အတုအယောင် ရီဖရင်ဒမ်ကြီးပြီးလို့ ၂၀၀၉၊ ၂၀၁၀ တိုင် လေလှိုင်းတွေကမြိုင်

ဒေါက်တာလွဏ်းဆွေ

ဆန္ဒ ခံယူပွဲဆိုတုန်း ကလည်း ဆန္ဒခံယူပွဲ အလျောက်မို့ အခုလည်း ၂၀၁၀ ရွေးကောက်ပွဲဆိုပြီး နအဖက အနံ့လေး ထပ်ထုတ်ပေး ထားပြန်တော့ ၂၀၁၀ ရွေးကောက်ပွဲ အနံ့ကိုရှုရင်း ရှိုက်ရင်း တိုက်ရိုက်လေလှိုင်း ဆွေးနွေး ပွဲတွေမှာ အာပေါင်အာရင်း သန်သန်နဲ့ ဆွေးနွေး ငြင်းခုံနေကြသံတွေ ကြားနေရ ပြန်ပါပြီ။ ပါဝင်ဆွေးနွေး ကြသူ အများစုက ပြည်ပမှာ နေထိုင်ကြ သူတွေပါ။ အမေး နွားကျောင်းသား များက ပျော်မဆုံး မော်မဆုံး ဆွမေး ဖွမေးနေ ကြသလို အဖြေ ဘုရား လောင်းများကလည်း တယောက်တမျိုး မရိုးနိုင်အောင် ဖြေကြား တော်မူနေကြတာကို ခပ်စိတ်စိတ် ကြားနေရပါတယ်။ ဆွေးနွေးသံတွေ မြိုင်မြိုင်ဆိုင်ဆိုင် ကြားနေရပုံများ “သီတင်းကျွတ်ပွဲတော်ကြီးပြီးလို့ တန်ဆောင်မုန်း တန်ဆောင်တိုင် ဆီမီးကမြိုင်” ဆိုတဲ့ သီချင်းကို စာသားပြောင်းပြီး “အတုအယောင် ရီဖရင်ဒမ်ကြီးပြီးလို့ ၂၀၀၉၊ ၂၀၁၀ တိုင် လေလှိုင်းတွေကမြိုင်” လို့ ထဟဲရတော့မလို …။

တခုပဲ တွေးမိ ပါတယ်။ မြန်မာပြည်ထဲမှာ ခြစ်ကုတ် ၀ယ်ထားကြတဲ့ ရေဒီယိုလေး တွေဖွင့်ပြီး ညမှောင်မှောင် လမှောင်မှောင် ထဲကနေ နားဆင် နေကြတဲ့ ကျနော်တို့ရဲ့ ချစ်လှစွာသော ပြည်သူ လူထုကြီးကတော့ တယောက်တပေါက် ဆွေးနွေး ငြင်းခုံသံတွေကို ကြားရပြီး၊ ဒီမိုကရေစီရေး အတွက် အားတက်ကြ လေမလား၊ မျက်လုံး ကလေးတွေ ကလယ်ကလယ်နဲ့ အားကိုးရာမဲ့ ဖြစ်နေကြ လေမလား၊ တော်ပြီ … ဓာတ်ခဲဖိုး ကုန်တယ်ကွာဆိုပြီး ရေဒီယိုကိုပဲ ပိတ်ပစ် လိုက်ကြလေမလား ဆိုတာကို စိုးရိမ်တကြီး တွေးနေမိတာပါ။


အခုအထိ ကြားခဲ့ရသမျှတွေထဲမှာ လှုပ်လှုပ်ရှားရှားအဖြစ်ဆုံး ဆွေးနွေးပွဲလေးကို ညွှန်းပါဆိုရင်ဖြင့် ဖေဖော်ဝါရီ (၂၁) ရက် စနေညပိုင်းက ထုတ်လွှင့်ခဲ့တဲ့ ဗွီအိုအေ တိုက်ရိုက်လေလှိုင်း အစီအစဉ်ကို ညွှန်းရပေလိမ့်မယ်။ အဲဒီဆွေးနွေးပွဲမှာ ထူးခြားတာက စီစဉ်တင်ဆက်တဲ့ ဦးကျော်ဇံသာရဲ့ လူရွေးချယ်မှုပါ။ အဓိက ပင်တိုင်ဆွေးနွေးဖို့ ရွေးချယ်ထားတဲ့ မြန်မာ့အရေး လေ့လာသုံးသပ်သူလို့ ဆိုတဲ့ ဦးအောင်သူငြိမ်းနဲ့ ဦးမင်းဇော်ဦးတို့ နှစ်ဦးစလုံးက ၂၀၁၀ ရွေးကောက်ပွဲကို ၀င်ရောက်ယှဉ်ပြိုင်ကြဖို့ နှပ်ကြောင်းပေး ပြောဆို ဆွေးနွေးသွားကြတာကို ကြားလိုက်ရလို့ပါ။ တိုက်ဆိုင်တာပဲလား တမင်တကာလုပ်တာလား ဆိုတာတော့ ဦးကျော်ဇံသာ ကိုယ်တိုင်မှပဲ သိနိုင်ပါလိမ့်မယ်။ စီစဉ်တင်ဆက်သူ ဦးကျော်ဇံသာရဲ့ အကြိုမိတ်ဆက် ပြောကြားမှုတွေကို ကြားရပုံကလည်း ၂၀၁၀ ရွေးကောက်ပွဲကို ၀င်ဖို့ တွန်းအားပေး ချင်ချင် လေသံမျိုး ပေါက်နေလေ တော့ ကြားထားတဲ့ သတင်းအစ အနတွေ မှန်နေလေပြီလား လို့တောင် တွေးမိပြီး ဆံပင်တွေ ထောင်ချင်ချင် ဖြစ်မိပါတော့တယ်။

