ဗန်းမော်ခရိုင် မန်စီမြို့နယ် နမ်လင်းပါ (Nam Lim Pa) ရွာပြင်ဘက်သို့ လှုပ်ရှားလာသော အစိုးရတပ်အင်အား ၃၀ ခန့် အား KIA တပ်ရင်း ၁၂ မှ နံနက် ၁၀ နာရီအချိန်တွင်မိုင်းဖြင့် တိုက်ခိုက်ခဲ့ခြင်းဖြစ်ကြောင်း ဗိုလ်မှူးဂျွန်အောင် KNG ကချင်သတင်းဌာန သို့ပြော သည်။
“သူတို့ဘက်ကအဖွဲ့လိုက်လှုပ်ရှားထွက်လာတဲ့လမ်းမှာ မိုင်းနဲ့ပစ်ခတ်တိုက်ခိုက်ခဲ့တာ သူတို့ဘက်က ၂ ယောက် ၃ ယောက်လောက်က အေးဆေးကျမယ်” ဟုဆိုသည်။
ထိုအစိုးရတပ်သည် ၎င်းတို့၏ဗိုလ်ကြီးများအိပ်သည့် နေရာများအနှံ့ လုံခြံရေးယူပေးသော တပ်ဖွဲ့ဖြစ်ပြီး ရွာအောက် ရွာပြင်သို့ နေ့စဉ် ပစ်ခတ်လှုပ်ရှားနေသောတပ်ဖွဲ့ဖြစ်ကြောင်း သိရသည်။
ယမန်နေ့ ၂၂ ရက်နံနက်ပိုင်းကလည်း ရှမ်းပြည်မြောက်ပိုင်း ကွတ်ခိုင်မြို့နယ်အတွင်း အစိုးရတပ် ခြေလျင်တပ်ရင်း ခလရ ၁၄၃ တပ်နှင့် KIA တပ်ရင်း ၈ ကြား ဘန်လော (Banglaw)တွင် ၃၀ မိနစ်ကျော်ကြာ တိုက်ပွဲဖြစ်ပွားခဲ့သည်။
ကွတ်ခိုင်မြို့နယ်အတွင်းရှိ ဂါလဲန် (Galeng)စခန်းမှ အစိုးရတပ်အင်အား ၈၀ ခန့်သည် KIA တပ်ရင်း ၈ ရှေ့တန်းတပ်ဖွဲ့များ ဘန်လော (Banglaw)တွင် ရောက်ရှိလာစဉ် ပစ်ခတ်တိုက်ခိုက်ခြင်း ဖြစ်ကြောင်း သိရသည်။
ယမန်နေ့တိုက်ပွဲတွင် KIA တပ်ရင်း ၈ မှ ထိခိုက်ဒဏ်ရာ ရရှိမှုမရှိကြောင်း အစိုးရတပ်မှ ၂ ဦးသေဆုံးပြီး ၃ ဦးဒဏ်ရာရရှိကြောင်း တပ်မဟာ (၄) အရာရှိ ၁ ဦးပြောသည်။ ထိခိုက်ကျဆုံးမှုနှင့် ပတ်သက်၍ KNG ကချင်သတင်းဌာနမှ သီးခြား အတည်မပြုနိုင်သေးပါ။
ယခုချိန် အစိုးရတပ်သည် ရှမ်းပြည်နယ် မြောက်ပိုင်း KIA တပ်ရင်း ၈ ဒေသတွင် နေ့စဉ်လှုပ်ရှားနေခြင်းကြောင့် နှစ်ဖက်တပ်မှ ပစ်ခတ်တိုက်မှုများရှိပြီး ကချင်ပြည်နယ် တောင်ပိုင်း KIA တပ်မဟာ (၃) ဒေသတွင်လည်း နေ့စဉ်တိုက်ပွဲများဖြစ်ပွား နေကြောင်း KIA အရာရှိများက ပြောသည်။
No comments:
Post a Comment