အထွေထွေ ရွေးကောက်ပွဲ ကျင်းပဖို့ ၁၈ ရက်သာလိုတော့ရာ တသီးပုဂ္ဂလ ကိုယ်စားလှယ်လောင်းများ သာမက ပါတီတော်တော်များများရဲ့ မဲဆွယ်မှု အရှိန်အဟုန် မြင့်မားနေပါတယ်။ မြန်မာပြည်သူများအတွက် ၂၀၁၅ ရွေးကောက်ပွဲဟာ အပြောင်းအလဲလို့ ယူဆနေတာကြောင့် စိတ်လှုပ်ရှား ဖွယ်ဖြစ်နေမယ်လို့ ထင်ပါတယ်။
ရန်ကုန်မြို့၊ မန္တလေးအပါအ၀င် မြို့ကြီးတွေနဲ့ နေရာအနှံ့က မဲဆွယ်ဆိုင်းဘုတ်တွေ၊ မိမိလိုလားတဲ့ ပါတီတွေရဲ့ အလံတွေကို တပ်ဆင်ကာ မောင်းနှင်နေတဲ့ကားတွေ၊ အထူးသဖြင့် အလံနီတွေကို တလူလူလွှင့်ကာ သွားလာနေတဲ့ အနှေးယာဉ်တွေကို မြင်ရတဲ့အခါ မြန်မာပြည်ရဲ့ ရွေးကောက်ပွဲတွေအထဲက တခုဖြစ်တဲ့ ၁၉၉၀ ရွေးကောက်ပွဲကို သတိရမိပါတယ်။
မြန်မာပြည်မှာ လုပ်ခဲ့တဲ့ ရွေးကောက်ပွဲတွေထဲမှာ ၁၉၈၈ စစ်တပ် အာဏာသိမ်းပြီး တနှစ်ကျော်အကြာ ၁၉၉၀ ခုနှစ် မေလ ၂၇ ရက်က ပြုလုပ်ခဲ့တဲ့ ရွေးကောက်ပွဲဟာ မြန်မာပြည်သူတွေအတွက် အမှတ်တရအဖြစ်ဆုံး ရွေးကောက်ပွဲတခု ဖြစ်လိမ့်မယ်လို့ ထင်ပါတယ်။
အဲဒီတုန်းက တတ်သိပညာရှင်တွေ၊ မျိုးချစ်ရဲဘော်ဟောင်းတွေ၊ နိုင်ငံရေး သမားဟောင်းကြီးတွေ ပေါင်းစပ်ထားပြီး လူထုထောက်ခံမှုကို အမြင်ဆုံး ရရှိထားတဲ့ အမျိုးသားဒီမိုကရေစီ အဖွဲ့ချုပ် (NLD)၊ စစ်တပ်ကျော ထောက်နောက်ခံ ပြုထားတဲ့ မြန်မာဆိုရှယ်လစ်လမ်းစဉ် တဖြစ်လဲ တိုင်းရင်းသား စည်းလုံးညီညွတ်ရေးပါတီ (တစည)၊ ကျောင်းသားပါတီလို့ နာမည်ကြီးတဲ့ လူ့ဘောင်သစ် ဒီမိုကရက်တစ်ပါတီ (DPNS) တို့ဟာ အင်အားအကြီးဆုံး ပါတီတွေလို့ ဆိုရမှာပေါ့။
လူတိုင်းရဲ့ မျှော်လင့်ချက်ဟာ ၂၆ နှစ်တာ အုပ်ချုပ်ခဲ့တဲ့ အာဏာရှင် တပါတီစနစ် လက်အောက်ကနေ ရုန်းထွက်ပြီး ပထမဆုံးပြုလုပ်တဲ့ ပါတီစုံ ဒီမိုကရေစီ ရွေးကောက်ပွဲဖြစ်လို့ ထွက်ပေါ်လာမယ့် အစိုးရသစ်တရပ်နဲ့အတူ အနာဂတ် နိုင်ငံရေး စီးပွားရေးတွေ မျှော်လင့်ချက်အသစ်တွေ အပြည့်ပေါ့။
လူထုရွံရှာတဲ့ အာဏာရှင်စနစ်ကို ဆန့်ကျင့်တဲ့ ဒီရေဟာ မြင့်တက်နေတဲ့ ကာလဖြစ်တာကြောင့် NLD ကို ပြည်သူများက ထောက်ခံ ၀န်းရံကြသလို ဒုတိယ အင်အားအကြီးဆုံး ပါတီလို့ ဆိုရမယ့် DPNS ပါတီဟာ ပါတီမှတ်ပုံတင်ခဲ့ပေမယ့် ရွေးကောက်ပွဲကို ၀င်ရောက်ခြင်းမရှိဘဲ NLD ပါတီကို ၀န်းရံခဲ့ပါတယ်။
ဒါပေမယ့် ရွေးကောက်ပွဲမတိုင်မီ ကြားကာလမှာ အမျိုးသားဒီမိုကရေစီ အဖွဲ့ချုပ် ခေါင်းဆောင်တွေဖြစ်တဲ့ ဒေါ်အောင်ဆန်းစုကြည်၊ ဦးတင်ဦးတို့ နေအိမ်အကျယ်ချုပ် ကျခံနေရသလို၊ သတင်းစာဆရာကြီး ဦးဝင်းတင်လည်း စစ်အစိုးရရဲ့ လက်ချက်နဲ့ ထောင်နန်းစံနေခဲ့ရပါတယ်။
