မွန်သတင်းအေဂျင်စီ
စစ်အစိုးရ၏ လာမည့် ၂၀၁၀ ရွေးကောက်ပွဲတွင် တချက်ခုတ်နှစ်ချက်ပြတ် စေသည့် ရည်ရွယ်ချက်များ ပါရှိလေသည်။ ရွေးကောက်ပွဲအား ကျင်းပပေးခြင်းအားဖြင့်လည်းကောင်း၊ နိုင်ငံရေးပါတီများကို တရားဝင်မှတ်ပုံတင်စေခြင်းအားဖြင့်လည်းကောင်း ဒီမိုကရေစီ အင်အား စုများတွင် ရွေးကောက်ပွဲအား သပိတ်မှောက်လိုသည့်အုပ်စုနှင့် ''တကျပ်ရက တကျပ်ယူမည်၊ တမတ်ရက တမတ်ယူမည်'' ဆိုသည့် ရွေးကောက်ပွဲဝင်လိုသည့်အုပ်စုတို့၏ အကွဲအပြဲကို တွေ့ရပေမည်။
တချိန်တည်းတွင် ဒီမိုကရေစီအင်အားစုတို့မှ ပဲ့ထွက်လာသည့်အုပ်စုအား ဂရုစိုက်ပဲ စစ်အုပ်စုအား ထောက်ခံသည့် နိုင်ငံရေးပါတီများသာ အနိုင်ရရှိအောင် ဆောင်ရွက်ပေးကာ ရွေးကောက်ပွဲ၌ ထိုစစ်အုပ်စု နိုင်ငံရေးပါတီ အနိုင်ရရှိအောင် စီစဉ်ဆောင်ရွက် ကြပ်မတ်ပေးလိမ့်မည် ဖြစ်သည်။ ရွေးကောက်ပွဲအား မနိုင်နိုင်အောင် ဆောင်ရွက်မည်ဖြစ်ပေသည်။ ဤကဲ့သို့ လက်တလုံးကြားနှင့် အနိုင်ရရှိအောင် ဆောင်ရွက်နိုင်ကြောင်းကို စစ်အုပ်စု၏ ၂၀၀၈ ခုနှစ် မေလလူထုဆန္ဒခံယူပွဲတွင် သက်သေပြခဲ့ပြီး ဖြစ်ပေသည်။
ယခုလာမည့် ၂၀၁၀ ရွေးကောက်ပွဲ၌လည်း ၁၉၉၀ ရွေးကောက်ပွဲတွင် သင်ခန်းစာယူခဲ့သည့် စစ်အစိုးရသည် လူထုဆန္ဒသဘောထားအမှန်အား ဖော်ထုတ်ပေးမည်မဟုတ်ပဲ လူထုဆန္ဒအား မိမိတို့ဖွဲ့စည်းထားသည့် နိုင်ငံရေးပါတီဘက်သို့ ရောက်ရှိအောင် ဆောင်ရွက်မည် ဖြစ်ပေသည်။ တရားသည် မတရားသည်များကို ၄င်းတို့ဂရုစိုက်မည် မဟုတ်ပေ။
လက်ရှိကာလတွင် အစိုးရအနေဖြင့် ကြံ့ခိုင်ရေးအဖွဲ့အား နိုင်ငံရေးပါတီအဖြစ်သို့ ပြောင်းလဲပစ်ရန် ကြိုးပမ်းနေဆဲ ဖြစ်ပေသည်။ မကြာသေးမီကာလတွင် ကြံ့ခိုင်ရေးအဖွဲ့အား ၄င်းတို့၏အဖွဲ့ဝင်အင်အား မည်မျှရှိသည်ကို အတိအကျ စာရင်းပြစုစေပြီး ရွေးကောက်ပွဲတွင် ဝင်ရောက်ယှဉ်ပြိုင်မည်ဆိုပါက တနိုင်ငံလုံးအတိုင်းအတာတွင် အမတ်နေရာမည်မျှရနိုင်သည်ကို ခန့်မှန်းစေပါသည်။ တချိန်တည်းတွင် လူထုမှ ထောက်ခံမှု လေးစားမှုမရှိသော ခြစားအကျင့်ပျက်ကြောင်း နာမည်ထွက်နေသည့် ကြံ့ခိုင်ရေးခေါင်းဆောင်တို့အား ဖြုတ်ထုတ်ကာ လူထုမှ လေးစားသည့် ကျောင်းဆရာ၊ ဆေးမှူးနှင့် အစိုးရဝန်ထမ်းတို့ဖြင့် အစားထိုးစေပါသည်။
