မင်းအောင် (နိရဉ္စရာ) “စစ်တပ်ထဲကို ၀င်ရင် ကျန်နေခဲ့တဲ့ မိသားစုတွေကိုပါ ရိက္ခာ ထောက်ပံ့ပေးမည်” ဟုဆိုကာ ချင်းပြည်နယ် ပလက်ဝမြို့နယ် အထက်ပိုင်းရှိ ကျေးရွာများမှ အရွယ်ရောက်သူ ချင်းနှင့် ခမီး လူငယ်များကို မက်လုံများပေးပြီး စစ်တပ်ထဲဝင်ရန် ဒေသတွင်းရှိ စစ်တပ် တပ်ရင်းများမှ စည်းရုံးနေသည်။ပလက်ဝမြို့နယ်အတွင်း အစားအစာ ရှားပါးပြီး လူထုများ အနေဖြင့် ရိက္ခာ မလုံလောက်မူနှင့် ရင်ဆိုင်နေရခြင်း အပေါ် အခွင့် ကောင်းယူ ပြီး ယခုကဲ့သို့ စစ်တပ်က စည်းရုံးနေခြင်း ဖြစ်သည်ဟု ဒေသခံ တဦးက ပြောသည်။
“အခု စည်းရုံးနေတာက ရှေ့တန်းစစ်ကြောင်းတွေက စည်းရုံးနေတာ ဖြစ်ပါတယ်။ လွန်ခဲ့တဲ့ နှစ်လလောက်က တခါ လာစည်းရုံး ခဲ့ပါတယ်။ မအောင်မြင် ခဲ့ပါဘူး။ ခုတခါ လူတွေ ထမင်းငတ်နေတော့ မိသားစု တွေကို ရိက္ခာတွေ ထုတ်ပေးမယ် သားယောင်္ကျားတွေကို တပ်ထဲကို သွင်းကြပါဆိုပြီး လိုက်လံ စည်းရုံးနေတာ ဖြစ်ပါတယ်။”
ယခုကဲ့သို့ လူငယ်များကို စစ်တပ်ထဲ ၀င်ရန် လိုက်လံ စည်းရုံးနေသည့် ရှေ့တန်း တပ်ရင်းများမှာ ခလရ ၃၄၊ ခမရ ၃၅၄ နှင့် ပုဏ္ဏားကျွန်း အခြေစိုက် ခမရ ၅၅၀ တို့ဖြစ်ကြသည်။
အိန္ဒိယ နယ်စပ်တွင် တည်ရှိသော သရော်အိုင်ကျေးရွာမှ ရခိုင် အမျိုးသား တဦးကလည်း “သူတို့ပြောတာက စစ်တပ်ထဲကို ၀င်ရင် လစာနဲ့ ရိက္ခာကို လုံလောက်အောင် ပေးမယ်။ ကျန်နေခဲ့တဲ့ မိသားစု တွေကိုလည်း စားဝတ်နေရေး အခက်အခဲတွေ မရှိအောင် ထောက်ပံ့ မယ်။ နောက်ပြီး ဆန်၊ ဆား၊ ဆီ စတာတွေ မပြတ်ရအောင် ထောက်ပံ့ ပေးမယ်လို့ ပြောပီး လူငယ်တွေကို တပ်ထဲကို ၀င်ရောက်နိုင်အောင် စည်းရုံးနေပါတယ်။” ဟု ပြောသည်။
အထူးသဖြင့် စစ်တပ်မှ လိုက်လံ စည်းရုံးနေသည့် ကျေးရွာများမှာ ပလက်ဝမြို့နှင့် သရိုင်အိုင် ကျေးရွာအကြားရှိ ချင်းဒေါင် ကျေးရွာ၊ ကျီးရှည်အောက်ရွာ၊ ကျီးရှည်အထက်ရွာ၊ ငါးရှားရွာ၊ သရော်အိုင်၊ နှုန်းဗူးကျေးရွာနှင့် တောင်ပြို ကျေးရွာများ အပါအ၀င် တခြားအနီးအနား ကျေးရွာများမှ ဖြစ်ကြသည်။
ယခုကဲ့သို့ စည်းရုံးနေသော်လည်း လူငယ် တဦးစ နှစ်ဦးစ ၀င်ရောက်ရုံမှ လွဲပြီး အများစု လူငယ်များမှာ စစ်တပ်ထဲသို့ ၀င်ရောက်ခြင်း မရှိကြောင်း အမည်မဖော် လိုသည့် ကျေးရွာလူကြီး တဦးက ယခုကဲ့သို့ ရှင်းပြသည်။
“ဘယ်သူမှ စိတ်မ၀င်စားဘူး။ သူတို့ ပေါ်တာ ဆွဲခဲ့တာတွေ၊ မတရား အနိုင်ကျင့်ခဲ့တာတွေ အမျိုးသမီးတွေ၊ အတင်း အဓမ္မပြု ကျင့်ခဲ့တာတွေကို ဘယ်သူမှမမေ့နိုင်ကြသေးဘူး။ ဒါကြောင့် စစ်တပ်ကို လူတွေက မုန်းနေကြတဲ့ အတွက် ဘယ်လူငယ်မှ စစ်တပ်ထဲဝင်ဖို့ စိတ်ဝင်စားတဲ့ အခြေအနေမှာ ရှိနေတာကို မတွေ့ရပါဘူး။”
တခြားတဘက်တွင်လည်း ပလက်ဝ အခြေစိုက် ခမရ ၂၈၉ တပ်ရင်းမှ တပ်ရင်းမှူး ဦးဆောင်ပြီး “ဒေသဖွံ့ဖြိုးရေးစီမံကိန်း” ဆိုသည့် ခေါင်းစဉ် တပ်ပြီး ပလက်ဝ မြို့နယ်ရှိ ကျေးရွာများအတွင်း သစ်ပင် စိုက်ပျိုးရေး၊ ယင်လုံ အိမ်သာ တည်ဆောက်ရေးစသည့် ကျန်းမာရေး ပညာပေး လုပ်ငန်း များကို ကျန်းမာရေးဌာနနှင့် သစ်တောဌာနမှ တာဝန်ရှိ သူများနှင့် အတူ ကျေးရွာများသို့ သွားရောက်ပြီး ပြုလုပ်ကာ လူငယ်များကို စစ်တပ်ထဲဝင်ရန် စည်းရုံးရေး လုပ်ဆောင် နေသည်ဟု သိရသည်။
စစ်တပ်ထဲသို့ ၀င်ရောက်ရန် အခွင့်အရေးပေးပြီး စည်းရုံးသော်လည်း ၀င်ရောက်သူ မရှိသဖြင့် ရွာတရွာကို (၂) ယောက်ကျနုန်းဖြင့် ယခင်ကကဲ့သို့ အတင်း စစ်သား ကောက်ခံ စုဆောင်း လာမည်ကို ဒေသခံများက စိုးရိမ်နေကြောင်း သိရသည်။
No comments:
Post a Comment