ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ မန္တလေးတိုင်း တံတားဦးမြို့နယ် ပြည်သူ့လွှတ်တော် ကိုယ်စားလှယ် ဒု ဗိုလ်ချုပ်ကြီးဟောင်း ဦးတင်အေးသည် လွှတ်တော် ကိုယ်စား လှယ် အဖြစ်မှ နုတ်ထွက်ရန်အတွက် ယနေ့ ပြည်ထောင်စု လွှတ်တော် သို့ တင်သွင်း လိုက်သည်။“ဦးတင်အေးက ဒီနေ့ပဲ လွှတ်တော် ကိုယ်စားလှယ်အဖြစ်က နုတ်ထွက်ကြောင်း စာတင်တာကို ပြည်ထောင်စု လွှတ်တော် နာယက အမျိုးသားလွှတ်တော်ဥက္ကဋ္ဌ ဦးခင်အောင်မြင့်က ဖတ်ကြားတယ်။ ဘာဖြစ်လို့ နုတ်ထွက်တယ်ဆိုတာတော့ မပြောဘူး။ အားလုံးက အံ့အားသင့်ကုန်တယ်” ဟု လွှတ်တော်ကိုယ်စားလှယ် တဦးက ပြောသည်။
လွှတ်တော် ကိုယ်စားလှယ်များက ဦးတင်အေးသည် အစိုးရသစ်ဖွဲ့ရာတွင် အာဏာ ခွဲဝေမှု မညီမျှခြင်းကြောင့် လွှတ်တော် ကိုယ်စားလှယ်အဖြစ်မှ တရားဝင် နုတ်ထွက်ခြင်း ဖြစ်နိုင်သည်ဟု ထင်မြင်ယူဆနေကြသည်။
ဒု ဗိုလ်ချုပ်ကြီးဟောင်း ဦးတင်အေးသည် စစ်တပ်အတွင်း၌ ဗိုလ်ချုပ်မှူးကြီးသန်းရွှေ၏ လူယုံတဦးဟု လူသိများ၍ ဒုတိယ ဗိုလ်ချုပ်မှူးကြီး မောင်အေးပြီးလျှင် ဦးရွှေမန်း၊ သီဟသူရ ဦးတင်အောင်မြင်ဦးတို့နှင့် အတူ စစ်တပ်အပေါ် သြဇာညောင်းသည့် နံပါတ် ၆ ခေါင်းဆောင်ဖြစ်သည်။
စစ်တပ်ထိပ်ပိုင်း ခေါင်းဆောင်များ မြောက်ကိုရီးယား၊ ရုရှားစသည့် နိုင်ငံခြားတိုင်းပြည်များသို့ သွားရောက်၍ လက်နက် ၀ယ်ယူရာတွင် ဦးတင်အေးမှာ အရေးပါသူတဦးအဖြစ် အမြဲတမ်း လိုက်ပါရသူဖြစ်သည်။
ပြီးခဲ့သည့်နှစ် သြဂုတ်လ အတွင်းက ထိပ်တန်းစစ်ဗိုလ်ချုပ်ကြီးများကို ရွေးကောက်ပွဲ ၀င်ရန် စစ် အစိုးရက ရာထူးမှ နုတ် ထွက်စေခဲ့ရာ ဦးတင်အေးကို မန္တလေးတိုင်း တံတားဦးမြို့နယ် ပြည်သူ့လွှတ်တော် ကိုယ်စားလှယ် အဖြစ် ၀င်ရောက်ယှဉ်ပြိုင် အရွေးခံ စေခဲ့သည်။
ဦးတင်အေးသည် စစ်တက္ကသိုလ် အပတ်စဉ် ၉ ကျောင်းဆင်းဖြစ်ပြီး ၁၉၉၄ ခုနှစ်ခန့်က တနင်္သာရီတိုင်းတွင် အသစ် ဖွင့်လှစ်သည့် ဒေသကွပ်ကဲမှု စစ်ဌာချုပ်တွင် ဗိုလ်မှူးချုပ် တာဝန်ယူခဲ့ပြီးနောက် တောင်ပိုင်းတိုင်း စစ်ဌာချုပ် တိုင်းမှူး အဖြစ် တာဝန်ထမ်းဆောင်ခဲ့သည်။
