“မြောက်ဦးကို ကမ္ဘာ့ယဉ်ကျေးမှုအမွေအနှစ်စာရင်းဝင်ဖို့ ဘယ်ခေါင်းစဉ်နဲ့တင်ရင်ကောင်းမလဲဆိုတာ ပဏာမအနေနဲ့လာကြည့်ကြတာ။ မနေ့ကမြောက်ဦးမြို့ကိုသွားကြည့်ကြတော့ UNESCO အဖွဲ့ကပါလာတဲ့ ရှေးဟောင်းသုတေသနပညာရှင် ဒေါက်တာရစ်ချတ်ဆိုရင် မြောက်ဦးတစ်လျှောက်လုံးကို သူ တော်တော်သဘောကျတာ။ ထုက္ကန်သိမ်ကိုလည်း သဘောကျတယ်လို့ြေ ပာသွားတယ်”ဟု မြောက်ဦးမြို့ရှိ ရှေးဟောင်းယဉ်ကျေးမှုအမွေအနှစ်များထိန်းသိမ်းစောင့်ရှောက်ရေးအဖွဲ့ဥက္ကဋ္ဌ ဒေါ်ခင်သန်းက နိရဉ္စရာသို့ပြောသည်။
ယင်းနေ့ကလာရောက်လေ့လာခဲ့ရာတွင် ယဉ်ကျေးမှုဝန်ကြီးဌာနမှ ပြည်ထောင်စုဝန်ကြီး ဒေါ်စန္ဒာခင်၊ အဆိုပါဌာန၏ညွှန်ကြားရေးမှူးချုပ် ဦးကျော်ဦးလွင်နှင့် ဌာနမှ ဝန်ထမ်းအချို့အပါအဝင် ကမ္ဘာ့အမွေအနှစ်တင်သွင်းရေးဆိုင်ရာ ကျွမ်းကျင်ပညာရှင် တစ်ဦးနှင့် ပြည်နယ်အစိုးရအဖွဲ့မှ ပြည်နယ်ဝန်ကြီးအချို့လည်း လိုက်ပါလာခဲ့ကြောင်း ဒေသခံများက ဆိုသည်။
ယင်းသို့လေ့လာအပြီး ယင်းနေ့မွန်းလွဲပိုင်းတွင် မြောက်ဦးမြို့ရှိ မြို့နယ်အုပ်ချုပ်ရေးမှူးရုံးတွင် ယဉ်ကျေးမှုဝန်ကြီးနှင့်အဖွဲ့သည် ဒေသခံများနှင့်တွေ့ဆုံမှုတစ်ခုပြုလုပ်ခဲ့ကြောင်းလည်း သိရသည်။
“ကမ္ဘာ့ရှေးဟောင်းအမွေအနှစ်စာရင်းဝင်ဖို့ ကမ္ဘာ့စံသတ်မှတ်ချက် ၆ ချက်ရှိတယ်လို့ ဝန်ကြီးက ပြောတယ်။ အဲဒီ ၆ ချက်ထဲက တစ်ချက်နဲ့ကိုက်ညီရင် စာရင်းဝင်နိုင်တယ်လို့လည်း ဆိုတယ်။ အဲလိုဝင်နိုင်ဖို့ ဘယ်လိုပြင်ဆင်သင့်သလဲဆိုတာ ဒေသခံတွေနဲ့ ဆွေးနွေးတိုင်ပင်ခဲ့ပါတယ်”ဟု အဆိုပါတွေ့ဆုံပွဲသို့တက်ရောက်ခဲ့သည့် မြောက်ဦးမြို့မိမြို့ဖတစ်ဦးဖြစ်သူ ဦးမောင်ကျော်ဇောက ပြောသည်။
မြောက်ဦးကို ကမ္ဘာ့ရှေးဟောင်းအမွေအနှစ်စာရင်းဝင်နိုင်ရန် အချိန်အားဖြင့် လေးနှစ်ခန့်ကြာမြင့်ဦးမည်ဖြစ်သည်ဟုလည်း ဝန်ကြီးတို့က ပြောကြားခဲ့သည်ဟု ဆိုသည်။
“အဲဒီကာလအတွင်း လက်ရှိ မြောက်ဦးမှာရှိနေတဲ့ ရှေးဟောင်းအမွေအနှစ်တွေကို မပျောက်ပျက်အောင်ထိန်းသိမ်းစောင့်ရှောက်ဖို့လိုတယ်”ဟု ဦးမောင်ကျော်ဇောက ဆိုသည်။
ကမ္ဘာ့အမွေအနှစ်စာရင်းတွင် မြောက်ဦးကိုထည့်သွင်းလိုက်နိုင်ပါက မြောက်ဦးရှိ ရှေးဟောင်း အမွေအနှစ်များကို စနစ်တကျထိန်းသိမ်းသွားနိုင်မည်ဖြစ်ပြီး ကမ္ဘာကလည်း စိတ်ဝင်စားမှုများပြားလာမည်ဖြစ်သည်ဟု မြို့ခံများက သုံးသပ်ပြောဆိုနေကြသည်။
ယင်းအပြင် မြောက်ဦးသို့ ကမ္ဘာလှည့်ခရီးသွားများလည်း လာရောက်လည်ပတ်မှုမြင့်တက် ဒေသခံများ၏ လူနေမှုဘဝနှင့် အလုပ်အကိုင်များသည်လည်း တိုးတက်ဖွံ့ဖြိုးလာနိုင်သည်ဟု မှတ်ချက်ပြုနေကြသည်။
No comments:
Post a Comment