ကန္တာရ၀တီတိုင်း(မ်)/ဧပြီ ၈၊ ၂၀၀၉
ကြံ့ဖွံ့ခေါင်းဆောင်တစ်ဦး၏ခြိမ်းခြောက်မှုကြောင့် ဆယ်ကျော်သက်အရွယ် ရှမ်းပြည်နယ်ဖယ်ခုံမြို့နယ် ညောင်ကုန်းရပ်ကွက် သားတစ်ဦး အကြောက်လွန်၍ သူ့ ကိုယ်သူ အဆုံးစီရင်ခဲ့ရသည်ဟု မျက်မြင်သက်သေတို့ကပြောသည်။
အသက်(၁၈)နှစ်အရွယ် ညောင်ကုန်း(၅)ရပ်ကွက်နေ အဲဒွက်သည် တောင်ယာလုပ်ကိုင်ရာမှအပြန် ရပ်ကွက်တွင်းရှိ ကြံ့ဖွံ့ခေါင်းဆောင်နန်းအေးထူး၏ကွမ်းယာဆိုင်တွင် ကွမ်းယာမှာယူနေရာ အချိန်အတန်ကြာစောင့်ဆိုင်းနေရသောကြောင့် တောင်ယာမှအနည်းငယ်သောက်ထားသော အရက်ရှိန်ကြောင့်စိတ်မထိန်းချုပ်နိုင်ဘဲ ကွမ်းယာ ဆိုင်ရှေ့မှထိုင်ခုံအား ခြေဖြင့် ကန်သည်ဟု အဖြစ်အပျက်အားမြင်တွေ့ခဲ့သူတဦးကပြောသည်။
ကြံ့ဖွံ့ခေါင်းဆောင်နန်းအေးထူး၏ကွမ်းယာဆိုင်စောင့်က အဲဒွက်အား ပက်ပက်စက်စက်ဆဲဆိုသောကြောင့် မကျေမနပ်ဖြစ်ကာ ဆိုင်၏ဆိုင်းဘုဒ်အားထပ်မံဆွဲဖြဲခဲ့သည် ဟုဆိုသည်။
ထိုကိစ္စအား ရပ်ကွက်ဥက္ကဌမှ မိဘများနှင့်ပြေလည်အောင်ဖြေရှင်းပေးမည်ဟုဆိုသော်လည်း ကြံ့ဖွံ့ခေါင်းဆောင်နန်းအေးထူးမှာ လက်မခံဘဲ ထိုသူငယ်အား ဖမ်းဆီးချုပ် နှောင်ရန် ရဲများအားသုံးကြိမ်တိုင်တိုင်ဖုန်းဆက်ခေါ်သည်ဟုဆိုသည်။
ပြီးခဲ့သည့်မတ်လ (၃)ရက် စနေနေ့ ညတွင် ကြံ့ဖွံ့များနှင့်ရဲများက ကြိုး၊သေနတ်၊လက်ထိပ်စသည်တို့ဖြင့် အဲဒွက်အားဖမ်းဆီးရန် သူ့မိဘနေအိမ်အထိရောက်လာချိန် အဲဒွက်မှာ အကြောက်လွန်၍ အိမ်ခန်းထဲသို့ပြေးတက်ပြီးလုံချည်ဖြင့် မိမိကိုယ်မိမိဆွဲကျိုးချအဆုံးစီရင်ခဲ့ပါသည်။
ချက်ချင်းအသက်မထွက်သေးသောသူငယ်အား မိဘများက မျက်ရည်မျက်ခွက်ဖြင့် ဖယ်ခုံမြို့ပြည်သူ့ဆေးရုံသို့တင်ပို့ခဲ့သည်။ သို့သော်သူငယ်မှာ ဆေးရုံရောက်သည်နှင့် အသက်ထွက်သွားရရှာသည်။
မိဘများ၏ပြောပြချက်အရ အဲဒွက်သည် အရက်ကိုစွဲစွဲမြဲမြဲသောက်တတ်သူမဟုတ်ကြောင်း ယခုလို ကြံ့ဖွံ့ခေါင်းဆောင်၏ ကွမ်းယာဆိုင်တွင်ပြဿနာများပြုလုပ်ခဲ့သည်မှာ ပထမဦးဆုံးအကြိမ်သာဖြစ်သည်။
No comments:
Post a Comment