မင်းနိုင်သူ
အန်အယ်လ်ဒီ ပါတီက (၂) ရက်ကြာ ကျင်းပ ခဲ့သော တိုင်းနှင့်ပြည်နယ် စုံညီ အစည်း အဝေး အပြီးတွင် အချက် (၅) ချက်ပါ ရွှေဂုံတိုင် ကြေညာ စာတမ်းကို ယမန် နေ့က ထုတ်ပြန်လိုက်သည်။
အဆိုပါအချက်ငါးချက်မှာ (၁) ဦးတင်ဦး၊ ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံး ခြွင်းချက်မရှိ လွှတ်ပေးရေး၊ (၂) ဖွဲ့စည်းပုံအခြေခံဥပဒေ (၂ဝဝ၈) ပြန်လည်ပြင်ဆင်ရေး၊ (၃) ပါတီစည်းရုံးရေး မြှင့်တင်နိုင်ရေး၊ (၄) ၁၉၉ဝ ပြည့်နှစ် ပါတီစုံဒီမိုကရေစီ အထွေထွေရွေးကောက်ပွဲရလဒ်ကို အသိအမှတ်ပြုရေးနှင့် (၅) တွေ့ဆုံဆွေးနွေးရေးတို့ဖြစ်ကြောင်း ပါတီပြောခွင့်ရသူ ဦးအုံးကြိုင်က ပြောသည်။
ယင်းအချက်များမှာ အန်အယ်လ်ဒီပါတီက အခါအားလျော်စွာထုတ်ပြန်ခဲ့သော သဘောထားထုတ်ပြန်ချက်များ အတိုင်းသာ ဖြစ်သည်။ မူဝါဒအသစ်တရပ် ပေါ်ထွက်လာခြင်းမဟုတ်။
ထိုကိစ္စမှာ ဖြစ်သင့်ဖြစ်ထိုက်သော ကိစ္စတရပ်သာဖြစ်သည်ဟု ပြည်သူ့လွှတ်တော်ကိုယ်စားပြုပါတီ (စီအာပီပီ) အထွေထွေအတွင်းရေးမှူး ဦးအေးသာအောင်က မြင်သည်။
“အရင်မူတွေအတိုင်း ဆက်လက်ကိုင်စွဲသွားမယ်ဆိုတဲ့ သဘောပါပဲ။ ၀ိဝါဒနည်းနည်း ကွဲနိုင်တာလေးတွေတော့ ရှိနိုင်တာပေါ့။ ဒါပေမယ့် နိုင်ငံရေးပါတီတရပ်ဆိုတာ မိမိချမှတ်ထားတဲ့ အခြေခံမူတွေကနေ သွေဖယ်တာမျိုး၊ လမ်းကြောင်းပြောင်းတာမျိုးတွေ မဖြစ်သင့်ဘူး။ ကိုယ့်ရဲ့အခြေခံမူတွေကို ကိုင်စွဲပြီးတော့ နောက်ဆုံးအချိန်ထိ တောင်းဆိုသွားတာမျိုးပဲ ကောင်းပါတယ်။ တကယ့်တကယ် ရင်ဆိုင်ရပြီဆိုရင်လည်း ဒီမူတွေပေါ်ကနေပဲ ပြတ်ပြတ်သားသား ရပ်တည်ပြီး ဒီမိုကရေစီအရေးအတွက် လုပ်ဆောင်သွားသင့်တယ်လို့ မြင်ပါတယ်” ဟု ဦးအေးသာအောင်က ပြောသည်။
အန်အယ်လ်ဒီပါတီ ပြောခွင့်ရပုဂ္ဂိုလ် ဦးအုံးကြိုင်ကမူ ယခုအစည်းအဝေးမှ ထူးခြားချက်တခုမှာ ယခင်က တွေ့ဆုံဆွေးနွေးရေးဟု အကြမ်းဖျင်း ပြောဆိုခဲ့သော်လည်း ယခုအခါ ထိုဆွေးနွေးပွဲတွင် ပါတီဘက်က ဆွေးနွေးသွားမည့် အကြောင်းအရာများကို ရှင်းရှင်းလင်းလင်း ပြောဆိုလိုက်ခြင်းဖြစ်သည်ဟု ဆိုသည်။
