Wednesday, July 31, 2013

မောင်တောမှ အမျိုးသမီး ရွှေချောင်း ၂ ချောင်းဖြင့် ဘင်္ဂလာဒေခ်ျ့တွင် အဖမ်းခံရ

နိရဉ္စရာ

ရခိုင်ပြည်နယ် မောင်တောမြို့မှ ရခိုင် အမျိုးသမီး တစ်ဦးကို ရွှေချောင်း (၂) ခုနှင့် အတူ ဘင်္ဂလာဒေခ်ျ့ နယ်စပ် အာဏာပိုင်များက ဖမ်းဆီးလိုက်သည်။

ဖမ်းဆီးခံရသူ အမျိုးသမီးမှာ မောင်တောမြို့မှ မလှမြင့် (၄၃) နှစ် ဖြစ်ကြောင်း ဘင်္ဂလာဒေခ်ျ့ နယ်ခြားစောင့်တပ်ဖွဲ့ ဗိုလ်မှူးကြီး ဂျာဟစ် ဟာဆန်က ပြောသည်။

သူမသည် ဘင်္ဂလာဒေခ်ျ့ နိုင်ငံသို့ တစ်ရက်တာ ပတ်စ်ပို့ဖြင့် လာရောက်သူ ဖြစ်ကြောင်း၊ သူမထံမှ အလေးချိန် ၃၃၂ ဂရမ် အလေးချိန်ရှိသော ရွှေချောင်း (၂) ချောင်းကို ဇူလိူင်လ ၃၀ ရက်နေ့ နေ့လည် တစ်နာရီတွင် တက်ကနက် နယ်စပ်မြို့တွင် ဖမ်းမိကြောင်း သူ ဆိုသည်။

သူမအား ဘင်္ဂလာဒေခ်ျ့ နိုင်ငံ ဥပဒေနှင့် အညီ တရားစွဲဆိုသွားမည်ဟု ဂျာဟစ် ဟာဆန်က ပြောသည်။

နိုင်ငံတကာတွင် ရွှေဈေးကျနေရာ ဘင်္ဂလာဒေခ်ျ့ နိုင်ငံအတွင်းသို့ တရားမ၀င် သွင်းယူလာသော ကုဋေနှင့် ချီ၍ တန်ဖိုးရှိသော ရွှေများကို အာဏာပိုင်များက မကြာခဏ ဖမ်းဆီးမိနေကြောင်း သိရသည်။

လွန်ခဲ့သော ဇူလိူင်လ ၂၄ ရက်နေ့ကလည်း ဒက္ကားမြို့ရှိ Shahjalal နိုင်ငံတကာ လေဆိပ်တွင် ဘင်္ဂလာဒေခ်ျ့ နိုင်ငံ အတွင်း တင်သွင်းလာသော အလေးချိန် ၁၂၄ ကီလိုရှိသော ရွှေချောင်းများကို ဘင်္ဂလာဒေခ်ျ့ အကောက်ခွန်ဌာနက ဖမ်းဆီးမိခဲ့သည်။ ရွှေချောင်းများ၏ တန်ဖိုးမှာ တာကာ ၅၄ ကုဋေ ဖိုး( မြန်မာကျပ်ငွေနှင့် ကုဋေ ၅၄၀) ရှိကြောင်း သိရသည်။

အလားတူ လွန်ခဲ့သော ဇူလိူင်လ ၂၉ ရက်နေ့ကလည်း ဒက္ကားမြို့ အဆိုပါ လေဆိပ်တွင် လူ နှစ်ဦး ရွှေ ၈ ကီလိုနှင့် အတူ ထပ်မံ ဖမ်းဆီးမိခဲ့သည်။ ၎င်းရွှေများမှာ ဒူဘိုင်မှ သွင်းယူလာသော ရွှေများ ဖြစ်ကြောင်း သိရသည်။

ဘင်္ဂလာဒေခ်ျ့တွင် ရွှေတကျပ်၏ တန်ဖိုးမှာ တာကာ ၄၂၀၀၀ (မြန်မာကျပ်ငွေနှင့်ဆိုလျှင် ၅၀၄၀၀၀) ရှိကြောင်း သိရသည်။

ပြည်ထောင်စု လွှတ်တော် နာယက ပြောင်းသော်လည်း တိုင်းရင်းသားအရေးပြောင်းလဲမည်မဟုတ်- အမတ်များပြော

မွေခေါဝ်

အမျိုးသားလွှတ်တော် ဥက္ကဌ နှင့် ပြည်သူ့လွှတ်တော် ဥက္ကဌတို့ ပြည်ထောင်စုလွှတ်တော်နာယက ရာထူးလွှဲပြောင်းကြ သော်လည်း တိုင်းရင်းသားအရေး ဦးစားပေးမှု မရှိနိုင်သေးဘူးဟု တိုင်းရင်းသားလွှတ်တော်အမတ်များက ဝေဖန်ပြော ဆိုကြသည်။

“ ဦးခင်အောင်မြင့်က တာဝန်ကျေပွန်တဲ့သူ၊ တိကျတဲ့သူဖြစ်တယ်။ စည်းနဲ့ကမ်းနဲ့ လုပ်သွားတယ်။ တိုင်းရင်းသားအရေးလဲ ဒီတိုင်းဘဲ။ ဦးစားပေးတာ သူ့မှာ မရှိခဲ့ဘူး။ သူက ယဉ်ကျေးမှု ဝန်ကြီးလုပ်ခဲ့ဖူးတယ်လေ။ အဲဒီတုန်းက ညောင်ရွှေဟော်နန်းကို ယဉ်ကျေးမှုပြတိုက် လုပ်လိုက်တာ သူပေါ့” - ဟု ကျားဖြူပါတီအမတ်မင်းတဦးက ပြောပါသည်။

ပြည်ထောင်စုလွှတ်တော် နာယက ရာထူး ၅ နှစ်သက်တမ်းအနက် ပထမ ၂ နှစ်ခွဲ အား အမျိုးသားလွှတ်တော် ဥက္ကဌက တာဝန်ထမ်း ဆောင်ပြီး ဒုတိယ သက်တမ်းအတွက် ပြည်သူ့လွှတ်တော် ဥက္ကဋ္ဌသူရဦးရွှေမန်းက ယခုတာဝန် ခဲ့ခြင်းဖြစ်သည်။

“ဦးရွှေမန်း တက်လာလဲ တိုင်းရင်းသားက ဘာမှ ထူးခြားမှာမဟုတ်ဘူး။ ပိုတောင်စိုးရိမ်ရမယ်။ ဘာလို့လဲ ဆိုတော့ NLD ခေါင်းဆောင် ဒေါ်အောင်ဆန်းစုကြည်နဲ့ တအားရင်းနှီးလာနေတယ်။ လူထုဘက်ကရပ်တည်ပြီး အစိုးရကို ဆက်လက် ဆန့်ကျင်ဖို့ အားမကောင်းတော့ဘူး။ တိုင်းရင်းသားတွေ ပိုခံရလိမ့်မယ်။ ဒါ့ကြောင့် တိုင်းရင်းသားအရေးကို တိုင်းရင်းသား တွေကဘဲလုပ်ရ လိမ့်မယ်။” - ဟု တိုင်းရင်းသား အမျိုးသမီးလွှတ်တော် အမတ်ဦးကလည်းပြောသည်။

လွှတ်တော် သက်တမ်း ၅ နှစ် (၂၀၁၀ မှ ၂၀၁၅ အထိ) တွင် ပြည်ထောင်စုလွှတ်တော်နာယကအဖြစ် အမျိုးသား လွှတ် တော်ဥက္ကဋ္ဌက ၂ နှစ်ခွဲ၊ ပြည်သူ့လွှတ်တော်ဥက္ကဋ္ဌက ၂ နှစ်ခွဲ တာဝန်ကိုပါ ထမ်းဆောင်ရမည်ဟု ဖွဲ့စည်းပုံ အခြေခံဥပဒေ၌ ပါရှိသည်။

ပြည်ထောင်စုလွှတ်တော် နာယက တာဝန်ကို အမျိုးသားလွှတ်တော် ဥက္ကဌ နှင့် ပြည်သူ့လွှတ်တော် ဥက္ကဌတို့ ပြောင်းလဲ ယူသည့် အခမ်းအနားသို့ နေပြည်တော်လေ့လာရေးခရီးစဉ်ရောက်ရှိနေသည့် အင်အား ၁၈၀ ခန့်ရှိ သျှမ်းပြည် အနယ်နယ်အရပ်ရပ်က ကျားဖြူပါတီဝင်အဖွဲ့ တို့လည်း တက်ရောက်ခဲ့သည်။

အစိုးရနဲ့ ABSDF အပစ်အခတ် ရပ်စဲရေး ဆွေးနွေးတော့မယ်

ကျော်ခ

၈၈ လူထု အရေးတော်ပုံကနေ ပေါက်ဖွားလာတဲ့ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) နဲ့ အစိုး ရ ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီတို့ သြဂုတ်လ ၄ ရက်နေ့မှာ အပစ်အခတ် ရပ်စဲရေး ဆွေးနွေးကြ မယ်လို့ သတင်းရပါတယ်။

ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီ ဒု ဥက္ကဋ္ဌ ဝန်ကြီး ဦးအောင်မင်း ဦးဆောင်တဲ့ ကိုယ်စားလှယ် အဖွဲ့နဲ့ ABSDF ဥက္ကဋ္ဌ ရဲဘော်သံခဲ ဦးဆောင်တဲ့ ကိုယ်စားလှယ်အဖွဲ့တွေ တွေ့ကြမှာဖြစ်ပြီး မူလက ကရင်ပြည်နယ် ဘားအံမြို့မှာ တွေ့ဆုံကြ ဖို့ စီစဉ်ထားပေမယ့် လတ်တလော ရေကြီးမှုဖြစ်နေတာကြောင့် ရန်ကုန်မြို့မှာ တွေ့ဖြစ်ဖို့များနေတယ်လို့ ABSDF ဘက်ကပြော ပါတယ်။

“ဆွေးနွေးမှာကတော့ လက်ရှိ တိုင်းပြည်မှာရှိနေတဲ့ နိုင်ငံရေးပြဿနာတွေကို တွေ့ဆုံဆွေးနွေး အဖြေရှာနိုင်ဖို့အတွက် ပြောင်းသင့် တဲ့ နိုင်ငံရေးဆိုင်ရာ ပြုပြင်ပြောင်းလဲမှုတွေကို တင်ပြမယ်၊ တပြိုင်တည်းမှာပဲ ကျနော်တို့က လက်နက်ကိုင် တော်လှန်ရေးတပ်ဖွဲ့ ဖြစ်တဲ့ အပေါ်မှာ မူတည်ပြီးတော့မှ နိုင်ငံရေးပြဿနာတွေ တွေ့ဆုံဆွေးနွေး အဖြေရှာနိုင်ဖို့အတွက် အပစ်အခတ် ရပ်စဲရေးဆိုင်ရာ ကိစ္စရပ်တွေလည်း ပါမှာ”လို့ ABSDF ဒု ဥက္ကဋ္ဌ ဦးမျိုးဝင်း က ဧရာဝတီ ကိုပြောပါတယ်။

ABSDF အနေနဲ့ အမျိုးသား ပြန်လည်သင့်မြတ်ရေးနဲ့ ပြည်တွင်းငြိမ်းချမ်းရေးကို အဓိကထား ဆွေးနွေးသွားမှာ ဖြစ်တယ်လို့လည်း သိရပြီး လက်ရှိ နိုင်ငံရေး အခင်းအကျင်းမှာ အားလုံးပါဝင်နိုင်ဖို့ လက်ကျန် နိုင်ငံရေးအကျဉ်းသားတွေ လွှတ်ပေးရေးနဲ့ ၂၀၀၈ အခြေ ခံ ဥပဒေ ပြောင်းလဲနိုင်ရေး ကြိုးပမ်းသွားမယ်လို့ ဆိုပါတယ်။

“တိုင်းပြည်မှာရှိတဲ့ နိုင်ငံရေး ပြဿနာတွေ၊ တိုင်းရင်းသားတွေရဲ့ အမျိုးသား တန်းတူရေးနဲ့ ကိုပိုင်ပြဌာန်းခွင့် အရေး၊ ဒီမိုကရေစီ အရေး ဆောင်ရွက်တဲ့နေရာမှာ ဒီ ၂၀၀၈ အခြေခံ ဥပဒေ ဘောင်အတွင်းကနေပြီးတော့ ဘယ်လိုမှ ပြေလည်အောင် ဖြေရှင်းနိုင်မှာ မဟုတ်ဘူး၊ အဲဒါကြောင့်မလို့ ၂၀၀၈ ဖွဲ့စည်းပုံ အခြေခံဥပဒေ ပြောင်းလဲလာဖို့ အတွက် ကျနော်တို့ ကြိုးပမ်း သွားမယ်”လို့ ဦးမျိုးဝင်း က ဆက်ပြီး ရှင်းပြပါတယ်။

ABSDF နဲ့ အစိုးရအဖွဲ့တို့ ရန်ကုန်မှာ ဆွေးနွေးဖြစ်ပါက ၂၅ နှစ်မြောက် ရှစ်လေးလုံး ငွေရတု နှစ်ပတ်လည် အခမ်းအနားကိုလည်း တက်ရောက်နိုင်ဖွယ်ရှိပြီး ရှေ့ဆက်လုပ်ဆောင်ရမယ့် အခြေအနေတွေနဲ့ ပတ်သက်လို့ နိုင်ငံရေး ပါတီတွေ၊ လူထုအခြေပြု အဖွဲ့ အစည်းတွေနဲ့ တွေ့ဆုံကာ သဘောထား ရယူသွားမယ်လို့လည်း ဆိုပါတယ်။

