ယခင်စစ်အစိုးရ အကြီးအကဲ အငြိမ်းစား ဗိုလ်ချုပ်မှူးကြီး သန်းရွှေနှင့် နီးစပ်သူဟု လူအများက ပြောဆိုနေသော ဦးတေဇ ကလည်း သူ၏ လူမှု ကွန်ရက် စာမျက်နှာ ကိုယ်ပိုင် ဖေ့စ်ဘုတ်မှတဆင့် တုံ့ပြန်ထားသည်။
“ယခုလို ဘယ်မီဒီယာမှ မကျင့်သုံး မရေးသားခဲ့တဲ့ အဝါရောင်ဆန်သော အရေးအသားများနဲ့ မိမိအပေါ်စော်ကားမှုများအတွက် လည်း လူကြီးလူကောင်း ပီသစွာ ဥပဒေဘောင် အတွင်းမှပဲ စကားပြောပါမယ်။ လမ်းဘေးစရိုက်ဆန်စွာ စိန်ခေါ်မှုအတွက် မိမိ ဥပဒေဘောင် အတွင်းမှ တုံ့ပြန်ပါမယ်။ မိမိကို ပုတ်ခတ်စော်ကား ရေးသားသော တခြားသော စာစောင်များကိုလည်း ဥပဒေကြောင်း အရ တုံ့ပြန်သွားပါမည်။ ၎င်းအချိန်မှ ထွက်မပြေးရန် မိမိပြောလိုပါသည်”ဟု ဦးတေဇ က ရေးသားထားသည်။
ဦးတေဇ၏ ဖေ့စ်ဘုတ် စာမျက်နှာမှာ အမှန်ဖြစ်ပြီး ယင်းရေးသားချက်များမှာလည်း ဦးတေဇ၏ အာဘော်များ ဖြစ်ကြောင်း ထူးကုမ္ပဏီ အုပ်စုမှ ရုံးအဖွဲ့မှူး ဦးညီညီအောင်က ဧရာဝတီသို့ ပြောသည်။
“ဦးတေဇနှင့် စိန်စီသောညများ” ခေါင်းစဉ်ဖြင့် ဦးတေဇ အပါအ၀င် ခရိုနီများကို အတိအလင်း စစ်ကြေညာလိုက်ကြောင်း စာစုကို နိုဝင်ဘာ ၂၃ ရက်နေ့ထုတ် သူရိယနေ၀န်း ဂျာနယ်တွင် ထောင်သူရဲ ဘအုပ် အမည်ဖြင့် သူရိယနေ၀န်း အမှုဆောင် အရာရှိချုပ် ဦးမိုးဟိန်းက သူကိုယ်တိုင် ရေးသားခဲ့ခြင်း ဖြစ်ကြောင်း ပြောဆိုထားသည်။
ထောင်သူရဲ ဘအုတ် ၏ စာစု၌“ခင်ဗျားတို့ ခရိုနီအားလုံး ရန်ကုန်မြစ်ထဲက မော်တော်တစင်းနဲ့ ဘင်္ဂလားပင်လယ်အော်ထဲထိ မောင်း သွားပြီး အားလုံးခုန်ချပြီး အဆုံး စီရင်လိုက်တာ ပိုကောင်းပါတယ်။ ရန်ကုန်မြစ်ထဲမှာဆို ပေါ်လာမယ့် Body က မြင်မကောင်းရှုမကောင်း ဖြစ်နေမှာ စိုးလို့ပါ။ ဘင်္ဂလား ပင်လယ်အော်ထဲမှာဆိုတော့ Body တွေ ပြန်ပေါ်မလာတော့ဘူးပေါ့ဗျာ။ ဘင်္ဂလား ပင်လယ် အော်ထဲမှာက ငမန်းတွေ ရှိတယ်လေ”ဟု ပါရှိသည်။
