အေးရှားဝေါလ် ကုမ္ပဏီက အလုံမြို့နယ်နှင့် ကြည့်မြင်တိုင်မြို့နယ်တို့မှလှိုင်မြစ်အတွင်းသို့ စီးဆင်းသည့်မြောင်းမကြီးမြောင်းကိုပိတ်ဆို့လိုက် သဖြင့် မိုးရွာပါက ရပ်ကွက်များအတွင်း ရေ၀င်ကာ ပျက်စီးဆုံးရှုံးမှုများ ကြုံတွေ့နေရသဖြင့် ဆန္ဒထုတ်ဖော် ကန့်ကွက်ခြင်းဖြစ် ကြောင်း သိရ သည်။
“၂ ရက်ရှိပြီ၊ မိုးရွာရင် အိမ်တွေထဲကို ရေ၀င်တယ်။ ရေက ခါးလောက်ထိ ၀င်တယ်။ အိမ်ထဲမှာရှိတဲ့ ပရိဘောဂတွေ၊ မော်တာတွေ အကုန် ပျက် စီးကုန်တယ်။ သူတို့က မြောင်းမကြီး မြောင်းကို ကွန်ကရစ်နဲ့ ပိတ်ပြီး လမ်းလုပ်ထားတယ်လို့ သိရတယ်။ အဲဒါကြောင့် မြောင်းပြန်ဖွင့်ပေးဖို့ ပြောတာပဲ” ဟု ဆန္ဒထုတ်ဖော် ကန့်ကွက်ခဲ့သူ ကြည့်မြင်တိုင် မြို့နယ် ဆေးရိုး တန်းနှင့် ငြိမ်းချမ်းရေးရပ်ကွက်မှ မနီလာက ပြောသည်။
ဆန္ဒထုတ်ဖော် ကန့်ကွက်မှုကို ကြည့်မြင်တိုင်နှင့် အလုံမြို့နယ်များရှိ ရေလွှမ်းမိုးမှုခံရသည့်ရပ်ကွက်များမှလူ ၅၀၀ ကျော်ပါဝင်ခဲ့ပြီးစုစု ပေါင်း ဆန္ဒပြချိန် ၆ နာရီခန့် ကြာမြင့်ခဲ့သည်။ ဆန္ဒပြ ကန့်ကွက်သူများနှင့် အေးရှားဝေါလ် ကုမ္ပဏီဝန်ထမ်း တချို့အကြား တင်းမာမှုများ ဖြစ်ပေါ်ခဲ့ သော် လည်း အချိန်မီ ထိန်းသိမ်းနိုင်ခဲ့သည်။
“ဒီမြောင်းက အင်္ဂလိပ် ခေတ်တုန်းကတည်းက လုပ်ထားတဲ့မြောင်း။ ဗားကရာမှာလည်း ရှိတယ်။ ကျောင်းကြီးလမ်းမှာလည်း ရှိတယ်။ ရွှေတိ ဂုံဘုရားက ဆင်းတဲ့ရေရယ်၊ ဒီ စမ်းချောင်း၊ ကြည့်မြင်တိုင်က ဆင်းလာတဲ့ရေတွေကို မြစ်ထဲကို ထုတ်ဖို့ လုပ်ထားတဲ့မြောင်း။ ဒီမြောင်းကို ပိတ် ပစ်လိုက်တယ်ဆိုတော့ ဒီရေတွေက ဘယ်က ဆင်းရမလဲ” ဟု ကြည့်မြင်တိုင်မှ ဦးမြင့်ကြွယ်က ဆိုသည်။
အေးရှားဝေါလ် ကုမ္ပဏီ၏ ပြောရေးဆိုခွင့်ရှိသူ တဦးကမူ မြောင်းမကြီး မြောင်းကိုပိတ်ဆို့ထားခြင်းမရှိဘဲတံတားခင်းထားခြင်းသာဖြစ် ကြောင်း၊ တံတားတိုင်များနှင့် ရပ်ကွက်တွင်းမှ စီးလာသည့် အမှိုက်များ ပိတ်ဆို့နေခြင်း၊ မြစ်ရေတက်လာခြင်းတို့ကြောင့် ရပ်ကွက်များ တွင်းသို့ ရေ၀င် ခြင်းသာဖြစ်နိုင်ကြောင်း ဧရာဝတီကို ပြောသည်။
