အမျိုးသား ဒီမိုကရေစီ အဖွဲ့ချုပ်(NLD) အစိုးရသစ် လက်ထက်တွင် လယ်သမားတိုင်း လယ်မြေ ပြန်လည် ပိုင်ဆိုင်ပြီး ပြည်တွင်း စားနပ်ရိက္ခာ ဖူလုံရေးသည် NLD အစိုးရ၏ မူဝါဒတခု ဖြစ်ကြောင်း စိုက်ပျိုးရေး မွေးမြူရေးနှင့် ဆည်မြောင်ဝန်ကြီး ဒေါက်တာ ထွန်းဝင်းက ပြောသည်။
“လယ်ယာမြေတွေကို လူမှန်နေရာမှန် သူ့ဥစ္စာရင်းမှန်ကို ပြန်ပေးဖို့ ကျနော်တို့ အစိုးရအနေနဲ့ ဆန္ဒရှိတယ်’’ဟု ဒုဝန်ကြီး ဒေါက်တာ ထွန်းဝင်းက ပြောသည်။
သို့သော် သိမ်းဆည်းခံ လယ်ယာမြေများ လယ်သမားလက်သို့ ပြန်လည် ရောက်ရှိရေးကိစ္စသည် အစိုးရသစ် အနေဖြင့် ဖြေရှင်းပေးနိုင်ရန် အလွန် ရှုပ်ထွေးသည့် ကိစ္စဖြစ်နေရာ ခိုင်မာသည့် ဥပဒေများ ရေးဆွဲနိုင်ရန် ဆောင်ရွက်နေကြောင်း၊ ပြည်သူများကလည်း ၄င်းတို့၏ မြေယာ ပြဿနာများကို ချက်ချင်း ဖြေရှင်းပေးရန် ဆန္ဒရှိနေကြသဖြင့် ယခုကိစ္စကို အချိန် အတိုင်းအတာ တခုအထိ စောင့်ဆိုင်းပေးရန်လည်း ၄င်းက ပြောသည်။
“လယ်ယာမြေ ပြဿနာတွေ အားလုံးရဲ့ မူလက အုပ်ချုပ်ရေးအဖွဲ့၊ စည်ပင်အဖွဲ့ အဆင့်ဆင့်၊ အိုးအိမ် အဖွဲ့ အဆင့်ဆင့်၊ တပ်မတော် အားလုံးတွေက အကြောင်းအမျိုးမျိုးတွေနဲ့ အများပြည်သူအတွက် ဆိုတဲ့ခေါင်းစဉ်နဲ့ သိမ်းယူပြီးတော့ ကိုယ်ကျိုးစီးပွားအနေနဲ့ ဒါတွေကို မြေကွက်ရိုက်ပြီး ရောင်းစားနေတယ်။ မြို့နယ်တွေ ကျေးရွာတွေ လမ်းဘေးတွေမှာ ခြံကာပြီးတော့ မကျူးကျော်ရ ဆိုပြီး ရောင်းစားထား တာတွေ ရှိတယ်”ဟု ဒေါက်တာ ထွန်းဝင်းက ပြောသည်။
ယခုကဲ့သို့ လုပ်ဆောင်နေမှုများသည် နိုင်ငံပုံရိပ်အတွက် အလွန် အကျည်း တန်စေပြီး နိုင်ငံပိုင်မြေကို အလွဲသုံးစားနေခြင်း ဖြစ်ကြောင်း၊ ယင်းမြေအားလုံး မူလပိုင်ရှင် လယ်သမားများထံသို့ ပြန်လည်ရောက်ရှိရေးသည် အစိုးရသစ်၏ တာဝန်ဖြစ်ကြောင်း သူက ပြောသည်။
ကချင်ပြည်နယ်၊ ဟူးကောင်းဒေသတွင် ယုဇန ကုမ္ပဏီ၏ လယ်ယာမြေ သိမ်းဆည်းခံထားရသည့် ဒေသခံ ဦးတန်ဂွန်း က “ကျနော်တို့ မဲထည့်လိုက်တဲ့ အစိုးရက ဒီကိစ္စကို ကူညီမယ်လို့ ယုံကြည်ပါတယ်။ ကျနော်တို့ ခံစားလာတာ ၁၀ နှစ်ရှိပြီ။ ကလေးတွေတောင် ပညာရေး မထောက်ပံ့နိုင်ဘူး” ဟု ပြောသည်။
လယ်ယာမြေ သိမ်းဆည်းမှုများသည် တနိုင်ငံလုံး အတိုင်းအတာအရ ဧက ၂ သန်း ဝန်းကျင် အထိ ရှိနေကြောင်း အမျိုးသား လွှတ်တော် တောင်သူလယ်သမား ရေးရာကော်မတီ၏ စာရင်းများအရ သိရသည်။
NLD အစိုးရ လက်ထက်တွင် လယ်ယာမြေနှင့် အခြားမြေများ သိမ်းဆည်းခံရမှုများကြောင့် ပြည်သူများ နစ်နာမှု မရှိစေရေး အတွက် မြေသိမ်းမှု ပြဿနာများ ဖြေရှင်းပေးနိုင်ရန် လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေး ဗဟို ကော်မတီကို ဒုတိယ သမ္မတ ၂ ဦး က ဦးဆောင်ပြီး အဖွဲ့ဝင် ၁၀ ဦး ဖြင့် မေလ ၅ ရက်နေ့က ဖွဲ့စည်းလိုက်ကြောင်း သမ္မတရုံး၏ ကြေညာချက် တစောင် ထုတ်ပြန်ခဲ့ပြီး ဖြစ်သည်။
No comments:
Post a Comment