ပြီးခဲ့တဲ့ ဆန္ဒခံယူပွဲတုန်းကလည်း ဒိုနာ ဆိုသူတွေက အတိုက်အခံ အုပ်စုအချို့ကို ဒေါ်လာသိန်းနဲ့ ချီချပေးပြီး “ဗုတ်နိုး ” လိုင်းကို လျှောက်ခိုင်း ခဲ့တယ်။ ဒါပေမယ့် နအဖ မျက်နှာပြောင်တိုက် လိမ်ညာ သမျှကို လက်ပိုက်ကြည့်နေရပြီး ဘာမှမခုခံ မတုန့်ပြန်နိုင်ဘဲ ခွက်ခွက်လန်ရှုံး နိမ့်မှုနဲ့ ရင်ဆိုင်ခဲ့ရ တယ်။ အခုလည်း ဒိုနာ ဆိုသူတွေက သူတို့အနှစ် (၂၀) ကြာ အထောက်အပံ့ ပေးခဲ့တဲ့ ပြည်ပ အတိုက်အခံ အုပ်စုတွေရဲ့ စွမ်းဆောင်ရည်ကို စိတ်ပျက်လက်ပျက်ဖြစ်လာပြီး ၂၀၁၀ ရွေးကောက်ပွဲကိုဝင်ဖို့ ဖိအားပေးနေတယ်လို့ ကြားရပါတယ်။ ဒိုနာတွေက သူတို့ကြိုးဆွဲရာကတဲ့ အဖွဲ့အစည်းကိုမှ (၂၀၁၀ ရွေးကောက်ပွဲဝင်မှ) ဒေါ်လာ အထောက်အပံ့ ပေးတော့မယ်လို့ ဆိုပါတယ်။

အဲဒီ အတွက် ဒေါ်လာရရေး ဒို့အရေး ဆိုပြီး ရွေးကောက်ပွဲ ၀င်ဖို့ တိတ်တိတ်ပုန်း ခြေပုန်းခုတ် လှုံ့ဆော်နေတဲ့ အတိုက်အခံ ဆိုသူ အချို့ရှိနေပြီ ဆိုတဲ့ အသံတွေ နားနဲ့မဆံ့အောင် ကြားနေရ ပါတယ် (ဘယ်သူတွေလဲဆိုတာတော့ မကြာမတင်သော ကာလမှာ မျက်ဝါး ထင်ထင် တွေ့မြင် ကြရတော့မှာပါ။ နအဖက ၂၀၁၀ ရွေးကောက်ပွဲကို အမှန်တကယ် ကျင်းပပေးတော့မယ် ဆိုရင်ပေါ့)။

ဗွီအိုအေ တိုက်ရိုက်လေလှိုင်း အစီအစဉ်ကို နားဆင်ရတဲ့အခါမှာတော့ ပိုပြီးသံသယ ၀င်စေပါတော့တယ်။ ဘာဖြစ်လို့လဲဆိုတော့ ဗုတ်နိုး ကာလတုန်းက နိုးဗုတ်သတင်းပို့ရင် အသံလွှင်ဋ္ဌာန တွေကမယူဘူး၊ မလွှင့်ဘူးဆိုတဲ့ မိတ်ဆွေသတင်းထောက်ရဲ့ စကားကို ပြန်လည် ကြားယောင်မိ လို့ပါ။

