ခင်ဦးသာ Friday, 14 January 2011
ရွေးကောက်ပွဲ၌ အနိုင်ရထားသော တိုင်းရင်းသားပါတီများ စုပေါင်း၍ ပေါ်ပေါက်လာမည့် လွှတ်တော်၌ ဒုတိယ သမ္မတ တဦးကို ၎င်းတို့ ကိုယ်စားလှယ်များထဲမှ အဆိုပြုသွားမည်ဟု ပါတီခေါင်းဆောင်များက ပြောသည်။
“ဖွဲ့စည်းပုံပါ အတိုင်းအဆိုပြုမှာပါ။ ပြည်နယ် ၀န်ကြီးချုပ်ရာထူးတွေကိုတော့ အဆိုပြုမယ်ဆိုပေမယ့် ရနိုင်မယ် မထင်ဘူး” ဟု ရခိုင်တိုင်းရင်းသားများ တိုးတက်ရေးပါတီ (RNDP) ၏ ဥက္ကဋ္ဌ ဒေါက်တာ အေးမောင်က ဧရာဝတီကို ပြောသည်။
ဇန်န၀ါရီလ ၁၅ ရက်နေ့တွင် တိုင်းရင်းသားပါတီ ၆ ခုခန့်သည် ရန်ကုန်မြို့၌ အစည်းအဝေးပြုလုပ်၍ လွှတ်တော်၌ ဆွေးနွေးကြ မည့် အကြောင်းအရာများအတွက် ကြေညာချက် တစောင် ထုတ်ပြန်သွားမည်ဟု ရှမ်းတိုင်းရင်းသားများ ဒီမိုကရက်တစ် ပါတီ (SNDP) ခေါ် ကျားဖြူပါတီ၏ ဒု-ဥက္ကဋ္ဌ ဦးစိုင်းဆောင်စီက ပြောသည်။
ပေါ်ပေါက်လာမည့် လွှတ်တော်၌ တိုင်းရင်းသားများအားလုံး စည်းလုံးညီညွတ်မှု အပြည့်ဖြင့် မိမိတို့၏ တိုင်းရင်းသားအရေး၊ တန်းတူအခွင့်အရေးရရှိရေး၊ ကိုယ်ပိုင်ပြဌာန်းခွင့်ရရှိရေး တို့ကို တပြေးညီ တောင်းဆိုသွားနိုင်ရန် အတွက် ပါတီများ မဟာမိတ် သဘော လုပ်ဆောင်သွားမည်ဟုလည်း ဦးစိုင်းဆောင်စီ က ဆိုသည်။
“ပြည်နယ်တွေအတွက် ၀န်ကြီးချုပ်ရာထူးတွေကို တိုင်းရင်းသားတွေကပဲ ရသင့်တယ်” ဟု ဦးစိုင်းဆောင်စီက ဆိုသည်။
ဦးစိုင်းဆောင်စီက တိုင်းဝန်ကြီးချုပ် ရာထူးများကို ရွေးချယ်ပြီးပြီဟု သိထားကြောင်း၊ သို့သော် ပြည်နယ် ၀န်ကြီး ချုပ် ရာထူးများအတွက် အဆိုပြုနိုင်ရေးကို မနက်ဖြန် အစည်းအဝေး၌ ဆွေးနွေးကြမည်ဖြစ်ကြောင်း ပြောသည်။
RNDP ပါတီ ဥက္ကဋ္ဌ ဒေါက်တာ အေးမောင်ကမူ ပြည်နယ်ဝန်ကြီးချုပ် ရာထူးများကို အနိုင်ရ တိုင်းရင်းသားပါတီများထဲက မရနိုင် ကြောင်း၊ တိုင်းရင်းသားဖြစ်လျှင်လည်း ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ဖွံ့ပါတီ) ၏ ကိုယ်စားလှယ် တိုင်းရင်းသားများသာ ရနိုင်မည်ဖြစ်ကြောင်း ပြောဆိုသည်။
၂၀၀၈ ဖွဲ့စည်းပုံအခြေခံ ဥပဒေအရ ပေါ်ပေါက်လာမည့် လွှတ်တော်တွင် စစ်တပ်မှ ၁ ဦး၊ အနိုင်ရ အရပ်သား ကိုယ်စားလှယ် များထဲမှ ၂ ဦးတို့ကို ဒုတိယ သမ္မတ အဖြစ်ရွေးချယ် တင်မြောက်ကြမည် ဖြစ်ပြီး ထို ၃ ဦးထဲမှ ၁ ဦးကို သမ္မတ အဖြစ် ရွေးချယ်တင်မြှောက်မည် ဖြစ်သည်။
ဒုတိယ သမ္မတ ၂ ဦးအနက် တဦးသည် တိုင်းရင်းသား ကိုယ်စားလှယ်များထဲမှ ရွေးချယ်မည်ဟု ကိုယ်စားလှယ်များ၏ အဆိုအရ သိရသည်။
နိုင်ငံတော် သမ္မတသည် နိုင်ငံရေး၊ စီးပွားရေး၊ စစ်ရေး အမြင်ရှိသူ ဖြစ်ရမည်ဟုလည်း ဖွဲ့စည်းပုံက ဆိုထားသည်။