ထို့အပြင် လာမည့်ရွေးကောက်ပွဲတွင် လူထုထောက်ခံမှု ရရှိရန်အတွက် ရပ်ရွာဒေသတို့တွင် အရေးပါသော ဖွံ့ဖြိုးရေးလုပ်ငန်းများအား ကြံ့ခိုင်ရေးအဖွဲ့မှ ဦးစီးပြီး အကောင်အထည် ဖော်စေပါသည်။ ကျောင်းနှင့်ဆေးရုံများ တည်ဆောက်ပြီး၊ လမ်းနှင့်တံတားများ ဖောက်လုပ်ခြင်း စသည့်လုပ်ငန်းများကို ဆောင်ရွက်စေပါသည်။
ထိုကဲ့သို့ ဆောင်ရွက်ခြင်းဖြင့် အကယ်၍ ကြံ့ခိုင်ရေးအဖွဲ့အား နိုင်ငံရေးပါတီအဖြစ် ပြောင်းလဲလိုက်မည်ဆိုပါက ၄င်းတို့တွင် လူထုမှ လေးစားသောခေါင်းဆောင်နှင့် လူထုအကျိုးပြုလုပ်ငန်းအတွက် ဆောင်ရွက်ခဲ့ခြင်းတို့ကြောင့် ၄င်းတို့နိုင်ငံရေးပါတီမှ မဲအများစုရရှိအောင် ဆောင်ရွက်စေပါသည်။
တချိန်တည်းတွင် ၄င်းတို့နှင့်အယှဉ်အပြိုင် နိုင်ငံရေးပါတီတို့အား နှိပ်ကွပ်ပြီး ကြံ့ခိုင်ရေးမှ အပြတ် အသတ်အနိုင်ရရှိအောင် ဆောင်ရွက်မည် ဖြစ်ပေသည်။ ပြည်ထောင်စုပါလီမာန်နှင့် ပြည်နယ်ပါလီမာန်တို့တွင် မဲအားလုံး၏ (၅၀%) ကျော် ရရှိအောင် စစ်အစိုးရမှ ဆောင်ရွက်ပေမည်။ ဖွဲ့စည်းအုပ်ချုပ်ပုံ အခြေခံဥပဒေအရ စစ်တပ်မှ ကိုယ်စားလှယ် (၂၅%) ကို ထည့်သွင်းမည် ဖြစ်ပေသည်။
ဤအချိန်တွင် ဒီမိုကရေစီကို လိုလားသော အင်အားစုများအနေဖြင့် ပါလီမန်၌ အမတ်နေရာ (၂၅%) အောက်သာ ရရှိသည့်အတွက် မည်သို့မှ မတတ်သာသောအခြေအနေတွင် ရှိနေနိုင်ပေသည်။ ဖွဲ့စည်းပုံအခြေခံဥပဒေအား ပြင်ဆင်ရန် တောင်းဆိုချက်ကို စစ်အုပ်စုဘက်မှ လိုက်လျောမည်မဟုတ်ပေ။ ပါလီမာန်နှင့် အစိုးရတို့ကတဆင့် ဒီမိုကရေစီလမ်းကြောင်းကို ဖော်ဆောင်နိုင်မည် မဟုတ်ပေ။
ထို့ကြောင့် ၂၀၁၀ ရွေးကောက်ပွဲကို အတိုက်အခံအင်အားစုတို့အနေဖြင့် အထူးဂရုပြရပေမည်။ ဒီမိုကရေစီအစစ်အမှန်ကို လိုလားသည့် အင်အားစုအားလုံး အတူတကွညီညွှတ်စွာဖြင့် ၂၀၁၀ ရွေးကောက်ပွဲကို ဆန့်ကျင်သင့်ပေသည်။ အားလုံးသဘောမတူနိုင် ဖြစ်မည်ဆိုပါက တဖွဲ့နှင့်တဖွဲ့၊ တပါတီနှင့်တပါတီ သဘောထားညှိနှိုင်းသင့်ပေသည်။ ရွေးကောက်ပွဲအတွင်း ဝင်ရောက်ယှဉ်ပြိုင်မည့် နိုင်ငံရေးပါတီတို့၏ ဒီမိုကရေစီပြောင်းလဲရေးအတွက် ဆောင်ရွက်နိုင်သည့် အခန်းကဏ္ဍနှင့် ဆက်လက်အတိုက်အခံ ပြုလုပ်သွားမည့် နိုင်ရေးပါတီတို့၏ အခန်းကဏ္ဍတို့အား ခွဲခွဲခြားခြား သတ်မှတ်သင့်ကြောင်း တင်ပြလိုက်ရပေသည်။
No comments:
Post a Comment