သျှမ်းပြည် (မြောက်ပိုင်း) မူစယ်ခရိုင် မန့်ဟျိုးမြို့နယ်ခွဲ နောင်မကျေးရွာ အခြေစိုက် RCSS/SSA ရင်း ၇၀၁ အဖွဲ့မှ တပ်ဖွဲ့ဝင် ဟု ယူဆ ရသူတစ်ဦး ယမန်နေ့ညပိုင်းက တရုတ် - မြန်မာ နယ်စပ် တရုတ်ပိုင် မန်အိုင်ရွာ အနီးတွင် သေနတ် ထိမှန် ဒဏ်ရာ ဖြင့် သေဆုံး နေ ကြောင်း သိရသည်။
အဆိုပါ သေဆုံးသူမှာ ၇၀၁ တပ်ရင်းမှ တပ်သားအဆင့်ရှိ စိုင်းငွေ ဆိုသူဖြစ်ပြီး နမ့်ခမ်းမြို့နယ် မုံးဝီးရွာဒေသခံ တစ်ဦးဖြစ်ကြောင်း၊ တ ရုတ် နယ်စပ်ဒေသခံများ အပြောကို ကိုးကား၍ ဒေသခံတစ်ဦးက သျှမ်းသံတော်ဆင့်သို့ ပြောသည်။
“ဖြစ်တာက တရုတ်ဘက်ခြမ်းမှာ၊ သေနတ်မှန်ပြီးလမ်းပေါ်မှာသေနေတာ၊ တရုတ်ရဲတွေက အကပ်မခံဘူး၊ သူတို့က သစ်ကားတွေ အခွန် ကောက်တဲ့အဖွဲ့လို့ သိရတယ်၊ ဟိုတစ်လောက သစ်ကားတွေမှာ အခွန်ကောက် ပြီး အဝေမတည့်လို့ သူတို့အချင်းချင်း လုပ်ကြံ လိုက် တာလို့လည်းပြောနေကြတယ် ” ဟု ဆိုသည်။
အဆိုပါကိစ္စနှင့်ပတ်သက်ပြီး သျှမ်းပြည်တပ်မတော် တောင်ပိုင်းတပ်ဖွဲ့ခေါ် RCSS/SSA ပြောခွင့်ရ ပုဂ္ဂိုလ် ဗိုလ်မှူး လောဝ်ဆိုင် က တော့ ‘ဒေ သအတွင်းလှုပ်ရှားတဲ့ တာဝန်ရှိသူတွေက ဌာနချုပ်ကို တင်ပြလာတာဘာမှ မရှိသေးဘူး၊ အဲ့ဒီကိစ္စနဲ့ပတ်သက်ပြီး အတည်ပြုလို့မရသေးဘူး၊ ကျနော်တို့ဘက်ကလဲ စုံစမ်းနေဆဲပါ’ - ဟု ပြောပါသည်။
ယခုလ ၂၄ ရက်နေ့ ည ၆ : ၃၀ နာရီခန့်ကလည်း နမ့်ခမ်းမြို့နယ် မိုခမ်းရပ်ကွက်၌ နေထိုင်သူ အသက် ၃၅ နှစ် အရွယ် အမျိုးသား တစ်ဦး အား အမည်မသိသေနတ်သမားများက လုပ်ကြံပစ်ခတ်ခဲ့ရာ သေဆုံးသွားကြောင်း သိရသည်။
No comments:
Post a Comment