ဟိန်းကိုစိုး
အတိုက်အခံပါတီမှ အမတ်လောင်းများသည် ၄င်းတို့ဝင်ပြိုင်မည့် ရန်ကုန်တိုင်းဒေသကြီး၊ ကိုကိုးကျွန်းမြိုနယ်သို့ မဲဆွယ်စည်းရုံးခွင့် မရသေးကြောင်း အမျိုးသားဒီမိုကရေစီ အဖွဲ့ချုပ် NLD ပြည်သူ့လွှတ်တော်အမတ်လောင်း ဦးဝင်းမင်းက စက်တင်ဘာ ၁၆ရက်တွင် မဇ္ဈိမကိုပြောသည်။
"ကျွန်တော်တို့ ၈ရက်နေ့ကတည်းက ကိုကိုးကျွန်းကိုသွားဖို့ မြို့နယ်ထွေအုပ်ကိုတင်တယ်။ မြို့နယ်က တိုင်းအစိုးရကို လျှောက်ရတယ်ဆိုလို့ ၁၀ရက်နေ့မှာထပ်ပြီး တိုင်းကိုတင်ထားတယ်။ ၁၄ ရက်ကမှ ပစ္စည်းစာရင်း၊ လူစာရင်းတောင်းတယ်။ ဘယ်တော့သွားရမလည်းဆိုတာက အခုထိ လုံးဝမသိရသေးဘူး။" ဟု ၄င်းကပြောသည်။
ကိုကိုးကျွန်းမြို့နယ်၌ တပ်မတော်သားများနှင့် ရဲတပ်ဖွဲ့ဝင်များအပါအ၀င် ဆန္ဒမဲပေးပိုင်ခွင့်ရှိသူ ဦးရေ ၁၀၀၀ ကျော် သာ ရရှိကြောင်း ရန်ကုန်တောင်ပိုင်းခရိုင် ရွေးကောက်ပွဲကော်မရှင်ခွဲ ဥက္ကဌ ဦးမြတ်စိုးက မဇ္ဈိမကို ပြောသည်။ ၂၀၁၅ ရွေးကောက်ပွဲသို့ ၀င်ရောက်ယှဉ်ပြိုင်ကြမည့် ကိုယ်စားလှယ်လောင်းအားလုံးကို စက်တင်ဘာလ ၈ရက်မှ နိုဝင်ဘာ ၆ ရက်ထိ မဲဆွယ်စည်းရုံးနိုင်သည်ဟု ပြည်ထောင်စုရွေးကောက်ပွဲကော်မရှင်က ရက်ပေါင်း ၆၀ ခွင့်ပြုထားသည်။
"NLD ကဘဲ လျှောက်သေးပါတယ်။ လူ ၆ဦး တင်ထားတယ်။ မနေ့ကဘဲ တိုင်းကိုတင်ပေးလိုက်တယ်။ ပြန်ပြီး အကြောင်းကြားတာ မရသေးဘူး။ မဲဆွယ်ဖို့ကိစ္စအတွက် NLD တစ်ခုကဘဲ တင်ထားသေး တယ်။ တစ်ခြားသူတွေ တင်တာတော့ မတွေ့ဘူး။" ဟု ရန်ကုန်တောင်ပိုင်းခရိုင်မှူး ဦးကျော်ဝင်းဦးက ပြောသည်။ ကိုကိုးကျွန်းပြည်သူ့လွှတ်တော်မဲဆန္ဒနယ်တွင် အာဏာရပါတီပြည်ခိုင်ဖြိုးမှ ကာကွယ်ရေးဦးစီးချုပ်ရေ (ငြိမ်း) သူရဦးသက်ဆွေနှင့် အမျိုးသားဒီမိုကရေစီအဖွဲ့ချုပ် NLD မှ ဦးဝင်းမင်းတို့ နှစ်ဦးသာ ၀င်ရောက် ယှဉ်ပြိုင်ကြခြင်းဖြစ်သည်။ "ပြည်ခိုင်ဖြိုးကပြိုင်မယ့် သူရဦးသက်ဆွေက မဲဆွယ်စည်းရုံးဖို့ မသွားသေးပါဘူး။ သူသွားရင်လည်း တောင်ပိုင်းခရိုင် ပြည်ခိုင်ဖြိုးကလိုက်သွားရမှာပါ။ အခုထိတော့ မသွားသေးဘူး။" ဟု ရန်ကုန်တောင်ပိုင်း ခရိုင်ပြည်ခိုင်ဖြိုး အတွင်းရေးမှူး ဦးလွင်ဦးက ဆိုသည်။
၎င်းမြို့နယ်သို့သွားရောက်လိုသူများက ရန်ကုန်တောင်ပိုင်းခရိုင်ရုံးတွင် တွဲလျက်ဖွင့်လှစ်ထားသည့် ကိုကိုးကျွန်းမြို့နယ်ရုံး သို့ ဦးစွာလျှောက်ထားပြီးမှ လေယာဉ်ကြုံ၊ သဘောင်္ကြုံတို့ဖြင့် သွားလာရသည်ဟု ရန်ကုန်တောင်ပိုင်းခရိုင်မှူး ဦးကျော်ဝင်းဦးက စက်တင်ဘာ ၁၆ရက်၌ မဇ္ဈိမကို ပြောသည်။ ရန်ကုန်တိုင်းရှိ မြို့နယ်ပေါင်း ၄၅ ခုတွင်ပါဝင်သည့် ကိုကိုးကျွန်းမြို့နယ်၌ တပ်မတော်အခြေစိုက်စခန်းများ တည်ရှိနေသည်။
No comments:
Post a Comment