ထိုသို့သော သူရိယနေ၀န်း ဂျာနယ်၏ ရေးသား ဖော်ပြချက်များသည် စာနယ်ဇင်းကျင့်ဝတ်နှင့် မညီကြောင်း၊ မီဒီယာတခု အနေဖြင့် ရပ်တည်မည်ဆိုပါက မီဒီယာကျင့်ဝတ်နှင့် အညီ အထောက်အထား ခိုင်ခိုင်လုံလုံဖြင့် ရေးသားသင့်သည်ဟု အကြံပြုလိုကြောင်း သတင်းစာပညာ သင်တန်းများ ပို့ချနေသည့် ဦးကြည်မင်းက ပြောသည်။
“အကုန်လုံးကတော့ ဒုက္ခတော့ ရောက်ကုန်တော့မှာ။ ဦးတေဇ ဘက်ကလည်း အသေရေဖျက်မှု ပုဒ်မ ၅၀၀ နဲ့ စွဲခွင့် ရှိတယ်။ သူရိယနေ၀န်း ဘက်ကလည်း ဦးတေဇက န၀တ(နိုင်ငံတော် ငြိမ်ဝတ်ပိပြားမှု တည်ဆောက်ရေးအဖွဲ့) လက်ထက်မှာ ယူကရိန်း ကနေ ဟယ်ရီကော်ပတာတွေ ၀ယ်တဲ့ ကိစ္စတွေ ရှိတယ်။ ကော်မရှင်ခ ဒေါ်လာ သန်းချီ သွားတာ။ အဲဒီနောက်ပိုင်း သစ်တောတွေ အကုန်ခုတ်။ တခြားလုပ်ချင်တာတွေ လုပ်ခွင့်ရခဲ့တော့ အဲဒါကို တွယ်ရင် ပြဿနာတက်မှာ”ဟု ဦးကြည်မင်းက ဆိုသည်။
မြန်မာ ဂျာနယ်လစ်များ ကွန်ရက် အဖွဲ့(MJN) မှ ဦးမြင့်ကျော် ကလည်း အသေရေဖျက်မှု၏ အဓိပ္ပာယ်ဖွင့်ဆိုချက်အရ အချက် အလက် အထောက်အထားမရှိဘဲ လူတယောက်ကို နစ်နာစေပါက အသရေဖျက်မှု မြောက်သောကြာင့် ဦးတေဇဘက်မှ အသေရေ ပျက်စေနိုင်သော အထောက်အထားများ ရရှိထားပါက တရားစွဲခွင့်ရှိကြောင်း ဧရာဝတီသို့ ပြောသည်။
“မြန်မာပြည်မှာက လူတွေ မုန်းတဲ့ အာဏာရှင်၊ ခရိုနီတွေကို ပြောတယ်ဆိုရင်ပဲ အဲဒီလူက သူရဲကောင်းလို ဖြစ်နေတယ်။ ပြဿနာ က သူက ဘာသူရဲကောင်းမှ မဟုတ်ဘူး။ မကျေနပ်လို့ လမ်းပေါ်ထွက်ဆဲတဲ့ အဆင့်ပဲရှိတာ။ ဆဲတော့ အခု လူတွေထွက်ကြည့်နေ တယ်။ အခုထွက်ကြည့်နေတဲ့ ကာလလို့ပြောရမှာပေါ့။ ဆဲလိုက်တော့ တဖက်က တုံ့ပြန်မှုတခုခုတော့ ရှိလိမ့်မယ်။ ကျနော်တို့ကတော့ အ၀ါရောင် စာနယ်ဇင်းလို့ပဲ မြင်တယ်”ဟု ဦးမြင့်ကျော်က ဆိုသည်။