အမျိုးသားဒီမိုကရေစီ အဖွဲ့ချုပ် ဥက္ကဋ္ဌ ပြည်သူ့လွှတ်တော် ကိုယ်စားလှယ် ဒေါ်အောင်ဆန်းစုကြည်နဲ့ တွေ့ဆုံဖို့ ABSDF မှာ ဆန္ဒရှိပြီး တွေ့ဆုံနိုင်ရေး ကြိုးစားသွားဦးမှာ ဖြစ်တယ်လို့လည်း သိရပါတယ်။

၂၀၁၂ ခုနှစ် ဒီဇင်ဘာလ အတွင်းက ABSDF ရဲ့ ပထမဆုံး သွားရောက်ခဲ့တဲ့ တရားဝင် ပြည်တွင်း ခရီးစဉ်တွေမှာ ဒေါ်အောင်ဆန်းစုကြည်နဲ့ တွေ့ဆုံဖို့ ကြိုးပမ်းမှု လုပ်ခဲ့ပေမယ့် တွေ့ဆုံခွင့် မရရှိခဲ့ဘူးလို့ သိရပါတယ်။

အစိုးရ နဲ့ ABSDF တို့အကြား ၂၀၁၂ ခုနှစ်ကတည်းက အလွတ်သဘောတွေ့ဆုံမှု တရားဝင်တွေ့ဆုံမှုတွေ အကြိမ်ကြိမ်ရှိခဲ့ပေမယ့် အပစ်အခတ် ရပ်စဲရေး လက်မှတ်ထိုးတဲ့ အဆင့်အထိတော့ မရောက်ခဲ့ပါဘူး။ အခုတွေ့ဆုံမယ့် အကြိမ်မှာတော့ သဘောတူ လက်မှတ် ရေးထိုးမှုတွေ ပြုလုပ်နိုင်ဖွယ်ရှိတယ်လို့ တိုင်းရင်းသား လက်နက်ကိုင်တပ်ဖွဲ့ သတင်းရင်းမြစ်တွေက ပြောပါတယ်။

ဒီနေ့ ပလောင် လွတ်မြောက်ရေး တပ်မတော်(TNLA)နဲ့ မူဆယ်မြို့မှာ လုပ်တဲ့ တွေ့ဆုံပွဲမှာ ၀န်ကြီး ဦးအောင်မင်းက ABSDF အဖွဲ့နဲ့ လာမယ့် သြဂုတ်လ ၄ ရက်နေ့တွေ့ဆုံပွဲမှာ သဘောတူ လက်မှတ် ထိုးနိုင်မယ်လို့ ယူဆကြောင်း၊ သမ္မတ ဦးသိန်းစိန်ကလည်း တနိုင်ငံလုံး အတိုင်းအတာနဲ့ အပစ်အခတ် ရပ်စဲရေးလုပ်ဖို့ ပြောထားကြောင်း၊ သူ့အနေနဲ့လည်း အမြန်ဆုံး ဆောင်ရွက်သွားမှာဖြစ်ကြောင်း သတင်းထောက်တွေကို ပြောကြားတယ်လို့ သိရတယ်။

“ABSDF ငြိမ်းချမ်းရေးဆွေးနွေးပွဲတွေက တခါတလေကျ တိမ်မလိုလိုနဲ့နက်သွားတာလည်း ရှိတယ်၊ နက်မလိုလိုနဲ့ တိမ်သွားတာလည်း ရှိတယ်”လို့လည်း ဦးအောင်မင်းက ပြောကြားသွားတယ်။

အတည်မပြုနိုင်သေးတဲ့ သတင်းတွေအရ အခုဆွေးနွေးပွဲအတွက် ကရင်အမျိုးသား အစည်းအရုံး(KNU)၊ ကချင်လွတ်လပ်ရေး အဖွဲ့ (KIO) တို့အပါအဝင် တခြား တိုင်းရင်းသား လက်နက်ကိုင်အဖွဲ့ တချို့က ကိုယ်စားလှယ်တွေလည်း တက်ရောက်ဖွယ်ရှိတယ်လို့ ကြား သိရပါတယ်။

ABSDF ကို ၁၉၈၈ ခုနှစ် နိုဝင်ဘာလ ၁ ရက်နေ့က စတင် တည်ထောင်ခဲ့ပြီး နယ်စပ်ဒေသတွေမှာ အခြေစိုက်ကာ အမျိုးသား ပြန်လည်သင့်မြတ်ရေး၊ ဒီမိုကရေစီ အရေး၊ လူ့အခွင့်အရေးနဲ့ ပြည်တွင်းငြိမ်းချမ်းရေး အတွက် အစိုးရ အဆက်ဆက်ကို ဆန့်ကျင် တော်လှန်ခဲ့တာ ၂၅ နှစ် ခန့်ရှိပြီဖြစ်သည်။

ABSDF နဲ့ အတူ လက်တွဲတိုက်ပွဲဝင်တဲ့ KNU က ၂၀၁၂ ခုနှစ် ဇန်နဝါရီနဲ့ မတ်လပိုင်းတွေမှာ အစိုးရနဲ့ ပဏာမ အပစ်အခတ် ရပ်စဲ ရေး သဘောတူညီမှု လက်မှတ်ရေးထိုးခဲ့ကြပြီး ဖြစ်ပါတယ်။ လက်ရှိ အတူပူးပေါင်း တိုက်ပွဲဝင်နေတဲ့ KIO အဖွဲ့ကလည်း အပစ် မရပ်သေးပေမယ့် အစိုးရနဲ့ ဆွေးနွေးမှုတွေ ပြုလုပ်နေတာ တွေ့ရပါတယ်။

ခလဲန်ရွာသား တဦး အစိုးရတပ်၏ ပစ်သတ်ခံရ

KNG

ရှမ်းပြည်မြောက်ပိုင်း ကချင်လွတ်မြောက်ရေးတပ်ဖွဲ့ (KIA) တပ်မဟာ (၄) နယ်မြေ ပန်ဆိုင်း (ကြူကုတ်) ဒေသ ခလဲန်ရွာဟောင်းတွင် ဇူလိုင်လ၂၈ ရက်နေ့က အစိုးရတပ် ခလရ (၁၂၃) နှင့် KIA ပြည်သူ့စစ် MHH တပ်ခွဲ (၅) ကြားပြင်းထန်စွာ တိုက်ပွဲဖြစ်ပွားပြီးနောက် ၎င်းအစိုးရတပ်သည် အပြစ်မဲ့ ခလဲန်ရွာသား ဦးဆွမ်လွတ်လာဂွန်း (Sumlut La Gun) ဆိုသူအား ပစ်သတ်ခဲ့ကြောင်းသိရသည်။

ခလဲန်ရွာသား ဦးဆွမ်လွတ်လာဂွန်း (Salang Sumlut La Gun) သည် အသက် ၃၀ နှစ် ကလေး ၃ ဦး ဖခင်ဖြစ်ပြီး တနင်္ဂနွေနေ့ ဘုရားဝတ်ပြုစည်းဝေးပြီးနောက် ကြံခင်းသို့ ကယ်ဆိုင်ဖြင့်သွားစဉ် ၎င်းအစိုးရတပ်မှ လမ်းတွင် ပစ်သတ်သွားပြီး အနီးနားတွင် မြုပ်ထားခဲ့ခြင်းဖြစ်ကြောင်း MHH တပ်ခွဲ(၅) တပ်ခွဲမှူး ဇော်ဆိုင်း KNG ကချင်သတင်းဌာန သို့ပြောသည်။

“ဆိုင်ကယ်နဲ့ ကြံခင်းထဲထွက်ထားတာ ပြန်မလာတော့ ဘယ်လိုဖြစ်တယ် အခြေအနေလဲမသိဘူး။ လိုက်ရှာကြတယ်။ ဆိုင်ကယ်ကိုတော့ အစိုးရတပ်က ကားနဲ့တင်သွားတာတွေ့လိုက်ပြီး လူကမထွက်လာတော့ အံ့သြပြီးလိုက်ရှာတော့ တိုက်ပွဲဖြစ်တဲ့နေရာ အောက်ဘက်မှာ ဒီတိုင်းပဲမြုပ်ထားကြတာ။ ဒီနေ့မှ သင်းအုပ်ဆရာတွေနှဲ့ပြန်ရှာတွေ့ပြီး နေရာပြန်စီစဉ်ပြီးမှ ဆုတောင်းသဂြိုလ်ဖို့လုပ်နေတယ်။”

ထိုနေ့တိုက်ပွဲတွင် ၁ နာရီကြာ တိုက်ပွဲဖြစ်ပွားခဲ့ပြီး အစိုးရတပ်မှ ကျဆုံး ထိခိုက်ဒဏ်ရာ ရရှိမှုများ၍ တပ်ခွဲ (၅) ဘက်သို့ လက်နက်ကြီးများဖြင့် ပစ်ခတ်ခဲ့ကြောင်းသိရသည်။

ထိုသို့ ပစ်ခတ်တိုက်ခိုက်ပြီးနောက် အဆိုပါ ခလဲန်ရွာသား ဦးဆွမ်လွတ်လာဂွန်း (Sumlut La Gun) ကြံခင်းအသွား ပစ်သတ်ခံရခြင်းဖြစ်ကြောင်းသိရသည်။ အသတ်ခံရသော ရွာသားသည် KIA တပ်ဖွဲ့ဝင်မဟုတ်ပဲ အပြစ်မဲ့ရွာသား သက်သက်ဖြစ်ကြောင်း တပ်ခွဲမှူးပြောသည်။

၎င်းမိသားစုဝင်များနှင့် ဆက်သွယ်ရန် ကြိုးစားသော်လည်း အခက်ခဲရှိနေဆဲဖြစ်သည်။ ခလဲန်ရွာတွင် အိမ်ထောင်စု ၅၀ ကျော်နေထိုင်လျက်ရှိသည်။

အဆိုပါ ခလဲန်ရွာရှိ အစိုးရတပ် ခလရ ခြေလျင်တပ်ရင်း (၁၂၃) တပ်သည် ယခုချိန် ပန်ဆိုင်း (ကြူကုတ်) ဘက်သို့ပြောင်းရွှေ့သွားပြီး မုန်ဂိုးဘက်မှ ထပ်မံတိုးချဲ့လာသော အလဲအလှယ်စစ်တပ်များသည် ခလဲန် (Hka Len) ကောင်းယောင်း (Kawng Yau)၊ ဖိုင်ကောင်း (Hpai Kawng)၊ ကောင်းစထေး (Kawng Sahte) ရွာများတွင် ပြန်လည်တိုးချထားကြောင်းသိရသည်။

တပ်မဟာ (၄) တာမိုးညဲမြို့နယ် KIA တပ်ရင်း (၂) ဒေသ MHH တပ်ခွဲ (၂) နယ်မြေ မုန်ပေါ် (Mung Paw) တွင်လည်း ဇူလိုင် ၂၈ ရက် အစိုးရတပ် ခလရ ၁၂၉ တပ်နှင့် MHH တပ်ခွဲ (၂) တို့ပစ်ခတ်တိုက်ခိုက်ချိန် နမ်ဂျောန် (Nam Jawn) ဘက်မှ စစ်ကူအင်အား ၇၀ ကျော် ရောက်ရှိလာပြီးလက်နက်ကြီးများဖြင့် ပစ်ခတ်တိုက်ခိုက်ခဲ့ခြင်းကြောင့် MHH တပ်ခွဲ (၂)မှ နောက်ဆုတ် လိုက်ရကြောင်း KIA တပ်မဟာ (၄) အရာရှိတဦးပြောသည်။

ယခုချိန် အစိုးရတပ်သည် တပ်မဟာ (၄) နယ်မြေနေရာ အသီးသီးတွင် စစ်အင်အားများဖြည့်နေပြီး ယနေ့နံနက်တွင်လည်း လားရှိုးဘက်မှ အစိုးရ ကား အစင်း ၂၀ ကျော်သည် နမ်ဖတ်ကာ-မူဆယ် ဘက်သို့ရောက်ရှိနေပြီဖြစ်ကြောင်း ဒေသခံများပြောသည်။

အစိုးရတပ်များ စစ်အင်အားများ တိုးချဲ့နေခြင်းကြောင့် KIA တပ်မဟာ (၄) နယ်မြေ အသီးသီးတွင် နှစ်ဖက်တင်းမာနေပြီး တိုက်ပွဲများ ဆက်လက် ဖြစ်ပွားလာနိုင်ကြောင်း KIA တပ်မဟာ (၄) အရာရှိပြောသည်။

ကလေးစစ်သားဟောင်းများ ပြန်လည် ထူထောင်ရေး ILO ဆောင်ရွက်မည်

နန်းဆိုင်နွမ်

မြန်မာ့တပ်မတော်မှ နုတ်ထွက်ခွင့်ပေးလိုက်သည့် ကလေးစစ်သားများ ရေရှည် ပြန်လည် ထူထောင်ရေးအတွက် အပြည်ပြည်ဆိုင်ရာ အလုပ်သမား အဖွဲ့ (ILO) က အစိုးရအဖွဲ့များ၊ NGO များနှင့် ပူးပေါင်းကာ တာဝန်ယူ ပံ့ပိုးမှုများ ပြုလုပ်ပေးမည်ဖြစ်ကြောင်း သိရသည်။

အဆိုပါ ကလေးငယ်များ၏ စိတ်ပိုင်းဆိုင်ရာ၊ လူမှုရေး အသိုင်းအဝိုင်းများနှင့် လုပ်လိုသည့် စီပွားရေးများကိုလည်း သုတေသန စစ်တမ်းများ စတင် ကောက်ယူနေကြောင်း ILO ဆက်ဆံရေးရုံး၏ နည်းပညာ အထောက်အကူပြုအဖွဲ့ အရာရှိ မစ္စတာ ဂျီးဇပ် မာကာဆီလ် ဂျူနီယာ (Jesus Macasil, Jr) က ဧရာဝတီသို့ ပြောသည်။

