ပန်းမြတ်ဇော်
Emperor Music Group (EMG) မှ စီစဉ်သည့် Emperor သင်္ကြန်အကြို ဖျော်ဖြေပွဲကို ဧပြီ ၁၁ ရက် ညနေ ၄ နာရီမှ ၇ နာရီအထိ MCC ခန်းမ၌ ကျင်းပပြုလုပ်မည် ဖြစ်သည်။
အဆိုပါ အစီအစဉ်နှင့် ပတ်သက်၍ မတ်လ ၃၀ ရက်တွင် ကန်တော်ကြီး မျှော်စင်ကျွန်းရှိ P3 Fusion Food ၌ ပြုလုပ်သည့် စာနယ်ဇင်းရှင်းလင်းပွဲတွင် Emperor တေးဂီတ အဖွဲ့မှ မာန်နေဂျာ ကိုသန့်ဇော်က ပြောကြားခဲ့ခြင်း ဖြစ်သည်။
Emperor သင်္ကြန် ပျော်ပွဲရွှင်ပွဲတွင် Emperor တေးဂီတအဖွဲ့နှင့် အတူ အဆိုတော် ရင်ဂို ၊ ရဲသွင်၊ ဘိုဘို၊ ဝေလ၊ ထူးအယ်လင်း၊ လိမ္မော်သီး နှင့်အတူ မော်ဒယ်နှင့် သရုပ်ဆောင် ဆန်းသစ်လနှင့် ဝါဆိုမိုးဦး တို့ကလည်း ပါဝင်သီဆိုဖျော်ဖြေမည်ဖြစ်ပြီး တေးဂီတအဖွဲ့သစ်များလည်း ပါဝင်ဖျော်ဖြေမည် ဖြစ်သည်။
"ဒီနှစ် သင်္ကြန်က ရန်ကုန်မှာ မတီးဖြစ်ဘူး ဆိုတော့ ရန်ကုန်က ပရိသတ် အတွက် ရန်ကုန်မှာ ပွဲကြီး တစ်ပွဲလုပ်ချင်တာနဲ့ သင်္ကြန်အကြိုလုပ်လိုက်ရင် ပိုကောင်းမယ်။ ဒီပွဲပြီးရင် သင်္ကြန်ကျပြီ ဆိုပြီး ဒီပွဲကို စီစဉ်ပြီး လုပ်ဖြစ်သွားတာပါ" ဟု Emperor တေးဂီတ အဖွဲ့မှ မန်နေဂျာ ကိုသန့်ဇော်က ပြော သည်။
ထိုဖျော်ဖြေပွဲတွင် အဆိုတော်များမှ သင်္ကြန်သီချင်းများ၊ ကိုယ်ပိုင်သံစဉ်များဖြင့် သင်္ကြန်မဏ္ဍပ်ဆောက်လုပ်ကာ ဖျော်ဖြေကြ မည် ဖြစ်သည်။ ဖျော်ဖြေပွဲအပြင် ဈေးဆိုင်များ ဖွင့်လှစ်ပေးမည် အပြင် ကလေးများ ရေဆော့ကစားရန်အတွက်လည်း စီစဉ်ပေးထားမည် ဖြစ်သည်ဟု ၎င်းက ဆိုသည်။
အဆိုပါ ဖျော်ဖြေပွဲအတွက် ဝင်ကြေး ကျပ် ၃၀၀၀ (သို့) ကျပ် ၄၀၀၀ ဖြင့် သတ်မှတ် ရောင်းချမည်ဖြစ်ပြီး ဧပြီ ၅ ရက်တွင် မန်းသီရိ တေးသံသွင်း၊ City Mark တို့တွင် စတင်ရောင်းချပေးသွားမည် ဖြစ်သည်။
Emperor တေးဂီတအဖွဲ့သည့် ၂၀၁၄ ခုနှစ်က သင်္ကြန်ပွဲတော်တွင် ရန်ကုန်မြို့ရှိ မြိုင်ဟေဝန်ပန်းခြံတွင် တီးခတ်ဖျော်ဖြေခဲ့ပြီး ယခုနှစ် သင်္ကြန်တွင် ချောင်းသာတွင် အဆိုတော် လင်းလင်း၊ ဂျီလတ်၊ ဘိုဘို၊ ဆန်းသစ်လနှင့် ချစ်သုဝေတို့နှင့်အတူ ဖျော်ဖြေမည် ဖြစ်သည်။
Emperor တေးဂီတအဖွဲ့ အနေဖြင့် မနှစ်က သင်္ကြန်၌ ရန်ကုန်မြို့ရှိ မြိုင်ဟေဝန်ပန်းခြံတွင် တီးခတ် ဖျော်ဖြေခဲ့ပြီး ယခုနှစ် သင်္ကြန်ကိုတော့ Emperor အဖွဲ့သည် ချောင်းသာတွင် အဆိုတော် လင်းလင်း၊ ဂျီလတ်၊ ဘိုဘို၊ ဆန်းသစ်လ၊ ချစ်သုဝေ တို့ဖြင့် ဖျော်ဖြေ ကြမည် ဖြစ်သည်။
No comments:
Post a Comment