၂၀၁၁ ခုနှစ်တွင် ဖုန်းသုံးစွဲမှု၊ အင်တာနက်အသုံးပြုမှု နှင့် IT ပိုင်းဆိုင်ရာ ဆောင်ရွက်မှုများအားလုံးကို ရတနာပုံတယ်လီပို့ ကုမ္ပဏီ လီမိတက် မှ ဦးဆောင်လုပ်ကိုင်သွားမည်ဟု သိရသည်။ အာဏာပိုင်များက ပြည်သူ လူထုကို ၀န်ဆောင်မှု ပီပီပြင်ပြင်နှင့်ထိထိရောက်ရောက်ပေးနိုင်ရန် ရည်ရွယ်ချက်ဖြင့် အစိုးရ လုပ်ငန်းနှင့် မသက်ဆိုင် သည့် ရတနာပုံတယ်လီပို့ ကုမ္ပဏီ လီမိတက်ကို ယခုကဲ့သို့ ဦးဆောင်လုပ်ပိုင်ခွင့် ပေးခြင်းဖြစ် သည်ဟု မြန်မာ့ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာနှင့် နီးစပ်သူ အရာရှိ တဦးက ဆိုသည်။
ယင်းကဲ့သို့ လုပ်ဆောင်ရန် ရတနာပုံတယ်လီပို့ နှင့် ပူးပေါင်းလုပ်ကိုင်မည့် စီးပွားရေး လုပ်ငန်းရှင်များ ပူးပေါင်းမှုဆိုင်ရာ သ ဘောတူစာချုပ်ကို ၂၀၁၁ ၊ ဇန်န၀ါရီလ ၈ ရက်နေ့မှ ၁၂ရက်နေ့အထိကျင်းပခဲ့သော မြန်မာ အိုင်စီတီ ရက်သတ္တပတ်ပွဲတော် တွင် ချုပ်ဆိုခဲ့ကြောင်း သိရသည်။
ရတနာပုံတယ်လီပို့ ကုမ္ပဏီ သည် မြန်မာ့ဆက်သွယ်ရေးဌာန၏ ခွင့်ပြုချက်ဖြင့် ပုဂ္ဂလိက ကုမ္ပဏီများ စုစည်းတည်ထောင်ထား
ခြင်း ဖြစ်ပြီး မြန်မာ့ဆက်သွယ်ရေး ၀န်ကြီးဌာနမှ လုပ်ကိုင်နေသည့် ဆက်သွယ်ရေးဆိုင်ရာ လုပ်ငန်းများကို ဦးဆောင် လုပ်ကိုင် ခွင့်ရရှိထားသည်ဟု ရတနာပုံ တယ်လီပို့ နှင့် နီးစပ်သူ တဦးက ပြောသည်။
“အစိုးရရဲ့ ခွင့်ပြုချက်နဲ့ ကုမ္ပဏီသေးသေးလေးတွေ က ရှယ်ယာတွေ အသီးသီးထည့်ပြီး ဖွဲ့ထားတဲ့ ရတနာပုံတယ်လီပို့ ကနေ တခြား ကုမ္ပဏီတွေနဲ့ ပူးပေါင်းပြီး နည်းပညာပိုင်းကို ဦးဆောင်လုပ်မှာဆိုတော့ ပုဂ္ဂလိကအပိုင်းမှာ အာဏာပိုင်တွေဘက်က ဖွင့် ပေးတဲ့ သဘောတွေပါတယ်။ အာဏာပိုင်တွေက ၃၀ ရာခိုင်နှုန်းလောက်ရှယ်ယာပါတော့ လုံးဝ ၀င်မပါတာမျိုးတော့ မဟုတ် ဘူး”ဟု သူက ဧရာဝတီကိုပြောသည်။
၎င်းက ဆက်၍ “အခု အခြေအနေက ဆက်သွယ်ရေးဘက် က ဒီအပိုင်းတွေကို တိုက်ရိုက် ပူးပေါင်းပြီး မလုပ်တော့ဘူး။ အကျိုးအမြတ် အတွက် ရတနာပုံတယ်လီပို့ နဲ့ ဘယ်လို သဘောတူညီမှုတွေလုပ်ထားလဲတော့ မသိဘူး”ဟု ဆိုသည်။