ကြုံရဆုံ ရဘုံဘ၀က အနို့ကလို သို့ကလိုမျိုးတွေ ဖြစ်နေလေတော့ ဗိုလ်ချုပ်အောင်ဆန်းတို့ ဖက်ဆစ်ဂျပန်တော်လှန်ရေး ကာလတုန်း ကများ အခု အချိန်အခါလို ပရိုပိုဇယ်တွေ ဒိုနာတွေ မှိုလိုပေါ နေခဲ့ရင် မြန်မာပြည် လွတ်လပ်ရေးတောင် ရခဲ့မှာ မဟုတ်ဘူး လို့ တွေးမိပြီး တော်ပါသေးရဲ့လို့ သက်ပြင်းချမိရဲ့။

ပထမဦးစွာ ဦးကျော်ဇံသာရဲ့ မိတ်ဆက်စကား လေးကို ဆွေးနွေးကြည့်ချင်ပါတယ်။ ဦးကျော်ဇံသာ က “တကယ်တော့ ဒီ ၂၀၁၀ ရွေးကောက်ပွဲမှာ ၀င်ရောက်ယှဉ်ပြိုင်မယ့် လူတချို့ကိုကြည့်ရင် တချို့ကလည်း ပွဲလန့်တုန်း ဖျာခင်းချင်တဲ့ လူတွေ၊ အာဏာပိုင် တွေကို မျက်နှာချိုသွေး ပြီးတော့ မျက်နှာလို မျက်နှာရ လုပ်လိုလို့ ယှဉ်ပြိုင်မယ့်သူတွေ ရှိကောင်းရှိမှာ ဖြစ်ပေမယ့်လည်း ဒီလမ်းစဉ်ဟာ တိုင်းပြည်အကျိုးကို တကယ်ဆောင်ရွက်နိုင်မယ်လို့ သဘောရိုးနဲ့ ယုံကြည်ပြီး ဆောင်ရွက်တဲ့လူတွေလည်း ပါမယ်ဆိုတာ မလွဲပါဘူး။ ဒါကြောင့် ဒီဟာကို ချင့်ချင့်ချိန်ချိန် စဉ်းစားနိုင်အောင်လို့ ဒီနေ့အစီအစဉ်ကို ရွေးချယ်လိုက်ခြင်း ဖြစ်ပါတယ်”လို့ ဆိုပါတယ်။

ပွဲလန့်ဖျာခင်းသူတွေနဲ့ အာဏာပိုင်တွေကို မျက်နှာချိုသွေး သူတွေအကြောင်း အထူးတလည် ဆွေးနွေးစရာမရှိပေမယ့် “သဘောရိုးနဲ့ ယုံကြည်ပြီး ဆောင်ရွက်သူ တွေပါမယ်ဆိုတာ မလွဲပါဘူး” ဆိုတဲ့ ဦးကျော်ဇံသာရဲ့ ထင်မြင်ယူဆမှု အပေါ်မှာတော့ အနည်းငယ် ဆွေးနွေး လိုပါတယ်။

ဒီနေ့ အထိ စီအာပီပီ၊ အန်အယ်လ်ဒီ၊ ယူအန်အေနဲ့ မွန်ပြည်သစ်ပါတီလို အပစ်အခတ်ရပ်အဖွဲ့များ၊ လက်နက်ကိုင်တော်လှန်ရေး အဖွဲ့အစည်း တော်တော်များများက ၂၀၁၀ ရွေးကောက်ပွဲကို ဆန့်ကျင်နေချိန်မှာ ရွေးကောက်ပွဲဝင်မယ့် အဖွဲ့ဆိုလို့ ၈၈ မျိုးဆက်ကျောင်းသား အတုတွေ၊ အန်အယ်လ်ဒီက ခွဲထွက်ပြီး နအဖအလိုကျ ခေါင်းညိတ်ခေါင်းခါ လုပ်နေတဲ့ ရုပ်သေးအမတ်တွေ၊ တစညတွေ၊ ကြံ့ဖွံ့တွေနဲ့ ငါတို့ အနေချောင်ရင်ပြီးရော ဘယ်သူတက်တက် ဒို့အစိုးရဆိုတဲ့ ခပ်တိမ်တိမ်လူမျိုးတွေသာ ရွေးကောက်ပွဲဝင်ဖို့ ဆွေးနွေး ပြောဆိုနေကြတာပါ။ အဲဒီ လူတွေပဲ ပါတီထောင်ခွင့်တွေ၊ ရွေးကောက်ပွဲဥပဒေတွေ မထုတ်ပြန်ခင်မှာ နအဖရဲ့ မျက်နှာသာပေး မှုနဲ့ ခြေပုန်းခုတ် စည်းရုံးလှုံ့ဆော်ခွင့်တွေ ရနေကြတာပါ။ ပြည်ပကနေ ပြန်ဝင်လာပြီး ၂၀၁၀ ရွေးကောက်ပွဲ ၀င်မယ်ဆိုတဲ့ သူတွေ ကလည်း ယူဒီပီလို မရှင်းမရှင်း အဖွဲ့တွေနဲ့ ဒိုနာအလိုကျ ကပြအသုံးတော်ခံမယ့် အဖွဲ့အစည်း တွေရယ်လောက်ပဲ ရှိမှာပါ။

