၃ ပွင့်ဆိုင်ဆွေးနွေးရေးမူကို မိုင်ဂျာယန်အစည်းအဝေးတွင် သဘောတူ

ကျော်ခ

နိုင်ငံရေး ဆွေးနွေးပွဲများအတွက် ၃ ပွင့်ဆိုင်ဆွေးနွေးရေးမူကို ကိုင်ဆွဲဆွေးနွေးရန် ကချင်ပြည်နယ်၊ မိုင်ဂျာယန်မြို့တွင် ပြုလုပ်သော တိုင်းရင်းသား လက်နက်ကိုင် တော်လှန်ရေး အဖွဲ့အစည်းများ၏ မျက်နှာစုံညီအစည်းအဝေး က သဘောတူ ဆုံးဖြတ်လိုက်ကြပြီဖြစ်ကြောင်း သိရှိရသည်။

၃ ပွင့်ဆုိုင်ဆွေးနွေးရေး မူ ဆုိုသည်မှာ အစုိုးရ၊ လွှတ်တော်နှင့် တပ်မတော်က တပွင့်၊ တုိုင်းရင်းသားလက်နက်ကိုင် အဖွဲ့အစည်းများအားလုံးက က တပွင့်နှင့် နုိုင်ငံရေးပါတီများက တပွင့် စုစုပေါင်း ၃ ပွင့်ဆုိုင် ဆွေးနွေးကြခြင်းကုို ဆုိုလုိုခြင်း ဖြစ်သည်။

မိုင်ဂျာယန် အစည်းအဝေး စတုတ္ထမြောက်နေ့ ဇူလိုင်လ ၂၉ ရက်နေ့တွင် နိုင်ငံရေးဆွေးနွေးရေးမူဘောင် အောက်၌ ကိုယ်စား ပြုမှုနှင့် စုဖွဲ့မှုပုံစံကို ဆွေးနွေးခဲ့ ကြပြီး သုံးပွင့်ဆိုင် ကိုယ်စားပြုမှု စနစ်အပေါ်ဆက်လက် အခြေခံသွားကြရန် အစည်းအဝေး တက်ရောက်လာသည့် အပစ်မရပ် ရသေးသော တိုင်းရင်းသားလက်နက်ကိုင်အဖွဲ့အစည်းများ၊ အပစ်ရပ်ထားသော အဖွဲ့များနှင့် တက်ရောက်လာသည့် အဖွဲ့ အစည်း များက သဘောတူလိုက်ကြခြင်းဖြစ်သည်။

UNFC ဒုဥက္ကဌ နိုင်ဟံသာ က “ဒီဝိုင်းထဲမှာ တို့လက်ခံတဲ့အပိုင်းကတော့ အရင်တို့ရပ်တည်တဲ့ ပုံစံအတိုင်းပဲ ၃ပွင့်ဆိုင်ပါပဲ။ ၃ပွင့်ဆိုင်ဆိုတဲ့ အထဲမှာ အစိုးရရယ်၊ လွှတ်တော်ရယ်၊ တပ်မတော်ရယ်က တပွင့်၊ တိုင်းရင်းသား လက်နက်ကိုင်အဖွဲ့တွေက တပွင့်၊ နိုင်ငံရေးပါတီတွေက တပွင့် ၃ပွင့်ကပဲ အဓိက တက်ရောက်ဖို့နဲ့ ကျန်တဲ့ အင်အားစုတွေ CBO၊ CSO တွေကတော့ သူ့သက်ဆိုင်ရာ ကဏ္ဍတွေမှာ ပါဝင်ပြီးတော့မှ ညှိနှိုင်းဆွေးနွေးသွားမယ်ဆိုတဲ့ သဘောထားမျိုးကို ချမှတ်ပါတယ်။ ဒီမှာ သဘောတူပါတယ်” ဟု ပြောသည်။

နိုင်ငံရေးဆွေးနွေးပွဲများ အတွက် ဦးသိန်းစိန် အစိုးရလက်ထက်တွင် ၇ ပွင့် အဖြစ် သတ်မှတ်ဖွဲ့စည်းခဲ့ပြီး ထိုအထဲတွင် အစိုးရ၊ လွှတ်တော်၊ တပ်မတော်၊ တိုင်းရင်းသားလက်နက်ကိုင်များ၊ နိုင်ငံရေးပါတီများ၊ တိုင်းရင်းသား ကိုယ်စားလှယ်နှင့် ပါဝင်သင့် ပါဝင်ထိုက်သူများ ဟု ပါဝင်သည်။

ထိုသို့ အစုအဖွဲ့ ၇ ပွင့် သတ်မှတ်မှုအပေါ် တိုင်းရင်းသား အဖွဲ့အစည်းများ ဘက်က လက်မခံနိုင်ကြောင်း ယနေ့ သတင်းစာ ရှင်းလင်းပွဲတွင် တိုင်းရင်းသားများဘက်က တရားဝင် ထုတ်ဖော်ပြောဆိုသည်။ တိုင်းရင်းသားများဘက်က ၃ ပွင့်ဆိုင်ကို ယခင်ကတည်းက တောင်းဆိုနေသော်လည်း အစိုးရဘက်ကလက်ခံထားခြင်းမရှိပေ။

အစိုးရနှင့် တနိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ်ထိုးထားသည့် အဖွဲ့အစည်းများ အကြား တွင်လည်း ၇ ပွင့်ဆိုင်ကိစ္စနှင့်ပတ်သက်ပြီး ပြန်လည်သုံးသပ်သည့် အဆင့်အနေဖြင့်သာ ဆွေးနွေးထားခြင်းဖြစ်ပြီး အပြီးအပြတ် သဘောတူညီချက် ဆုံးဖြတ်ချက်ချမှတ်ထားသည့် မဟုတ်ကြောင်း NCA လက်မှတ်ရေးထိုးထားသည့် ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO) ဥက္ကဌ ခွန်မြင့်ထွန်း က သတင်းထောက်များကို ပြောသည်။

ခွန်မြင့်ထွန်း က “၃ပွင့်ဆိုင်ကိုတော့ ကျနော်တို့ ဘုံသဘောထားတရပ်လို့ ချမှတ်ထားတာဖြစ်ပါတယ်။ သို့သော် မိမိတို့ရဲ့ အခြေ အနေ အခင်းအကျင်းများနဲ့ အညီ သွားနိုင်အောင် ဒီအခက်အခဲတွေကို ဘယ်လိုကျော်လွှားမလဲ ဒါတွေကတော့ ကျနော်တို့ ဆက်လက်ပြီး ဆွေးနွေးရမှာဖြစ်ပါတယ်” ဟု ပြောသည်။

၃ပွင့်ဆိုင်ဆွေးနွေးရေးမူကို ပြည်ထောင်စုငြိမ်းချမ်းရေးညီလာခံ – ၂၁ ရာစု ပင်လုံတွင် အဓိက ဆွေးနွေးသွားမည်ဖြစ်ပြီး ယင်းမတိုင်မီ တိုင်းရင်းသား လက်နက်ကိုင်တော်လှန်ရေးအင်အားစုများအား ဖိတ်ခေါ်ပြီး ပြုလုပ်မည့် နိုင်ငံရေးဆွေးနွေးမှု မူဘောင် ပြန်လည် သုံးသပ်မည့် အစည်းအဝေးတွင်လည်း ထပ်မံဆွေးနွေးဦးမည်ဟုသိရသည်။