ထိုင်းနိုင်ငံ မဟာချိုင်ဒေသရေလုပ်ငန်းများတွင် မြန်မာစစ်တပ်မှ တပ်ပြေး(၂ဝဝဝ)ကျော် ငါးဖမ်းလှေ လုပ်ငန်းများတွင်အလုပ်လုပ်နေသည်ဟု လှေဦးစီးတစ်ဦးဖြစ်သူ နိုင်မွန်စင်းမှပြောပါသည်။ အဆိုပါရေလုပ်ငန်း အတွက် ငါးဖမ်းထွက်မည့်လှေ(၄ဝဝ)ကျော်ရှိပြီး လှေတစ်စီးလျှင်မြန်မာတပ်ပြေး (၆)ယောက်ကျော်ပါရှိနေသည် ဟု နိုင်မွန်စင်းမှပြောဆိုပါသည်။ကျွန်တော်တို့လှေကြီးတွေမှာဆိုရင်လူအင်အား(၂ဝ)ကျော် လှေငယ်တွေမှာဆိုရင်(၁၅)ယောက်လောက် ရှိတာပေါ့။ အဲဒီအထဲမှာဆိုရင်ဗမာစစ်သားလူထွက်တွေ တပ်ကပြေးလာတဲ့သူတွေအများကြီးပါတယ်။ လှေ တစ်စီးမှာဆိုရင်(၆)ယောက်လောက်ပါတယ်။ ငါးဖမ်းတဲ့လှေက အစီး(၄ဝဝ)ကျော်တယ်လေ။ အလုပ်ကျွမ်းကျင် မှုမရှိပေမဲ့ ဈေးပေါပေါနဲ့ရတော့ ယူထားရတာပေါ့။ တဖြည်းဖြည်းနဲ့သင်ပေးရတာပေါ့။
ထိုင်းနိုင်ငံ မဟာချိုင်ရောက်တပ်ပြေးများနှင့်တကွ တခြားအလုပ်သမားများကို မြဝတီ၊မဲဆောက်မှ တဆင့် လူကုန်ကူးပွဲစားများမှ တင်သွင်းလာပြီး လှေဦးစီးများမှ ကြောပေါင်စံနစ်(လုပ်အားခဖြတ်ယူစံနစ်)ဖြင့် ပြန်လည်ရွေးယူကာ မိမိတို့၏လှေတွင် ဈေးပေါပေါလုပ်သားများအဖြစ် ပြန်လည်ခိုင်းစေသည်။ အဆိုပါ ဖြစ်စဉ်ကို လူကုန်ကူးပွဲစားတစ်ဦးမှ အခုလိုရှင်းပြပါသည်။
ကျွန်တော်တို့က သူတို့ကိုတစ်ယောက်တစ်သောင်းနှုန်းအကုန်ကျခံပြီးသယ်လာတယ်။ ဒီမဟာချိုင် ရောက်တော့ နှစ်သောင်းနှုန်းနဲ့ လှေဦးစီးတွေကိုပြန်ရောင်းတယ်။ အလုပ်သမားတွေတော့ (၆)လလောက် အလုပ်လုပ်ရမယ်။ လခမရဘူး။ အသုံးစရိတ်တလကို(၆ဝဝ)လောက်ပေးတယ်။ တကယ့်လို့အလုပ်သမားတွေ ထွက်ပြေးရင် သူတို့ကံပေါ့။ အများအားဖြင့်တော့ စစ်သားလူထွက်တွေများတယ်ဗျ။
မြန်မာစစ်အာဏာပိုင်များမှ ဝန်ထမ်းလစာငွေတိုးမြှင့်ပေးခဲ့သော်လည်း အထက်နှင့်အောက် လစာ ကွာဟမှုကြောင့် အောက်ခြေတပ်သားများမှာ ဆင်းရဲမြဲဖြစ်ပြီး စားဝတ်နေရေးအရ ကြပ်တည်းမှုနှင့်ရင်ဆိုင် နေရဆဲဖြစ်ကြောင်း စစ်တပ်နှင့်နီးစပ်သူများမှ ပြောပါသည်။
No comments:
Post a Comment