အဲဒီတော့ ဦးကျော်ဇံသာပြောတဲ့ သဘောရိုးနဲ့ ယုံကြည်ပြီး ဆောင်ရွက်တဲ့ လူတွေကို အခု မြင်တွေ့ နေရပြီဆိုရင် ဘယ်သူတွေလဲ ဆိုတာရယ်၊ အဲဒီ လူတွေအနေနဲ့ နအဖ မျက်နှာသာ အပေးခံရ သူတွေလို ပါတီ တရားဝင်ထောင်ခွင့်မရခင် အခုလိုအချိန်မှာ စည်းရုံး လှုပ်ရှားခွင့် ရနေကြပြီလား ဆိုတာရယ် သိလိုလှပါတယ်။

အဲဒီလူတွေက အခုတော့ မမြင်သာသေးဘူး ရွေးကောက်ပွဲနီးမှ ပေါ်လာလိမ့်မယ်ဆိုရင်တော့ အဲဒီ ပေါ်လာမယ့်လူတွေဟာ သဘောရိုးနဲ့ ဆောင်ရွက်တဲ့လူတွေ ဖြစ်ကောင်းဖြစ်နိုင်ပေမယ့် အားကိုးလောက်တဲ့ လူတွေလို့တော့ ပြောလို့ရမှာမဟုတ်ပါဘူး။ အခွင့်အရေးသမားတွေ၊ ပေါင်းစားမယ့်သူတွေ မဟုတ်ရင် နအဖအခြေခံဥပေဒရဲ့ ညစ်လုံးညစ်ကွက် ကောက်ကျစ်လှည့်ဖျား မှုတွေကို မမြင်တတ်၊ ရှေ့ရှေး နောက်ရေး လည်း ဘာမှမချင့်ချိန် မစဉ်းစားတတ်တဲ့ လူနုံလူအတွေပဲ ဖြစ်ပါလိမ့်မယ်။

အဲဒီတော့ တမတ်သား စစ်ဗိုလ်တွေရယ်၊ အခွင့်အရေး သမားတွေ၊ နအဖနဲ့ ပေါင်းစားမယ့် လူတွေ ရယ်၊ အဲဒီလို(ရိုးသားပြီး စိတ်ကောင်း ရှိချင်ရှိမယ်) လူနုံလူအ တွေရယ် ပါဝင်မယ့် လွှတ်တော်ဟာ လည်း ပြည်သူ့လူထုအတွက် အားကိုးအားထားပြုရမယ့် လွှတ်တော်ဖြစ်လာ နိုင်စရာ အကြောင်းမရှိဘူး လို့ပဲ ပြောရပါမယ်။

ဆက်လက်ပြီးတော့ ဦးအောင်သူငြိမ်းရဲ့ ဆွေးနွေးချက်တွေကို ကောက်နှုတ်ကြည့်မယ်ဆိုရင် …

ဦးအောင်သူငြိမ်း ။ ။ “၁၉၉၀ ခုနှစ် ရွေးကောက်ပွဲကတော့ အခု ၂၀၁၀ ဖြစ်တဲ့အချိန်မှာ ဆိုလို့ရှိရင် နှစ် (၂၀) ကျော်ကြာခဲ့ပြီလို့ ပြောရင်ရ နိုင်ပါတယ်။ ဆိုတော့ အခုအချိန်မှာ စစ်အစိုးရက နောက်ထပ်ရွေးကောက်ပွဲ တကယ်လို့ ပြန်လုပ်မယ် ဆိုပါစို့။ ဆိုတော့ အခု အချိန်အထိလည်း ကျနော်တို့က တော်တော်ပြောဖို့ခက်သေးတာက ရွေးကောက်ပွဲနဲ့ ပတ်သက်တဲ့ ဥပဒေတွေလည်း မထွက်သေးဘူး။ နောက်တခုက ပါတီတွေကို ဘယ်လိုစည်းရုံးခွင့်၊ လှုပ်ရှားခွင့် လွတ်လပ်စွာ ပေးမလား စသည်ဖြင့် ဒါတွေလည်း အခြေအနေတွေ ကျနော်တို့ သေချာမသိ ရသေးပါဘူး။ ဆိုတော့ ဒီလိုအနေအထားမှာတော့ အပ်ကျမတ်ကျတော့ သေချာပြောဖို့ ခက်ပါသေးတယ်။ ဒါပေမယ့် ဘာပဲဖြစ်ဖြစ် အခု ၂၀၁၀ ရွေးကောက်ပွဲ ဖြစ်လာတဲ့အချိန်မျိုးမှာ ကျနော်တို့လို အင်အားစုတွေက ပါဝင်ပြီးတော့ လုံးဝမလှုပ်ရှား ဘဲနေမလား၊ ဒါမှမဟုတ်ရင် ပါပြီးတော့ ကျနော်တို့က နေပြီးတော့ ကိုယ့်ဘာသာကိုယ် တတ်နိုင်တဲ့ဘက်က လှုပ်ရှားကြမလားဆိုတဲ့ မေးခွန်း ဖြစ်လာပါတယ်။ ဆိုတော့ အဲလိုအနေအထားမှာတော့ ကျနော်မြင်တဲ့ အယူအဆကတော့ ခုနပြောသလိုပဲ ဒီလိုရွေးကောက်ပွဲ တခုလုံးကို လုံးဝ ပစ်ပယ်လိုက်မယ့်အစား တချို့ အင်အားစု တွေက ၀င်ပြီးလှုပ်ရှားကြမယ် ဆိုလို့ရှိရင်ကတော့ ကျနော်အနေနဲ့ကတော့ လက်ခံနိုင်တဲ့ အနေအထားလည်း ရှိပါတယ်။ ဆိုတော့ ကျနော့်အနေနဲ့က ၀ိုင်းဝန်းပံ့ပိုးနိုင်တဲ့ အနေအထားလည်း ရှိပါတယ်ခင်ဗျ။”