ရတနာပုံ တယ်လီပို့မှ လွှင့်တင်ထားသော ရတနာပုံဝက်ပေါ်တယ်လ် တွင် ပုဂ္ဂလိကပိုင် ဘဏ်သစ်ကြီးများနှင့် ချိတ်ဆက်ကာ အွန်လိုင်းဝန်ဆောင်မှုများ ပြုလုပ်ပေးသွားရန် စီစဉ်နေသည်ဟု ပြည်တွင်းထုတ်ဂျာနယ်များတွင် ဖော်ပြခဲ့သည်။
“၀က်ဘ် ဆိုက်ထောင်ပြီး ကြော်ငြာတွေတင်၊ သတင်းတွေ တင်တာလောက်ကတော့ အဆင်ပြေပေမယ့် တယ်လီပို့ နဲ့ တွဲလုပ်မယ့် ဥပမာ- အွန်လိုင်း ဘဏ်စနစ်တို့၊ ဖုန်းဘီလ်ဆောင်တာတို့ ဒီလိုမျိုးတွေကတော့ အလှမ်းကွာလွန်းပါတယ်။ အရင်ဆုံး လုပ်သင့်တာ အင်တာနက်လိုင်းမကျဖို့ ဘယ်လို အရှိန်မြှင့်မလဲဆိုတာပဲ။ ပူးပေါင်းလုပ်မယ့် လုပ်ငန်းရှင်တွေဘက်က နည်းပညာ တွေ ၊ လိုအပ်တဲ့ စက်ပစ္စည်းတွေ၊ ပညာရှင်တွေ ခေါ်ပြီး ဦးဆောင် မယ် ဆိုရင်တော့ အနည်းငယ်ဖြစ်လာနိုင်ပေမယ့် အင်တာ နက်လိုင်း ကောင်းဖို့က အခြေခံလိုအပ်ချက် ဖြစ်နေတယ်။ အာဏာပိုင်တွေ ဘက်ကတော့ ပုဂ္ဂလိက လုပ်ငန်းတွေကို လုပ်ပိုင် ခွင့် ပေးလိုက် ပြန်ချုပ်ကိုင်လိုက် မဖြစ်ဖို့တော့ လိုတယ်”ဟု IT သင်တန်းများ ဖွင့်လှစ် သင်ကြား ပေးနေသည့် လုပ်ငန်းရှင် တဦး က ဆိုသည်။
လက်ရှိ မြန်မာပြည်၏ အင်တာနက်ထိန်းချုပ်မှုတွင် စစ်ဘက်သုံး အင်တာနက်လိုင်း ကို တပ်မတော် ကွန်ပျူတာ ကွန်ရက်များ ညွန်ကြားရေးမှူးရုံး ကက(ကွန်) ၊ ၀န်ကြီးဌာနသုံး အင်တာနက် လိုင်းများကို မြန်မာ့ ဆက်သွယ်ရေးလုပ်ငန်း(MPT) နှင့် အရပ်ဘက်သုံး အင်တာနက်လိုင်းများကို ရတနာပုံတယ်လီပို့ မှ ချုပ်ကိုင် ဆောင်ရွက်နေသည်။
“ကောင်းတာ တခုက အရင်ကဆို လုပ်ခွင့်ရချင်မှ ရမှာ ခုဆို အစိုးရနဲ့ ပေါင်းပြီး အင်တာနက်သုံးလို့ရတဲ့ ဖုန်းတွေ ရောင်းလို့ရ လာပြီ။ အာဏာပိုင်တွေ ဘက်ကတော့ ဒီဟာကို ပိတ်လိုက်ဖွင့်လိုက် မလုပ်ဖို့တော့လိုတယ်။ FEC 200 တန် ဖုန်းကတ်တွေ တုန်းက ဆိုရင်လည်း ခွင့်ပြုလိုက်ပြီး နောက် လုံခြုံရေးစိတ်မချရလို့ ရောင်းချခွင့်ပိတ်ထားတာမျိုးတွေ ဒီလို ပြဿနာတွေ ဖြစ် မလာအောင်တော့ ကိုင်တွယ်နိုင်ဖို့ တော့လိုတယ်”ဟု မြန်မာ့ဆက်သွယ်ရေး၊ စာတိုက်နှင့် ကြေးနန်းလုပ်ငန်းနှင့်နီးစပ်သည့် အမည်မဖော်လိုသူ နည်းပညာရှင်တဦးက ဆိုသည်။