“ကျနော်တို့ရဲ့ ဒါရိုက်တာအဖွဲ့ဝင်တွေအားလုံး နေပြည်တော်ကို ကိစ္စတခုနဲ့ ရောက်နေပါတယ်။ အဲဒီမှာ အမြင့်ဆုံး အထွေထွေမန်နေဂျာပဲ ရှိမှာ ပါ။ ကျနော်တို့ဆီကို ခုပဲ စာရောက်ပါတယ်။ ဘယ်လို ဖြေရှင်းမယ်ဆိုတာကို ညှိနှိုင်းနေ ကြပါပြီ” ဟု ၎င်းက ပြောသည်။
အေးရှားဝေါလ် ဆိပ်ကမ်းနေရာသည် ကွန်တိန်နာကားကြီးများ၊ သစ်လုံးတင် ယာဉ်များနှင့် အင်းစိန်၊ လှိုင်သာယာ၊ ရွှေပြည်သာသို့ ပြေးဆွဲ နေ သည့် ခရီးသည်တင် ဘတ်စ်ကားများ ဖြတ်သန်းသည့် အောက်ကြည့်မြင်တိုင်လမ်း (ကြည့်မြင်တိုင် ကမ်းနားလမ်း) တွင်တည်ရှိနေ ရာလမ်း တလျှောက် ယာဉ်ကြောပိတ်ဆို့မှုမှာလည်း ၆ နာရီနီးပါးခန့် ကြာမြင့်ခဲ့သည်။ ည ၉ နာရီကျော်တွင် ခရိုင်ရဲမှူး ရောက်ရှိလာ ပြီး ယာဉ်ကြော ပိတ်ဆို့မှုကို ရှင်းလင်းရန် စတင်ဆောင်ရွက်ခဲ့သည်။
“ကျနော်တို့လည်း ခုမှ သတင်းရလို့ ခုမှ လာခဲ့ရတာပါ။ နာရီနဲ့ ချီပြီး ယာဉ်ကြောပိတ်ဆို့ထားတဲ့အ တွက် ဒါကို အရင်ဖြေရှင်းရပါမယ်” ဟု ခရိုင်ရဲမှူးက ပြောသည်။
ယာဉ်ကြောပိတ်ဆို့မှု ဖြေရှင်းနေချိန်အတွင်း ယာဉ်မောင်းများနှင့် ဆန္ဒထုတ်ဖော်သူများအကြား ပဍိပက္ခများ ထပ်မံဖြစ်ပေါ်ခဲ့ရာ ၈၈ မျိုး ဆက် ကျောင်းသားများဖြစ်သော ကိုဂျင်မီ၊ ကိုမြအေးနှင့် ကိုပြုံးချိုတို့က ၀င်ရောက် ထိန်းသိမ်းပေးခဲ့သည်။
“ရေစီးရေလာ မကောင်းလို့ အိမ်တွေထဲကို ရေဆိုးရေညစ်တွေ ၀င်ရောက်ခံနေရတဲ့ ကြည့်မြင်တိုင် ပြည်သူတွေရဲ့ ဒုက္ခဟာ ကျနော်တို့ ဒုက္ခ ဖြစ်ပါတယ်။ အခု ဆိုဒ်တာဝန်ခံရဲ့ သဘောတူညီချက်နဲ့ ကျနော် အာမခံပါတယ်။ ကုမ္ပဏီက မြောင်းမကြီးကို ပြန်ဖွင့်ပေးပါလိမ့်မယ်” ဟု ၈၈ မျိုးဆက်ကျောင်းသား ကိုမြအေးက ကြည့်မြင်တိုင်၊ အလုံဒေသခံများကို ပြောကြားခဲ့သည်။
အေးရှားဝေါလ်ဆိပ်ကမ်းသည် ပင်လယ်ကူးသင်္ဘောကြီးများ ဆိုက်ကပ်နိုင်သော ဆိပ်ကမ်းကြီးဖြစ်ကာ ယခင်အစိုးရ လက်ထက်ကတည်းက ဆောက်လုပ်ခွင့်ရရှိထားခြင်းဖြစ်သည်။
No comments:
Post a Comment