“အရင်ကတော့ တွေ့ဆုံဆွေးနွေးပွဲ လုပ်ပါဆိုပြီး အကြိမ်ပေါင်းများစွာ ကမ်းလှမ်းခဲ့တာပေါ့ဗျာ။ အခုဟာကတော့ တွေ့ဆုံဆွေးနွေးပွဲလုပ်ရင် ကျနော်တို့ဘက်က ဘယ်လိုအချက်အလက်တွေကို ထည့်ပြီးဆွေးနွေးဖို့ ရှိပါတယ်ဆိုပြီး ထုတ်ပြန်လိုက်ပြီဗျာ။ ကျနော်တို့က ရွေးကောက်ပွဲ အနိုင်ရထားတဲ့ပါတီဆိုတော့ လွှတ်တော်ခေါ်ပေးဖို့ပြောမှာပဲ။ နောက် တိုင်းရင်းသား စည်းလုံးညီညွတ်ရေး ကိစ္စတွေကိုလည်း ဆွေးနွေးသွားမယ်။ ကျနော်တို့ပါတီရဲ့ အခြေခံမူဝါဒတွေအရ သွားရမှာပဲလေ” ဟု ဦးအုံးကြိုင်က ပြောသည်။
အကယ်စင်စစ်လည်း ၁၉၉၀ ရွေးကောက်ပွဲရလဒ်ကို ပယ်ဖျက်ခြင်းမပြုသေးဘဲ ၂၀၁၀ ရွေးကောက်ပွဲ ကျင်းပရန် နအဖက လောဆော်နေခြင်းဖြစ်သည်။ ထိုကိစ္စမှာ မျက်နှာပူတတ်မည်ဆိုလျှင် နိုင်ငံတကာ အသိုင်းအ၀ိုင်းကြားတွင် မျက်နှာပူစရာဖြစ်သည်။
အန်အယ်လ်ဒီပါတီက ယခင်သဘောထားများအတိုင်း တွေ့ဆုံဆွေးနွေးရေးကို ထပ်မံတောင်းဆိုခဲ့သော်လည်း နအဖဘက်မှ တဖက်သတ်အစီအစဉ်ဖြင့် ရွေးကောက်ပွဲ ကျင်းပခဲ့ပါက အချက်သုံးချက်လိုက်လျောလျှင် ရွေးကောက်ပွဲဝင်မည်ဟုလည်း ဆိုသည်။
ထိုအချက်သုံးချက်အနက် “အားလုံးလွှမ်းခြုံပါဝင်နိုင်မည့် လွတ်လပ်၍ တရားမျှတသော ရွေးကောက်ပွဲအဖြစ် နိုင်ငံတကာက စောင့်ကြပ်လေ့လာမှုကို ခွင့်ပြုလျက် ကျင်းပမည်ဆိုလျှင်” ဆိုသည့် အချက်ကလွဲ၍ “အဖွဲ့ချုပ်ခေါင်းဆောင်များအပါအဝင် နိုင်ငံရေးအကျဉ်းသားများအားလုံး ခြွင်းချက်မရှိ ပြန်လွှတ်ပေးလျှင်” နှင့် “၂ဝဝ၈ ဖွဲ့စည်းပုံအခြေခံဥပဒေမှ ဒီမိုကရေစီ စံနှုန်းများနှင့်မကိုက်ညီသည့် အချက်များကို ပြင်ဆင်ပေးလျှင်” ဆိုသည်တို့မှာ အန်အယ်လ်ဒီက အစဉ်တစိုက် ကိုင်စွဲထားသောမူဝါဒများ ဖြစ်သည်။
နအဖစစ်ခေါင်းဆောင် ဗိုလ်ချုပ်မှူးကြီးသန်းရွှေကလည်း ၎င်းတို့ချမှတ်ထားသော မူဝါဒလမ်းစဉ် (၇) ချက်အတိုင်း ဆက်လက်လုပ်ဆောင်သွားမည်ဟု ပြီးခဲ့သည့် တပ်မတော်နေ့မိန့်ခွန်းတွင် ထည့်သွင်းပြောဆိုထားသည်။
တွေ့ဆုံဆွေးနွေးရေးနှင့် စပ်လျဉ်း၍လည်း ဒေါ်အောင်ဆန်းစုကြည်အနေဖြင့် ထိပ်တိုက်ရင်ဆိုင်ရေး၊ အလုံးစုံ ပျက်သုဉ်းရေး၊ စီးပွားရေးအဆက်အသွယ် ဖြတ်တောက်ရေး အပါအ၀င် အလုံးစုံပိတ်ဆို့ရေး လေးချက်ကို စွန့်လွှတ်မှသာ တွေ့ဆုံနိုင်မည်ဖြစ်ကြောင်း နအဖက (၄-၁၀-၂၀၀၈) ရက်စွဲဖြင့် ထုတ်ပြန်ခဲ့သည်။
