံးပြုသူ အရေအတွက်မှာမူ ၅ သိန်းနီးပါး ရှိသည်။
၂၀၀၇ ခုနှစ်တွင် ထုတ်ပြန်သည့် ကုလသမဂ္ဂ လူကုန်ကူးမှု တိုက်ဖျက်ရေးအဖွဲ့ UNIAP အဆိုအရ မြန်မာနိုင်ငံရှိ လူဦးရေမှာ ၅၇ ဒဿမ ၅ သန်းရှိကြောင်းနှင့် ၇၀ ရာခိုင်နှုန်းမှာ ကျေးလက်နေ ပြည်သူများဖြစ်ကြောင်း သိရသည်။
No comments:
Post a Comment