ကျင့်ဝတ်နှင့်မညီသော အရေးအသားများကြောင့် မြန်မာနိုင်ငံ၏ မီဒီယာ ပုံရိပ်မှာ ထိခိုက်လျက်ရှိပြီး ဆင်ဆာမူဝါဒများနှင့် ကိုယ်ကျိုး စီးပွားရှေ့တန်းတင်မှုတို့ကြောင့် လွတ်လပ်သော မီဒီယာများ ရှားပါးသွား၍ ယခုအချိန်တွင် အမှန်တကယ်လွတ်လပ်သော သတင်း မီဒီယာများ ပေါ်ထွက်လာစေရန် အရေးကြီးကြောင်း ပဲ့တင်သံ ဂျာနယ် တာဝန်ခံအယ်ဒီတာ မသီတာ(စမ်းချောင်း)ကလည်း ပြော သည်။
“အချက်အလက်နဲ့ဝေဖန်ထောက်ပြနိုင်ရင် ဂျာနယ်တစောင်၊ သတင်းထောက်တယောက် အကျိုးထက် တိုင်းပြည်အတွက်ပါ အကျိုး ရှိနိုင်တယ်။ ခရိုနီတွေရဲ့ စီးပွားရေးနဲ့ပတ်သက်တဲ့ မသမာမှုတွေ အခွန်ရှောင်မှုတွေကို စနစ်တကျနဲ့ ထိထိရောက်ရောက် ဖော်ထုတ် နိုင်တယ် ဆိုရင်တော့ ကောင်းပါတယ်။ သတင်းဖတ်တဲ့သူတွေမှာ Right to Know လို့ခေါ်တဲ့ သတင်းသိပိုင်ခွင့်ရှိဖို့ လိုသလို သတင်း ပေးတဲ့ Source(သတင်း ရင်းမြစ်) နဲ့ သတင်းကို ဆန်းစစ်ခံရတဲ့ သူတို့ဘက်မှာလည်း ပြောရေးဆိုခွင့် ဆိုတာ ရှိရမယ်”ဟု မသီတာ(စမ်းချောင်း)က ဆိုသည်။
လက်ရှိအခြေအနေအရ သူရိယနေ၀န်း ဂျာနယ်ကို တရားစွဲဆိုရန် စီစဉ်နေပြီး ဥပဒေကြောင်းအရ အရေးယူနိုင်ရန် အချက်အလက် များ စုဆောင်းလျက်ရှိကြောင်း ထူးကုမ္ပဏီ အုပ်စု ရုံးအဖွဲ့မှူး ဦးညီညီအောင် က ဧရာဝတီသို့ ပြောသည်။
“တရားစွဲနိုင်ဖို့ အချက်အလက်တွေ စုဆောင်းနေတယ်။ တိုင်ပင်နေတယ်။ သူရိယနေ၀န်းကိုပဲ တရားစွဲဖို့ လုပ်မှာပါ”ဟု ဦးညီညီ အောင် က ပြောပြသည်။
ဦးတေဇမှာ တိုင်းပြည်၏ စီးပွားရေး လုပ်ငန်းရှင်ဖြစ်သောကြောင့် စာစောင်များက စာနယ်ဇင်းကျင့်ဝတ်နှင့် အညီ အမြင်အမျိုးမျိုးဖြင့် ရေးသားနေကြသည်မှာ ပြဿနာမရှိကြောင်း၊ သို့သော် သူရိယနေ၀န်းဂျာနယ်မှာ ပုဂ္ဂိုလ်ရေး ခြိမ်းခြောက်မှုများသာမက အလွန် ဆိုး ၀ါး လာသောကြောင့် ဥပဒေကြောင်းအရ အရေးယူရန် စဉ်းစားရခြင်း ဖြစ်ကြောင်းလည်း ဆိုသည်။