စစ်အစိုးရက တိုက်ရိုက် ချုပ်ကိုင်မှုပြုလုပ်ရန် မလိုသည့်အပြင် ကြားခံကုမ္ပဏီများကို အသုံးချ ဆောင်ရွက်သည့် နည်းလမ်း တခုလည်းဖြစ်နိုင်သည်ဟု သူက ဧရာဝတီကို ပြောသည်။
ရတနာပုံတယ်လီပို့ နှင့် ပူးပေါင်းလုပ်ကိုင်ရန် ဦးတေဇ ပိုင် E-lite ကုမ္ပဏီ ၊ ဦးကျော်ဝင်း ပိုင် ရွှေသံလွင် ကုမ္ပဏီ၊ e Trade ကုမ္ပဏီ ၊ Asia Mega Link ကုမ္ပဏီ၊ Myanmar Technology Gateway ကုမ္ပဏီ တို့ အပြင် ကုမ္ပဏီ ၁၅ ခုခန့် စာချုပ် ချုပ်ဆိုရာ တွင် ပါဝင်ခဲ့သည်။
ထို့အပြင် မိုဘိုင်းဖုန်းထုတ်လုပ်မှုကို စစ်အစိုးရနှင့် နီးစပ်သည့် ထူး ကုမ္ပဏီ နှင့် အေးရှား ဝေါလ် ကုမ္ပဏီ တို့ လုပ်ကိုင်ခွင့်ရရှိ
ကြောင်း ပြည်တွင်းထုတ် Weekly Eleven ဂျာနယ် အင်တာနက်စာမျက်နှာတွင် ဖော်ပြထားသည်။
ဦးတေဇ သည် အာရှစိမ်းလန်းမှု ဖွံ့ဖြိုးရေး ဘဏ်သစ် အပြင် ကျပ် ၅ သိန်းတန် CDMA တယ်လီဖုန်း ဟန်းဆက်များ ထုတ်လုပ် ရောင်းချနေပြီး တခါသုံး ဖုန်းကတ်များကိုလည်း မြန်မာ့ ဆက်သွယ်ရေး လုပ်ငန်းနှင့် အကျိုးတူ ပူးပေါင်းဆောင်ရွက်ခွင့် ရရှိ ထားသူ ဖြစ်သည်။
ဦးတေဇပိုင် ထူး ကုမ္ပဏီ၏ လက်အောက်ခံ ကုမ္ပဏီတခုဖြစ်သော E – Lite ကုမ္ပဏီသည်လည်း ဖိုက်ဘာဆက်ကြောင်းဖြင့် အင်တာနက်၊ ရုပ်မြင်သံကြားလိုင်း၊ တယ်လီဖုန်းလိုင်း ၃ မျိုး အသုံးပြုနိုင်သော Fiber to the Curb၊ Fiber to the Home၊ Fiber to the Building (FTTx) ကို မြန်မာ့ ဆက်သွယ်ရေး လုပ်ငန်းနှင့် အကျိုးတူ ပူးပေါင်းဆောင်ရွက်ခွင့် ရရှိခဲ့သည်။
မန္တလေးတိုင်း ပြင်ဦးလွင်မြို့နယ် ရတနာပုံနည်းပညာ မြို့သစ်ရှိ ရတနာပုံတယ်လီပို့ ကုမ္ပဏီ လီမိတက်ကို ၂၀၀၆ ခုနှစ် အတွင်း စတင် တည်ထောင်ခဲ့ပြီး နည်းပညာ တက္ကသိုလ် (ရတနာပုံ ဆိုက်ဘာ စီးတီး)အဖြစ် ပြောင်းလဲဖွင့်လှစ်ခဲ့သည်။
No comments:
Post a Comment