ဖြိုးကြီး
အရွယ်မရောက်သေးသည့် ကလေးသူငယ်များ စစ်မှုထမ်းခြင်းမှ ကြိုတင်ကာကွယ်ရေး အသိပညာပေး နည်းပြသင်တန်းကို ပြုလုပ်နေ သော်လည်း အသက်မပြည့်သေးသည့် ကလေးငယ်များ စစ်သားအဖြစ် စုဆောင်းခံနေရလျှက်ရှိသည်။
စစ်အစိုးရက ယခုလ ၁၅ ရက်နေ့မှစ၍ ကလေးသူငယ်များ စစ်မှုထမ်းခြင်းမှ ကြိုတင်ကာကွယ်ရေး အသိပညာပေး နည်းပြသင်တန်းကို ၅ ရက်တာ ပြုလုပ်နေလျှက်ရှိသည်။
ထိုကဲ့သို့ စစ်အစိုးရက လုပ်ဆောင်နေသော်လည်း ၂၀၀၉ ခုနှစ်အတွင်း ကလေးစစ်သားအမှုပေါင်း (၁၂၁) မှုရှိခဲ့ကြောင်း လမ်းပြကြယ် ဦးအေးမြင့်က မကြာသေးခင်က ထုတ်ပြန်ပြောဆိုထားသည်။
အဆိုပါ သင်တန်းသို့ ကာကွယ်ရေးဝန်ကြီးဌာန၊ အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ လူမှုဝန်ထမ်းဦးစီးဌာန၊ အကျဉ်းဦးစီးဌာနာ၊ လူဝင်မှုကြီးကြပ်ရေးနှင့် အမျိုးသားမှတ်ပုံတင်ဦးစီးဌာနနှင့် နိုင်ငံခြားရေးဌာနတို့မှ သင်တန်းသား ၄၀ ဦးတက်ရောက်နေလျှက်ရှိသည်။
ယခုနှစ်ဆန်းပိုင်းတွင်လည်း ကလေးစစ်သားစုဆောင်းမှုများ ဆက်လက်ရှိနေပြီး ပဲခူးမြို့မှ မောင်ဝေချိုဦး၊ ဖျာပုံခရိုင်၊ အမာမြို့နယ်မှ မောင်အောင်ကိုဇင်နှင့် မကွေးတိုင်း၊ တောင်တွင်းကြီးမြို့မှ မောင်ကျော်မင်းထွန်းတို့ သုံးဦးကို သက်ဆိုင်ရာက မိဘများထံ ပြန်ပို့ဆောင်ခဲ့သော်လည်း ကျန်ကလေးငယ်များမှာ စစ်အခြေခံသင်တန်းကျောင်းများတွင် ရှိနေဆဲဖြစ်သည်။
ကမ္ဘာ့အလုပ်သမားအဖွဲ့ချုပ် (ILO) သို့ ယခုနှစ်တွင်း ကလေးစစ်သားနှင့်ပတ်သက်သည့် အမှုပေါင်း (၇) မှု တိုင်ထားလျှက်ရှိပြီး ဇန်နဝါရီလအတွင်းက မြန်မာနိုင်ငံသို့လာရောက်ခဲ့သည့် (ILO) ဦးဆောင်ညွှန်ကြားရေးမှူး မစ္စတာကယ်ရီတာ ပီအိုလာနှင့်အဖွဲ့အား လမ်းပြကြယ်အဖွဲ့မှ ဦးအေးမြင့်တို့ တွေ့ဆုံစဉ် ကလေးစစ်သားနှင့် ပတ်သက်သည့်ကိစ္စများကို ဆွေးနွေးခဲ့ကြသည်။
ယခုနှစ်ဆန်းပိုင်းအတွင်း မြောက်ဥက္ကလာမြို့နယ်မှ အဖဦးသိန်းထွန်း၏သား မောင်အောင်ကျော်သူအပါဝင် ကလေးစစ်သားအဖြစ် စုဆောင်းခံရသူ (၉) ဦးရှိကြောင်း ဦးအေးမြင့်က ပြောသည်။
စစ်အစိုးရအနေဖြင့် အရွယ်မရောက်သေးသည့် ကလေးသူငယ်များအား ကာကွယ်ထိန်းသိမ်းစောင့်ရှောက်ရေး ကော်မတီကို ၂၀၀၄ ခုနှစ် ဇန်နဝါရီလ ၅ ရက်နေ့တွင် လမ်းညွှန်ချက် (၃) ခုချမှတ်၍ ဖွဲ့စည်းထားခဲ့သော်လည်း နအဖ၏ စစ်သည် အင်အားလိုအပ်ချက်အရ အသက်မပြည့်သည့် ကလေးငယ်များမှာ လစဉ်စစ်သားအဖြစ် စုဆောင်းခံနေရလျှက်ရှိသည်။
ထို့အပြင် ယခုရက်ပိုင်းအတွင်း ကမ္ဘာ့ကုလသမဂ္ဂ လူ့အခွင့်အရေးအထူးကိုယ်စားလှယ် မစ္စတာ သောမတ်အိုဟေး ကွမ်တားနား မြန်မာနိုင်ငံသို့ ရောက်ရှိနေလျှက်ရှိပြီး ရခိုင်ပြည်နယ်သို့ သွားရောက်ကာ လူ့အခွင့်အရေးအခြေအနေများ လေ့လာစုံစမ်းနေလျှက်ရှိသည်။
No comments:
Post a Comment