အမေရိကန်က စီးပွားရေးပိတ်ဆို့မှုကို လုံးဝ ရုပ်သိမ်းပေးမှာဖြစ်ပြီး ပိတ်ဆို့ အရေးယူမှု စာရင်းထဲမှာ ထည့်ထားတဲ့ စစ်ခေါင်းဆောင်တွေနဲ့ စီးပွားရေးသမား ခရိုနီကြီးတွေကိုလည်း စာရင်းထဲကနေ ပယ်ထုတ်ပေးမယ်လို့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ အမေရိကန် ခရီးစဉ် အပြီးမှာ သတင်းတွေ ထွက်ခဲ့ပါတယ်။
အမေရိကန်ရဲ့ ဆန်ရှင်ထဲမှာဆိုရင် အာဏာရှင်ဟောင်း ဗိုလ်ချုပ်မှူးကြီး (ငြိမ်း) ဦးသန်းရွှေ၊ ဦးမောင်အေး၊ ဦးသိန်းစိန်၊ ဦးရွှေမန်း၊ ဦးအောင်သောင်း၊ ဦးတင်အောင်မြင့်ဦး တို့ ပါဝင်သလို လက်ရှိအစိုးရတာဝန် ထမ်းဆောင်နေတဲ့ ဒုတိယ သမ္မတ ဦးမြင့်ဆွေလည်း ဆန်ရှင်စာရင်းထဲမှာ ရှိနေဆဲ ဖြစ်ပါတယ်။
ဒါ့အပြင် မြန်မာပြည်သူတွေ ယဉ်ပါးတဲ့ နာမည်တွေဖြစ်တဲ့ ဦးတင်နိုင်သိန်း၊ ဦးစိုးသာ၊ ဦးအောင်သိန်းလင်း၊ ဦးချမ်းငြိမ်း၊ ဦးသိန်းဇော်၊ ဦးဥာဏ်ဝင်း၊ ဦးလွန်းသီ၊ ဦးရဲမြင့် အစရှိတဲ့ ဗိုလ်ချုပ်ဟောင်းတွေ၊ ဝန်ကြီးဟောင်းတွေလည်း စာရင်းထဲမှာ ရှိနေဆဲ ဖြစ်ပါတယ်။
စစ်အစိုးရခေတ်မှာ ဗိုလ်ချုပ်ကြီးတွေ၊ ဝန်ကြီးဌာနတွေနဲ့ ပေါင်းပြီး ကြီးပွားချမ်းသာသွားတဲ့ ခရိုနီသူဌေးကြီးတွေ အများအပြားလည်း ပါဝင်ပါတယ်။ အဲဒီ ခရိုနီ သူဌေးကြီးတွေထဲမှာတော့ ဦးတေဇ၊ ဦးထွန်းမြင့်နိုင် ခေါ် စတီဗင်လော၊ ဦးဇော်ဇော်၊ ဇေကမ္ဘာ ဦးခင်ရွှေ၊ ယုဇန ဦးဌေးမြင့် အစရှိသူတွေ ပါဝင်ပါတယ်။
မြန်မာနိုင်ငံမှာ ပြုပြင်ပြောင်းလဲရေးတွေ စတင်လုပ်ချိန်က စပြီး သမ္မတဟောင်း ဦးသိန်းစိန်၊ လွှတ်တော်ဥက္ကဋ္ဌဟောင်း ဦးရွှေမန်းတို့ကို ဆန်ရှင်ကနေ ထုတ်ပယ်ပေးခဲ့ပြီး ဖြစ်ပါတယ်။ သူတို့နှစ်ဦးစလုံး အမေရိကန်နိုင်ငံ ပြည်ဝင်ခွင့်ကို ခွင့်ပြုပေးလိုက်ပြီ ဖြစ်တဲ့အတွက် တရားဝင် သွားရောက်လည်ပတ်ခဲ့ပြီးလည်း ဖြစ်ပါတယ်။
ဒေါ်အောင်ဆန်းစုကြည်ရဲ့ အမေရိကန် ခရီးစဉ်မှာ စီးပွားရေး ကုန်သွယ်ခွင့်တွေ ပိတ်ပင်ထားတာကို ရုပ်သိမ်းပေးလိုက်ပါပြီ။ ဒါ့အပြင် အမေရိကန် ပိတ်ဆို့ အရေးယူမှု ထိထားတဲ့ လူပုဂ္ဂိုလ် ၁၀၀ ကျော်ကိုလည်း အမေရိကန် ဆန်ရှင် စာရင်းကနေ ထုတ်ပယ်ပေးမယ်လို့ သိရပါတယ်။ ဒါပေမယ့် အကုန်လုံးကို ထုတ်ပယ်ပေးမှာလား၊ တချို့ကို ချန်ထားမှာလား ဆိုတာကိုတော့ သဲသဲကွဲကွဲ မသိရသေးပါဘူး။
