ဒီကိစ္စနဲ့ ပတ်သက်ပြီး တရားခံဘက်က လိုက်ပါဆောင်ရွက်ပေးနေတဲ့ ရှေ့နေ ဦးရောဘတ်ဆန်းအောင် က အခုလို ပြောပါတယ်။
“မနေ့က စပြီးတော့ ကပစ ၂၄ က ဌာနမှူး ဒုတိယ ဗိုလ်မှူးကြီး ကျော်ကျော်ဦး ဆိုတဲ့ တရားလိုကို စတင်စစ်ဆေးပါတယ်။ မနက်ကို ၁၀ နာရီ သာသာလောက်ကစစ်တာ တစ်နာရီခွဲမှာ ပြီးပါတယ်၊ ၂ နာရီခွဲမှာ ဒုတိယ လိုပြသက်သေဖြစ်တဲ့ ဗိုလ်ကြီးထက်ဝေအောင် ကို ဆက်လက်စစ်ဆေးပါတယ်၊ ရုံးချိန်က ၄ နာရီခွဲ ကုန်ဆုံးသွားတဲ့အတွက် ကနေ့ပြန်ချိန်းတယ် အဲ့တော့ ကနေ့လည်း ဗိုလ်ကြီးထက်ဝေအောင် ကို ကျနော်တို့ စွတ်စွဲခံရသူတွေဖက်ကလည်း အပြန်အလှန်မေးခွန်းမေးပြီး တော့ ပြီးဆုံးသွားပါတယ် နောက် တရားလိုပြ သက်သေ ဖြစ်တဲ့ အရပ်သား လယ်သမား ဦးကြည်ဝင်းကို စစ်ဆေးခဲ့ပါတယ် ပေါ်ပေါက်တဲ့ အချက်အလက် အရကတော့ အခု လောလောဆယ် လျို့ဝှက်ထားတဲ့ စက်ရုံမဟုတ်ဘူးဆိုတာရယ်၊ ဓါတုလက်နက် ထုတ်လုပ်တာ မဟုတ်ဘူးဆိုတာရယ် ပေါ်ပေါက်တဲ့အတွက် စွဲဆိုထားတဲ့ အမှုနဲ့တော့ ညှိစွန်းချက်က အခုချိန်ထိတော့ မပေါ်ပေါက်သေးဘူး။”
တရားစွဲဆိုခံထားရတဲ့ သတင်းထောက်တွေထဲက ပခုက္ကူအခြေစိုက် သတင်းထောက် ကိုလူမောင်နိုင် ဟာ ထောင်တွင်းကျန်းမာရေးမကောင်းတဲ့အတွက် တရားရုံးမှာ အာမခံလျောက်ထားခဲ့တာ ကိုတော့ တရားရုံးက ပယ်ချခဲ့တယ်လို့ ရှေ့နေ ဦးရောဘတ်ဆန်းအောင် က ဆက်ပြောပါတယ်။
“အာမခံကိစ္စနဲ့ ပတ်သက်ပြီးတော့ အမှတ် ၅ စွတ်စွဲခံရသူ လူမော်နိုင်က အစာအိမ်ရောဂါလည်း ဖြစ်တယ်၊ သရက်ရွက်ကလည်း မကောင်းဘူး၊ ကျောမှာလည်းပဲ ရေယုံတွေပေါက်ပြီးတော့ ထိုင်လို့ ခါးနာနေတယ်၊ ဒါပေမယ့် ကျနော်တို့ အာမခံ လျောက်ထားတာကို မနေ့က ပယ်တယ်၊ ဒါပေမယ့် ထောင်မှာ အထူးကုဆရာဝန်တွေ စစ်ဆေးဖို့ အတွက် ထောင်က ဆရာဝန် က ညွန်းကြားပေးမယ်လို့ ပြောပါတယ်။”
ယူနတီဂျာနယ်က သတင်းထောက်တွေကိုစွဲဆိုထားတဲ့ နိုင်ငံတော် လျို့ဝှက်ချက် ဥပဒေပုဒ်မ ၃ (၁) (က) / ၉ နဲ့အရေးယူခံထားရတဲ့အမှုမှာ တရားလိုပြသက်သေ ၄၀ ကျော် ဆက်လက် စစ်ဆေး ဖို့ရှိပြီး အပတ်စဉ် တနင်္လာနဲ့ အင်္ဂါနေ့တွေမှာ စစ်ဆေးသွားဖို့ ရှိတယ်လို့လည်း သိရပါတယ်။
ဒါပေမယ့် လာမယ့် တပတ် မတ်လ ၂၄ ရက်နဲ့ ၂၅ ရက်နေ့ ရုံးချိန်းကိုတော့ မကွေးတိုင်း တရားလွှတ်တော်က တရားသူကြီးချူပ်က ရုံးချူပ်ကို သွားစရာရှိတာရယ် အကျဉ်းထောင်အတွင်း ၀င်ရောက်စစ်ဆေးဖို့တွေ ရှိတာတွေ ကြောင့် မတ်လ ၃၁ ရက်နေ့နက ဧပြီလ ၁ ရက်နေ့ကို တခါတည်း ရုံးချိန်း ပြောင်းလဲခဲ့တယ်လို့လည်း သိရပါတယ်။
ဒီအမှုဟာ ပြီးခဲ့တဲ့ ဇန်န၀ါရီလ ၂၅ ရက်နေ့ထုတ် ယူနတီဂျာနယ်မှာ ဗိုလ်ချူပ်မှူးကြီးဟောင်း၊ တရုတ်ပညာရှင်နှင့် လက်ရှိ ကာ/ချူပ်တို့၏ ပေါက်မြို့နယ်မှာ လျို့ဝှက်ဓာတုလက်နက်စက်ရုံ ဆိုတဲ့ ခေါင်းစဉ်နာမည်နဲ့ ပခုက္ကူခရိုင် ပေါက်မြို့နယ်က အမှတ် ၂၄ ကာကွယ်ရေးပစ္စည်းစက်ရုံ အကြောင်းကို ဒေသခံလယ်သမားတွေ၊ စက်ရုံအလုပ်သမားတွေရဲ့ ပြောဆိုချက်တွေကို ကိုးကားပြီး ဂျာနယ်မှာ ဆောင်းပါး ရေးသား ဖော်ပြခဲ့တဲ့အတွက် တရားစွဲဆိုခံထားရတာဖြစ်ကြောင်း ရေဒီယို သြစတေးလျ သတင်းထောက် သန်းကျော်စိုးက သတင်းပေးပို့ ထားပါတယ်။
No comments:
Post a Comment