ဦးအောင်သူငြိမ်းရဲ့ ဆွေးနွေးချက်ကို သုံးသပ်ရရင် (၉၀) ပြည့်နှစ် ရွေးကောက်ပွဲဟာ နှစ် (၂၀) ကျော်ခဲ့ပြီမို့ လွှင့်ပစ်ရမယ့် အနေအထားလို့ သွယ်ဝိုက်ဆိုလိုရာ ရောက်နေပါတယ်။ လူထုက မဲပေး ရွေးချယ်ခဲ့တဲ့ ရလဒ်ကြီး တခုကို မစဉ်းစား မဆင်ခြင်ဘဲ အလွယ်တကူ လွှင့်ပစ်လိုက်မယ် ဆိုရင် မဲပေးခဲ့တဲ့ မြန်မာလူထုကြီးရဲ့ သဘောထား ဆန္ဒကို ပစ်ပယ်စော်ကားရာ ကျမနေဘူးလားလို့ ကျနော်တော့ တွေးမိပါတယ်။ နောက်ပြီး (၉၀) ရလဒ်ကို အကောင် အထည် မဖော်နိုင်ခဲ့ဘဲ အနှစ် (၂၀) ကျော်ကြာခဲ့ရတဲ့ အကြောင်း အရင်းဟာ အန်အယ်လ်ဒီက ဘာမှမလှုပ်ရှား မဆောင်ရွက် လို့လား၊ နအဖစစ်အုပ်စုက နည်းမျိုးစုံနဲ့ ညစ်ပတ်ခဲ့လို့လား ဆိုတာကိုတော့ ဦးအောင်သူငြိမ်းအနေနဲ့ ရှင်းရှင်းလင်းလင်း မြင်နိုင်မယ်လို့ထင်ပါတယ်။

အဲဒီတော့ နအဖ အနေနဲ့ အမှန်တကယ် ရွေးကောက်ပွဲ လုပ်ပေး ချင်တယ်ဆိုရင် နှစ် (၂၀) အတွင်း ကွယ်လွန်လစ်လပ်သွားတဲ့ လွှတ်တော်ကိုယ်စားလှယ်တွေနေရာကိုသာ ကြားဖြတ်ရွေးကောက်ပွဲ လုပ်ပေးပြီး လွှတ်တော်ခေါ်ပေးသင့်တယ်လို့ မြင်ပါတယ်။ လွှတ်တော်ထဲမှာ ကျုပ်တို့ စစ်ဗိုလ်တွေပါ ပါဝင်ဆွေးနွေးရမှ ဆိုရင်လည်း ပြည်သူက မန်းဒိတ်ပေးထားတဲ့ ပြည်သူ့လွှတ်တော် ကိုယ်စားပြု ကော်မတီဝင်တွေနဲ့ ဆွေးနွေးညှိနှိုင်းလို့ ရနိုင်မယ်ထင်ပါတယ်။ အဲဒီလိုမှမဟုတ်ဘဲ စစ်ဗိုလ်တွေက တဖက်သတ် ဗိုလ်ကျရေး ဆွဲထားတဲ့ လူထုကိုလည်း ကိုယ်စားမပြုတဲ့ ၂၀၁၀ ရွေးကောက်ပွဲကြီးကို ပါဝင်ယှဉ်ပြိုင်ဖို့ အကြံပြု နေတာကတော့ ပြည်သူ့ဆန္ဒကို ဆန့်ကျင်စော်ကားရာ ကျသလို အဆင်ခြင်မဲ့ ပြောဆိုရာ ရောက်တယ်လို့လည်း ထင်ပါတယ်။