မြောက်ကိုရီးယားနဲ့ ပတ်သက်သူတွေ၊ ဘိန်းမှောင်ခို ရာဇာတွေအပြင် စစ်အစိုးရခေတ်က လူ့အခွင့်အရေး၊ ချိုးဖောက်မှုတွေမှာ စီစဉ်ညွှန်ကြားသူ၊ တာဝန်ရှိသူတွေကိုတော့ စာရင်းထဲမှာ ချန်ထားမယ်ဆိုတဲ့ အတည်ပြုလို့မရတဲ့ သတင်းတွေလည်း ထွက်ရှိနေခဲ့ပါတယ်။
စီးပွားရေး၊ ကုန်သွယ်ရေး ဆန်ရှင်တွေ ဖွင့်ပေးလိုက်တာကို မြန်မာပြည်သူတွေက ကြိုဆိုကြပေမယ့် စစ်အာဏာရှင်တွေ၊ မူးယစ် မှောင်ခိုရာဇာနဲ့ အဆွယ်အပွားတွေ၊ လက်နက် မှောင်ခိုကုန်သည်တွေ ဆန်ရှင်စာရင်းထဲမှာ ဆက်ရှိသင့်တယ် လို့ ယုံကြည်တဲ့ အုပ်စုတွေလည်း ရှိနေသေးပါတယ်။
၁၉၉၂ ခုနှစ်က နေ ၂၀၁၁ ခုနှစ် အာဏာ လွှဲပြောင်းချိန်အထိ နဝတ၊ နအဖ အကြီးအကဲ အဖြစ် တာဝန် ထမ်းဆောင်ခဲ့ပြီး စစ်ဦးစီးချုပ်အဖြစ် တာဝန် ထမ်းဆောင်ခဲ့တဲ့ ဦးသန်းရွှေကတော့ လောလောဆယ် နေပြည်တော်မှာရှိတဲ့သူ့ရဲ့ အိမ်မှာ အနားယူနေပါတယ်။ အခုချိန်အထိ တပ်မတော်အပေါ်မှာ သြဇာသက်ရောက်မှု ရှိနေဆဲဖြစ်တယ်လို့ ပြည်တွင်း၊ ပြည်ပက ထင်ကြေးပေးမှု ရှိနေဆဲဖြစ်ပါတယ်။
မကြာသေးခင်က တရုတ်ကွန်မြူနစ် ပါတီ နိုင်ငံတကာ ဆက်ဆံရေးဌာနကြီးမှူး မစ္စတာ ဆုန်တောင်နဲ့ တွေ့ခဲ့သလို ဒီမတိုင်ခင် ရွေးကောက်ပွဲ အပြီးမှာလည်း ဒေါ်အောင်ဆန်းစုကြည်နဲ့ တွေ့ဆုံခဲ့ပါတယ်။ သူ့မြေးကတဆင့် ကြားလိုက်ရတဲ့ အနာဂတ်ရဲ့ ခေါင်းဆောင်ဆိုတဲ့ အသုံးအနှုန်းက လွဲလို့ ဘာတွေ ဆွေးနွေးခဲ့တယ် ဆိုတာတော့ မသိရပါဘူး။
အမေရိကန် သမ္မတဟောင်း ဂျော့ခ်ျ ဒဗလျူ ဘုရှ် လက်ထက်မှာ ဦးသန်းရွှေ ဦးဆောင်တဲ့ စစ်အစိုးရကို ပိတ်ဆို့မှု အကြီးအကျယ် လုပ်ခဲ့ပြီး ဦးသန်းရွှေ အနေနဲ့ ရာထူးကနေဆင်းပေးကာ မြန်မာပြည်ကို လွတ်လပ်ခွင့် ပေးဖို့ကိုတောင် တောင်းဆိုခဲ့ဖူးပါတယ်။
အခုလို အမေရိကန်က မြန်မာပြည်အပေါ် ပိတ်ဆို့မှုတွေ ရုပ်သိမ်းချိန်မှာ မြန်မာ ပြည်သူလူထုနဲ့ နိုင်ငံတကာ အသိုင်းအဝိုင်းကတော့ လူ့အခွင့်အရေး ချိုးဖောက်မှုတွေ ကမ္ဘာသိ ကျူးလွန်ထားတဲ့ အာဏာရှင်ဟောင်း ဗိုလ်ချုပ်မှူးကြီး (ငြိမ်း) ဦးသန်းရွှေရော ဆန်ရှင်က လွတ်မလား၊ မလွတ်ဘူးလား ဆိုတာ စိတ်ဝင်တစား စောင့်ကြည့်နေကြမှာ အမှန်ပါ။
အမေရိကန်ရဲ့ ပိတ်ဆို့ အရေးယူမှုကနေ ဘယ်သူတွေ လွတ်မယ် မလွတ်ဘူး ဆိုတာကတော့ နိုဝင်ဘာလအတွင်းမှာ အဖြူအမည်း သဲသဲကွဲကွဲ သိရတော့မှာ ဖြစ်ပါတယ်။
No comments:
Post a Comment