အွန်လိုင်း ဘုန်းတော်ကြီး ဦးဝီရသူ၏ Facebook အနှောင့်ယှက် ခံနေရသလား

ဇာနည်မာန်

အွန်လိုင်းပေါ်၌ လှုံ့ဆော်မှုများ ပြုလုပ်ခဲ့ခြင်းဖြင့် လူသိများလာခဲ့သော အရှင်ဝီရသူသည် မန္တလေးမြို့တွင် ဖြစ်ပွားခဲ့သည့် ပဋိပက္ခများနောက်ပိုင်း အချိန်များ၌ အွန်လိုင်းဘုန်းတော်ကြီး တပါးအသွင် ဖြစ်လာခဲ့သည်။

အမျိုးသားရေးဝါဒီ ဗုဒ္ဓဘာသာတချို့နှင့် ထိုသူတို့၏ ချစ်ကြောက်အရိုသေခံ ဘာသာရေးခေါင်းဆောင် အရှင်ဝီရသူက သူ၏ ကိုယ်ပိုင်လူမှုကွန်ရက် စာမျက်နှာများကို အသုံးပြုရ ခက်ခဲလာပြီး အတိုက်အခိုက်များ ရှိနေကြောင်း ပြောဆိုကြသည်။

“ဦးပဉ္စင်းရဲ့ Facebook အကောင့်ခိုးပြီး အဖောက်ခံရတယ်လို့ ထင်တယ်။ အကောင့်ထဲကို ဝင်လို့မရဘူး။ ဒါပေမယ့် ကိုယ့်ရဲ့အကောင့်ကိုတော့ တွေ့နေရတုန်းပဲ။ ဘယ်လိုပဲဖြစ်ဖြစ်တော့ ၂၀၁၄ မှာ တင်ခဲ့သမျှစာတွေကတော့ မရှိတော့ပါဘူး” ဟု ဦးဝီရသူက ဧရာဝတီသို့ မိန့်သည်။

လူမှုကွန်ရက်များ၏ ထုံးစံအရ သုံးစွဲသူများသည် အကောင့်များ ပိတ်သိမ်းခံရပါက email များထဲသို့ အကောင့်ပိတ်ပင်ခြင်း ခံရကြောင်း အကြောင်းကြားစာများ ပေးပို့လေ့ရှိသော်လည်း Facebook ဘက်မှနေ၍ ဦးဝိရသူ၏အကောင့်မှာ ခေတ္တပိတ် ခြင်းခံထားရသည်၊ (သို့မဟုတ်) ချမှတ်ထားသော စည်းကမ်းချက်များကို ချိုးဖောက်ခြင်းကြောင့် ဖျက်သိမ်းလိုက်သည် စသည်ဖြင့် ပြန်ကြားပေးပို့ခြင်း မရှိသေးပေ။

ဦးဝီရသူကမူ ၄င်းသည် Facebook ဘက်မှ အသိပေးမှု တစုံတရာပြုလုပ်ခြင်း ရှိ၊ မရှိကို မသိကြောင်း၊ သူ့အနေဖြင့် ၄င်း၏ email ကို စစ်လေ့ရှိသူ မဟုတ်ကြောင်း ပြောဆိုသည်။

ဇွန်လကုန်ခန့်က ဦးဝီရသူသည် ၄င်း၏ လူမှုကွန်ရက် မိတ်ဆွေများနှင့် လူမှုကွန်ရက် နောက်လိုက်ပေါင်း ၃၀ဝ၀ဝ ကျော်ရှိသည့် Facebook အကောင့်ပေါ်တွင် မွတ်စလင် လက်ဖက်ရည်ဆိုင်ပိုင်ရှင်က မြန်မာအမျိုးသမီး တဦးကို အဓမ္မပြုကျင့်ခဲ့သည်ဟူသော သတင်းများ မျှဝေတင်ပြခဲ့သည်။

ဦးဝီရသူက အဓမ္မမှု ကျူးလွန်သည်ဆိုသည့် ညီအစ်ကို ၂ ဦးကိုဆက်သွယ်၍ ၄င်းတို့ စွပ်စွဲခံထားရသော ပြစ်မှုများအတွက် လူသိရှင်ကြား ပြောဆိုဖြေ ကြားမှုပြုလုပ်ရန် ကြိုးပမ်းခဲ့သည်ဟုလည်း ဇူလိုင်လ ၁ ရက်နေ့က ၄င်း၏ Facebook ပေါ်တွင် တင်ခဲ့သည်။

ထို့နောက် ဦးဝီရသူက တခြားသော Facebook သုံးစွဲသူတချို့ ကျယ်ကျယ်ပြန့်ပြန့် ဝေမျှခြင်းပြုလုပ်နေသော စွပ်စွဲခံရသူများ၏ အမည်၊ ဖုန်းနံပါတ်နှင့် နေရပ်လိပ်စာများ ပါဝင်သည့် စာများကိုလည်း တဆင့် ပြန်လည်ဝေမျှခြင်း ပြုလုပ်ခဲ့သေးသည်။