“အသက်ကိုတော့ ၁၅ နှစ်မှ ၂၅ နှစ် လူငယ်တွေကို လုပ်ပေးမှာပါ။ တယောက်ကို ဘယ်လောက်လဲ ဆိုတာကတော့ မရှိပါဘူး။ တယောက်နဲ့ တယောက် လိုအပ်ချက်၊ လုပ်ချင်တာက မတူညီဘူးလေ။ အဲဒါကြောင့်လည်း သူတို့ ဒေသမှာ ဘယ်လိုရှိလဲ၊ သူတို့တွေ ဘာလုပ်ချင်လဲ ဆိုတာ စစ်တမ်းကောက်နေရတာပါ” ဟု ၎င်းက ဆိုသည်။

စစ်တပ်မှ နုတ်ထွက်ခွင့်ရသည့် ကလေးစစ်သားဟောင်းများကို ထောက်ပံ့ပေးရန် ILO က ပြည်တွင်းပြည်ပ ကုမ္ပဏီများ၊ အစိုးရ အဖွဲ့များ၊ NGO နှင့် INGO များနှင့် ပူးပေါင်းဆောင်ရွက်သွားမည် ဖြစ်ကြောင်း၊ သုတေသန စစ်တမ်းကို Myanmar Marking Research Development (MMRD) ကောက်ယူပေးနေကြောင်း၊ ကလေးစစ်သားဟောင်း အားလုံးကို ထောက်ပံ့နိုင်ရန်နှင့် ထွက်လာသည့် ကလေးစစ်သားအားလုံး ထောက်ပံ့နိုင်ရန်နှင့် ရေရှည်စီးပွားဖြစ်တည်နိုင်ရန်လည်းဆောင်ရွက်သွားမည်ဖြစ်ကြောင်း သိရသည်။

ကလေးစစ်သားဟောင်းများအတွက် သုတေသန စစ်တမ်း ကောက်ယူနေသည့် ဒေါ်လေးလေးက “ကျမတို့ကို ဒီလ (ဇူလိုင်) ၁၈၊ ၁၉ ရက်နေ့က ILO ကနေပြီး ကလေးတွေကို ဘယ်လို ဆက်ဆံပြီး ဘယ်လိုမေးရမယ်ဆိုတာ သင်တန်းပေးပါတယ်။ ကလေးတွေ ဘာဆက်လုပ်ချင်လဲ၊ ဘာစီးပွားရေးတွေ လုပ်ချင်လဲဆိုတာ လိုက်မေးရမယ်။ ကျမကတော့ ရန်ကုန်တိုင်းမှာရှိတဲ့ ကလေး ၇၅ ယောက်ကို မေးရမှာပါ” ဟု ဧရာဝတီသို့ ပြောသည်။

အသက် ၁၈ နှစ် မပြည့်သေးသည့် ကလေးများအတွက် မိဘအုပ်ထိန်းသူနှင့် တွေ့ဆုံဆွေးနွေးသွားမည် ဖြစ်ပြီး ကလေးငယ်များ စိတ်ဓာတ်ပိုင်းဆိုင်ရာ ပြန်လည်ဖွံ့ဖြိုးလာရန်နှင့် လူမှုပတ်ဝန်းကျင်တွင် ပြန်လည် ၀င်ဆံ့နိုင်ရန်လည်း မျှော်လင့်နေကြောင်း၊ပြန်ထွက်လာသည့် ကလေးငယ်များ၏ စိတ်ဓာတ်ပိုင်းဆိုင်ရာ ခံစားချက်သည် အလွန် ချို့ယွင်းနေသည်ကို တွေ့ရကြောင်း ဒေါ်လေးလေးက ဆက်ပြောသည်။

ILO အနေဖြင့် ပြန်လွတ်လာသည့် ကလေးစစ်သား အများစုရှိရာ ရန်ကုန်တိုင်း၊ ပဲခူးတိုင်းနှင့် ဧရာဝတီတိုင်းဒေသတို့တွင် လုပ်ငန်းများ ဦးစားပေး လုပ်ဆောင်သွားမည် ဖြစ်ပြီး နယ်မြေအကြောင်းကိုလည်း စုံစမ်းသွားမည် ဖြစ်ကြောင်း၊ လက်ရှိတွင် အစိုးရတပ်နှင့် သဘောတူညီချက်အရ လုပ်ဆောင်နေပြီး တခြား တိုင်းရင်းသား လက်နက်ကိုင် တပ်ဖွဲ့များက ကလေးစစ်သား စုဆောင်းမှု ရှိ မရှိ စောင့်ကြည့်ရန် အတွက် အစိအစဉ် မရှိသေးကြောင်း သိရသည်။

ဒဂုံမြို့သစ် တောင်ပိုင်းတွင် နေထိုင်သည့် ကလေးစစ်သားဟောင်းတဦး၏ မိခင်က “ကလေး စပြီး ထွက်လာတော့ ကြောင်တောင်တောင်လို ဖြစ်နေတယ်။ ထွက်လာနိုင်အောင်လည်း ILOကပဲ ကူညီတာပါ။ သူကတော့ အခု လောလောဆယ် ၀ပ်ရှော့လုပ်ဖို့ အားသန်နေပါတယ်” ဟု ဧရာဝတီသို့ ပြောသည်။

မြန်မာ အစိုးရနှင့် ကုလသမဂ္ဂတို့ သဘောတူထားကြသည့် လုပ်ငန်းဖော်ဆောင်ရေး အစီအစဉ်တွင် လက်နက်ကိုင် အဖွဲ့များမှ လွတ်မြောက်လာကြသည့် ကလေးစစ်သားများကို အစိုးရက ပြန်လည် ပြုစု ပျိုးထောင်မည့် လုပ်ငန်းစဉ် သဘောတူညီချက် ပါဝင်ကြောင်း၊ ယခင်က ထိုသဘောတူညီချက်မျိုး မရှိခဲ့ကြောင်း သိရသည်။

ကုလသမဂ္ဂ ကလေးများရန်ပုံငွေ အဖွဲ့ (UNICEF) အနေဖြင့် ၂၀၁၄ ခုနစ်တွင် မြန်မာတ၀န်းလုံး၌ ကလေးစစ်သား လုံးဝ ပပျောက်ရေး ကြိုးပမ်း ဆောင်ရွက်သွားမည် ဖြစ်ကြောင်း သိရှိရသည်။

မြန်မာ့ တပ်မတော်တွင် ကလေးစစ်သား မရှိကြောင်း နှစ်ပေါင်းများစွာ ငြင်းဆိုခဲ့ပြီး နောက်ပိုင်းတွင် ကလေးစစ်သား ပပျောက်ရေး ကြိုးပမ်းခြင်းများ ရှိခဲ့သော်လည်း ကျယ်ပြန့်စွာ မဆောင်ရွက်နိုင်သေးဘဲ ကလေးစစ်သားများ ရှိနေဆဲဖြစ်ကြောင်း ကုလသမဂ္ဂ၏ ထုတ်ပြန်ချက်များအရ သိရသည်။

ကလေးစစ်သားနှင့် အရွယ် မရောက်သေးသူများကို စစ်မှုထမ်းအဖြစ် အသုံးပြုနေသည်မှာ မြန်မာအစိုးရ စစ်တပ်တခုတည်းသာ မဟုတ်ဘဲ တိုးတက်သော ဗုဒ္ဓဘာသာ ကရင်အမျိုးသား တပ်မတော် (DKBA)၊ ကချင်လွတ်မြောက်ရေး တပ်မတော် (KIA)၊ ကရင်အမျိုးသား အစည်းအရုံး (KNU)၊ ကရင်နီအမျိုးသား တိုးတက်ရေးပါတီ (KNPP)၊ ရှမ်းပြည် တပ်မတော် တောင်ပိုင်းတပ် (SSA-S)၊ “ဝ” ပြည် သွေးစည်းညီညွတ်ရေး တပ်မတော် (UWSA) စသည်တို့လည်း ပါဝင်ကြောင်း ကုလသမဂ္ဂ၏ ၅ နှစ်စစ်တမ်းတွင် ဖော်ပြထားသည်။

အဆိုပါ တိုင်းရင်းသား လက်နက်ကိုင် အဖွဲ့များကိုလည်း ထိတွေ့ဆွေးနွေးကာ ကလေးစစ်သား ပပျောက်ရန် ကြိုးပမ်း သွားမည်ဖြစ်ကြောင်း UNICEF က ဆိုသည်။

အသက်မရွယ် မပြည့်သည့် ကလေးငယ်များကို လက်နက်ကိုင် အဖွဲ့များက အသုံးပြုခြင်းဖြင့် သက်ဆိုင်ရာ အဖွဲ့အစည်းသည် စစ်ရာဇ၀တ်မှု ကျူးလွန်ရာရောက်သည်ဟု နိုင်ငံတကာ ဥပဒေတွင် ပြဌာန်းထားကြောင်း၊ အသက် ၁၈ နှစ် မပြည့်သေးသူများကို လက်နက်ကိုင်အဖွဲ့များက အသုံးပြုခြင်းသည် အရွယ်မရောက်သေးသူအား စစ်မှုထမ်းစေခြင်းဟု သတ်မှတ်ထားကြောင်း သိရသည်။

တောင်ကုတ်လူသတ်မှု နေပြည်တော်အထူးဖွဲ့ ဆက်လက်တရားစွဲမည်

အေး​နိုင်

မနှစ်တုန်းက တောင်ကုတ်မြို့ လူသတ်မှုသံသယနဲ့ ဖမ်းဆီးထားသူ ၆ ဦးကို နေပြည်တော် အထူးအဖွဲ့က ဆက်လက် တရားစွဲဆိုသွားမယ်လို့ သံတွဲခရိုင်အုပ်ချုပ်ရေးမှူး ဦးထွန်းဝေက ပြောပါတယ်။

မနှစ်က တောင်ကုတ်မြိ်ု့မှာ ခရီးသည်တင်ကားပေါ်ကနေ မွတ်စလင် ဆယ်ဦးကို နေ့ခင်းကြောင်တောင် လူမြင်ကွင်းမှာ အုပ်စုဖွဲ့သတ်ဖြတ်ခဲ့တာပါ။ အခင်းဖြစ်ပြီး တနှစ်ကျော်အကြာမှာ နေပြည်တော်က အထူးအဖွဲ့ဆင်းလာပြီး တောင်ကုတ်မြို့ကနေ ၆ ဦးကို ဖမ်းပြီး သံတွဲထောင်မှာ ချုပ်ထားပါတယ်။

အထူးအဖွဲ့ကပဲ တရားစွဲဆိုရေးအပိုင်းကို ဆက်လက်ဆောင်ရွက်သွားမယ်လို့ သံတွဲခရိုင်အုပ်ချုပ်ရေးမှူး ဦးထွန်းဝေက ပြောပါတယ်။

“ကျနော်တို့ နေပြည်တော် အထူးအဖွဲ့ကနေပြီးတော့ ဖမ်းဆီးရေး လုပ်ငန်းတွေကို ဆောင်ရွက်တယ်၊ တရားစွဲဆိုရေး အပိုင်းကိုလည်း သူတို့ကနေပြီးတော့ ဆောင်ရွက်သွားမှာ ဖြစ်ပါတယ်။ ဖမ်းတဲ့ လူအရေအတွက်ကိုတော့ ၆ ယောက်လောက်ပဲ ကျနော်တို့ သိရတယ်။ ဘယ်လောက်ပါတယ်၊ ဘယ်လောက်ဟိုဟာ ဖြစ်တယ်ဆိုတာ ကျနော်တို့ မသိပါဘူး။ ခရိုင်ထဲမှာ ဖြစ်တာ မှန်တယ်။ ဒါပေမယ့် ဒီအထူးအဖွဲ့အနေနဲ့ တိုက်ရိုက်လာလုပ်တော့ ကျနော်တို့ အနေနဲ့ အဲဒီအပိုင်းကို အပေါ်ကနေ စီမံဆောင်ရွက်နေတဲ့ အပိုင်း ဖြစ်တဲ့အတွက်ကြောင့် မေးမြန်ခြင်းလည်း မရှိပါဘူး။”

သံတွဲမြို့နယ်ရဲစခန်းကို မေးမြန်းတဲ့အခါ သူတို့စခန်းနဲ့ မသက်ဆိုင်ကြောင်း တာဝန်ကျရဲက ဖြေပါတယ်။

မြန်မာနိုင်ငံရှေ့နေများ ကွန်ရက်က တရားလွှတ်တော်ရှေ့နေ ဦးကိုနီကတော့ မွန်ပြည်နယ်ခရီးသည်တင်ကား ဓားပြတိုက်သူတွေကို ဖမ်းဆီးရမိတဲ့ ရဲတပ်ဖွဲ့ဟာ လူပုံအလယ် နေ့ခင်းကြောင်တောင် သတ်ဖြတ်တဲ့ကိစ္စကို မဖော်ထုတ်နိုင်တဲ့အပေါ် မေးခွန်းထုတ်လိုက်ပါတယ်။

ရာဇ၀တ်မှု ကျူးလွန်သူတွေနဲ့ နောက်ကွယ်က ကြိုးကိုင်သူတွေကို ဖော်ထုတ်အရေးယူဆောင်ရွက်မှသာ ရာဇ၀တ်မှုတွေကို အာဏာပိုင်တွေက လုပ်ဆောင်ဖို့ လိုတယ်လို့ ထောက်ပြပါတယ်။