ဘာဖြစ်လို့ အဆင်ခြင်မဲ့ ပြောဆိုရာရောက်သလဲဆိုရင် ပြီးခဲ့တဲ့ ဆန္ဒခံယူပွဲရလဒ်ကို ကြည့်ရင် ထင်ရှားပါတယ်။ ဆန္ဒခံယူပွဲတုန်းက ဒိုနာတွေကိုယ်တိုင် ဒေါ်လာတွေ အလုံးအရင်းနဲ့ ထောက်ပံ့ ကူညီခဲ့တာတောင် ဘာမှမခုခံနိုင်ဘဲ နအဖက (၉၂) ရာခိုင်နှုန်းကျော်နဲ့ မျက်နှာပြောင်တိုက် လိမ်လည် အတည်ပြုသွားတာကို ခံခဲ့ရတယ် မဟုတ်လား။ အခုလည်း ယှဉ်ပြိုင်ခွင့်ရမယ့် (၇၅) ရာခိုင်နှုန်းမှာ နအဖက သူ့လူတွေ အကုန်လုံးနီးပါးရအောင် ညစ်ဦးမယ်ဆိုတာကို မဆင်ခြင်မိလို့ လက်လွတ်စပယ် ရွေးကောက်ပွဲဝင်ဖို့ ပြောကြားလေသလား တွေးမိလို့ပါ။

ဦးအောင်သူငြိမ်း အကြံပြုပုံက ဘာနဲ့တူသလဲဆိုတော့ ရပ်ကွက်ထဲမှာ ချဲမလျော်ဘဲ ထွက်ပြေးသွား တဲ့ ချဲဒိုင်က နှစ်အတော်ကြာမှ ပြန်လာပြီး ဒီတခါတော့ ထိုးပါခင်ဗျာ တကယ်လျော်ပါမယ်၊ ဒါပေမယ့် (၁၀၀) ထိုးရင် (၇၅) ကျပ်ပဲ လျော်ပါမယ်ဆိုတာကို ယုံလွယ်ပြီး အမှတ်သည်းခြေမရှိ “သွားထိုးကြပါ” လို့ ဆော်သြပေးသူလိုဖြစ်နေပါတယ်။ ထပ်အလိမ်ခံရရင် ဦးအောင်သူငြိမ်း ဘာများ လုပ်ပေးမှာလဲလို့ပဲ မေးရတော့မယ်ထင်ပါရဲ့။

ဦးမင်းဇော်ဦးရဲ့ ဆွေးနွေးချက်ကို ကောက်နှုတ်ကြည့်မယ်ဆိုရင် …

ဦးမင်းဇော်ဦး။ ။ စစ်တပ်က အုပ်ချုပ်တဲ့ နိုင်ငံတွေကနေပြီးတော့ ဒီမိုကရေစီဘက်ကို အကူးအပြောင်း လုပ်ခဲ့တဲ့အခါမှာ ၂၀၁၀ ရွေးကောက်ပွဲနဲ့ ဆင်တူတဲ့ အဖြစ်အပျက်တခုကို ကျနော် ပြောရမယ်ဆိုလို့ရှိရင် ချီလီနိုင်ငံမှာ ၁၉၈၈ ခုနှစ်က စစ်တပ်ဆွဲထား ခဲ့တဲ့ ဖွဲ့စည်းပုံ အခြေခံ ဥပေဒ အောက်မှာ အရပ်သားတွေ ၀င်ရောက်ယှဉ်ပြိုင်ခဲ့ရတဲ့ ရွေးကောက်ပွဲနဲ့ သွားပြီး ဆင်တူပါလိမ့်မယ်။ အဲဒီ အချိန်မှာ ဒီကနေ့ ကျနော်တို့ ချီလီကို ကြည့်လိုက်မယ် ဆိုလို့ရှိရင် စစ်တပ်ကနေ ဒီမိုကရေစီကို ပြောင်းတဲ့ နိုင်ငံတွေထဲမှာ ချီလီက အတည်ငြိမ်ဆုံး အတိုးတက်ဆုံးလို့ ပြောလို့ရပါတယ်။ အဲဒီတော့ ဒီလိုနည်းလမ်းမျိုးနဲ့လည်း အပြောင်းအလဲလုပ်ရင် မရနိုင်ဘူးလား ဆိုတော့လည်း ရနိုင်တဲ့ အောင်မြင်နိုင်တဲ့ အလားအလာ တွေရှိပါတယ်။ ဒါပေမယ့် ဒီလိုလုပ်မှ အောင်မြင်မှာလား ဆိုတော့လည်း အဲလိုလုပ်မှ အောင်မြင်မှာတော့ မဟုတ်ဘူး။ တခြား အကောင်းဆုံးနည်းလမ်းတွေ ရှိလာဆိုလို့ရှိရင် ဗမာပြည်အတွက် အကောင်းဆုံး ကတော့ တွေ့ဆုံဆွေးနွေး ပြီးတော့ အပြောင်း အလဲလုပ်လိုက် ဒါကအကောင်းဆုံး ဆိုတာတော့ အားလုံးလက်ခံပြီးသား ဖြစ်တယ်။ ဒါပေမယ့် စစ်တပ်ဖက်က လက်ရှိအာဏာကို ကိုင်ထားတဲ့အချိန်မှာ အပြောင်းအလဲပေါ်မှာ အခြေခံတဲ့ အပြောင်းအလဲကို သွားမယ်ဆိုလို့ရှိရင် တွေ့ဆုံဆွေးနွေးရေး နဲ့ မသွားဘူး။ ငါတို့အတွက် အာမခံနိုင်တဲ့ ကွန်စတီကျူးရှင်းကနေ ချထားတဲ့ လမ်းကြောင်း တွေကနေ သွားမယ်ဆိုတဲ့ဟာကို ပြောထားပြီးတဲ့အတွက် ကျနော်တို့မှာက အခြားနည်းလမ်းမရှိတော့ဘဲနဲ့ ဒီနည်းလမ်းတခုပဲ ရှိတယ်ဆိုတဲ့ အမြင်မျိုးရှိတဲ့ နိုင်ငံရေးသမား တွေကတော့ ဒီအခါမှ ၀င်ပြိုင်ကြလိမ့်မယ်လို့ ကျနော် ထင်ပါတယ်။