ထိုသို့ ဦးဝီရသူပြုလုပ်အပြီး နာရီအနည်းငယ် အကြာတွင် ထိုညီအစ်ကို ၂ ဦးနှင့် ၄င်းတို့၏ လက်ဖက်ရည်ဆိုင်ရှိ မွတ်စလင်ဖောက်သည်များ စကားများရန်ဖြစ်ခဲ့ကြ၍ ဆိုင်ကိုစောစောပိတ်သိမ်း ခဲ့ကြသည့်အပြင် ဒေါသထွက်နေသော လူအုပ်ကြီးမှာ လုံခြုံရေးချထားရာနေရာနှင့် ပဋိပက္ခဖြစ်ပွားရာနေရာ သို့ရောက်ရှိလာကြပြီး များမကြာမီ ပဋိပက္ခကြီးမှာ ဗုဒ္ဓဘာသာဝင်တို့နှင့် အစ္စလမ်ဘာသာဝင်များအကြား ဖြစ်ပွားသော ပဋိပက္ခအသွင်သို့ ကူးပြောင်းသွားခဲ့သည်။ ပဋိပက္ခဖြစ်ပွားမှုမှာ နောက်တနေ့ ညနေခင်းအထိ တိုင်ခဲ့ပြီး လူနှစ်ဦး သေဆုံးခဲ့သည်။

အခင်းဖြစ်ပွားလျက်ရှိသော နေရာတွင် ညမထွက်ရအမိန့်ကို ထုတ်ပြန်ခဲ့ပြီး Facebook ကို ခေတ္တအသုံးပြု၍ မရဘဲ ဖြစ်သွားခဲ့သည်။

တခြားသောသူများ၏ Facebook မှာ မကြာမီအချိန်အတွင်း ပြန်လည်အသုံးပြု၍ ရသွားခဲ့သော်လည်း ဦးဝီရသူကမူ ၄င်း၏ Facebook အကောင့်သည် ယခင်ကဲ့သို့ ပြည့်ပြည့်စုံစုံ အသုံးပြု၍ မရတော့ကြောင်း ပြောဆိုခဲ့သည်။ ဦးဝီရသူမှာ Facebook အသုံးပြုသူများနှင့် မသင့်လျော်သော အကြောင်းအရာများကို ပယ်ဖျက်နိုင်ရန် သတင်းပို့သူများ၏ စောင့်ကြည့်ခြင်းကိုခံရသည်ဟု သံသယဖြစ်လျက်ရှိပြီး အကောင့်ဟက်ကာများက သူ၏အကောင့်ကို ဖောက်ထွင်းရန် အမြဲတစေ ကြိုးပမ်းလျက်ရှိသည်ဟု ပြောပြသည်။

ဦးဝိရသူသည် သူ၏ Facebook အကောင့်သို့ ဝင်ရောက်နိုင်သော်လည်း စာရေး၍ တင်မည်လုပ်ပါက အကောင့်အတွင်းမှ အလိုအလျောက် Sign Out ဖြစ်သွားကြောင်း ပြောဆိုသည်။

ထို့အပြင်၂၀၁၃ အောက်တိုဘာမှ စတင်ရေး သားမျှဝေခဲ့သော စာနှင့်ဓာတ်ပုံများမှာလည်း ဖယ်ရှားခံလိုက်ရသည်ဟု ဆိုသည်။

“ဘာလို့ Facebook ပေါ်မှာ စာတွေရေးလို့မရ တော့လဲမသိဘူး။ ပြီးတော့ လူတွေကလည်း ဘာလို့ Report လုပ်ကြသလဲဆိုတာ မသိဘူး။ အခုအကောင့် အသစ်မှာတော့ စာတွေရေးတင်လို့ ရနေပါပြီ။ ဒါပေမယ့် ကိုယ်ပိုင်ဘလော့ဂ်တခု လုပ်တော့မှာပါ။ Facebook ကိုချည်းပဲ အားကိုးနေလို့ မရတော့ဘူး” ဟု ဦးဝီရသူက မိန့်သည်။

ဦးဝီရသူက ၄င်း၏ Facebook အကောင့်အသစ်ကို “ဝီရသူ မစိုးရိမ်” ဟု မြန်မာဘာသာဖြင့် ရေးသား အမည်ပေးထားပြီး ၄င်းအကောင့်ဖြင့် စာများကို ရေးသားမျှဝေနိုင်သည်ဟု ဆိုသည်။