“အဲဒီတော့ ဒီဖြစ်ရပ်မှာ ပါဝင်ပတ်သက်သူတွေကို ဟိုထိပ်က အာဏာပိုင်တွေ သိနေပြီ။ ဒီလိုဆိုရင် ဒီကစ္စဟာ အရေးယူချင်ရင် ယူလို့ရတဲ့ အပိုင်းမှာ ရှိတယ်၊ နောက်ကွယ်မှာ ဘယ်သူပါလို့ ဘယ်လောက် ဒီပြဿနာတွေဟာ ကြီးကျယ်နေသလဲ ကျနော်တို့ အတော်ပြောဖို့ ခက်နေတယ်။ သမ္မတကြီးရဲ့ မိန့်ခွန်းမှာလည်း ပါနေတယ်။ ကြိုးကိုင်လှုပ်ရှားမှုတွေ ရှိနေတယ်လို့ ပြောတယ်။ ကြိုးကိုင်လှုပ်ရှားမှုတွေ ရှိတယ် သိရင် ဖော်ထုတ်ပြီးတော့ ဒါတွေကို ထိထိမိမိ အရေးယူလိုက်ဖို့ တိုင်းပြည်နဲ့ ကမ္ဘာကို သိအောင် ကြေညာပေးဖို့ ကိစ္စမှာကျတော့ အလွန်နှေးကွေးနေတယ် အဲဒါ ဘာကြောင့်လဲ ဆိုတဲ့ ကိစ္စဟာ တော်တော် စိတ်ဝင်စားဖို့ ကောင်းတယ်၊ မေးစရာ မေးခွန်းတွေ ဖြစ်နေတယ်။”

မနှစ်က တောင်ကုတ်မြို့ မွတ်စလင် ၁၀ ဦး သတ်ဖြတ်ခံရမှုမှာ ဦးဆောင်တယ်လို့ သံသယရှိသူ ၆ ဦးကို နေပြည်တော်က တိုက်ရိုက်ကွပ်ကဲမှုနဲ့ တောင်ကုတ်မြို့ကနေ ဇူလိုင် ၁၇ ရက်နေ့ညမှာ ဖမ်းဆီးခဲ့ပါတယ်။ ဒီသတ်ဖြတ်မှု ဖြစ်ပြီးတဲ့နောက် ရခိုင်ပြည်နယ်အတွင်း နေအိမ်မီးရှို့မှုတွေနဲ့ သတ်ဖြတ်မှုတွေ ဆက်တိုက်ဖြစ်ပွားခဲ့ပြီး လူပေါင်း ၁ သိန်း ၄ သောင်းကျော် ဒုက္ခသည်ဖြစ်နေကြပါတယ်။

အစိုးရနဲ့ တအောင်းပလောင် လက်နက်ကိုင်အဖွဲ့ တွေ့ဆံ

ABC

မြန်မာအစိုးရ ​ငြိမ်းချမ်းရေး ​ဖော်ဆောင်ရေး ​ကော်မတီ ​အဖွဲ့နဲ့ ​ပလောင်ပြည်နယ်လွတ်မြောက်ရေး ​တပ်ဦး ​(PSLF) ​တအောင်းပလောင်အမျိုးသားလွတ်မြောက်ရေး ​တပ်မတော်အဖွဲ့ ​(TNLA) ​တို့က ​ပထမဦးဆုံးအကြိမ်ငြိမ်းချမ်းရေးကိစ္စ ​ဆွေးနွေးဖို့အတွက် ​တရုတ်မြန်မာနယ်စပ်မှာ ​စတင်တွေ့ဆုံ ​ဆွေးနွေးမှု ​ပြုလုပ်နေတယ်လို့ ​သိရပါတယ်။

ဒီကနေ့စတင်ပြုလုပ်မဲ့ ​ငြိမ်းချမ်းရေးဆွေးနွေးပွဲမှာ ​ပလောင်ပြည်နယ်လွတ်မြောက်ရေး ​တပ်ဦး/ ​တအောင်း ​ပလောင်အမျိုးသား ​လွတ်မြောက်ရေး ​တပ်မတော်အဖွဲ့ဖက်က ​အထွေထွေအတွင်းရေးမှူး ​မိုင်ဘုန်းကျော် ​ဦးဆောင်ပြီး ​မြန်မာအစိုးရဖက်က ​ပြည်တောင်စု ​ငြိမ်းချမ်းရေး ​ဖော်ဆောင်ရေး ​ကော်မတီ ​ဒုဥက္ကဌ ​၀န်ကြီးဦးအောင်မင်းက ​ဦးဆောင်တာဖြစ်ပြီးတော့ ​ရှမ်းပြည်မြောက်ပိုင်း ​မူဆယ်မြို့မှာ ​တွေ့ဆုံကြတာဖြစ်ပါတယ်။

တွေ့ဆုံဆွေးနွေးပွဲနဲ့ ​ပတ်သက်ပြီး ​အထွေထွေ ​အတွင်းရေးမှူး ​မိုင်ဘုန်းကျော် ​က ​အခုလို ​ပြောပြပါတယ်။

“အပစ်အခတ်ရပ်စဲရေးအရင်ဆွေးနွေးရမယ် ​ပြီးတော့ ​နေရာသတ်မှတ်ရေးတွေလုပ်မယ် ​နှစ်ဖက် ​လက်နက်မပါပဲ ​သွားနိုင်တဲ့နေရာတွေ ​ဆွေးနွေးရမယ် ​ပြီးတော့ ​ဆက်ဆံရေးရုံးဖွင့်ရမယ် ​ဒါသူတို့ဖက် ​ပရိုပို့စ် ​လုပ်တာပေါ့။ ​ကျနော်တို့ဖက်ကလည်း ​နိုင်ငံရေးတွေ့ဆုံဆွေးနွေးဖို့ကိစ္စ ​ဆွေးနွေးရမယ်၊ ​နှစ်ဖက်စစ်ရှိန်လျှော့ဖို့ ​ဘယ်လိုလုပ်ရမလဲ ​စသဖြင့် ​ပြီးတော့ ​စစ်ဘေး ​ဒုက္ခသည်တွေကို ​စစ်ဘေးရောက်နေတဲ့ ​ရွာပုံးရွာရှောင်တွေ ​ဘယ်လိုလုပ်မလဲ ​စသဖြင့် ​ကျနော်တို့ဖက်ကတော့ ​ဒါတွေပြောထားပါတယ်။”


ဆွေးနွေးပွဲကို ​တိုင်းရင်းသား ​လက်နက်ကိုင် ​မဟာမိတ်တပ်ဖွဲ့တွေ ​ဖြစ်တဲ့ ​ကရင်အမျိုးသား ​အစည်းအရုံး ​KNUနဲ့ ​ကချင်ပြည်လွတ်မြောက်ရေးအဖွဲ့ ​KIO ​အပါအ၀င် ​တခြားအဖွဲ့တွေလည်း ​တက်ရောက်ဖို့ရှိတယ်လို့သိရပါတယ်။

တဆက်တည်းမှာပဲ ​မြန်မာအစိုးရငြိမ်းချမ်းရေးကိုယ်စားလှယ်အဖွဲ့ဟာ ​မြန်မာနိုင်ငံလုံးဆိုင်ရာ ​ကျောင်းသားများဒီမိုကရက်တစ်တပ်ဦး ​ABSDF ​အဖွဲ့တို့နဲ့ ​ပထမဦးဆုံးအကြိမ် ​ငြိမ်းချမ်းရေးကိစ္စဆွေးနွေးဖို့အတွက် ​သြဂုတ်လ ​၄ရက်နေ့ကျရင် ​ကရင်ပြည်နယ်ဖားအံမြို့မှာ ​တွေ့ဆုံဖို့ရှိတယ်လို့ ​သိရတဲ့အကြောင်း ​ရေဒီယိုသြစတြေးလျသတင်းထောက် ​သန်းကျော်စိုးက ​သတင်းပေးပို့ထားပါတယ်။

ခေါင်လန်းဖူးဒေသထွက် “ထဆူမခမ်း” ခေါ် ရှားပါးမှိုတမျိုး

KNG

ကချင်ပြည်နယ်မြောက်ဖျားပိုင်း တောင်ပေါ်ဒေသခေါင်လန်ဖူးမြို့နယ်၊ နောင်မွန်းမြို့နယ်များတွင် ပေါက်လျက်ရှိသော ရ၀မ်တိုင်းရင်းသား ဘာသာစကားဖြင့် ‘ထဆူမခမ်း’ ဟုခေါ်သော ရှားပါးဆေးမှိုတမျိုး တရုတ်ဖက်တွင် ရောင်းအား ကောင်းလျက်ရှိသည်။

အဆိုပါ ထဆူမခမ်း ရှားပါးမှိုကို ရေခဲတောင်၊ တောင်ထိပ်၊ သစ်ပင်ကြီးများ၊ သစ်ငုတ်များတွင် ရှာဖွေတွေ့ရှိခဲ့ခြင်းဖြစ်ပြီး မှိုအကြီးအသေး ၁ ပိဿာမှ ၁၀၀ ပိဿာထိ အလေးချိန်အလိုက် ဈေးနှုန်းရှိကြောင်း ခေါင်လန်ဖူးဒေသခံ ကို အားဖုန်က ပြောသည်။

“ဒီမှိုဟာ ဆေးတစ်မျိုးဖြစ်ကြောင်းတရုတ်တွေကပြောပြပါတယ်။ တရုတ်ပြည်မှာ အင်မတန်မှ တန်ဖိုးရှိကြောင်း သိရတယ်။ အစပိုင်းမှာအချိန် ၇ ပိဿာအထက်ရှိတဲ့ မှိုများကိုသာ ၀ယ်ကြတယ်။ အငယ်လေးတွေကိုတော့ချန်ထားတယ်။ အဲဒီမှိုမျိုးက လူတစ်ထမ်းစာမက အချိန် ပိဿာ ၁၀၀ မက ကြီးတဲ့မှိုမျိုးရှိတာကို တွေ့ရတယ်။ အထဲဖက်မှာ ဖြူဖွေးပြီး နုညံ့တယ်၊ ရေစိုထားသလိုမျိုး ဟုတ်တယ်။ မပျက်အောင်သတိထားပြီး ထမ်းရတယ်။ ရေခဲတောင်မှာပေါက်တဲ့ ထဆူပင်လို့ခေါ်တဲ့ သစ်ငုတ်မှာ ပေါက်တာကိုတွေ့မြင်ရပါတယ်။ အဲဒီထဆူပင်က လေတိုက်လို့ဖြစ်ဖြစ် အကြောင်း တခုခုကြောင့် သစ်ပင်ဟာ အပင်ရဲ့အလယ် ဒါမှမဟုတ် ပျက်စီးပြီး အပင်ကျိုးသွားတာမျိုးဆိုရင် သစ်ငုတ်သာ ကျန်ရစ်တယ်။ အဲဒီအခါ သစ်ငုတ်အခွံက ဆွေးလာတယ်။ အဲဒီအချိန်ကနေ မှိုကလေးတွေစပေါက်လာတယ်။”


တရုတ်ပြည်သို့ ရောင်းချရာတွင် များသောအားဖြင့် မှို အလေးချိန် ၁ ပိဿာမှ ၁၀ ပိဿာရှိသည့် အရွယ်အစားများက ပိုများပြီး ပိဿာ ၁၀၀ ရှိသောမှိုမျိုးဆိုလျင် တရုတ်ငွေ ယွန် ၅ သောင်း (သိန်း ၈၀) အနည်းဆုံးရသည်ဟု သိရသည်။

သို့သော် ယခုချိန်တွင် မှိုကြီးများရှာဖွေရန် ရှားပါးလာသောကြောင့် ခက်ခဲသည်ဟု ခေါင်လန်ဖူးဒေသခံ အဖုန် KNG ကချင်သတင်းဌာနသို့ ပြောသည်။

“အပင်ကြီးကြီးတွေ၊ အခွံအထူကြီးတွေမှာ ဆိုရင် တဖြည်းဖြည်းနဲ့ ပိုကြီးလာတယ်။ အပင်အကြီးကြီးမှာတော့ အခွံအရမ်း ထူတဲ့အတွက် တော်ရုံတန်ရုံနဲ့ ပျက်စီးမသွားပဲ နှစ် ဆယ်ချီထိန်းထားပြီး မှို က တဖြည်းဖြည်းကြီး လာတယ်။ အခွံထူတဲ့ အပင်မှာဆိုရင် ပို ကြီးပြင်း လာတယ်။ ဒီလိုနဲ့ နှစ်ပေါင်း ၂၀၊ ၃၀ ကြာလာတော့ ပိဿာ ရာနဲ့ ချီပြီးရှိလာတယ်။ အပင်ငယ်ရင် အခွံပါးပါးလေးဖြစ်တာကြောင့် ဘယ်လောက်မှ မကြာပါဘူး။ သိပ်လည်းမကြီးတဲ့အချိန်မှာ ပြုတ်ကျ သွားတယ်။ အမြင့်ကပဲ ယူရတယ် အများပိုင်းပေါ့။ အဲဒါကို ခက်ခက်ခဲခဲ အရမ်းကြမ်းတမ်းတဲ့ကျောက်ကမ်းပါးတွေကို ခက်ခက်ခဲခဲ သွားပြီးအမြင့်ကြီးကနေ တဖြည်းဖြည်းမြေပေါ်သို့ချ လိုက်ရတယ်။ ပြီးမှ အင်မတန်မှ ကြမ်းတမ်းတဲ့လမ်း၊ နေရာတွေကိုဖြတ်ကျော်ပြီး ရွာကို အရင်ထမ်းရတယ်။ အိမ်ကနေ တခါ ရှိန်းခေါင်ဆိုတဲ့တရုတ်ပြည်နယ်စပ်ကို ထမ်းရတယ်။ ဈေးဘယ်လောက်ပဲ နိမ်နိမ် ရောင်းလိုက်ရတယ်။”

ခေါင်လန်ဖူးဒေသည် ဝေးလံခေါင်ဖျားသော ဒေသဖြစ်သောကြောင့် ထိုမှိုများရောင်း၍ မိသားစုများ ဆန်၊ ဆီ၊ ဆား၊ ဆပ်ပြာ၊ လဘ္ဘက် စသည်များကို ပြန်လည်အစားထိုးဝယ် နိုင်ခြင်းဖြစ်သည်ဟု ဒေသခံများများမှ သိရသည်။