ချီလီ ဥပမာနဲ့ နှိုင်းယှဉ်ပြောကြားပေးတဲ့ ဦးမင်းဇော်ဦးကို ကျေးဇူးတင်ပါတယ်။ ဒါပေမယ့်လည်း နိုင်ငံရေး ဆိုတာမျိုးက (၁+၂=၃) ဖြစ်တဲ့ဟာမျိုး လည်း ဟုတ်ချင်မှ ဟုတ်တာဆိုတော့ ပုံတူကူးချလို့ ဖြစ်နိုင်တဲ့အနေအထား ရှိချင်မှရှိမယ်လို့ထင်ပါတယ်။ ချီလီ စစ်ခေါင်းဆောင်တွေနဲ့ မြန်မာစစ်ခေါင်းဆောင်တွေရဲ့ စိတ်နေသဘောထား၊ ဖိနှိပ်အုပ်ချုပ်မှု အတိုင်းအတာ၊ ဆွဲထားတဲ့ အခြေခံဥပေဒရဲ့ တရားမျှတမှု အချိုးအစား၊ သက်ဆိုင်ရာ စစ်ခေါင်းဆောင်တွေနဲ့ ပြည်သူတွေ၊ အတိုက်အခံတွေရဲ့ ဆက်ဆံရေးအနေအထားတွေ ကွာခြားတာနဲ့အမျှ ရလဒ်တွေကလည်း ကပြောင်းကပြန်တွေ ဖြစ်တတ်တာကို မြင်နိုင်ရမှာပါ။ (၁+၂=၃) အလွယ်တကူ ဖြစ်ခဲ့မယ် ဆိုရင်တော့ အတိုင်းအထက်အလွန်ပေါ့။ နိုင်ငံရေး ဆိုတာက အဲသလိုမဖြစ်လို့ ခက်နေတာကိုး။

တခါတခါကျတော့လည်း ပညာရှင်တွေဆီက ကောင်းတဲ့အကြံဥာဏ်တွေ ရတတ်သလို တခါတခါကျတော့လည်း ပညာရှင်တွေဟာ ရပ်ကွက်ထဲက ချဲဆရာကြီးတွေလို များများသိလို့ တွက်လေ လွဲလေ၊ လွဲတော့ ထပ်လေ့လာ၊ ထပ်လေ့လာတော့ ပိုသိ၊ ပိုသိပြီး ထပ်တွက်တော့ ပိုလွဲ ဆိုတာမျိုးတွေလည်း ရှိတတ်တာကို ကျနော်တို့ သတိပြုရမှာပါ။

