တစ်ဘဝ တွင် ထောင်ဒဏ် တစ်သက် တစ်ကျွန်း နှစ်ခါ စီရင် ခံရပြီး ပြန်လည် လွတ် မြောက် လာသော ကရင် အမျိုးသား အစည်း အရုံး KNU ခေါင်းဆောင် တစ်ဦး ဖြစ်သူ ပဒို မန်းငြိမ်း မောင် သည် မြန်မာ အစိုးရ အစီ အစဉ်ဖြင့် နေပြည်တော်မှ တဆင့် ထိုင်း မြန်မာ နယ်စပ်- မဲဆောက်မြို့သို့ ယနေ့ နေ့လည် ပိုင်းတွင် ရောက်ရှိ လာသည်။“မီးရထား ဝန်ကြီး ဦးအောင်မင်းနဲ့ အဖွဲ့ လိုက်ပို့ တယ်၊ ကေအဲန်ယူ အရာရှိ အချို့ နဲ့လည်း တွေ့ဆုံခဲ့ ကြတယ်” ဟု မြဝတီ အခြေစိုက် အမည် မဖေါ် လိုသော မြန်မာ အရာရှိ တစ်ဦးက ပြောသည်။
ပဒိုမန်း ငြိမ်းမောင် သည် နိုင်ငံ တော်ကို စစ်မက်ပြိုင် ဆိုင် တိုက်ခိုက်မှု ပုဒ်မ ၁၂၂/၁ အရ ထောင်ဒဏ် တစ်သက် တစ်ကျွန်း၊ မတရား အ သင်း ဆက်သွယ်မှု ပုဒ်မ ၁၇/၁ အရ ထောင် ဒဏ် ၃ နှစ် တို့ဖြင့် အင်းစိန် အထူး တရား ရုံးက လွန်ခဲ့သည့် မတ်လ ၁၃ ရက် နေ့တွင် စီရင် ချက်ချ ထားခံ ခဲ့ခြင်း ဖြစ်သည်။
ထို့နောက် နိုင်ငံတော်သမ္မတ၏ လွပ်ငြိမ်းချမ်းသာခွင့်အရ မတ်လ ၁၈ ရက်နေ့တွင် အင်း စိန်အကျဉ်းထောင်မှ လွတ်မြောက်ခွင့်ရရှိခဲ့ပြီး ပဒို မန်းငြိမ်းမောင်သည် ရထားပို့ဆောင် ရေးဝန်ကြီးဌာန ပြည်ထောင်စုဝန်ကြီး ဦးအောင်မင်း၏ အထူး ဧည့်သည်တော် အဖြစ် နေပြည်တော် သို့ သွားရောက် ခဲ့သည်။
ပဒို မန်းငြိမ်းမောင်သည် ပြီးခဲ့သည့်နှစ် ဇူလိုင်လအတွင်းက တရုတ်ပြည်ကူမင်းလေဆိပ်မှတဆင့် မြန်မာနိုင်ငံ ရန်ကုန်လေဆိပ်သို့ ပို့ဆောင်ခံရပြီး လူဝင်မှုကြီးကြပ်ရေးဥပဒေ၊ တရားမဝင် စာရွက်စာတမ်း ကိုင်ဆောင်မှု၊ မတရားအသင်း ဆက်သွယ်မှုများဖြင့် ဖမ်းဆီး အ ရေးယူ ခံခဲ့ ရသည်။
“သူအသက် ရ၀ ရှိပြီ၊ နည်းနည်းတော့ပိန်သွားသလိုလိုပဲ၊ ဒါပေမယ့် စိတ်ဓါတ်ကြံ့ခိုင်နေပုံပေါ်တယ်” ဟု ဗဒိုမန်းငြိမ်းမောင်နှင့် မြဝတီမြို့၌ ယနေ့နှုတ်ဆက်ခဲ့သူ၏မိတ်ဆွေတစ်ဦးက ပြောသည်။
ပဒိုမန်းငြိမ်းမောင်သည် KNU ဗဟိုကော်မတီဝင်တစ်ဦးဖြစ်သည့်အပြင် ညီညွတ်သောတိုင်းရင်းသားလူမျိုးများ ဖယ်ဒရယ်ကောင်စီ UNFC ကော်မတီဝင်တဦးလည်းဖြစ်သည်။
၁၉၆၇ တွင် ကရင်လူငယ်ခေါင်းဆောင်တဦးဖြစ်သော ပဒိုမန်းငြိမ်းမောင်ဖမ်းဆီးခြင်းခံရပြီး ထောင်ဒဏ်တစ်သက်တစ်ကျွန်းကျခံရကာ ကို ကိုးကျွန်းအကျဉ်းစခန်းသို့ ပို့ဆောင်ခြင်းခံရသည်။
ထို့နောက် ပဒိုမန်းငြိမ်းမောင်သည် အတူအကျဉ်းကျခံနေရသူ ကရင်လူငယ်အဖွဲ့မှမန်းအောင်ကြည်၊ အထက်တန်းပြဆရာကိုအောင်ငွေ တို့နှင့်အတူ ပင်လယ်ပြင် မိုင်ပေါင်း ၂၀၀ ကျော်ခရီးကိုဖြတ်ပြီး မွန်ပြည်နယ်၊ ရေးမြို့နယ်တောင်ပိုင်းသို့ ရောက်ရှိလွတ်မြောက်လာခဲ့သည်။
ယခုအကြိမ်ဗဒိုမန်းငြိမ်းမောင်လွတ်မြောက်ရေးကိစ္စမှာ ကေအဲန်ယူနှင့်မြန်မာအစိုးရတို့ ငြိမ်းချမ်းရေးဆွေးနွေးပွဲလက်ဆောင်ဟု နိုင်ငံရေး သမားက ရှုမြင်နေကြသည်။
No comments:
Post a Comment