သို့သော် ယခုချိန် ခေါင်လန်ဖူးဒေသတွင် မိုးအ၀င်နောက်ကျ၍ စပါးစိုက်ချိန် မစိုက်လိုက်ရပဲ ဆန်များလည်း ပြတ်လပ်နေချိန်ဖြစ်သောကြောင့် အခက်ခဲရင်ဆိုင်ရပြီး စားဝတ်နေရေးအတွက် အဆိုပါမှိုများရောင်းရန်လည်း ခူးချိန်မဟုတ်သောကြောင့် ပို၍ ခက်ခဲလာသည်ဟု အထက်ပါဒေသခံက ဆက်ပြောသည်။

“တစ်ပတ်တွင်းရှာလို့မရဘူး။ အနည်းဆုံး (၂) ပတ်၊ (၃) ပတ်၊ တစ်လ တောင် ကြာသွားတတ်တယ်။ ဒါတောင်မှ အနည်းစုကသာ ရတာ။ ရှာတဲ့လူအကုန်ရတာ မဟုတ်ပါဘူး။ ယခုလက်ရှိအခြေအနေကလည်း အရင်နဲ့တော့ လုံးဝ မတူ တော့ဘူး။ အခုက နေရာအနှံ့မသွားတဲ့နေရာဆိုလို့ မရှိတော့ဘူး။ အကုန်လုံးက ရှာထားပြီးတဲ့ နေရာတွေ သာဖြစ် ပါတယ်။ ဘာဖြစ်လို့လဲဆိုရင် ဥပမာ အချိန်ပိဿာ ၃၀၊ ၄၀ ရှိပြီဆိုရင် တရုတ်ငွေက ယွန် ၁ သောင်းအထိ ဈေးရခဲ့တယ်။ ဗမာငွေနဲ့တွက်ကြည့်ရင် တရုတ်ငွေ ၈ ယွန် ကို ဗမာငွေ ၁၀၀၀ ကျပ်နဲ့တွက်ရင်တောင် အများကြီးဖြစ်သွားတာပေါ့။ ဒေသခံလူတွေက ရှားပါးမှိုရတော့လည်း မိမိရွာမှာ၊ နယ်စပ်မှာ ရောင်းဖြစ်တာနဲ့ တရုတ်ငွေ ယွန် ၁ သောင်း ရ ရမဲ့ဟာကို ၇၀၀ - ၆၀၀ ယွန်နဲ့ ကျေနပ်သွားတာတွေပဲများပါတယ်။ ဒါကြောင့်မြန်မြန်လေး ယူသွားရတယ်။ မိုးတွင်းမှာ ရေစိုနေလို့ မထမ်းနိုင်လောက်အောင် အလွန်လေး ပါတယ်။ ဒါကြောင့် အဓိက ဆောင်းတွင်းကို ရွေးရတာဖြစ်တယ်။ အခု အကြီးတွေ ရဖို့မလွယ်တော့ဘူး။ တခါတလေ၊ တစ်ယောက်ယောက် ကရတယ်။ အရမ်းရှာရတာ ခက်ခဲတယ်။ ရေခဲတောင်တွေမှာပဲ ပေါက်တဲ့အခါ လူတွေအားလုံးက သွားလို့မရဘူးလေ။ အသက်စွန့်ပြီးသွားရှာကြတာပဲ။ မိသားစုအရေးအတွက်ပေါ့။ အများပိုင်းဒေသခံလူတွေက မသိဘူး။ မရှာဘူး။ အနည်း စုသာ ရှာစားခြင်းဖြစ်ပါတယ်။”

ထိုမှိုများကို အရွယ်အစားကြီး၍ ဈေးကောင်းရရန် နှစ်ရှည်ထားရကြောင်းနှင့် ဈေးရရန် မှိုခူးယူပြီးနောက် ရောင်းပန်းလှစေရန် ပင်ပန်းစွာ ဂရုစိုက်၍ ထမ်းယူရသည်ဟု ပြောသည်။

“မှိုကို အစို ရောင်းတယ်။ ဘာမှလုပ်စရာမလိုဘူး။ သူ့အလှမပျက်အောင်ပဲ အမြဲတမ်း မရောင်းမချင်းတော့ သတိထား ရမယ်။ အများကြီးပြုစုဖို့မရှိပါဘူး။ နဂိုအလှမပျက်အောင် ကွယ်ကာပေးတာ လောက်ပါပဲ။ ဥပမာ နေပူတဲ့နေရာတွေမှာ၊ မိုးရွာတဲ့နေရာတွေမှာ ကြာကြာမထားရဘူး။ ခဏတဖြုတ်တော့ ရတယ်။ သူ့ရဲ့ အောက် ဗိုက်ဖက်မှာ နည်းနည်း ဂရုစိုက်ပေးရုံလေးပါပဲ။ ရောင်းရမယ့်နေရာ မြန်မြန်လေး ရောက်အောင်တော့ ကြိုးစားရတယ်။ သူကအပင်ကနေယူပြီး ကြာကြာထားလိုက်ပြီဆိုရင် အလွန်ဘဲ အလေးချိန်ကျသွားတတ်ပါတယ်။ ရမယ့် အတိုင်းအတာ အထိမရပါဘူး။”

တရုတ်ပြည်တွင်မူ အငယ်ဆုံးမှိုကို ၁ ပေါင် ကျပ် ၁ ထောင်ခန့် ဈေးရကြောင်းသိရသည်။ ထဆူမခမ်းခေါ် ရှားပါးမှိုကို ခေါင်လန်ဖူးမြို့နယ်တွင် ၂၀၀၅ ခုနှစ်ဝန်းကျင်ကစတင်၍ တရုတ်ပြည်မှလာသော နောမီ လီဆူးတိုင်းရင်းသားတွေက တဆင့်ဒေသခံရွာသားတွေကို လိုက်ရှာခိုင်းရာက သိရှိခဲ့ခြင်းဖြစ်ကြောင်း သိရသည်။

တရားရုံးက စီရင်လိုက်သည့်အမှုများကို ဝေဖန်နိုင်ပြီ

မင်းမင်း | ဗုဒ္ဓဟူးနေ့၊ ဇူလိုင်လ ၃၁ ရက် ၂၀၁၃

လွန်ခဲ့သော နှစ်ကိုးဆယ်နီးပါးက ပြဌာန်းထားသည့် ဥပဒေဟောင်းကို ဖျက်သိမ်းပြီး ဇူလိုင် ၂၉ ရက်တွင် အသစ်ပြဌာန်းလိုက်သည့် တရားရုံး မထီမဲ့မြင်ပြုမှုဥပဒေသစ်တွင် တရားသူကြီးက အမိန့်ချမှတ်ပြီးသည့် အမှုကိုဝေဖန်နိုင်ကြောင်း ထည့်သွင်းပြဌာန်းထားသည်။

တရားလွှတ်တော်ရှေ့နေ ဦးကိုနီက ယင်းပြဌာန်းချက်သည် “ စီရင်ချက် ချလိုက်လို့ အဲ့ဒီ စီရင်ချက်ကြီးက မမှန်ကန်ဘူး၊ မမျှတဘူး၊ တစ်ဖက်ဖက်ကို ဘက်လိုက်တဲ့အကြောင်း ရှိနေတယ်၊ ဘာညာ သုံးသပ်မယ်ဆိုရင် သုံးသပ်လို့ ရသွားပြီပေါ့ဗျာ။ အင်မတန် ကောင်းတဲ့အချက်ပါပဲ”ဟု မှတ်ချက်ပြုသည်။

အင်္ဂလိပ်တို့ မြန်မာနိုင်ငံကို ကိုလိုနီ ပြုလုပ်ထားသည့်အချိန် ၁၉၂၆ ခုနှစ်က ပြဌာန်းထားသည့် တရားရုံး မထီမဲ့မြင်ပြုမှုဥပဒေကို ပယ်ဖျက်ပြီး အသစ်ပြဌာန်းသည့် ယင်းဥပဒေ၏ ပုဒ်မ ၈ တွင် ထိုသို့ ပြဌာန်းထားခြင်းဖြစ်သည်။

စီရင်ချက်ချပြီးသည့် အမှုအပေါ် ဝေဖန်မှု၊ သုံးသပ်မှုများကိုလည်း ပုံနှိပ်ထုတ်ဝေခြင်း၊ ဖြန့်ချိခြင်းများလည်း လုပ်ဆောင်နိုင်ပြီး ထိုသို့ ပြုလုပ်မှုသည် တရားရုံးကို မထီမဲ့မြင် လုပ်မှုမမြောက်ကြောင်း ထိုပုဒ်မတွင်ထည့် သွင်းထားသေးသည်။

အမျိုးသား ဒီမိုကရေစီအဖွဲ့ချုပ်ပါတီ၏ အထက်လွတ်တော်အမတ် ဦးအောင်ကြည်ညွန့်က ထိုအချက်သည် တရားစီရင်ရေး၏ အလားအလာကောင်း ဖြစ်သည်ဟုလည်း သုံးသပ် ပြောဆိုသည်။

ထို့ပြင် တရားစီရင်နေဆဲ ကာလတွင်လည်း အမှုနှင့်ပတ်သက်၍ မှန်ကန်တိကျ ခိုင်လုံသော အကြောင်းအရာ တစ်ရပ်ရပ်ကို နှုတ်ဖြင့်ဖြစ်စေ၊ စာဖြင့်ဖြစ်စေ၊ ထုတ်ဖော်ကြေငြာခြင်း၊ သတင်းအဖြစ် ရေးသားခြင်း၊ ပုံနှိပ်ထုတ်ဝေခြင်းနှင့် ဖြန့်ချိခြင်းသည် တရားရုံးကို မထီမဲ့မြင်ပြုမှု မမြောက်စေရဟုလည်း အဆိုပါဥပဒေ၏ ပုဒ်မ ၇ တွင် ပြဌာန်းထားသည်။

တရားခွင်ကို အများပြည်သူ ၀င်ရောက်ခွင့်မရှိဘဲ သီးသန့် စစ်ဆေးသည့် အမှုများကိုပင်လျှင် ဥပဒေမချိုးဖောက်ဘဲရေးသားလျှင် လည်းကောင်း၊ တရားရုံးက အတိအလင်း ပိတ်ပင်မထားလျှင် လည်းကောင်း၊ တရားစီရင်ရေးတွင် အငြင်းပွားဆဲ လျှို့ဝှက်ကိစ္စ မဟုတ်လျှင်လည်းကောင်း ပုံနှိပ်ထုတ်ဝေ ဖြန့်ချိနိုင်သည်ဟုပင် ထိုဥပဒေက ကင်းလွတ်ခွင့်ပေးထားသည်ကိုလည်း လေ့လာတွေ့ရှိရသည်။


သို့သော် တရားရုံးကို မထီမဲ့မြင်လုပ်မှု မြောက်စေသော လုပ်ရပ်များကို ပြုလျှင်မူ အများဆုံး ငွေဒဏ် တစ်သိန်းနှင့်ထောင်တစ်နှစ် ချမှတ်နိုင်ပြီး၊ တရားမဆိုင်ရာ မထီမဲ့မြင်မှု ဖြစ်လျှင် ငွေဒဏ်တစ်သိန်းနှင့် ထောင်သုံးလ ချနိုင်ကြောင်းလည်း ဥပဒေတွင် ထည့်သွင်း ပြဌာန်းထားသည်။

ညီနောင် တိုင်းရင်းသား ပါတီများ ဖက်ဒရေးရှင်း၏ အထူး အစည်းအဝေး ကျင်းပရန်ရှိ

ဖြူဖြူကို

ညီနောင် တိုင်းရင်းသား ပါတီများ ဖက်ဒရေးရှင်း (NBF) ၏ အထူး အစည်းအဝေးကို လာမည့် သြဂုတ်လ (၃) ရက်နေ့တွင် ရန်ကုန် ရုံးတွင် ကျင်းပမည် ဖြစ်ကြောင်း၊ ယမာန်နေ့၌ ကျင်းပသော NBF အတွင်းရေးမှူး အဖွဲ့က အစည်းအဝေးက ဆုံးဖြတ် ခဲ့ခြင်းကြောင်း ပြောရေး ဆိုခွင့်ရှိသူ ချင်းအမျိုးသား ပါတီ အထွေထွေ အတွင်း ရေးမှူး ဆလိုင်း ကျဲဘွခ်ထောင် က ဆိုပါသည်။

“ဖက်ဒရယ် ယူနီယံ ပါတီ FUP ရဲ့ မူဝါဒနဲ့ပေါ်လစီ၊FUP မှာ ပါဝင် ရမည့် ကော်မတီ၊ဖွဲ့စည်းပုံ၊ FUP မှတ်ပုံတင် ကိစ္စမှာ ရွေးကောက်ပွဲ ကော်မရှင်မှာ ဘယ်လို တင်ရမလဲ ဆိုတာတွေ ဆွေးနွေး ကြပါတယ်။ ဒါပေမယ့် အဲဒါတွေ အားလုံးကို ပြီးစီးအောင် မလုပ်နိုင် သေးပါဘူး။ ဆက်ပြီး ဆောင်ရွက်ဖို့ ရှိသေးတယ်။ သြဂုတ် (၃) ရက်နေ့နဲ့ (၄) ရက်နေ့ အစည်း အဝေး အတွက် အကြမ်းဖျင်း အစီအစဉ်တွေ ရေးဆွဲ ကြပါတယ်” ဟု ဆိုပါသည်။

ယင်း အစည်းဝေး အတွက် ညီနောင် ပါတီ (၁၅) ပါတီမှ ကိုယ်စားလှယ် (၂) ဦးကျစီ တက်ရောက် ကြရန် ရှိပါသည်။ ထို့အပြင် ဖွဲ့စည်းပုံ အခြေခံ ဥပဒေနှင့် ပါတ်သတ်သည့် ပြည်တွင်း တိုင်းရင်းသား ပညာရှင်နှင့်နိုင်ငံခြား ပညာရှင် တဦး ကိုလည်း ဖိတ်ကြား ထားပြီး စုစုပေါင်း ကိုယ်စားလှယ် (၃၀) ခန့် တက်ရောက်မည် ဖြစ်သည်ဟု ဆိုပါသည်။

