Miss Golden Land Myanmar 2015 ပြိုင်ပွဲ အတွက် ဆန်ခါတင် အလှမယ် ရွေးချယ်ပွဲ ဧပြီလတွင် ကျင်းပမည်

ပန်းမြတ်ဇော်

Miss Golden Land Myanmar 2015 ပြိုင်ပွဲ အတွက် နောက်ဆုံးအဆင့် ဆန်ခါတင်အလှမယ် အယောက် ၃၀ ရွေးချယ်ပွဲကို လာမည့် ဧပြီလတွင် တော်ဝင်ဂါးဒင်း ဟိုတယ်၌ ကျင်းပပြုလုပ်သွားမည် ဖြစ်သည်။

Miss Golden Land Myanmar 2015 ပြိုင်ပွဲ အတွက် လာရောက် လျှောက်ထားသူ လျှောက်လွှာရှင် ၆၀၀ ကျော် အနက်မှ ပဏာမအဆင့် လူတွေ့ ဖြေဆိုရန် အတွက် ရွေးချယ်ခြင်း ခံရသူများကို မတ်လ ၂၇ ရက်တွင် Miss Golden Land Myanmar Organization မှ အကြောင်းကြားပေးမည် ဖြစ်သည်။

"လျှောက်လွှာရှင်များအနက် တက္ကသိုလ်ကျောင်းသူအများစု ပါဝင်ကြတာကြောင့် လူတွေ့ဖြေဆိုရမည့် နေ့ရက်ကိုတော့ တက္ကသိုလ် စာမေးပွဲများ အားလုံး ပြီးစီးသည့် အချိန်ကိုသာ စီစဉ်ပေးထားသည့် အတွက် မစိုးရိမ်ကြရန်" Miss Golden Land Myanmar Organization မှ National Director တစ်ဦး ဖြစ်သည့် ကိုဝေယံအောင်မှ ၎င်း၏ ဖေ့ဘုတ် စာမျက်နှာတွင် ရေးသားဖော်ပြထားသည်။

Miss Golden Land Myanmar 2015 ပြိုင်ပွဲ အတွက် ၀င်ခွင့် ဖောင် များကို ယခင်က ဇန်န၀ါရီ ၁၅ရက် နောက်ဆုံးထား လျှောက်ထားရန် ကြေညာ ထားသော်လည်း ယခု အခါတွင် ၀င်ခွင့် ဖောင်များကို မတ်လ ၂၅ရက် အထိ ထပ်မံ တိုးမြှင့်ပြီး လက်ခံခဲ့သည်။

တစ်လခွဲကြာကျင်းပမည့် Miss Golden Land Myanmar 2015 ပြိုင်ပွဲကြီးအတွက် နောက်ဆုံးအဆင့် ဆန်ကာတင် အလှမယ် ၃၀ ဦး ရွေးချယ်ပွဲကို Taw Win Garden Hotel တွင် သင်္ကြန်မတိုင်မီ ကျင်းပပြုလုပ်မည် ဖြစ်သည်။

Miss Golden Land Myanmar 2015 ပြိုင်ပွဲကို ဧပြီ လဆန်းမှ မေလ ထိ Camp ၀င် လေ့ကျင့်ခြင်း များ ၊ ခရီးသွားပရိုမိုးရှင်းနှင့် လှုဒါန်းသည့် အစီအစဉ်များ ၊ အကြိုပဏာမ Challenge ပြိုင်ပွဲများ ဖြင့် ကျင်းပသွားမည် ဖြစ်ပြီး နောက်ဆုံးအဆင့် Final ပြိုင်ပွဲကို ၂၀၁၅ မေလ စတုတ္ထပတ်တွင် ကျင်းပ သွားမည်ဖြစ်သည်။

Miss Golden Land Myanmar 2015 ပြိုင်ပွဲတွင် Miss Earth Myanmar 2015 ၊ Miss Supranational Myanmar 2015 ၊ Miss Intercontinental Myanmar 2015 ၊ Miss Tourism Myanmar 2015 ၊ Face of Beauty Myanmar 2015 စသည့် ခေါင်းစဉ်များဖြင့် ရွေးချယ်သွားမည့်အပြင် Miss Grand International Myanmar အစား Miss Tourism Myanmar 2015 ကို ရွေးချယ်မည် ဖြစ်သည်။