ဒါကြောင့်လည်း ခေါင်းဆောင်းပိုင်း အားနည်နေတဲ့ NLD ပါတီကို ဗိုလ်မှူးကြီးဟောင်း ဦးကြည်မောင်ကပဲ ဦးဆောင်ကာ ၀င်ရောက် ယှဉ်ပြိုင်ခဲ့ရပါတယ်။
၁၉၉၀ ရွေးကောက်ပွဲ မတိုင်ခင် အမှတ်ရစရာ အဖြစ်ဆုံးတခုကတော့ အာဏာသိမ်း စစ်ခေါင်းဆောင် နိုင်ငံတော် ငြိမ်ဝပ်ပိပြားရေးအဖွဲ့ ဥက္ကဋ္ဌ ဗိုလ်ချုပ်မှူးကြီး စောမောင်ရဲ့ တိုင်းသိပြည်သိ ပြောခဲ့တဲ့ စကားတခွန်းပါ။
စစ်တပ်အနေနဲ့ “ပြည်သူက ရွေးချယ်ပေးခဲ့တဲ့ အစိုးရတရပ် ပေါ်ပေါက်လာရင် စစ်တပ်က စစ်တန်းလျားကို ပြန်မယ်၊ တိုင်းပြည်ရဲ့ ကာကွယ်ရေးတာဝန်ကို ထမ်းဆောင်ကြရမယ်၊ တိုင်းပြည်အုပ်ချုပ်ရေး ကိစ္စတွေဟာ ရွေးချယ်ခံခဲ့ရလို့ ပေါ်ပေါက်လာမယ့် အစိုးရတာဝန်သာ ဖြစ်တယ်” ဆိုတဲ့ ကတိစကားဟာ ပြည်သူအတွက်တော့ ယုံကြည်စရာ ဖြစ်ခဲ့ကြပါတယ်။
ဒါကြောင့် လူထုဟာ အသည်းကြားက မဲတပြားကို ခမောက် အမှတ်အသားကိုင်စွဲတဲ့ အမျိုးသားဒီမိုကရေစီ အဖွဲ့ချုပ် (NLD) ပါတီကို ပုံအော မဲပေးခဲ့ကြပါတယ်။
လူတိုင်းဟာ အဲဒီနေ့က မဲရေတွက်ကာ မြန်မာ့ရုပ်မြင်သံကြားနဲ့ နုိုင်ငံပိုင် ရေဒီယိုက ကြေညာမယ့် အနိုင်အရှုံး စာရင်းကို စောင့်မျှော်နားဆင်ကာ NLD ပါတီရဲ့ အောင်နိုင်မှုကို စောင့်ဆိုင်းခဲ့ကြပါတယ်။
တနိုင်ငံလုံး အတိုင်းအတာနဲ့ အနိုင်ရခဲ့တဲ့ NLD ပါတီရဲ့ အောင်မြင်မှုဟာ တောင်ပြိုကမ်းပြို အနိုင်ရမှုတခုလို့ ဆိုရမှာပါ။
တိုင်းရင်းသား စည်းလုံးညီညွတ်ရေးပါတီ အနိုင်ရမယ်လို့ လူတိုင်းယုံကြည်ကြပြီး စစ်တပ် အမာခံနယ်မြေတွေလို့ ယူဆတဲ့ မှော်ဘီတပ်နယ်၊ မင်္ဂလာဒုံ တပ်နယ်တွေမှာကအစ NLD ပါတီဟာ အနိုင်ရခဲ့ကြတယ်။
ဒါပေမယ့် အားလုံးသိကြတဲ့ အတိုင်းပါပဲ၊ စစ်အစိုးရအနေနဲ့ မဲရလဒ်ကို ကြေညာခဲ့သော်လည်း အနိုင်အရှုံးကို လက်ခံချင်ပုံ မရပါဘူး။ ထီပေါက်ပြီး လက်မှတ်ပျောက်သလို NLD ပါတီဟာ အစိုးရ ဖွဲ့ခွင့်မရဘဲ တောက်လျှောက် ဖိနိုပ်မှုတွေကိုသာ ကြုံခဲ့ရပါတော့တယ်။
နောင် နှစ် ၂၀ အကြာမှာ ပြုလုပ်တဲ့ ၂၀၁၀ အထွေထွေ ရွေးကောက်ပွဲမှာတော့ NLD ပါတီဟာ ရွေးကောက်ပွဲ မ၀င်ခဲ့ပါဘူး။
အခုအချိန်မှာတော့ ၁၉၉၀ ရွေးကောက်ပွဲမှာ NLD ပါတီ အောင်နိုင်ရေး ဦးဆောင်ခဲ့တဲ့ ဗိုလ်မှူးကြီးဟောင်း ဦးကြည်မောင်လည်း ကွယ်လွန်ခဲ့ပါပြီ။
ရှေ့လမှာပြုလုပ်မယ် အထွေထွေ ရွေးကောက်ပွဲအတွက် ဒေါ်အောင်ဆန်းစုကြည်နဲ့ သူရ ဦးတင်ဦးတို့က ဦးစီးနေပါတယ်။
ဒါကြောင့်လည်း ၂၀၁၅ ရွေးကောက်ပွဲဟာ NLD ပါတီအတွက်တော့ ဒုတိယအကြိမ် တပြည်လုံးအတိုင်းအတာနဲ့ ၀င်ရောက် ယှဉ်ပြိုင်ရမယ့် ရွေးကောက်ပွဲလို့ ဆိုရမှာ ဖြစ်ပါတယ်။
No comments:
Post a Comment