စိစစ်ရေးက ပြည်တွင်းဂျာနယ်များအား သတင်းပိတ်ပင် ဆိုးဆေးသုံး ငါးပိသတင်း ကြိုတင်ဖော်ပြခွင့်မပြု

မင်းနိုင်သူ / ၄ မေ ၂၀၀၉

ပြည်တွင်း ဂျာနယ်များ က သတင်း များကြိုတင်ရ ရှိ၍ သတင်း ဖော်ပြ ရေးသား လိုသော်လည်း စာပေ စိစစ်ရေးက သတင်း ထုတ်ပြန်ခွင့် မပြုခဲ့ကြောင်း ပြည်တွင်းမှ ဂျာနယ် အယ်ဒီတာ တဦးက ပြောသည်။

ငါးပိများတွင် စားသုံးသူများ၏ ကျန်းမာရေးကို ထိခိုက်စေနိုင်သော Rhodamine-B ပါရှိကြောင်း သတင်းရေးသားမှု ကို စာပေစိစစ်ရေးက ပိတ်ပင်ခဲ့ကြောင်း အဆိုပါ ဂျာနယ်အယ်ဒီတာတဦးက ပြောသည်။

၎င်းက “ကျနော်တို့တိုက်က သတင်းထောက်တယောက်က ဗဟိုအစားအသောက်နှင့် ဆေးဝါးကွပ်ကဲရေး ဌာန(FDA) ရဲ့ ညွှန်ကြားရေးမှူး ဒေါက်တာကျော်လင်းရဲ့ပြောစကားကို ကိုးကားပြီးတော့ ငါးပိတွေမှာ ဆိုးဆေး ပါမပါစစ်ဆေးနေပြီဆိုတဲ့ သတင်းရေးတင်ပါတယ်။ သတင်းစာမှာမပါခင် တပတ်လောက်ကတည်းကပေါ့လေ။ အဲဒီသတင်းကို စာပေစိစစ်ရေးက ဖော်ပြခွင့်မပေးဘူး။ အခုဟာက သတင်းစာမှာပါပြီးမှပဲ သတင်းရေးနေရတာ။ ကြိုသိထားလည်း စာဖတ်ပရိသတ်ကို ချပြလို့မရဘူး။ စာဖတ်ပရိသတ်အတွက် အရမ်းနစ်နာတာပေါ့။ ဒါက ကျန်းမာရေးကိစ္စကြီးလေ”ဟု ပြောသည်။

FDA က ငါးပိအမျိုးအစားပေါင်း (၁၀၀) ကျော်ကို စမ်းသပ်စစ်ဆေးခဲ့ကြောင်းနှင့် ထိုအထဲမှ အမျိုးအစား (၈၀) ခန့်တွင် ကျန်းမာရေးကို ထိခိုက်စေနိုင်သော Rhodamine-B ပါရှိကြောင်း ကြေညာချက် သတင်းစာတွင် ပါပြီးမှသာ စာပေစိစစ်ရေးက ဂျာနယ်များအား သတင်းဖော်ပြခွင့်ပြုခဲ့ကြောင်း သိရသည်။

“သတင်းသမားဆိုတော့ သတင်းဦးချင်တာပေါ့ဗျာ။ ကြိုသိထားရလို့ ရေးပါတယ်။ စိစစ်ရေးကမပေးဘူးဗျ။ အခုဟာ ကျနော်တို့ဆီမှာ ဘယ်လိုဖြစ်နေလဲဆိုတော့ ဌာနဆိုင်ရာသတင်းတွေဆို သတင်းပြောတဲ့ ဌာနဆိုင်ရာအမည်၊ လူကြီးအမည်၊ ရာထူး အဲဒါတွေကိုပါ စာပေစိစစ်ရေးက တောင်းတယ်။ တချို့သတင်းတွေဆိုတာ ပေးတဲ့လူကြီးကို ဖော်ပြလိုက်ရင် သူ့အတွက် အန္တရာယ်ရှိနိုင်တယ်ဆို ကျနော်တို့က အမည်ရာထူးချန်ရင် ချန်ကြရတာဗျ။ ခုဟာ သတင်းစာကျင့်ဝတ်ဆိုတာလည်း မရှိတော့ဘူး။ သတင်းပါချင်တယ်ဆိုရင်တော့ အမည်၊ ရာထူးကို စိစစ်ရေးကိုပေး။ အဲလိုဖြစ်နေတာ။ အဲဒီလို သတင်းပြောသူရဲ့ အမည်၊ ရာထူးပေးတာတောင် တချို့သတင်းတွေဆို ပိတ်တာပဲ” ဟု ပြည်တွင်းသတင်းထောက်တဦးက ပြောသည်။