“တော်ရုံတန်ရုံ ကိစ္စဆိုရင် တိုင်းရေးပြည်ရေး မီဒီယာ ကိစ္စတွေကို အကုန်လုံး နားလည်ပါတယ်။ ဘာမှမပြောပါဘူး ။ သူရိယ နေ ၀န်း ကတော့ လူပုဂ္ဂိုလ်အနေနဲ့ ခြိမ်းခြောက်တာတွေရော တခြားကိစ္စတွေရော တော်တော် ဆိုးဆိုးဝါးဝါး မို့လို့ပါ”ဟု ဦးညီညီအောင် က ပြောဆိုသည်။
သူရိယနေ၀န်း ဂျာနယ်မှ အမှုဆောင် အရာရှိချုပ် ဦးမိုးဟိန်းကမူ ဦးတေဇ၏ သူရိယနေ၀န်း အပေါ် တုံ့ပြန်လာမှုကို လုံးဝအံ့သြခြင်း မရှိဘဲ ကမ္ဘာ့သမိုင်းတွင် တရားလိုမှ တရားခံဖြစ်သွားသော ဖြစ်စဉ်များစွာရှိသောကြောင့် ဆက်လက် လှုပ်ရှားသွားမည်ဖြစ်ပြီး မည်သည့် အခြေအနေတွင်မှ နောက်ကြောင်း ပြန်လှည့်မည်မဟုတ်ကြောင်း ပြောသည်။
“ကျနော်တို့လို လူထုဘက်ကရပ်တည်နေတဲ့ ဂျာနယ်တစောင်ရဲ့ ကြန်အင်လက္ခဏာတွေနဲ့ သဘောသဘာဝတွေကိုက အာဏာရှင် ကရော၊ အာဏာပိုင်ကရော၊ ခရိုနီတွေကရော အထူးသဖြင့် သူရိယအလင်းနဲ့ သူရိယနေ၀န်းဂျာနယ်မှာ ဖော်ပြခဲ့တဲ့၊ ပါဝင်ရေးသား ခံရတဲ့ ခရိုနီဇာတ်ကောင် အကြီးကြီးတွေအနေနဲ့ ကျနော်တို့ကို တနေ့မဟုတ် တနေ့ ဒီလိုလုပ်လာမယ်ဆိုတာ အစကတည်းက ကြိုတွက်ထားပြီးသားပါ။ တခုပြောချင်တာက တရားစွဲမယ့်လူကလည်း တရားခံပြန်ဖြစ်သွားနိုင်တယ် ဆိုတာမျိုးက ကမ္ဘာ့သမိုင်းမှာ ပြည့်နှက်နေတာပါပဲ”ဟု ဦးမိုးဟိန်းက ဆိုသည်။
ပြည်တွင်ငြိမ်းချမ်းရေး၊ အာဏာရှင်စနစ် ချုပ်ငြိမ်းရေးနှင့် ခရိုနီစနစ် အမြစ်ဖြုတ်ရေးဆိုသော အချက်များနှင့် ညီညွှတ်သော ဆောင်း ပါး၊ သတင်းများ အားလုံးကို ဆက်လက်ဖော်ထုတ်ပြီး ပြည်သူလူထု၏ တထောင် တန်သော ပိုက်ဆံကို တကျပ်နှင့် ယူထားသော ကိစ္စရပ်များကို ဆက်လက် ဖော်ပြပေးရမည်မှာ သူရိယအလင်း၏ တာဝန် ဖြစ်ကြောင်း ဦးမိုးဟိန်းက ဆက်လက် ပြောဆိုသည်။
“ကျနော်တို့က ဘယ်တော့မှ နောက်ပြန်မလှည့်ဘူး။ ၈၈ ကတည်းကစပြီး တခါမှ နောက်ပြန်မလှည့်ခဲ့ဘူး။ ကျနော်တို့ ၈၈ ကျောင်း သား ခေါင်းဆောင်တွေက ဘယ်တော့မှ နောက်ပြန်မလှည့်ဘူး။ ရှေ့ကိုပဲ ရအောင်ထိုးဖောက်တာ”ဟု ဦးမိုးဟိန်းက ဆိုသည်။
No comments:
Post a Comment