မင်းအောင် (နိရဉ္စရာ) ရခိုင်ပြည်နယ် အတွင်းရှိ ပုဏ္ဏားကျွန်း-ကျောက်တော် ရထားလမ်းပိုင်းကို ဖေါက်လုပ် နေရာတွင် အလုပ်သမား တဦး ရေထဲလိမ့်ကျ သေဆုံးသွားကြောင်း သတင်းရရှိသည်။သေဆုံးသွားသူမှာ မူဆလင် အမျိုးသား မော်တူဆောင်း ဆိုသူဖြစ်သည်ဟု ရထားလမ်း ဖေါက်လုပ်ရာတွင် အလုပ် လုပ်ကိုင်နေသူ စာရေး တဦးက ပြောသည်။
"သေဆုံးသွားတဲ့သူကတော့ မူဆလင်အမျိုးသား တဦးပါ။ အဲဒီလူဟာ ပုဏ္ဍားကျွန်းမြို့နယ်ထဲက မိုရာနဲ့ ဒေးဝန်း အကြားက ရထား လမ်းကို ရေတိုက်စားရင် မပြိုပျက်ရအောင် ကာရံနေတဲ့ ကွန်ကရက်တိုင်ကြီးတွေကို စိုက်ထူ နေတဲ့ နေရာမှာ မောင်းတံပြုတ်ကျရာက သူ့ကို ရိုက်မိပြီး ရေထဲကို ပြုတ်ကျ သေဆုံးသွားတာ ဖြစ်ပါတယ်။"
သေဆုံးသူမှာ စစ်တွေမြို့နယ် ကသည်းရွာမှ ဖြစ်ပြီး ဇန္န၀ါရီလ ၁၈ ရက်နေ့က သေဆုံး သွားခြင်း ဖြစ်သည်။
သူ၏ အလောင်းကို သေဆုံးပြီး ၂ရက်အကြာ ဇန္န၀ါရီလ ၂၀ ရက်နေ့က ပြန်လည်တွေ့ရှိပြီး သက်ဆိုင်ရာမှ စစ်တွေဆေးရုံ ကြီးသို့ ပို့ဆောင် လိုက်သည်ဟု သိရသည်။
သေဆုံးသွားသူ အလုပ်သမား အတွက် ယခုအချိန်ထိ လျော်ကြေး တစုံတရာ ပေးခြင်းမရှိသေးဟု စုံစမ်း သိရှိရသည်။
ရခိုင်ပြည်နယ်တွင် စစ်တွေနှင့် အမ်း ရထားလမ်းကို ၂၀၀၉ ခုနှစ် ဖေဖေါ်ဝါရီလမှ စတင်ဖေါက်လုပ်ခဲ့ရာ ယခုအခါ စစ်တွေ-ပုဏ္ဏားကျွန်းလမ်းပိုင်း၊ ပုဏ္ဏားကျွန်း-ကျောက်တော်လမ်းပိုင်း၊ ကျောက်တော်-မြောက်ဦး-မင်းပြား လမ်းပိုင်းနှင့် မင်းပြား-အမ်း လမ်းပိုင်းဟူ၍ အပိုင်းလေးပိုင်း သတ်မှတ်ပြီး ဖေါက်လုပ် နေသည်။
No comments:
Post a Comment