ဖွဲ့စည်းပုံအရ နိုင်ငံတော်သမ္မတသည် လုပ်ပိုင်ခွင့်အာဏာ အပြည့်အ၀ ရရှိမည် ဖြစ်ပြီး ဒုတိယ သမ္မတ၏ လုပ်ပိုင်ခွင့်သည် နည်းပါးသည်။
“ဒု-သမ္မတရဲ့ လုပ်ပိုင်ခွင့်ကတော့ နည်းပါတယ်။ သမ္မတ မလုပ်နိုင်တာတွေ၊ တာဝန်လွှဲပေးတာတွေကို လုပ်ရမှာဖြစ်ပြီးတော့ လုံခြုံရေး ကောင်စီအဖွဲ့ဝင်တဦး အနေနဲ့ လုပ်ဆောင်ရမှာပါ” ဟု ဒေါက်တာ အေးမောင် က ပြောသည်။
မနက်ဖြန် ဆွေးနွေးကြမည့် တိုင်းရင်းသားပါတီများမှာ SNDP၊ RNDP၊ မွန်ဒေသလုံးဆိုင်ရာဒီမိုကရေစီပါတီ (AMDP)၊ ချင်း အမျိုးသားပါတီ၊ ဖလုံ-စဝေါ်ပါတီ နှင့် တခြားတိုင်းရင်းသားပါတီ တချို့ပါဝင်မည် ဟုသိရသည်။
ဖလုံ-စဝေါ်ပါတီ၏ ဥက္ကဋ္ဌ ဦးခင်မောင်မြင့်ကလည်း လွှတ်တော်ထဲ၌ ဆွေးနွေးရာတွင် တိုင်းရင်းသားအားလုံးသည် အသံတသံ တည်း ဖြစ်ရေး၊ လက်တွေ့ကျကျ ပြောဆိုနိုင်ရေးတို့က အရေးကြီးပြီး ကြိုတင်ပြင်ဆင်မှုသည် အရေးကြီးသည်ဟု ဆိုသည်။
တိုင်းရင်းသား ခေါင်းဆောင်များ၏ အဆိုအရ ၎င်းတို့ပါတီများသည် လွှတ်တော်နှင့်ပတ်သက်၍ ယနေ့အထိ တိကျသေချာစွာ မသိရသေးကြောင်း၊ လွှတ်တော်အား တာဝန်ခံ ခေါ်ယူမည့် နအဖ စစ်အစိုးရ ကိုယ်တိုင် မည်သည့် အကြောင်းအရာကိုမှ ရွေးကောက်ပွဲ အနိုင်ရ ပါတီကိုယ်စားလှယ် များအား အသိပေး အကြောင်းကြားမှု မရှိသေးကြောင်း သိရသည်။
လက်ရှိ အစိုးရတာဝန်အပြင် ကြံ့ဖွံ့ပါတီ၏ ခေါင်းဆောင်ရာထူးများကိုပါ ပူးတွဲလုပ်ဆောင်နေကြသော ကြံ့ဖွံ့ပါတီဝင်များကမူ လွှတ်တော်အတွက် သာမက ပေါ်ပေါက်လာမည့် အစိုးရသစ်၌ တာဝန်ယူကြမည့် ရာထူးများကိုပါ ရွေးချယ်ထားပြီး ဖြစ်ကြောင်း
တိုင်းရင်းသားခေါင်းဆောင်များက ပြောသည်။
တိုင်းရင်းသား ခေါင်းဆောင်များ၏ အဆိုအရ ပြည်နယ်ဝန်ကြီးချုပ်ရာထူးများကို ကြံ့ဖွံ့ပါတီဝင်များဖြစ်သော စစ်ဗိုလ်ချုပ် ဟောင်းများကို ရွေးချယ်ထားပြီးပြီဟု သိရသည်။ ၂၀၀၈ ဖွဲ့စည်းပုံတွင် ပြည်နယ် ၀န်ကြီးချုပ်ရာထူးများကို နိုင်ငံတော်သမ္မတမှ
တိုက်ရိုက် ခန့်အပ်နိုင်ကြောင်းပါရှိသည်။
၂၂ နှစ်အတွင်း ပထမဆုံးအကြိမ် ခေါ်ယူမည့် လွှတ်တော်အား ဇန်န၀ါရီလ ၃၁ ရက်နေ့ နံနက် ၈ နာရီ ၅၅ မိနစ်တွင်တပြိုင်တည်း ခေါ်ယူမည်ဟု စစ်အစိုးရ မီဒီယာများက ရေးသားထားသည်။
အမျိုးသားလွှတ်တော်နှင့်ပြည်သူ့လွှတ်တော်အား နေပြည်တော်မြို့တော်သစ်၌ ပြုလုပ်၍ ပြည်နယ်နှင့် တိုင်းဒေသကြီးများ လွှတ်တော်အား သက်ဆိုင်ရာ ပြည်နယ်၊ တိုင်းဒေသများ၌ ကျင်းပသွားမည်ဟု ကြေညာထားသည်။
လွှတ်တော်ကိုယ်စားလှယ်များ၏ အကျိုးခံစားခွင့်၊ ရပိုင်ခွင့်များကိုမူ ယနေ့ထိ မသိရသေးဟု လွှတ်တော်တက်မည့် ကိုယ်စားလှယ် လောင်းများက ဆိုသည်။
No comments:
Post a Comment