ရန်ကုန်ဆောင်း အအေးဆောင့်တက်၊ အနွေးထည် အရောင်းသွက်

သီဟတိုး

ဒီဇင်ဘာလ တတိယပတ် အတွင်းကစလို့ သိသိသာသာ ပြောင်းလဲလာတဲ့ ချမ်းအေးမှုနဲ့အတူ သာမန်အားဖြင့် ဆောင်းရာသီ ဆိုရင် အနွေးထည်ဝတ်စရာ မလိုတဲ့ ရန်ကုန်မြို့ဟာ အခုတော့ ကလေး၊ လူကြီး၊ လူငယ် ကျား၊ မ မရွေး အနွေးထည် ကိုယ်စီနဲ့ ၀တ်စားသွားလာ လှုပ်ရှားနေကြတာကို တွေ့နေရပါပြီ။

အိန္ဒိယက တိုက်ခတ်လာတဲ့ မြောက်ပြန်လေ အေးအေးတွေကြောင့် အနွေးထည် မ၀တ်ရတာ ကြာပြီဖြစ်တဲ့ ရန်ကုန်မြို့က လူတွေအတွက် အလုပ်တခု ပိုလာတယ်လို့ပဲ ဆိုရမှာပါ။ ဒါပေမယ့်လည်း အရင်လို ပူအိုက်အိုက် မွန်းကြပ်ကြပ် သွားလာ နေရတာထက် စာရင် အခုလို ချမ်းချမ်းအေးအေးနဲ့ အနွေးထည် မထူမပါးလေးတွေ ၀တ်ပြီး အလုပ်လုပ်ရတာ ပို သက်သောင့်သက်သာ ရှိတာတော့ အသေအချာပါပဲ။

နေ့တာတိုတဲ့ ဆောင်းတွင်းရဲ့ သဘာဝအတိုင်း ရန်ကုန်မြို့ရဲ့ ညနေ နေ၀င်ချိန်ကို စောစီးစွာ ရောက်လာပြီဆိုရင်ပဲ ရန်ကုန်မြို့တွင်း နေရာအနှံ့က ရုံး အလုပ်လုပ်သူတွေ၊ ကျောင်းတက်သူတွေဟာ ဆောင်းမြောက်ပြန်လေရဲ့ တိုးဝှေ့ ကျီစယ်တဲ့ ချမ်းအေးမှုကို ခံစားရင်း မိမိတို့ နေထိုင်ရာ အိမ်ကိုပြန်ကြရပါတယ်။

ဒီလိုအချိန် ရန်ကုန်မြို့ရဲ့ အနော်ရထာ လမ်းမတလျောက် ဆူးလေတ၀ိုက်က လမ်းဘေး Export ထည် အရောင်းဆိုင်တွေ၊ လေဘေးထည် ဆိုင်တွေ၊ ဖက်ရှင်ဆိုင်တွေအသီးသီးမှာ အနွေးထည်တွေ လက်မလည်အောင် အရောင်းသွက် နေတာ ကိုလည်း ဒီရက်ပိုင်းအတွင်း သိသိသာသာ တွေ့နေရတယ်။

“ကြိုက်တာယူ တထည် ၂၅၀၀” ဆိုပြီး အော်ဟစ်ရောင်းချနေတဲ့ အနော်ရထာလမ်းပေါ်က လေဘေးဆိုင် အတွေမှာလည်း ဈေးပေါပေါနဲ့ ရံဖန်ရံခါ အရည်အသွေးကောင်းကောင်း အထည်တွေ ရတတ်တာကြောင့် သူ့ထက်ငါ အလုအယက် အပြိုင်အဆိုင် ရွေးချယ် ၀ယ်နေသူတွေ တွေ့ရသလို ရောင်းရတဲ့သူကလည်း နေ့ခင်းဘက် သုံးနာရီလောက်ကနေ ညဘက် ရှစ်နာရီကျော် လောက်အထိ လက်မလည်အောင် မနားတမ်း ရောင်းနေရပါတယ်။

“မနှစ်ကထက်စာရင် ရန်ကုန်ဆောင်းက ဒီနှစ်မှာအေးတော့ အနွေးထည် အတော်လေး ရောင်းရပါတယ်။ မနှစ်ကတော့ သိပ်မရောင်းရတဲ့ အတွက် တွက်ခြေမကိုက်ဘူး၊ ရှုံးတယ်။ ဒီရက်ပိုင်းကတော့ အနွေးထည် ရောင်းအားကို ပုံမှန် ၀င်ငွေမှန်းလို့ မရဘူး။ ဆောင်းတွင်း မတိုင်ခင်ကတော့ တရက်ကို ငါးသောင်း၊ ခြောက်သောင်း ဖိုးလောက် ရောင်းရတယ်။ အခု ဆောင်းတွင်း ကာလမှာတော့ ဒီရက်ပိုင်းအတွင်း သိသိသာသာ အေးလာပြီးနောက်ပိုင်း တရက်ကို နှစ်သိန်း၊ သုံးသိန်းဖိုး ရောင်းရပါတယ်” လို့ အထည်ရောင်း သက်တမ်း ၁၀ နှစ် ရှိပြီဖြစ်တဲ့ ရန်ကုန်မြို့ အနော်ရထာလမ်းမှာ Export ထည်တွေ ရောင်းချတဲ့ အသက် ၅၃ နှစ် အရွယ် ဒေါ်စန်းစန်းမြင့်က ဧရာဝတီ ကိုပြောပါတယ်။