ဤအစည်း အဝေးတွင် ပညာရှင် များ၏ အကူ အညီဖြင့် စာတမ်း ဖြစ်လာရန် ရေးဆွဲ ကြမည် ဖြစ်ပါသည်။ ဤစာတမ်းသည် လာမည့်စက်တင်ဘာလ လဆန်း၌ကျင်းပသော NBF ညီလာခံတွင် အတည်ပြုမည် ဖြစ်ပါသည်။ ထို့အပြင် ဆုံးဖြတ် ချက်များ၊ စည်းကမ်း များနှင့် NBF ၏ လုပ်ထုံး လုပ်နည်း များကို ဤညီလာခံ၌အတည်ပြု သွားမည် ဖြစ်သည်။ တချိန် ထဲတွင် ညီနောင် ပါတီ၏၃နှစ်ပြည့်အခမ်း အနားပါ ကျင်းပရန် ရှိနေ ပါသည်။

ယခု ကျင်းပမည့် အထူး အစည်း အဝေးတွင်ဖွဲ့စည်းပုံအခြေခံ ဥပဒေ သုံးသပ်ရေး စာတမ်း ပြုစု ထားခြင်း အပေါ်တွင်အသေးစိတ်ပြန်လည် လေ့လာပြီးဖြည့်စွက်ရန် နှင့်တိုင်းရင်းသား လူမျိုးများအခွင့်အရေး ကာကွယ်သည့် ဥပဒေကို ရေးဆွဲရန်တို့ ဖြစ်ပါသည်။

“အရင်တုန်းက စာတမ်း ပြုစု ပြီးသားကို ဒီတစ်ကြိမ်မှာ အသေးစိတ် ဆွေးနွေး သုံးသပ်မယ်။ အရင် အစည်းအဝေး တွေမှာ ပါတီ၊ ပုဂ္ဂိုလ်၊ ပညာရှင် တဦးချင်း ဆီကတင်ပြ ထားတဲ့ အချက် တွေကို အတည်ပြုတဲ့ စာတမ်း ဖြစ်အောင် ဘယ်လို ဆောင်ရွက် သွားမလဲ ဆိုတာ ကိုလည်း ဆွေးနွေး ရဦး မှာပါ။ ကျနော်တို့ လိုချင်တဲ့ မူကတော့ ဖက်ဒရယ် ပြည်ထောင်စု နိုင်ငံတော် တည်ဆောက်ဖို့ နည်းလမ်း တစ်ခု ပါပဲ။ ဒါပေမယ့် ဖွဲ့စည်းပုံ အသစ် ကိုတော့ မရေးဘူး၊ ပြင်ဆင် ဖို့ဘဲ သုံးသပ် သွားမယ်” ဟုဆလိုင်း ကျဲဘွခ်ထောင် က ဆိုပါသည်။

NBF သည် UNFC နှင့် WGEC တို့က ချမှတ် ထားသည့် နိုင်ငံရေး မူဘောင် ကိုလည်း ယျေဘူယျ အားဖြင့် လက်ခံ ထားပါသည်။ ထို့အပြင် ဇူလိုင် (၂၉) ရက်နေ့၌ကျင်းပသော UNFC ၏ တိုင်းရင်း ညီလာခံ သို့လည်း ကိုယ်စားလှယ်များ တက်ရောက် စေခဲ့ ပါသည်။

NBF သည် အစိုးရ လွှတ်တော်မှ ဖွဲ့စည်းပုံ ပြုပြင် ပြောင်းလဲ မှုတွင် ပါဝင် အကြံပြု နိုင်ရန်နှင့် တိုင်းရင်းသား အခွင့်အရေး ကာကွယ်ရေး ဥပဒေများ ဖြစ်ပေါ်လာရန် တိုင်းရင်းသား ပါတီများ အပါအ၀င် ပြည်တွင်း ပြည်ပ ပညာရှင် များနှင့် တိုင်ပင်ပြီး စာတမ်း ပြုစုရန် ကြိုးစား နေခြင်း ဖြစ်ပါသည်။

ပြည်ထဲရေး ၀န်ကြီးဌာန ရေးဆွဲသည့် ဆိုက်ဘာ ရာဇ၀တ်မှု ဥပဒေကြမ်း လွှတ်တော် တင်မည်

သာလွန်ဇောင်းထက်

ပြည်ထဲရေး ၀န်ကြီးဌာနက ရေးဆွဲထားသည့် ဆိုက်ဘာ ရာဇ၀တ်မှု ဥပဒေကြမ်းကို လွှတ်တော်သို့ တင်သွင်းရန်ရှိပြီး ယင်း ဥပဒေကြမ်းကို ပြည်သူ့ လွှတ်တော် ပြည်သူ့ရေးရာ စီမံခန့်ခွဲမှု ကော်မတီက တာဝန်ယူ စိစစ်သွားမည်ဖြစ်ကြောင်း သတင်း ရရှိသည်။

ယခင် အစိုးရလက်ထက်က ဆက်သွယ်ရေး ဥပဒေတွင် ဆိုက်ဘာ ရာဇ၀တ်မှုများကို ခေါင်းစဉ်ခွဲ တခုအဖြစ် ထည့်သွင်း ထားရှိခဲ့မှ ဆိုက်ဘာ ရာဇ၀တ်မှု ဥပဒေကို ပြည်ထဲရေး ၀န်ကြီးဌာန၊ မြန်မာနိုင်ငံ ရဲတပ်ဖွဲ့က ရေးဆွဲပြီး လွှတ်တော်သို့ တင်သွင်းရန် ပြင်ဆင်နေပြီ ဖြစ်ကြောင်း သိရှိရသည်။

ပြည်သူ့ လွှတ်တော် ပြည်သူ့ရေးရာ စီမံခန့်ခွဲမှု ကော်မတီ၏ အတွင်းရေးမှူး ရွှေပြည်သာမြို့နယ် ပြည်သူ့ လွှတ်တော် ကိုယ်စားလှယ် ဦးတင်မောင်ဦးက ပြည်ထဲရေး ၀န်ကြီးဌာနက ရေးဆွဲလျက်ရှိသော ဆိုက်ဘာ ရာဇ၀တ်မှု ဥပဒေ နှင့် ပတ်သက်ပြီး ဆွေးနွေးမှုများ သြဂုတ်လ ၁ ရက်နေ့ တွင်ပြုလုပ်မည်ဟု ဧရာဝတီသို့ ပြောသည်။

“ကိုယ်တို့ ကော်မတီက Cyber Crime Law အပါအ၀င် ဥပဒေ ၅၇ ခု ဆောင်ရွက်ဖို့ရှိတယ်။ လ၀က (လူဝင်မှုကြီးကြပ်ရေး) ဥပဒေ ၉ ခုရှိတယ်။ ပြည်ထဲရေးက ဥပဒေ ၄၇ ခု ရှိတယ်။ သြဂုတ် ၁ ရက်နေ့မှာ ကျနော်တို့ ကော်မတီနဲ့ လ၀က၊ ပြည်ထဲရေးဝန်ကြီးဌာနဲ့ တွေ့ဖို့ရှိတယ်။ အဲဒီအခါကျရင် Cyber Crime Law အကြောင်း ကျနော် တို့ မေးမှာပဲ။ အခု အချိန်အထိတော့ ကျနော်တို့ ဆီမှာ ဒီဥပဒေနဲ့ ပတ်သက်လို့ ဘာမှ မသိရသေးဘူး။ ဒီဥပဒေကို ပြည်ထဲရေးဝန်ကြီးဌာန၊ ရဲတပ်ဖွဲ့က ဆွဲတယ်။ ဥပဒေ ရေးဆွဲပြီးပြီလို့လည်း သိထားတယ်။ ကျနော်တို့ဆီကို ဘာမှကို မရောက်သေးဘူး” ဟု ဦးတင်မောင်ဦးက ဆိုသည်။

မြန်မာနိုင်ငံ ရဲတပ်ဖွဲ့က ရေးဆွဲထားသည့် ဆိုက်ဘာ ရာဇ၀တ်မှု ဥပဒေသည် နိုင်ငံသားများ၏ အခွင့်အရေးကို ထိခိုက် ပိတ်ပင်စေသည့် ဥပဒေ မဖြစ်စေဘဲ ဒီမိုကရေစီ စနစ်နှင့် ကိုက်ညီသော ဥပဒေ တရပ်ဖြစ်စေရန် လွှတ်တော်က ကြိုးပမ်း သွားမည်ဖြစ်ကြောင်း၊ ယခင် စစ်အစိုးရ လက်ထက်က ဥပဒေများသည် ဖိနှိပ်မှုကို အဓိကထားခဲ့သော်လည်း ဒီမိုကရေစီ ခေတ်တွင်မူ ဒီမိုကရေစီစနစ် ထွန်းကားရေးကိုသာ ဦးတည်သော ဥပဒေများဖြစ်စေရန် ကြိုးပမ်းသွားမည်ဖြစ်ကြောင်း ဦးတင်မောင်ဦးက ရှင်းပြသည်။

“ကျနော် ကိုယ်တိုင်လည်း အငြိမ်းစား ဗိုလ်မှူးကြီးပါ။ အရင် အစိုးရ လက်ထက်တုန်းက အသင်းအဖွဲ့ ဥပဒေ ဆိုတာ အသင်း အဖွဲ့တွေ ဖွဲ့မှာစိုးလို့ ပိတ်ပင်ခဲ့တာ။ ဒါပေမယ့် အခု ကျနော်တို့က အသင်းအဖွဲ့တွေ များများပေါ်ဖို့ အားပေးတဲ့ ဥပဒေအဖြစ် ပြင်ထားတယ်။ အဲဒီလိုပဲ Cyber Crime Law ကလည်း ကျနော်တို့ဘက်က အာမခံနိုင်တာက ဒီဥပဒေက ဒီမိုကရေစီ စနစ်နဲ့ ကိုက်ညီဖို့ ကျနော်တို့ လုပ်မယ်။ ဒီဥပဒေကြမ်းကို တင်ပြလာတာနဲ့ သက်ဆိုင်တဲ့ ပညာရှင်တွေ၊ ပြည်သူတွေကို ချပြမှာပ” ဟု ဦးတင်မောင်ဦးက ဆိုသည်။

ပြည်ထဲရေးဝန်ကြီးဌာနမှ တာဝန်ရှိသူတဦးကမူ ဆိုက်ဘာ ရာဇ၀တ်မှုဥပဒေကို မြန်မာနိုင်ငံရဲတပ်ဖွဲ့၊ နိုင်ငံဖြတ်ကျော် မှုခင်းဌာနနှင့် ဥပဒေကျွမ်းကျင်သူများက ရေးဆွဲနေပြီး နိုင်ငံတော်သမ္မတထရုံး၊ ရှေ့နေချုပ်ရုံးတို့ထံ တင်ပြပြီးမှသာ လွှတ်တော်သို့ တင်သွင်းမည်ဖြစ်ကြောင်း၊ လတ်တလော ဥပဒေကြမ်းတွင် ပါဝင်မည့် ပြဋ္ဌာန်းချက်များကို ထုတ်ဖော် ပြောဆိုနိုင်ခြင်း မရှိသေးကြောင်း ဧရာဝတီသို့ ပြောဆိုသည်။

မြန်မာနိုင်ငံကွန်ပျူတာ အသင်းချုပ်မှ အိုင်တီပညာရှင် ဦးရဲမြတ်သူက မြန်မာနိုင်ငံတွင် အွန်လိုင်း ငွေပေးငွေယူနှင့် အွန်လိုင်းဘဏ်စနစ် ပေါ်ထွန်းရေး အပါအ၀င် အွန်လိုင်းအခြေခံ စီးပွားရေးစနစ် ဖြစ်ထွန်းရေး အတွက် ဆိုက်ဘာ ရာဇ၀တ်မှု ဥပဒေ တရပ်မဖြစ်မနေ လိုအပ်ကြောင်း၊ သို့ရာတွင် မြန်မာ့ ဆိုက်ဘာ ရာဇ၀တ်မှု ဥပဒေတွင် နိုင်ငံသားများ၏ အခွင့်အရေး ပိတ်ပင်သော အချက်အလက်များ ပါဝင်လျှင် ကန့်ကွက်သွားမည်ဟု ပြောသည်။

“Cyber Crime Lawက အွန်လိုင်းပေါ်မှာ အမှုတခုဖြစ်လို့ ဘယ်ဟာက ပြစ်မှု မမြောက်ဘူး၊ မြောက်တယ်ဆိုတာ ဆုံးဖြတ် တာတွေ ပါလိမ့်မယ်။ ဘဏ်က ပိုက်ဆံတွေကို ATM ငွေထုတ်စက်ကနေ လိမ်ထုတ် သွားတာတို့ပေါ့။ နိုင်ငံတကာရဲ့ Cyber Crime Lawက အဲဒါမျိုးတွေ အဓိကပါတယ်။ တကယ့် ဆိုက်ဘာ ရာဇ၀တ်မှုအစစ်က Online payment အွန်လိုင်း ပေါ်မှာ ငွေပေးငွေယူတွေ၊ Online Commerce တွေလာရင် တကယ်ကို လိုအပ်တယ်။ နိုင်ငံတကာမှာ ပြဋ္ဌာန်းထားတဲ့ Cyber Crime Law အတိုင်းဖြစ်ရင် ကောင်းတယ်။ ကျနော်တို့က ဖိနှိပ်ခံထားရတာ များတော့ ဥပဒေ ထွက်လာမယ်ဆိုရင် ကိုယ့်ကို နှိပ်ကွပ်မယ်ပဲ ထင်နေတာ။ အချို့ဟာတွေက ကိုယ့်ကိုယ် ကာကွယ်ပေးတဲ့ ဟာတွေလည်းရှိတယ်။ ကျနော်တို့ အဲဒီဥပဒေမရှိရင် အွန်လိုင်း ဘဏ်စနစ်၊ ငွေပေးငွေယူ ကိစ္စတွေ လုပ်မရဘူ” ဟု ဦးရဲမြတ်သူက ဆိုသည်။