ယခုနှစ် ဖေဖော်ဝါရီလအတွင်း ကုလသမဂ္ဂအထွေထွေအတွင်းရေးမှူးချုပ်၏ အထူးအကြံပေးပုဂ္ဂိုလ် မစ္စတာဂမ်ဘာရီ လာရောက်စဉ်ကလည်း ထိုအချက်ကိုပါ နအဖစစ်အစိုးရက ထပ်မံပြောဆိုသည်။
အန်အယ်လ်ဒီပါတီဘက်ကမူ ထိုကိစ္စရပ်များသည် ဒေါ်အောင်ဆန်းစုကြည်နှင့် အန်အယ်လ်ဒီပါတီဘက်မှ လုပ်ဆောင်ထားခြင်းမဟုတ်ကြောင်း ပြန်လည်ထုတ်ပြန်သည်။
ထို့ကြောင့် တွေ့ဆုံဆွေးနွေးရေးဆိုသည်မှာ အလှမ်းကွာနေဦးမည့် သဘောရှိသည်။
သုို့သော် အန်အယ်လ်ဒီပါတီက ရွှေဂုံတိုင်ကြေညာစာတမ်းတွင် နအဖစစ်အစိုးရအနေဖြင့် တွေ့ဆုံဆွေးနွေးရေးကို မျက်နှာမမူဘဲ ရွေးကောက်ပွဲကိုသာ တဖက်သတ် လုပ်ဆောင်ပါက အန်အယ်လ်ဒီ၏ ရပ်တည်ချက်ကို လူထုထံချပြ သွားမည်ဟု ဆိုထားသည်။
ယင်းကိစ္စနှင့်စပ်လျဉ်း၍ ဦးအုံးကြိုင်က “ပါတီဖွဲ့စည်းခွင့်ဆိုင်ရာဥပဒေ၊ ရွေးကောက်ပွဲဥပဒေတို့ ထွက်လာရင် အဲဒါတွေအပေါ်မူတည်ပြီး ကျနော်တို့က ချပြသွားမှာ” ဟု ရှင်းလင်းပြောဆိုသည်။
အန်အယ်လ်ဒီပါတီအနေဖြင့် ထိုကဲ့သို့ နအဖက ဖော်ဆောင်နေသော ရွေးကောက်ပွဲအပေါ် ချဉ်းကပ်ဆွေးနွေးမှုများ ပြုခဲ့သကဲ့သို့ ပါတီဝင်အချို့ကလည်း ပါတီတွင်း ပြုပြင်ပြောင်းလဲရေးဆိုင်ရာအချို့ကို ထည့်သွင်းဆွေးနွေးသွားကြ သည်။
ပဲခူးလွှတ်တော်ကိုယ်စားလှယ်ဦးမြတ်လှ ဦးဆောင်သော အစည်းအဝေးတက်ရောက်လာသော ပါတီဝင်အချို့က ဗဟိုအလုပ်အမှုဆောင်အဖွဲ့မှ ဦးအောင်ရွှေနှင့် ဦးလွင်တို့ နုတ်ထွက်ပေးရန် တောင်းဆိုခဲ့ခြင်းဖြစ်သည်။
“ကျနော့်ကို အမတ်တွေ၊ အဖွဲ့ဝင်တွေက တင်ပြပါလို့ တိုက်တွန်းလို့ ကျနော်တင်ပြခဲ့တယ်။ အန်အယ်လ်ဒီက အခုကျဆင်းသလိုဖြစ်နေတယ်။ အဲလိုကျသွားတာ အကြောင်းနှစ်ချက်ရှိတယ်လို့ မြင်တယ်။ တိုင်းပြည်ကို ဒီမိုကရေစီနိုင်ငံကြီး တည်ထောင်မယ်လို့ ကြွေးကြော်ထားတဲ့ ပါတီကိုယ်နှိုက်က ဗဟိုဦးစီးစနစ်ကို ကျင့်သုံးနေတဲ့ အတွက် ကျဆင်းရတဲ့အကြောင်းတကြောင်း၊ နောက် ဦးအောင်ရွှေခေါင်းဆောင်တဲ့ စီအီးစီအဖွဲ့ကြောင့် ကျဆင်းလာတယ်လို့ ထင်လို့ တာဝန်အရှိဆုံးဖြစ်တဲ့ ဦးအောင်ရွှေနဲ့ဦးလွင်တို့ နုတ်ထွက်ပေးပါဆိုပြီး တောင်းဆိုခဲ့တာပါ” ဟု ဦးမြတ်လှက ပြောသည်။
