သံလွင်မြစ်ပေါ်တွင် တည်ဆောက်သွားမည့် ရေကာတာများသည် သဘာဝဘေးအန္တရာယ်အမျိုးမျိုးကြောင့် ပျက်စီးပြိုကျပါက ရေကာတာအောက်ပိုင်းရှိ နေထိုင်ကြသော ဒေသခံလူသန်းပေါင်းများစွာ ဒုက္ခရောက်မည် ဖြစ်သလို ထိခိုက်နစ်နာမှုများအတွက် သက်ဆိုင်ရာအသီးသီးမှတဆင့် လူထုများကြုံတွေ့ခံစားရနိုင်မည့် အရာများကို သိရှိရန် ဆန္ဒထုတ်ဖော် တောင်းဆိုမှုများပြုလုပ်ရခြင်းဖြစ်သည်ဟု သျှမ်းသဘာဝ ပတ်ဝန်းကျင် ထိန်းသိမ်းရေးအဖွဲ့မှ စိုင်းခေဆိုင်က ပြောသည်။
“နိုင်ငံရည်ရှည်ဖွံ့ဖြိုးတိုးတက်ဖို့ဆိုရင် ဒေသခံတွေ ထိခိုက်နစ်နာမှု မရှိစေဖို့ လျှပ်စစ်စွမ်းအင် လိုအပ်ချက်တွေကို အခြားနည်းမှန်လမ်းမှန်များကို ရှာဖွေဖို့ လိုတယ် ကျနော်တို့ယူဆတယ်။ ဒါကြောင့် ဒီရေကာတာစီမံကိန်းကို ဆက်မလုပ်ဖို့ ကျနော်တို့ ဆန္ဒထုတ်ဖော်တာပါ”ဟု စိုင်းခေဆိုင်းက ကေအိုင်စီသို့ ပြောသည်။
ကော့မုပွန်သောင်ပြင်တွင် ပြုလုပ်သည့် ရေကာတာ ဆန့်ကျင်ရေးထုတ်ဖော်ဆန္ဒပြပွဲတွင် အရပ်ဖက်လူမှုအဖွဲ့ ၁၆ ဖွဲ့နှင့် ဒေသခံလူထုပေါင်း ၁၅၀ ခန့်တက်ရောက်ပြီး ရေကာတာ ဆန့်ကျင်ရေးဆိုင်ရာ စာတမ်းများ ကိုင်ဆောင် ဆန္ဒထုတ်ဖော်ခဲ့ကြခြင်းဖြစ်သည်။
ရေကာတာစီမံကိန်းနှင့် ပတ်သက်၍ ကရင်ပြည်နယ် စက်မှုနှင့် လျှပ်စစ်ဝန်ကြီး စောကြည်လင်းက မြန်မာနိုင်ငံ တွင် လျှပ်စစ်စွမ်းအင် အလုံအလောက်ရရှိရန်အတွက် အခြားနည်းလမ်းများကို ရှာဖွေပြီး လူထုများ နစ်နာ ထိခိုက်မှုများ မဖြစ်ပေါ်နိုင်သည့် သဘာဝဓါတ်ငွေ့ဖြင့် လျှပ်စစ်စွမ်းအင် ထုတ်နိုင်ရန် နိုင်ငံတော်အစိုးရဘက်မှ စဉ်းစားထားမှုများရှိကြောင်း ကေအိုင်စီသို့ ပြောသည်။
စောကြည်လင်းက “ကရင်ပြည်နယ်က ဟတ်ကြီးရေကာတာကိုတော့ ၂၀၀၈ ကတည်းက ရပ်ထားတာကြာပြီ။ ဒီအစိုးရလက်ထက်မှာတော့ ဆက်လုပ်သွားဖို့တော့ မရှိဘူး။ နိုင်ငံတော်တိုးတက်ဖို့ လျှပ်စစ်စွမ်းအင်က အရေး ကြီးဆုံးပဲ။ ဒါပေမယ့် ရေအားသုံးလျှပ်စစ်ထုတ်တာက အန္တရာယ်လည်းများတယ်။ ဒေသခံလူထု အတွက်လည်း ထိခိုက်နစ်နာမှုရှိတယ်။ ဒါကြောင့် အခုနောက်ပိုင်းမှာတော့ နိုင်ငံတော်က သဘာဝဓါတ်ငွေ့သုံး လျှပ်စစ်ကို ထုတ်လုပ်ဖို့တော့ စဉ်းစားလာတယ်”ဟု ပြောသည်။
လက်ရှိ ၎င်းသံလွင်မြစ်ပေါ်တွင် ဆောက်လုပ်မည့် ရေကာတာစီမံကိန်းများမှာ သျှမ်းပြည်နယ်တွင် ကွမ်းလုံ၊ နောင်ဖ၊ တာဆန်း၊ ကရင်နီပြည်နယ်တွင် ရွာသစ်နှင့် ကရင်ပြည်နယ်တွင် ၀ဲကြီး၊ ဟတ်ကြီး စသည့် ရေကာတာ တို့ဖြစ်ကြပြီး ယင်းရေကာတာ(၅)ခု၏ ထုတ်လုပ်နိုင်မည့် လျှပ်စစ်စွမ်းအင် စုစုပေါင်း ၁၅,၀၀၀ မီကာဝပ် ရရှိမည် ဖြစ်သည်။ ထိုရေကာတာစီမံကိန်းမှ ရရှိမည့် အကျိုးအမြတ်များကို ထိုင်းနှင့် တရုတ်နိုင်ငံတို့အတွက် အများဆုံး ခံစားရမည်ဖြစ်ပြီး မြန်မာနိုင်ငံအတွက် အနည်းငယ်သာ အကျိုးခံစားရမည်ဖြစ်ကြောင်း သိရသည်။
No comments:
Post a Comment