မြန်မာနိုင်ငံ သတင်းသမဂ္ဂမှ ဦးဇော်သက်ထွေးက ဆိုက်ဘာ ရာဇ၀တ်မှု ဥပဒေကို ပြည်ထဲရေး ၀န်ကြီးဌာန၊ မြန်မာနိုင်ငံ ရဲတပ်ဖွဲ့က ဦးစီး ရေးဆွဲနေခြင်းကြောင့် ယခင် စစ်အစိုးရ လက်ထက်ကကဲ့သို့ သတင်းလွတ်လပ်ခွင့်နှင့် လွတ်လပ်စွာ ထုတ်ဖော်ရေးသားခွင့်ကို ပိတ်ပင်သော ပြဋ္ဌာန်းချက်များ ပါဝင်မည်ကို အလွန်စိုးရိမ်သည်ဟု ပြောသည်။

“ကျနော် အဖမ်းခံရတုန်းက နိုင်ငံခြားကို ဆက်သွယ်တဲ့ အီးမေးလ် တစောင်ကြောင့် အီလက်ထရောနစ် ဥပဒေနဲ့ ထောင်ဒဏ် ၁၅ နှစ် ချခံခဲ့ရတာ။ အဲလိုပဲ ၈၈ မျိုးဆက်ကျောင်းသားတွေက ထောင်ဒဏ် နှစ် ၆၀ တွေ အထိ ချမှတ် ခံခဲ့ရတယ်။ ဆိုက်ဘာ ရာဇ၀တ်မှုဆိုပြီး လွတ်လပ်စွာ ရေးသားခွင့်၊ သတင်းလွတ်လပ်ခွင့် နဲ့ နိုင်ငံသားအခွင့်အရေးကို ထိခိုက်မယ့် ပြဋ္ဌာန်းချက်တွေ ပါလာမှာ စိုးတယ်” ဟု ဦးဇော်သက်ထွေးက ဆိုသည်။

ဆိုက်ဘာ ရာဇ၀တ်မှု ဥပဒေကို စိစစ်ဆောင်ရွက်မည့် ပြည်သူ့လွှတ်တော်၊ ပြည်သူ့ရေးရာ စီမံခန့်ခွဲမှုကော်မတီကို ယခင် ပြည်ထဲရေးဝန်ကြီး ဗိုလ်ချုပ်ဟောင်း၊ တပ်ကုန်းမြို့နယ် ပြည်သူ့လွှတ်တော်ကိုယ်စားလှယ် ဦးမောင်ဦးက ဥက္ကဋ္ဌ အဖြစ် ဆောင်ရွက်လျက်ရှိသည်။

သောင်ရင်းမြစ်ရေလျှံ မှုကြောင့် မြ၀တီမြို့ဧရိယာ ထက်ဝက်ခန့်ရေမြုပ်နေ

စဖန်းရှောင်း (ကေအိုင်စီ)

ထိုင်း-မြန်မာနယ်စပ် ကရင်ပြည်နယ်အတွင်း ရှိ သောင်းရင်းမြစ်မှာ စိုးရိမ်ရေအမှတ် ထက် ကျော်လွန်သွားသဖြင့် မြ၀တီမြို့၏ ဧရိယာ ထက်ဝက်ခန့် ရေကြီးနေပြီး လူဦးရေငါးထောင်ကျော် ရေဘေးကြုံနေရသည်ဟု ရေဘေး ကြုံရသူများကို လိုက်လံကူညီပေးနေသည့် အဖွဲ့များက ပြောသည်။

မိုးအဆက်မပြတ် ရွာသွန်းမှုကြောင့် သောင်းရင်းမြစ်မှာ ဇူလိုင်လ ၂၈ ရက်နေ့မှစပြီး စိုးရိမ်ရေအမှတ် ၁၄မှ ၂၀ အထိ ကျော်လွန်သွားပြီး မြ၀တီမြို့ရှိ ရပ်ကွက်များဖြစ်သည့် ရပ်ကွက် (၁)၊(၂)၊(၃)၊(၅) တို့တွင် ရေကြီးမှု ဆိုးဆိုး ၀ါးဝါးဖြစ်ပေါ်နေကြောင်း ရေဘေးကြုံတွေ့နေရသူ မြို့ခံတစ်ဦးက ကေအိုင်စီသို့ ပြောဆိုသည်။

“အခုမြ၀တီမြို့မှာက ရပ်ကွက် ၄ ပဲ ကျန်တော့တယ်။ မြို့ရဲ့ထက်ဝက်လောက်ကို ရေမြုပ်ကုန်ပြီ။ နေရာအနိမ့် အမြင့်ပေါ်မှုတည်တယ်။ နိမ့်တဲ့ နေရာမှာဆိုရင် အိမ်ပါမြုပ်တယ်။ တစ်ချို့လည်း အိမ်ခေါင်းမိုးပဲကျန်တယ်”ဟု ၎င်းက ဆိုသည်။

ရေဘေးကြုံနေရသူများကို မြ၀တီမြို့အတွင်းရှိ ဘုန်းကြီး ကျောင်းများဖြစ်သည့် တောရကျောင်း၊ ကြခတ်တော၊ မွန်ကျောင်း၊ ကျောက်ပုံးကြီးဓမ္မာရုံစသည့် နေရာများတွင် ကယ်ဆယ်ရေး စခန်း ၁၃ ခုဖွင့်လှစ်ကာ ကယ်ဆယ် ပေးနေကြောင်း ကယ်ဆယ်ရေးလုပ်ရာတွင် ပါဝင်သည့် အစိုရဌာနဆိုင်ရာမှ ၀န်ထမ်းတစ်ဦးက ပြောသည်။

“အခုကျနော်တို့က အားလုံးနဲ့ပေါင်းပြီးတော့ အတတ်နိုင်ဆုံးလုပ်နေပါတယ်။ ရေဘေးသင့်သူတွေကို ကယ်ဆယ် ရေးစခန်းတွေဆီ ကားတွေနဲ့သယ်ပို့လုပ်နေတယ်။ ပြီးတော့ ရေအခြေအနေကြည့်ပြီးတော့ အချိန်မှီ ကူညီကယ် ဆယ်ရေးတွေ လုပ်နိုင်အောင်လည်း အသင့်ရှိပါတယ်”ဟု ၎င်းက ရှင်းပြသည်။

လက်ရှိ ရေဘေးကြုံနေရသူများကို အစိုးရဌာနဆိုင်ရာများ၊ လူမှုရေးအသင်းအဖွဲ့များ၊ ငြိမ်းချမ်းရေး ရယူထား သော ကရင်လက်နက်ကိုင်အဖွဲ့အစည်းများ စသည်တို့မှ ဆန်အိတ်များ၊ ရေသန့်ဗူးများနှင့် အခြားစားသောက် ဖွယ်ရာများကို လိုက်လံဝေငှကာ ကယ်ဆယ်ရေးလုပ်ငန်းများတွင် ပါဝင်ကူညီခဲ့ကြခြင်းဖြစ်ကြောင်း သိရသည်။

သို့သော် ရေဘေးကြုံတွေ့နေသူများသည် အစားအသောက်နှင့် ရေသန့်များအပြင် အခြားသောအကူ အညီများ လည်း လိုအပ်နေကြောင်း ကယ်ဆယ်လုပ်နေသည့်အဖွဲ့များက ပြောသည်။

တချိန်တည်းမှာပင် မြ၀တီမြို့၏ သောင်းရင်းမြစ်တဖက်ကမ်းရှိ မြန်မာနိုင်ငံသားအများဆုံးနေထိုင်ရာ ထိုင်းနိုင်ငံ ဘက်ခြမ်း သောင်ရင်းမြစ်ကမ်းနံဘေးရှိ အွေမူတ်ရွာအတွင်းသို့ ရေစီးဝင်မှုကြောင့် ဒေသခံနည်းဆုံး ၁,၅၀၀ ခန့် နီးစပ်ရာ ထိုင်းဘုန်းကြီးကျောင်းများတွင် ခိုလှုံနေကြရသည်ဟု ရေဘေးသင့်သူများကို ကူညီကယ်ရေးဆောင် ရွက်ပေးနေသည့် မြန်မာအလုပ်သမားများ ပူးတွဲလှုပ်ရှားရေးကော်မတီ(JACBA)ဥက္ကဌ ဦးမိုးကြိုးက ပြောသည်။

၎င်းအပြင် မဲဆောက်မြို့တွင် ရေကြီးမှုကြောင့် စက်ရုံအလုပ်ရုံများကို ပိတ်ထားရပြီး မြန်မာအလုပ်သမား နှစ်သောင်းမှ သုံးသောင်းအထိ အလုပ်မလုပ်နိုင်သလို အချို့သည် အလုပ်ရုံခေါင်မိုးအထိ တက်နေရမှုများရှိ သည်ဟု ဦးမိုးကြိုးက ဆက်ပြောသည်။

ထိုင်းနိုင်ငံ မဲဆောက်မြို့ရှိ ရေဘေးကြုံတွေ့နေရသည့် မြန်မာအလုပ်သမားများကို ထိုင်နိုင်ငံဆိုင်ရာ မြန်မာသံရုံး ရှိ အလုပ်သမာသံမှူး ဦးကျော်ကျော်လွင်ကလည်း ဇူလိုင်လ ၃၀ ရက်နေ့ ညနေတွင် ကိုယ်တိုင်ကွင်းဆင်းကြည့်ရှု ပြီး အလုပ်သမား ၂၁၀၀ စာအတွက် စားနပ်ရိက္ခာအကူအညီများ ပေးအပ်သွားမည်ဖြစ်ကြောင်း ပြောဆိုသွားခဲ့ သည်ဟု သိရသည်။

မြ၀တီမြို့နှင့် မဲဆောက်မြို့နံဘေးရှိ သောင်ရင်းမြစ်သည် မိုးရာသီအတွင်း၌ မြစ်ရေလျှံမှုကြောင့် သုံးနှစ်ဆက် တိုက် မြို့အတွင်းသို့ ရေးကြီးမှုဖြစ်ပေါ်ပြီး ယခုနှစ် ရေကြီးမှုမှာ အဆိုးရွားဆုံးဖြစ်ကြောင်း သိရသည်။

မြန်မာပြည်မှာ ထောက်လှမ်းရေးက အသက်ဝင်နေဆဲ

တော့ဒ်ပစ်မန်း


မြန်မာ အစိုးရသစ်က ပြည်သူများကို ပို၍လွတ်လပ်သော ဘ၀ကို ရစေမည်ဟု ကတိပြုခဲ့သည်မှာ ၂ နှစ်ကြာခဲ့ပြီ ဖြစ်သော်လည်း အရပ်ဝတ်နှင့် အစိုးရထောက်လှမ်းရေးအဖွဲ့တွေ ရောက်လာနေဆဲဖြစ်ပြီး ဘယ်ကိုသွားသလဲ၊ ဘယ်တော့ပြန်လာမှာလဲ စသည်ဖြင့် မေးမြန်းနေကြဆဲဖြစ်သည်။

နိုင်ငံရေးသမားများ၊ စာနယ်ဇင်းသမားများ၊ စာရေးဆရာများ သာမက သံတမန်များသည်ပင်လျှင် သူတို့ စောင့်ကြည့်ခံ နေရကြောင်း သိကြသည်။ ဆိုင်ကယ်နှင့် နောက်က လိုက်သည်။ အခါအားလျော်စွာ ဖုန်းတွေလည်း ခေါ်ကြသည်။ ထို့နည်းတူ မျက်မှန်းတမ်းမိသော မျက်နှာတွေကို လူသူရှုပ်ထွေးသည့် လမ်းပေါ်က ကော်ဖီဆိုင်များမှာလည်း တွေ့မြင်နေရသည်။

“အကျင့်ရလာတော့လည်း သိပ်ပြီး အနေမခက်တော့ပါဘူး၊ ဒါပေမယ့် စိတ်အနှောင့်အယှက် ဖြစ်စရာကောင်းတာတော့ အမှန်ပဲ။ သူတို့လုပ်နေတာက ကျနော်တို့က ရာဇ၀တ်သားတွေ ကျနေတာပဲ၊ ကျနော်တို့ ကိုရော ကျနော်တို့ရဲ့ မိသားစု တွေကိုပါ လိုက်နှောင့်ယှက်နေကြတယ်။ ဒါက မလေးမစားနဲ့ ခြိမ်းခြောက်တဲ့သဘောမျိုးပါပဲ။ ဒီလို အပြုအမူတွေ ဆက်ပြီး မလုပ်သင့်တော့ပါဘူး ” ဟု သူ့ဘ၀၏ အချိန်အများစုကို လူ့အခွင့်အရေး လှုပ်ရှားမှုတွင် မြှုပ်နှံထားခဲ့သော ကိုမြအေးက ပြောသည်။

မြန်မာနိုင်ငံကို နှစ်ပေါင်း ၅၀ ခန့် အုပ်ချုပ်ခဲ့ပြီး အင်အားကောင်းသည့် ထောက်လှမ်းရေးကွန်ယက်ကို ဖွဲ့စည်းထားနိုင်သော စစ်အာဏာသိမ်းအစိုးရ၏ ဖိနှိပ်မှုများကို အုံကြွတော်လှန်ခဲ့ပြီး နောက်ပိုင်းတွင် ဖြိုခွဲဖျက်ဆီးခံခဲ့ရသည့် ၁၉၈၈ ခုနှစ် အရေးအခင်းတွင် ကိုမြအေးက ကျောင်းသားခေါင်းဆောင်တယောက်အဖြစ် ပါဝင်ခဲ့သူဖြစ်သည်။

လွန်ခဲ့ပြီးသော နှစ်များတွင် ကိုမြအေး အပါအ၀င် အစိုးရကို ဆန့်ကျင်သူ ထောင်ပေါင်းများစွာ ဖမ်းဆီး အကျဉ်းချခံခဲ့ရပြီး ပြည်သူများအကြားတွင် တဦးကိုတဦး ယုံကြည်စိတ်ချစွာဖြင့် ဖွင့်ဟပြောဆိုရဲခြင်း မရှိလောက်အောင် အကြောက်တရားများ လွှမ်းမိုး ပြန့်နှံ့နေစေရန် ဖန်တီးထားခဲ့သည်။

