ပြီးခဲ့တဲ့ ဖေဖော်ဝါရီလ တုန်းကပဲ MSF အဖွဲ့ အနေနဲ့ ရခိုင် ဗုဒ္ဓ ဘာသာ ဝင်တွေနဲ့ မွတ် စလင် တွေအပေါ် ဆေးကုသမှု ပေးရာမှာ ခွဲခြားမှုတွေ လုပ်တဲ့ အကြောင်း၊ ဒုချီရာတန် ကျေးရွာ ပဋိပက္ခ အတွင်း သတင်းမှားတွေ ပြောဆို ခဲ့တယ် ဆိုပြီး မြန်မာ ပြည်ထဲရေး ဌာနက ရခိုင် ပြည်နယ်မှာ လုပ်ကိုင်ခွင့် ပိတ်ထားလိုက်ပါတယ်။
ရခိုင်ပြည်နယ်မှာ ကျန်းမာရေး စောင့်ရှောက်ခွင့် ပိတ်ပင် ခံရတာ နှစ်ပတ်သာ ရှိသေးပေမယ့် ခုအခါမှာ ဒုက္ခရောက် နေကြပြီလို့ United to End Genocide အဖွဲ့ရဲ့ အကြီးအကဲ Tom Andrews က ပြောပါတယ်။
အမေရိကန် ကွန်ဂရက် လွှတ်တော် အမတ်ဟောင်း Tom Andrews ရဲ့အဆိုအရ ရခိုင်နဲ့ ရိုဟင်ဂျာ တွေဟာ ခုချိန်ထိ ယာယီ တဲစခန်းတွေမှာ သီးသန့်စီ နေထိုင်နေရပြီး နေရာ ကျဉ်းကျဉ်း လေးမှာ လူပေါင်း ကိုးသောင်းလောက် စုပြုံနေထိုင် တာကို တွေ့ခဲ့ရတယ်လို့ ပြောပါတယ်။
ရိုဟင်ဂျာ တွေအနေနဲ့ စခန်းပြင်ပကို ထွက်ခွာဖို့ အတွက် ဂိတ်ကြေးတွေ၊ လာဘ်ပေးမှုတွေ လုပ်ရတာတွေ ရှိပေမယ့် လှေတွေနဲ့ တခြားနိုင်ငံကို ထွက်ခွာခွင့်တော့ လွတ်လွတ် လပ်လပ် ရှိကြတယ်လို့ ပြောပါတယ်။
ဒီလို အခြေအနေ ကြောင့် ပြီးခဲ့တဲ့ နှစ်ကပဲ လူအယောက် သုံးသောင်းလောက် လှေတွေနဲ့ ထွက်ခွာကြပြီး အများစုကတော့ လူကုန်ကူးသူရဲ့ လက်ထဲ ရောက်ရှိ သွားကြတယ်လို့ ဆိုပါတယ်။
ကျန်းမာရေး ကောင်းသူတွေ အတွက်တောင် နေထိုင်ရ ခက်ခဲတဲ့ နေရာမှာ ကျန်းမာရေး စောင့်ရှောက်မှုတွေ မရကြတဲ့ အတွက် နာမကျန်း ဖြစ်သူတွေ ပိုပြီး အတိ ဒုက္ခရောက်နေကြ တယ်လို့ ဆိုပါတယ်။
မြန်မာနိုင်ငံ ဆေးရုံတွေမှာ ဆေးကုသခွင့် ရှိပေမယ့် အဲဒီကို သွားနိုင်ဖို့ ငွေကြေးပေးရတာတွေ၊ စခန်းပြင်ထွက်ရင် တိုက်ခိုက်ခံရမှာ စိုးရိမ်တာတွေကြောင့် မသွားဖြစ်ကြဘူးလို့ ဆိုပါတယ်။
ဒါကြောင့် တချို့လူတွေမှာ သောက်စရာဆေးမရှိတာတွေ၊ သောက်ရမယ့်ဆေး ကုန်ခါနီးတဲ့ အခြေအနေမှာ ရှိနေတယ်လို့ ဆိုပါတယ်။
ဆေးရုံတက်ဖြစ်တဲ့လူတွေကလည်း ရန်ကုန်က အထူးကုတွေကို ပြသမှ ရမယ်လို့ ရခိုင်ပြည်နယ်က ဆရာဝန်တွေ ညွန်ကြားချက်ရလာရင်လည်း သွားရောက်ကုသဖို့ ငွေမရှိတာတွေ၊ တခြားနယ်ကို ခရီးသွားခွင့်လက်မှတ်ရဖို့အတွက် ငွေမတတ်နိုင်ကြတဲ့ အခြေအနေမှာ ရှိနေတဲ့အတွက် သေဆုံးခဲ့ရသူ တချို့ရှိနေပြီလို့ သတင်းတွေမှာ ဖော်ပြထားပါတယ်။
သူ့အနေနဲ့ ရခိုင်ပြည်နယ်ကို တစ်ကြိမ်ထက်မနည်း သွားရောက်ဖူးပေမယ့် ဒီတချီမှာတော့ တင်းမာမှုတွေ၊ သီးမခံနိုင်မှုတွေ၊ မုန်းတီးရေးစကားတွေကို ပိုမိုကြားခဲ့ရတယ်လို့လည်း သူက ပြောပါတယ်။
မြန်မာနိုင်ငံရေးမှာ လမ်းကြောင်းမှန်ဘက်ကို ရောက်လာနေပြီလို့ ယူဆနေကြပေမယ့် ရိုဟင်ဂျာအရေးမှာတော့ အခြေအနေပိုဆိုးဝါးနေတယ်လို့လည်း ပြောပါတယ်။
ဒေသတွင်းမှာ အကူအညီပေးနေတဲ့ တခြားအဖွဲ့အစည်းတွေရှိပေမယ့် ပွင့်ပွင့်လင်းလင်း ပြောဆိုဖို့ ကြောက်နေကြတဲ့အကြောင်း သူကိုယ်တိုင်တောင် ထောင်လှမ်းရေးတွေရဲ့ နောက်ယောင်ခံမှုကို ခံရတဲ့အတွက် အဲဒီကလူတွေဟာ အကြောက်တရားတွေနဲ့ နေနေရတယ်လို့ ပြောသွားခဲ့ပါတယ်။
No comments:
Post a Comment