“ဦးဆိုင်က ဒီနှစ်လေဘေး အနွေးထည် ရောင်းအားကတော့ တနေ့ကို လေးငါးသောင်းဖိုးလောက် ရောင်းရတယ်။ တနေ့ကို တသောင်းလောက်တော့ အမြတ်ကျန်ပါတယ်။ မနှစ်ကတော့ အရောင်းပါးတယ်။ မရောင်းရဘူး။ ဒီနှစ်ကတော့ပိုအေးတော့ ပိုရောင်းရတယ်။ ဦးရဲ့ဆိုင်မှာတာ့ အရောင်းဝန်ထမ်းမထားဘူး။ ဦးတယောက်တည်း ဆိုင်ရှင် ကိုယ်တိုင်ပဲရောင်းတယ်။ အထည်တွေကတော့ အစားစားပဲ။ ငါးထောင်ကျော် လောက်ကနေ တသောင်းကျော်တန်လောက်ထိရှိတယ်။ ဒီလေဘေးထည်တွေကို မင်္ဂလာဈေးကနေ အထုပ်လိုက်ယူတယ်။ တထုပ်ကို ၂သိန်းခွဲကျန်တယ်။ တခါယူရင် ၁၀ ထုပ်ယူတယ်။ အခုဒီနှစ် ဆောင်းတွင်းမှာ ၃ ထုပ်ကုန်သွားပြီ။ အထုပ်တွေ အကုန်ရောင်းရမယ်လို့ မျှော်လင့်ပါတယ်” လို့ လေဘေးထည် ရောင်းတာ နှစ် ၃၀ နီးပါးရှိပြီ ဖြစ်တဲ့ ပန်းပဲတန်းမြို့နယ် အနော်ရထာ လမ်းမပေါ်က လေဘေးရောင်းချသူ အသက် ၅၀ အရွယ် ဦးစံငြိမ်းက ပြောပြတယ်။

ရန်ကုန်မြို့ ဗိုလ်ချုပ်အောင်ဆန်း လမ်းမပေါ် ပန်းဆိုးတန်းမှတ်တိုင်အနီး ခေါင်းစွပ်၊ ခြေအိတ်၊ လက်အိတ်တွေ ရောင်းချသူ တဦးကလည်း ဒီရက်ပိုင်းမှာ တော်တော်အေးလာလို့ သူ့ဆိုင်က အရောင်းသွက်တဲ့ အကြောင်း၊ တနေ့ကို ငါးသောင်း၊ ခြောက်သောင်း ဖိုးလောက်အထိ ရောင်းရကြောင်း ရှင်းပြတယ်။

သူက “ဒီရာသီက ဘုရားဖူးရာသီလည်း ဖြစ်တော့ ကျိုက်ထီးရိုး ဘုရားသွားမယ့် သူတွေကလည်း လက်အိတ်၊ ခြေအိတ်တွေ အများကြီး လာဝယ်ကြတယ်။ ပြီးတော့ ရန်ကုန်မြို့ထဲပိုင်းသာ သိပ်မအေးတာ၊ တောင်ဒဂုံ၊ သာကေတ ဘက်ဆို တအား အေးတော့ အဲဒီဘက်မှာ နေတဲ့သူတွေလည်း အတော် လာဝယ်ကြတယ်” လို့ ဧရာဝတီကို ပြောတယ်။

ဒီအချိန်ဟာ သက်ကြီးပိုင်းနဲ့ သက်လတ်ပိုင်းတို့က ရာသီဥတု အခြေအနေအရ ဆောင်းရဲ့အအေးဒဏ်ကို အံတုဖို့ အနွေးထည်တွေ ၀တ်ဆင်ကြရတဲ့ အချိန်ဖြစ်သလို၊ ခေတ်လူငယ်တွေ ကလည်း အခုခေတ် ဖက်ရှင် ရေစီးကြောင်းကို မျောပါရင်း ဖက်ရှင်ကျကျ အနွေးထည်၊ ခေါင်းစွပ်၊ ရှူးဖိနပ် စတာတွေကို စတိုင်မိမိ၊ ဒီဇိုင်းမိုက်မိုက်၊ ခပ်လန်းလန်းပုံစံတွေနဲ့ အပြိုင်အဆိုင် ရှိုးထုတ် ပဲများလို့ ကောင်းနေကြတဲ့ အချိန်ဖြစ်ပါတယ်။

လူငယ်တွေကြားမှာ အနွေးထည်၊ ခေါင်းစွပ်၊ ရှူးဖိနပ်လို့ ပြောလိုက်တာနဲ့ ကိုးရီးယားစတိုင် Cute ဖြစ်တဲ့ ပုံစံလေးတွေ၊ ခေါင်းစွပ် ဦးထုတ်ရှည်ရှည်လေးတွေ၊ ဟစ်ပ်ဟော့ပ်ဂီတကို နှစ်သက်တဲ့ လူငယ်အများစုကြိုက်တဲ့ Swag ဖက်ရှင်လို့ခေါ်တဲ့ ခေါင်းစွပ် နောက်မြီး ရှည်ရှည်တွဲတွဲလေးတွေ၊ တီရှပ်နဲ့ ခေါင်းစွပ်အနွေးထည် Hoddy အင်္ကျီ၊ ဂျင်းဝေ့စ်ကုတ် စသဖြင့် တွဲဝတ်ရတဲ့ ဖက်ရှင်လေးတွေကို All Star လန်းလန်းလေး၊ ဒါမှမဟုတ် Boots အမိုက်စား လေးတွေနဲ့ တွဲဝတ်နေကြတာကို တွေ့ရပါတယ်။

ဒီအထည်တွေကတော့ ဈေးနှုန်းကို ၅ ထောင်ကျော် ၀န်းကျင်ကနေစလို့ အနွေးထည်အများစုက သောင်းဂဏန်း ၀န်းကျင်မှာရှိပါတယ်။