ယင်းတောင်းဆိုမှုကို ပါတ်ီဝင် (၃၆) ဦးက လက်မှတ်ရေးထိုး တောင်းဆိုခဲ့သည်ဟုလည်း ဦးမြတ်လှက ပြောသည်။
အစည်းအဝေး တက်ရောက်လာသူများ အချက်သုံးချက်အပေါ်တွင် မူတည်ဆွေးနွေးရန် စီအီးစီအဖွဲ့က ချပေးသော အစီရင်ခံစာ ဖတ်ရှုခွင့်ရချိန်မှာလည်း နည်းလွန်းသည်ဟု ဆိုသည်။
“(၂၇) ရက်နေ့မှာ ကျနော်တို့ကို အကြိုညှိနှိုင်းထားနိုင်ဖို့ ဆိုပြီး ပေးဖတ်တယ်ဗျာ။ ဒါပေမယ့် အချိန် နှစ်နာရီလောက်ပဲ ဖတ်ခွင့်ရတာ နည်းလွန်းတယ်။ ဒီအချိန်ရောက်မှတော့ စာတမ်းပေါက်ကြားလည်း ဘာဖြစ်လဲဗျာ။ ထုတ်ပေးလိုက်မှပေါ့။ ကျယ်ကျယ်ပြန့်ပြန့် ဆွေးနွေးကြဆိုပြီး။ အခုဟာက တိုင်းနဲ့ပြည်နယ်တခုကိုမှ တစောင်စီ ပဲပေးတော့ အားလုံးဝိုင်းဖတ်နေကြရတယ်” ဟု ဦးမြတ်လှက ပြောသည်။
ဦးမြတ်လှ၏ တောင်းဆိုချက်များကို ဦးခင်မောင်ဆွေက ပြန်လည်ဖြေကြားပေးခဲ့သည်ဟု ပါတီပြောခွင့်ရပုဂ္ဂိုလ် ဦးဉာဏ်ဝင်းက ပြောသည်။
“ဒါဟာ တောင်းဆိုသင့် တောင်းဆိုထိုက်တယ် ထင်ရင် တောင်းဆိုပါ။ ဒါပေမယ့် ဒီအစည်းအဝေးမှာ တောင်းဆိုရမှာ မဟုတ်ပါဘူး။ တချိန်ချိန်မှာ ဘယ်သူ့ကိုပဲဖြစ်ဖြစ် နုတ်ထွက်ပေးသင့်တယ် ထင်ရင် တောင်းဆိုဖို့ အခွင့်အရေး ရှိပါတယ်။ ခုဟာကတော့ အချိန်အခါ မဟုတ်သေးပါဘူးလို့ ဦးခင်မောင်ဆွေက ပြန်လည်ဖြေကြားပေးခဲ့ပါတယ်” ဟု ဦးဉာဏ်ဝင်းက ပြောသည်။
စီအာပီပ်ီအဖွဲ့ဝင်တဦးဖြစ်သူ ပူကျင့်ရှင်းထန်က အန်အယ်လ်ဒီတိုင်းနှင့် ပြည်နယ်စုံညီ အစည်းအဝေးကြီးသည် ယခုထက်ပိုစော ကျင်းပသင့်သည်ဟု ယူဆသည်။
၎င်းက “ဒီလိုအစည်းအဝေးကြီး ကျင်းပသင့်တာက ကြာပါပြီဗျာ။ အခုလို ကျင်းပဖြစ်သွားတာကိုလည်း ၀မ်းသာတယ်။ အမှန်က ဒီထက် ပိုစောစောတောင် ကျင်းပသင့်တယ်။ ဒီလိုနှောင့်နှေးမှုတွေ ရှိခဲ့တယ်ဆိုပြီး ဦးအောင်ရွှေတို့ နုတ်ထွက်ဖို့ တင်ပြတာတွေရှိတယ်လို့ ကြားပါတယ်။ ဒါက သူတို့ပါတီတွင်း ကိစ္စတွေပေါ့လေ။ ဒါပေမယ့် ဒီအချိန်မှာ တနိုင်ငံလုံးမှာ ဦးဆောင်တဲ့ပါတီက အန်အယ်လ်ဒီ တခုတည်းရှိတယ်။ အဲဒီအထဲမှာ ဦးဆောင်တဲ့သူက စီအီးစီဆိုတော့။ ဒီလိုဖြစ်နေတာကိုး။ ဟိုဘက်က အုပ်ချုပ်နေတဲ့ အစိုးရကလည်းပဲ အာဏာကို အလွန့်အလွန် သုံးစွဲမှုရှိတယ်။ နောက်ပြီးတော့ အတိုက်အခံခေါင်းဆောင်ဘက်မှာလည်း ညံ့ဖျင်းမှုရှိတယ်ဆိုပြီး သူတို့က ဒီအဆိုကို တင်တာနဲ့တူပါတယ်။ ဒီမိုကရေစီနည်းလမ်းအရဆိုရင် ကိုယ်မြင်တဲ့အတိုင်း တင်ပြခွင့်ရှိတယ်လို့ ဆိုရမှာပေါ့ဗျာ” ဟု ပြောသည်။