ခြုံငုံပြီး ပြောရမယ်ဆိုရင်တော့ ဗွီအိုအေ ဆွေးနွေး ၀ိုင်းမှာ မြန်မာအရေး လေ့လာသူ နှစ်ဦး ဆွေးနွေး သွားတဲ့ အသိအမြင်တွေလောက်ကိုတော့ ကျနော်တို့ရဲ့ အစစ်အမှန် တိုက်ပွဲခေါင်းဆောင် တွေဖြစ်တဲ့ ဒေါ်အောင်ဆန်းစုကြည်၊ ဦးဝင်းတင် အပါအ၀င် တိုင်းရင်းသားခေါင်းဆောင်များ၊ လက်နက်ကိုင် အဖွဲ့အစည်းခေါင်းဆောင်များ၊ ၈၈ မျိုးဆက်ကျောင်းသားခေါင်းဆောင်များ တွေးပြီးသိပြီးသားဖြစ်မယ်လို့ ထင်ပါတယ်။

အဲဒီတော့ ကျနော်တို့ပြည်သူတွေအနေနဲ့က ကိုယ့်ခေါင်းဆောင်တွေ ဘာဖြစ်လို့ နအဖ အခြေခံဥပေဒကို ဆန့်ကျင်တယ်၊ ဘာဖြစ်လို့ ၂၀၁၀ ရွေးကောက်ပွဲကို ဆန့်ကျင်တယ်၊ ဘာဖြစ်လို့ ထောင်ကျတန်းကျခံ အနာခံပြီး တိုက်ပွဲ ၀င်နေတာလဲဆိုတာကို ရှင်းလင်းမြင်သာစေဖို့ ၈၈ မျိုးဆက်ကျောင်းသားခေါင်းဆောင် ကိုကိုကြီးရဲ့ ပြောစကားလေးနဲ့ပဲ နိဂုံးချုပ်လိုက်ပါရစေ။

“နိုင်ငံရေးဖြေရှင်းမှုဆိုတဲ့အခါမှာ ဖွဲ့စည်းပုံ အခြေခံဥပဒေ အယူအဆဟာ Social Contract Theory ပါ။ တယောက်နဲ့ တယောက် ပဋိညာဉ်ပြုတဲ့ လွတ်လပ်တဲ့ သဘောဆန္ဒနဲ့ချုပ်ဆိုကြတဲ့ Contract ပါ။ အဲဒါကို ဘာမှမှ မလုပ်နိုင်ဘဲကွာ အရှုံးသာပေးလိုက်ပါတော့ ဆိုတာက အဲတော့ ကျနော်တို့က အရှုံးပေးလိုက်လို့ ကျနော်တို့ ပြည်သူတွေဟာ အခုရေတွင်းတူး အခုရေကြည်မသောက်ပါဘူး။ ကျနော်တို့ကလည်း ဒီလောက် အလောမကြီးဘူး။ တဖြည်းဖြည်း ပြုပြင်နိုင်တဲ့ အခွင့်အလမ်းမျိုး တွေ ရမလားဆိုတာကိုလည်း ကျနော်တို့က တလျှောက်လုံး မျှော်လင့်နေတယ်။ ကျနော်တို့ ကြိုးစားနေတယ်။ အခုဟာက လူထုကနေ ရွေးချယ်သမျှ ကိုယ်စားလှယ်အားလုံး တနည်းအားဖြင့် တိုင်းရင်းသားတွေ လူထုတွေ သန်း (၅၀) စလုံးက ပြင်ချင်ပါတယ် ဆိုရင်တောင်မှ စစ်ခေါင်းဆောင်က သဘောတူမှ ပြင်လို့ရမယ်ဆိုတဲ့ အခြေအနေကို ကျနော်တို့က ဒါကိုမှ သတိမပြုဘူး ဂရုမစိုက်ဘူးဆိုရင် နောင်အခါလာ နောင်အခါဈေးဆိုရင် တဘက်က တပ်မတော်ရဲ့ အခြေခံမူတွေထဲမှာ ဖွဲ့စည်းပုံအခြေခံဥပဒေကို အသက်နဲ့လဲပြီး ကာကွယ်စောင့်ရှောက်မယ်လို့ သူကပြောထားတယ်။ အဲဒီတော့ နောင်တချိန်ပြင်ချင်ရင် ကျနော်တို့ နောင်လာ နောက်သားတွေ ကလည်း အသက်နဲ့လဲပြီးတော့ ပြင်ကြဆိုပြီးတော့ ကျနော်တို့ ကလေးတွေကို ဒီလိုမျိုး သေကြေ ဒဏ်ရာရမယ့် လမ်းပေါ်မှာ သေကြေရမယ့် အခြေအနေမျိုးကို ကျနော်တို့ ခွင့်မပြုနိုင်ပါဘူး။ နောင်အခါလာ နောင်အခါဈေး လုပ်လို့မရတဲ့ အချိန်ဆိုတာကို ကျနော်သတိပေးချင်တာပါ။”

(ဘီဘီစီ၏ ‘မြန်မာ့အရေး ကမ္ဘာ့အရေး’ အစီအစဉ်တွင် ဖြေကြားချက်)