ဆရာတော် ဦးဝိရသူ၏ “ဝီရသူ မစိုးရိမ်” ဟူ သောအမည်ဖြင့် ပြုလုပ်ထားသော အကောင့်အသစ်သည် ယခုအခါတွင် Follower ပေါင်း ၁၀ဝ၀ဝ၀ ကျော်ခန့် ရှိနေပြီဟုလည်း သိရသည်။

ဦးဝီရသူကဲ့သို့ပင် တခြားသော ဗုဒ္ဓဘာသာ အသိုင်းအဝိုင်းမှ ပုဂ္ဂိုလ်များသည် ဘာသာရေးဆိုင်ရာ ပွဲများ၊ သတင်းများကို မျှဝေရန်အတွက် လူမှုကွန်ရက်များကို အသုံးပြုနေကြသော်လည်း ဦးဝီရသူ၏ Facebook ကမူ အစ္စလမ်ဘာသာဝင်များအား သက်သေအထောက်အထား မပါရှိဘဲ စွပ်စွဲပြောဆိုမှုနှင့် အမုန်းပွားစေသော လှုံ့ဆော်မှုများပြုလုပ်ခြင်းကြောင့် လူအများအကြားတွင် အသိများလာခဲ့သူဖြစ်ကြောင်း ဖော်ပြမှုများ ရှိနေသည်။

Facebook သို့ဆက်သွယ်၍ ဦးဝီရသူအကောင့်ပေါ်တွင် လုပ်ပိုင်ခွင့်များ ထိန်းချုပ်လိုက်ခြင်း ရှိ၊ မရှိ မေးမြန်း၍ မရခဲ့သော်လည်း လူမှုကွန်ရက် အသုံးပြုသူ တချို့ကမူ ဦးဝီရသူ ရေးသားမျှဝေထားသည့် အမုန်းပွားစေသော လှုံ့ဆော်မှုများကို ဖယ်ရှားရန်အတွက် ၄င်းတို့ဘက်က အဆိုပြုမှုများ ပြုလုပ်ခဲ့ကြောင်း ဧရာဝတီသို့ ပြောပြခဲ့သည်။

“ပဋိပက္ခတွေဖြစ်လာတဲ့ အချိန်ကစပြီး Facebook ပေါ်မှာ အဲဒီလို အမုန်းပွားစေမဲ့ စာမျိုးတွေ တွေ့တာနဲ့ ကျနော်ကတော့ Report တန်းတင်ပါ တယ်။ ပဋိပက္ခတွေ ထပ်မဖြစ်စေချင်လို့ပါ” ဟု ပဋိပက္ခဖြစ်ပွားရာ အဓိကနေရာတွင် နေထိုင်သူ မန္တလေးမြို့ ချမ်းအေးသာဇံရပ်မှ ကိုကျော်ကျော်မောင်က ပြောသည်။

သူ့အနေဖြင့် ဦးဝီရသူအပြင် တခြားသော အစွန်းရောက်တချို့၏ အကောင့်များကိုလည်း Report တင်ခဲ့သည်ဟု သိရသည်။

“ဒါက နိုင်ငံသားတိုင်းရဲ့ တာဝန်လို့ပဲ ပြောချင်ပါတယ်။ အမုန်းပွားစေတဲ့စာတွေ ဖြန့်နေတာကို တားဆီးပြီး အေးချမ်းတဲ့ လူ့အဖွဲ့အစည်းတခု ဖြစ်လာဖို့အတွက်ပါ” ဟု ၄င်းကဆိုသည်။

နာမည်ကြီး ဘလော့ဂါတဦးဖြစ်သည့် ကိုနေဘုန်းလတ်ကလည်း ထိုကဲ့သို့ အမုန်းဝါဒဖြန့်ချိသည့် စာများကို Report ပြုလုပ်ခြင်းဖြင့် လူအချင်းချင်းအကြား အမုန်းပွားမှုများ ထိန်းချုပ်ခြင်းကို ထောက်ခံကြောင်းနှင့် လူမှုကွန်ရက် သုံးစွဲသူများအနေဖြင့် စာများကို ဝေမျှခြင်းမပြုလုပ်မီ သေချာစွာ စဉ်းစားသင့်ကြောင်း အကြံပြုသည်။

“Report လုပ်တာကနေ အမုန်းဝါဒ ဖြန့်တာမျိုးတွေကို တားဆီးလို့ရတယ် ဆိုပေမယ့်လည်း လုပ်တဲ့သူတွေကတော့ အကောင့်အသစ်တွေလုပ်ပြီး ထပ်တင်နေဦးမှာပဲ။ ဒါကို လူတွေက တာဝန်ယူလိုစိတ်၊ စဉ်းစားဉာဏ်ရှိရှိ လုပ်ကြရင် Facebook ပေါ်မှာလည်း အေးချမ်းနေမှာပါ” ဟု ကိုနေဘုန်းလတ်က ပြောသည်။