စုံညီအစည်းအဝေးတက်ရောက်ခဲ့သည့် ရန်ကုန်တိုင်း စည်းရုံးရေးတွဲဖက်အတွင်းရေးမှူး ဒေါက်တာမျိုးအောင်က “ဒီအစည်းအဝေးကြီးမှာ စီအီးစီအဖွဲ့အနေနဲ့ကတော့ အဖွဲ့ဝင်တွေ အကုန်လုံးကို ကိုယ်စားပြုမယ့် တိုင်းစည်းနဲ့ လွှတ်တော်ကိုယ်စားလှယ်တွေရဲ့ သဘောထားတွေကို ရသွားတာပေါ့ဗျာ။ အစီရင်ခံစာတွေ ဖတ်ခွင့်ရတဲ့ အချိန်ကတော့ နည်းတာပေါ့ဗျာ။ ဒါပေမယ့်လည်း ကျနော်တို့ ပြန်လည်ဆွေးနွေးနိုင်ခဲ့ပါတယ်” ဟု ဆိုသည်။
လွှတ်တော်ကိုယ်စားလှယ်တဦးဖြစ်သည့် ဦးကျော်မြင့် (ဇလွန်မြို့နယ်၊ မဲဆန္ဒနယ်အမှတ်-၁) ကလည်း စာတမ်းများ ဖတ်ရှုခွင့်ရချိန် နည်းပါးသည်ဟု ဆိုသည်။ ဦးအောင်ရွှေနှင့် ဦးလွင်တို့အား နုတ်ထွက်ခိုင်းမှုအပေါ်တွင်မူ ၎င်းက ယခုကဲ့သို့ ရှုမြင်သည်။
“ကျနော်တို့ ခေါင်းဆောင်မဖြစ်ခင် ဒီပုဂ္ဂိုလ်ကြီးတွေကနေပြီး ပါတီကို ဆက်လက်ရပ်တည်နိုင်အောင်၊ သူတို့ရဲ့ ဦးဆောင်မှုနဲ့ ကျနော်တို့ လိုက်ခဲ့ရတာပေါ့။ ဆိုတော့ ဒီအချိန်မှာ ကွဲလွဲမှုတွေ မရှိစေချင်ဘူးပေါ့။ ဘာဖြစ်လို့လဲ ဆိုတော့ ကွဲလွဲမှုတွေကို လက်ခံနိုင်တယ်ဆိုပေမယ့် မကျေနပ်ဘူးဆိုတဲ့လူတွေကလည်း အနည်းအကျဉ်းပါ”ဟု ၎င်းက ပြောသည်။
မည်သို့ပင်ဆိုစေကာမူ ပါတီစုံညီအစည်းအဝေးအတွင်း နအဖနှင့် ယှဉ်ပြိုင်လျှောက်လှမ်းရမည့် မူဝါဒသဘောထားများအပြင် ပါတီတွင်း ပြုပြင်ပြောင်းလဲမှုအတွက် ဆွေးနွေးခဲ့ကြရသည်မှာ အမှန်ပင်ဖြစ်သည်။
သို့သော် ပါတီစုံညီအစည်းအဝေးမှ မူဝါဒသစ်များ ချမှတ်နိုင်မှုကို မမြင်ရသေးဘဲ မူဝါဒဟောင်းများကိုသာ တိုင်းနှင့်ပြည်နယ်အဆင့် ဦးဆောင်သူများထံမှ သဘောထားကောက်ယူမှု ပြုခဲ့ခြင်းသာဖြစ်မည်။
မူဝါဒသစ် ပေါ်ထွက်လာနိုင်မည့်အချိန်မှာ ဦးအောင်ရွှေ၏ အဖွင့်မိန့်ခွန်းနှင့် ဦးအုံးကြိုင်တို့ပြောစကားများအရ ပါတီဖွဲ့စည်းခွင့်ဆိုင်ရာ ဥပဒေပေါ်ထွက်ပြီးမှသာ ဖြစ်ပါလိမ့်မည်။
No comments:
Post a Comment