လက်ဖက်အမျိုးအစား (၁၀၀) ကို Auramine O ပါဝင်သည်ဟု ဆိုကာ ဖေဖော်ဝါရီနှင့် မတ်လတို့အတွင်း FDA က တားမြစ်ခဲ့ပြီးနောက် ရိုးရာအစားအသောက်တခုဖြစ်သော ငါးပိကို ထပ်မံပိတ်ပင်တားမြစ်လိုက်ခြင်းဖြစ်သည်။

ယခုတားမြစ်လိုက်သော စာရင်းတွင် စိမ်းစားငါးပိနှင့် အသင့်စားငါးပိတို့ပါဝင်ပြီး နာမည်ရှိတံဆိပ်အများအပြား ပါဝင်နေကြောင်း၊ ဈေးကွက်အတွင်း စစ်ဆေးစာရင်းတွင် မပါဝင်သည့် တံဆိပ်အများအပြား ကျန်ရှိနေသေးကြောင်း ပြည်တွင်းသတင်းထောက်တဦးက ပြောသည်။

“ရွှေပုစွန်၊ ကင်းမွန်၊ ပွင့်ဦးတို့ဆို လူသုံးများတဲ့ တံဆိပ်တွေလေ။ အဲဒါတွေလည်း ပါနေတယ်။ ဒါပေမယ့် ငါးပိက တံဆိပ်စုံတယ်။ တကယ်တမ်းဈေးကွက်ထဲမှာက အများကြီးရယ်။ တချို့က ပွဲရုံကြီးတွေက၀ယ်ပြီး ကိုယ့်ဆိုင် တံဆိပ်နဲ့ကိုယ် ကပ်ရောင်းနေကြတာကိုက အများကြီး။ ခုဟာက လက်ဖက်တုန်းကလိုပဲ ဘယ်နေရာကနေ ဆိုးဆေးထည့်သုံးတယ်ဆိုတာကို မသိရသေးဘူးရယ်” ဟု သတင်းထောက်က ပြောသည်။

ထုတ်လုပ်၊ ဖြန့်ဖြူး၊ ရောင်းချဆိုသော အပိုင်းသုံးခုအနက် မည်သည့်နေရာမှ ဆိုးဆေးအသုံးပြုကြောင်း မိမိတို့မသိပါကြောင်း တားမြစ်စာရင်းဝင် ငါးပိထုတ်လုပ်သူတဦးက ပြောသည်။

“ကျနော်တို့ကတော့ ကုန်ကြမ်းကို ပင်လယ်ဘက်ကလည်း ယူတယ်။ တခါတလေ ဒီကပွဲရုံတွေဆီကပဲ ပြန်ယူတာ လည်းရှိတယ်။ ကျနော်တို့ကတော့ ဆိုးဆေးထည့်မသုံးပါဘူး။ ဘယ်ကပိုင်းက ထည့်တယ်ဆိုတာလည်း မပြောတတ် ဘူး။ ဘာဖြစ်လို့လဲဆိုတော့ အဲလိုမျိုးစစ်ဆေးတာတွေလည်း မရှိခဲ့ဖူးဘူး။ အခုမှကောက်စစ်ပြီး တွေ့တယ်လို့ ကြေညာသွားတာပဲ။ ကြိုတင်အသိပေးတာမျိုးလည်း မရှိဘူး” ဟု ၎င်းက ပြောသည်။

မည်သည့်အချိန်တွင် FDA သို့ လာရောက်စစ်ဆေးရမည်၊ မည်သည့်အချိန်တွင် ပြန်လည်ထုတ်လုပ် ခွင့်ပြုမည် ဆိုသော အကြောင်းကြားချက်တစုံတရာလည်း မရရှိသေးကြောင်း ၎င်းက ဆက်လက်ပြောဆိုသည်။

FDA ၏ ထုတ်ပြန်ချက်တွင် Rhodamine B စားသုံးမိပါက လတ်တလောအားဖြင့် အစာအိမ်အူလမ်းကြောင်း ရောင်ရမ်းခြင်း၊ ပျို့ခြင်း၊ အန်ခြင်း နှင့် ဦးနှောက်အာရုံကြော ထိုင်းမိုင်းခြင်းတို့ဖြစ်စေကာ ရေရှည်တွင် ကင်ဆာရောဂါဖြစ်နိုင်ကြောင်း ဖော်ပြထားသည်။