ထို့နောက် အာဏာသိမ်း စစ်ကောင်စီတွင် အဖွဲ့ဝင်တဦး ဖြစ်လာခဲ့သည့်အပြင် တပ်မတော် စစ်လက်နက်ပစ္စည်း ထုတ်လုပ်ရေးအရာရှိချုပ် အဖြစ်လည်း တာဝန်ယူခဲ့သည်။
၎င်းသည် စစ်တပ် စီးပွားရေးကို အကောင်အထည် ဖော်ပေးရသည့် မြန်မာ့စီးပွားရေး ဦးပိုင် လီမိတက်တွင် ဥက္ကဋ္ဌအဖြစ် ပြီးခဲ့သည့်နှစ် သြဂုတ်လ အထိ တာဝန်ယူခဲ့သူ ဖြစ်သည်။
မြန်မာ့စီးပွားရေး ဦးပိုင်လီမိတက် ဥက္ကဋ္ဌ ရာထူးကို ဗိုလ်ချုပ်ခင်ဇော်ဦးအား တရားဝင် လွှဲပြောင်းပေးခဲ့ရ သော်လည်း ထိုတာဝန်များကို နောက်ကွယ်မှ ကြိုးကိုင်ရန် ဗိုလ်ချုပ်မှူးကြီးက ဦးတင်အေးကို အမိန့်ပေးခဲ့သည်။
ဦးတင်အေး လက်ထက်တွင် စစ်တပ်စီးပွားရေး ကုမ္ပဏီဖြစ်သည့် ဦးပိုင်လီမိတက်သည် မြန်မာဘီယာ၊ တိုက်ဂါးဘီယာ၊ ရမ္မာမော် တော် ကားစက်ရုံ၊ ရူဘီမတ် ကုန်တိုက်၊ မြန်မာတံဆိပ် အထည်ချုပ်စက်ရုံ၊ ဘိလပ်မြေစက်ရုံ၊ ကြယ်ငါးပွင့် သင်္ဘောလိုင်း၊ ပါရမီ ကားလိုင်း၊ မြောက်ကိုရီးယား နိုင်ငံသို့ ဆန်တင်ပို့ခြင်း စသည့်လုပ်ငန်းများကို တိုးချဲ့လုပ်ကိုင်ခဲ့သည်။
ဖေဖော်ဝါရီ ၁၂ ရက်နေ့က နေပြည်တော် ဆာဖာရီဥယျာဉ်ကို ဦးတင်အေး သွားရောက်ဖွင့်လှစ်ပေးခဲ့ရာ အစိုးရပိုင် သတင်းစာများ၌ ၎င်းကို နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီဝင်ဟု သုံးနှုန်းထားကြောင်း တွေ့ရသည်။
ယခုအခါ ဗိုလ်ချုပ်မှူးကြီး သန်းရွှေ ဦးဆောင်ဖွဲ့စည်းပေးသည့် အစိုးရသစ်တွင် အာဏာခွဲဝေရေး မညီမျှမှုများနှင့် ပတ်သက်၍ မကျေနပ်မှုများ ဖြစ်ပေါ်နေကြောင်း၊ မကြာသေးမီက ကာကွယ်ရေး ၀န်ကြီး ခန့်အပ်မှုကို မကျေနပ်သည့်အတွက် ဗိုလ်ချုပ်မှူးကြီး သန်းရွှေအား စောဒကတက် ပြန်လည် ပြောဆိုခဲ့သူ ဒုတိယ ဗိုလ်ချုပ်ကြီး သူရမြင့်အောင်ကို ရာထူးမှ ဖယ်ရှားခဲ့ ကြောင်း နေပြည်တော် စစ်တပ်အသိုင်းအ၀န်းတွင် ပြောဆိုနေကြသည်။
No comments:
Post a Comment