မြောက်ကိုးရီးယားနိုင်ငံနဲ့ စစ်လက်နက်ရောင်းဝယ်မှု မလုပ်ဖို့ နိုင်ငံတကာက တားမြစ်မှုတွေရှိထားတဲ့ကြားက မြန်မာနိုင်ငံက ဒုတိယ ဗိုလ်မှူးကြီး ကျော်ညွန့်ဦးအပါအဝင် Asia Metal Company, စိုးမင်းထိုက်ကုမ္ပဏီနဲ့ Excellence Mineral Manufacturing ကုမ္ပဏီသုံးခုဟာ မြောက်ကိုးရီးယားနိုင်ငံနဲ့ လက်နက်ရောင်းဝယ်မှုတွေ လုပ်ခဲ့တယ်လို့ အမေရိကန်နိုင်ငံက ဆိုပါတယ်။
ဒဏ်ခတ်ပိတ်ဆို့မှုကြောင့် အမေရိကန်နိုင်ငံက ကုမ္ပဏီတွေ၊ အမေရိကန် နိုင်ငံသားတွေအနေနဲ့ ခုလို အမည်မည်းစာရင်းဝင် ပုဂ္ဂိုလ် ဒါမှမဟုတ် စီးပွားရေးကုမ္ပဏီတွေနဲ့ ပူးပေါင်းလုပ်ဆောင်ခွင့် တားမြစ်လိုက်တာ ဖြစ်ပေမယ့် ဒီဒဏ်ခတ်ပိတ်ဆို့မှုဟာ မြန်မာအစိုးရကို ပစ်မှတ်ထားတာမျိုး မဟုတ်ဘူးလို့ အမေရိကန်အစိုးရက ပြောပါတယ်။
ဒီလက်နက်ရောင်းဝယ်မှုတွေဟာ မြောက်ကိုးရီးယားနိုင်ငံရဲ့ နျူးကလီးယားအစီအစဉ်ကို သက်ဆိုးစေရှည်တယ်လို့ အမေရိကန်က ဆိုပါတယ်။
အမေရိကန်နိုင်ငံရဲ့ အမည်မည်းစာရင်းမှာ ထည့်သွင်းခံရတဲ့ ဒုဗိုလ်မှူးကြီး ကျော်ညွန့်ဦးဟာ မြန်မာကာကွယ်ရေးတပ်ရဲ့ အစိတ်အပိုင်းတစ်ခုဖြစ်တဲ့ DDI ဌာနက စစ်အရာရှိတစ်ဦးဖြစ်တယ်လို့ ဆိုပါတယ်။
မြန်မာရဲ့ DDI ကိုလည်း ပြီးခဲ့တဲ့ နှစ်ကပဲ အမေရိကန်က ဒဏ်ခတ်ပိတ်ဆို့မှု လုပ်ခဲ့သလို DDI ဌာနရဲ့ အကြီးအကဲ ဒုဗိုလ်ချုပ်ကြီး သိန်းဌေးကိုလည်း ဒဏ်ခတ်ပိတ်ဆို့မှု လုပ်ခဲ့ပါတယ်။
စိုးမင်းထိုက်ကုမ္ပဏီကတော့ DDI အတွက် မြောက်ကိုးရီးယားနဲ့ ဆက်သွယ်ပေးတာတွေ လုပ်ခဲ့သလို Excellence Mineral Manufacturing က မြောက်ကိုးရီးယားနဲ့အတူ အလုပ်လုပ်ပြီး မြန်မာ နျူးကလီးယားအစီအစဉ်အတွက် မြောက်ကိုးရီးယားဆီက လိုအပ်တဲ့ တွင်းထွက်သတ္ထုတွေ ရရှိအောင် လုပ်ဆောင်ပေးခဲ့တယ်လို့ ဆိုပါတယ်။
Asia Metal ကုမ္ပဏီကတော့ DDI စက်ရုံတွေ တည်ဆောက်ပေးတာတွေ၊ ဆောက်လုပ်ရေးပစ္စည်း ပံ့ပိုးတာတွေလုပ်ခဲ့ပြီး အဲဒီစက်ရုံမှာ မြောက်ကိုးရီးယားနိုင်ငံသား အယောက် ၃၀ လောက် အလုပ်လုပ်ခဲ့တယ်လို့ ဆိုပါတယ်။
မြန်မာအစိုးရအနေနဲ့ ၂၀၁၂ ခုနှစ် နိုဝင်ဘာလတုန်းကပဲ ကုလသမဂ္ဂလုံခြုံရေးကောင်စီက ချမှတ်ချက်တွေအတိုင်း လိုက်နာပြီး မြောက်ကိုးရီးယားနိုင်ငံနဲ့ လက်နက်အရောင်းအဝယ် မလုပ်တော့ဘူးဆိုတာကို လူသိရှင်ကြား ပြောဆိုခဲ့ဖူးကြောင်း အေအက်ဖ်ပီ သတင်းမှာ ဖော်ပြထားပါတယ်။
No comments:
Post a Comment