သြစတြေးလျနိုင်ငံက စီးပွားရေးသမားတွေအနေနဲ့ မြန်မာနိုင်ငံမှာ ရင်းနှီးမြုပ်နှံမှု လုပ်မယ်ဆိုရင် သတိနဲ့ လုပ်ကိုင်ဖို့ Austrade လို့ခေါ်တဲ့ သြစတြေးလျနိုင်ငံ ကုန်သွယ်ရေးဝန်ကြီးဌာနက သတိပေးထားတဲ့ကြားကပဲ သြစတြေးလျ စီးပွားရှင်နဲ့ မြန်မာစီးပွားရှင်တွေအကြား လက်မှတ်ရေးထိုးခဲ့ကြတာ ဖြစ်ပါတယ်။
သြစတြေးလျနိုင်ငံအနေနဲ့ မြန်မာနိုင်ငံမှာ အခုကစပြီး ရင်းနှီးမြုပ်နှံမှုတွေ မလုပ်ရင် နောက်ကျ ကျန်ရစ်မှာ ဖြစ်တယ် လို့လည်း Australia-Myanmar Chamber of Commerce အဖွဲ့ ဥက္ကဌ Glen Robinson က ပြောလိုက်ပါတယ်။
နိုင်ငံတကာက ကဏ္ဍစုံ လုပ်ငန်းတွေ မြန်မာနိုင်ငံမှာ ရင်းနှီးမြုပ်နှံမှု လုပ်နေကြပေမယ့် သြစတြေးလျနိုင်ငံက ဝင်ရောက်မှု နည်းပါးသေးတယ်လို့ Australia-Myanmar Chamber of Commerce အဖွဲ့ဥက္ကဌ Glen Robinson က ပြောသွားခဲ့ပါတယ်။
ဒါကြောင့် မြန်မာနိုင်ငံမှာ ဥပဒေ အပြောင်းအလဲတွေ ဖြစ်လာဖို့ မစောင့်တော့ပဲ သြစတြေးလျ ကုမ္ပဏီတွေအနေနဲ့ ခုကတည်းက ဝင်ရောက်ကြဖို့လိုကြောင်း၊ မြန်မာနိုင်ငံမှာ ရင်းနှီးမြုပ်နှံတာဟာ တခြားအာစီယံဒေသတွင်းက နိုင်ငံတွေမှာ ရင်းနှီးမြုပ်နှံသလိုပဲ ပုံစံတူကြောင်း ပြောပါတယ်။
သြစတြေးလျနိုင်ငံဟာ သယံဇာတထုတ်ယူရေးလုပ်ငန်းမှာ အတွေ့အကြုံရှိတဲ့နိုင်ငံ၊ ပြီးတော့ သဘာဝပတ်ဝန်းကျင်နဲ့ ညီအောင် ထုတ်လုပ်နိုင်တဲ့ အတတ်ပညာတွေရှိတဲ့အတွက် မြန်မာနိုင်ငံ သယံဇာတလုပ်ငန်းမှာ လုပ်ကိုင်သင့်သလို ပညာရေးလုပ်ငန်းမှာလည်း ရင်းနှီးမြုပ်နှံမှုတွေ လုပ်ဖို့သင့်တယ်လို့လည်း ပြောပါတယ်။
မြန်မာစက်မှုလုပ်ငန်းရှင်များအသင်းဟာ မြန်မာအစိုရက ယုံကြည်စိတ်ချရတဲ့ အဖွဲ့အစည်းဖြစ်တဲ့အတွက် သြစတြေးလျ စီးပွားရှင်တွေအနေနဲ့ ခုလို အသင်းနဲ့ ပူးတွဲလုပ်ကိုင်ခြင်းအားဖြင့် ယုံကြည်သက်ဝင်မှု ဂုဏ်တွေ ပိုမိုရရှိစေမှာ ဖြစ်တယ်လို့ ပြောပါတယ်။
မနေ့က ပြုလုပ်ခဲ့တဲ့ သဘောတူညီမှု စာချွန်လွှာ လက်မှတ်ရေးထိုးပွဲကို နှစ်နိုင်ငံက စီးပွားရှင်တွေအပြင် သြစတြေးလျ သံအမတ်လည်း တက်ရောက်ခဲ့ပါတယ်။
ခုလောလောဆယ် သြစတြေးလျနိုင်ငံက မိုင်းတွင်းလုပ်ငန်းရှင်တွေ၊ ရေနံနဲ့ သဘာဝဓာတ်ငွေ့ လုပ်ငန်းရှင်နဲ့ ဘဏ်လုပ်ငန်းရှင် ကိုယ်စားလှယ် အယောက် ၂၀ လောက် မြန်မာနိုင်ငံမှာ လေ့လာရေးတွေ ပြုလုပ်နေကြကြောင်းလည်း မခင်မာဝင်းက ရန်ကုန်မြို့ကနေ သတင်းပေးပို့ခဲ့ပါတယ်။
No comments:
Post a Comment