အတိုက်အခံများက သပိတ်မှောက်ခဲ့သော ၂၀၁၁ ရွေးကောက်ပွဲအပြီး အာဏာရခဲ့သော စစ်ဗိုလ်ချုပ်ဟောင်း တယောက်လည်းဖြစ်သူ သမ္မတ ဦးသိန်းစိန်၏ အစိုးရလက်ထက်တွင် တင်းကြပ်မှုအခြေအနေ သိသိသာသာ လျော့ ကျသွားခဲ့သည်။ နိုင်ငံရေး အကျဉ်းသား အမြောက်အများကို လွှတ်ပေးခြင်း၊ သတင်းမီဒီယာများကို စိစစ်ဖြတ်တောက် မှုများ ရုပ်သိမ်းလိုက်ခြင်းနှင့် လွတ်လပ်စွာပြောဆိုခွင့် ကျယ်ပြန့်လာခြင်းများက အမှန်တကယ်ဖြစ်ပေါ်လာခဲ့သော်လည်း တဖက်တွင် အစိုးရအနေဖြင့် ပြည်သူများကို စုံစမ်းထောက်လှမ်းခြင်းကို မရပ်တန့်နိုင်ဘဲရှိနေခဲ့သည်။

“အရိုးစွဲနေတဲ့ အကျင့်က ပြင်ဖို့ခက်တယ်” ဟု အတိုက်အခံပါတီဖြစ်သော အမျိုးသားဒီမိုကရေစီ အဖွဲ့ချုပ်မှ လွှတ်တော် ကိုယ်စားလှယ် ဦးဝင်းထိန်က ပြောသည်။ သူသည်လည်း စစ်အစိုးရလက်ထက်က ထောင်ထဲတွင် နှစ်ပေါင်း ၂၀ နီးပါး နေ ခဲ့ရသူဖြစ်သည်။ အေပီသတင်းဌာန သို့ တယ်လီဖုန်း နှင့်ပြောကြားရာတွင် ရဲအဖွဲ့က ကြားဖြတ်အသံဖမ်းယူမည်ကို စိုးရိမ်သည်ဟု ဦးဝင်းထိန်က ပြောသည်။

အတိုက်အခံပါတီရုံးချုပ်၏ လမ်းတဖက်တွင်ရှိသော လဘက်ရည်ဆိုင်တွင် လုံခြုံရေးဌာန အသီးသီးမှ အရာရှိ ၅ ယောက်မှ ၈ ယောက်ခန့်ကို နေ့စဉ်တွေ့မြင်နိုင်သည်။ NLD ရုံး၏ လူဝင်လူထွက်ကို မှတ်တမ်းရေးသွင်းကြပြီး လိုအပ်လျှင် ဓာတ်ပုံတွေ လည်း ရိုက်ယူကြသည်။

တနိုင်ငံလုံး အတိုင်းအတာတွင် ထောက်လှမ်းရေး မည်မျှ လှုပ်ရှားနေသည်ကို မည်သူမှ မသိနိုင်ပေ။ သို့သော်လည်း ထောက်လှမ်းရေး သတင်းအချက်အလက်များကို စုဆောင်းသည့် အဓိက ဌာနကြီးနှစ်ခု ဖြစ်သည့် စစ်ဖက်ရေးရာလုံခြုံရေး တပ်ဖွဲ့နှင့် ပြည်ထဲရေးဝန်ကြီးဌာန လက်အောက်မှ သတင်းတပ်ဖွဲ့ တို့က လှုပ်ရှားနေကြသည်။

သူ့တွင် မီဒီယာများနှင့် စကားပြောခွင့်မရှိသဖြင့် နာမည်ကို ထုတ်ဖော်ရေးသားခြင်းမပြုရန် တောင်းဆိုခဲ့သော အလယ် အလတ်အဆင့် အရာရှိတဦးက အဆိုပါအခြေအနေနှင့် ပတ်သက်၍ အခုရက်များအတွင်းတွင် လူတဦးတယောက်ကို လိုက်လံစုံစမ်းခြင်း ပြုလုပ်ရန် အထက်မှ ညွှန်ကြားထားခြင်း မရှိပါဟု ဆိုသည်။ ငယ်ရွယ်ပြီး အတွေ့ အကြုံနည်းသည့် ထောက်လှမ်းရေးများကိုသာ ၎င်းတို့ တာဝန်ယူရသည့် နယ်မြေ အတွင်း မျက်နှာစိမ်းများနှင့် ထူးခြားသော ဖြစ်စဉ်များ ရှိလျှင် အထက်လူကြီးများကို အကြောင်းကြားရန် ပြောထားသည်ဟု သိရသည်။

ထို့ပြင် အတွေ့အကြုံ နည်းပါးသည့် အလျောက် သူတို့တွေ အလုပ်လုပ်ကြသည့်အခါ ပရိယာယ်သုံးရန် မေ့လျော့ခြင်းနှင့် အားထုတ်မှု နည်းပါးခြင်းတို့ကြောင့် ရုပ်ပြ ဇာတ်လမ်း ဆန်ဆန် လုပ်မိတတ်ကြသည်ဟုလည်း ဆိုသည်။

ယခုနှစ် အစောပိုင်းက မိတ္ထီလာမြို့တွင်ဖြစ်ပွားခဲ့သော လူမျိုးရေး ဘာသာရေး ပဋိပက္ခများနှင့် ထိခိုက်ပျက်စီးမှုများကို လေ့လာသတင်းယူရန် အေပီ သတင်းဌာနမှ သတင်းထောက်များ ရောက်ရှိသွားသည့်အခါက စောင့်ကြည့်နေသူများကို နေရာတိုင်းတွင် တွေ့မြင်ခဲ့ရသည်။ မော်တော်ဆိုင်ကယ်သမား နှစ်ယောက်က အနီးကပ် နောက်ယောင်ခံ လိုက်ခဲ့ဖူးသည်။

မန္တလေးတွင်လည်း ဟိုတယ်ရှေ့တွင် လာစောင့်နေသည့်အတွက် သတင်းထောက်အဖွဲ့သည် ၎င်းတို့၏ မျက်စိအောက်မှ လွတ်အောင် နည်းလမ်းရှာဖွေခဲ့ရသည်။ နောက်ဆုံးတွင် လူသူရှုပ်ထွေးသော ဘုရားကျောင်းတခုအတွင်းသို့ ၀င်သွားပြီး နောက်ဖက်မှ လှည့်ပြီး ရှောင်ထွက်နိုင်တော့မှ အကြမ်းဖက်တိုက်ခိုက်မှုများမှ လွတ်မြောက်လာသူများနှင့် တွေ့ဆုံမေးမြန်း ခဲ့ရသည်။ သူတို့က အာဏာပိုင်များက ဟန့်တားနှောက်ယှက်မည်ကို စိုးရွံ့ထိတ်လန့် နေကြသည့်အတွက် လက်ခံစကားပြောဆိုခြင်း မပြုချင်ကြပါ။

သမ္မတ၏ ပြောရေးဆိုခွင့် ရှိသူ ဦးရဲထွဋ်ကမူ စောင့်ကြည့်ထောက်လှမ်းသော နေ့ရက်များကျော်လွန်ခဲ့ပါပြီဟု ဆိုသည်။ “သတင်းတပ်ဖွဲ့ဟာ စာနယ်ဇင်းသမားတွေကို စောင့်ကြည့်လေ့လာခြင်းတွေ မလုပ်တော့ပါဘူး” ဟု သူက ပြောသည်။ အထက်ဖော်ပြပါ နောက်ယောင်ခံလိုက်နေခြင်းများအပေါ် မှတ်ချက်ပြောကြားပေးရန် မေတ္တာရပ်ခံသည့်အခါ သူက “ထင်မြင်ယူဆချက် အမှားတွေကို အခြေခံပြီး ဖြစ်သွားတာပါ” ဟုသာပြော၏။

လူ့အခွင့်အရေး စောင့်ကြည့်မှုအဖွဲ့က စစ်အစိုးရလက်ထက်တွင် ထောင်သားများနှင့် ဖမ်းဆီးထိန်းသိမ်းခံရသူများကို ထောက်လှမ်းရေးအဖွဲ့အစည်းများက အိပ်ရေးမ၀ အောင်လုပ်ခြင်း၊ ထိုးနှက်ကန်ကျောက်ခြင်း စသည့် နည်းများဖြင့် ညှဉ်းပန်းနှိပ်စက်ခဲ့ရာတွင် အချို့မှာ အသိဥာဏ် ချို့ယွင်းပျောက်ဆုံးသည် အထိ ခံစားခဲ့ရသည်ဟု ဆိုသည်။ ဖျက်ဆီးဖြိုခွဲ ခံခဲ့ရသော ၂၀၀၇ ခုနှစ် သံဃာတို့၏ ရွှေဝါရောင်တော်လှန်ရေးကာလတွင်လည်း သတင်းတပ်ဖွဲ့ အရာရှိများက ဆန္ဒပြပွဲ များကို ဗွီဒီယို မှတ်တမ်းများ ဓာတ်ပုံများ ရိုက်ယူပြီးနောက် ပါဝင်သောရုပ်ပုံများကို အထောက်အထားပြု၍ လူ ထောင်ပေါင်းများစွာကို ဖမ်းဆီး ထိန်းသိမ်းခဲ့သည်။

ယခုအချိန်အထိ ဖမ်းဆီးထိန်းသိမ်းမှုနှင့် တခါတရံ ညှဉ်းပန်းနှိပ်စက်မှု စသည့် သတင်းပေးပို့ချက်များ ရရှိနေဆဲဖြစ်သည် ဟု အမေရိကန် အခြေစိုက် လူ့အခွင့်အရေးစောင့်ကြည့်မှု အဖွဲ့မှ မြန်မာနိုင်ငံရေးရာ ကျွမ်းကျင်သူ ဒေးဗစ်မက်သီဆင်က ပြော သည်။ သို့သော်လည်း လူ့ အခွင့်အရေးလှုပ်ရှားသူများနှင့် မီဒီယာများက ယင်းကဲ့သို့ ဖြစ်ရပ်များ ဖြစ်ပေါ်သည်နှင့် ၎င်းတို့ ထံ သတင်းပို့ကြသည့်အတွက် ထိခိုက်နစ်နာမှု အရေအတွက် သိသိသာသာ ကျဆင်းသွားသည် ဟုလည်း သူက ဆိုသည်။

ဒေးဗစ်မက်သီဆင်က အစိုးရထောက်လှမ်းရေးများက ပစ်မှတ်များကို ဆက်လက်၍ နောက်ယောင်ခံလိုက်နေခြင်းမှာ ၎င်း တို့၏ အကျင့်ဟောင်းနှင့် ၎င်းတို့ကို ပြန်လည် ရန်မူမည်ကို စိုးရိမ်ကြောက်လန့်မှုကြောင့် ဖြစ်သည်ဟု ပြောသည်။ “လျှို့ဝှက် ရဲအဖွဲ့တွေဟာ အသွင်ကူးပြောင်းရေးမှာ နောက်ဆုံးဖက်တွယ်ကျန်ခဲ့သူတွေ ဖြစ်တတ်ကြတယ်။ အထူးသဖြင့် အတိတ် တုန်းက သူတို့ရဲ့သားကောင်တွေဖြစ်ခဲတဲ့ နိုင်ငံရေးအကျဉ်းသားတွေ၊ တက်ကြွလှုပ်ရှားသူတွေက အသွင်ကူးပြောင်းရေးရဲ့ အဓိက အစိတ်အပိုင်းဖြစ်လာတဲ့ အခါမျိုးမှာပါ” ဟု သူက ဆိုသည်။

“ခုချိန်မှာ သူတို့အတွက် အခက်အခဲက တိကျတဲ့ လုပ်ငန်းရည်ရွယ်ချက်မရှိတဲ့အပြင် မြန်မာတွေ၊ နိုင်ငံခြားသားတွေနဲ့ ရှုပ်ထွေးနေတဲ့ နိုင်ငံရေး အစီအစဉ်တွေ အစရှိသဖြင့် စောင့်ကြည့်ရမယ့် အရာတွေ ပိုများလာတာပဲ။ ၂၀၁၁ မတိုင်မီတုန်းက တော့ ရဲအဖွဲ့၊ တရားရုံးတွေနဲ့ စစ်တပ်ဟာ တရားဥပဒေစိုးမိုးရေး ဆိုတာကို သူတို့ရဲ့ပြိုင်ဖက်တွေကို နှိပ်ကွပ်ဖို့၊ စာနယ်ဇင်း သမားတွေကို ခြိမ်းခြောက်ဖို့နဲ့ သူတို့ကို ဝေဖန်သူတွေကို ထောင်ထဲထည့်ဖို့ အသုံးချခဲ့ကြတယ်။ ခုတော့ ဒီလိုလုပ်ဖို့ သူတို့ မှာ ခွင့်ပြုချက် မရတော့ဘူး။ ဒါကြောင့် သူတို့ ဂရုစိုက် စောင့်ကြည့်ဖို့ပဲ လုပ်စရာရှိတော့တယ်” ဟု ဒေးဗစ်မက်သီဆင်က ပြောသည်။

မြေယာအခွင့်အရေးလှုပ်ရှားသူ ဦးဝင်းချိုက ပြဿနာကို ကိုယ်ပိုင်နည်းဖြင့် ဖြေရှင်းသည်ဟု ဆိုသည်။ သူက သူ့ သတင်းကို ကိုယ်တိုင်ပေးသည်။

“ကျနော် ဘာလုပ်မယ် ဆိုတာ သူတို့ကို ပြောလိုက်ရုံပဲ” ဟု သူကပြောသည်။ ချမ်းသာပြီး သြဇာရှိသည့် စီးပွားရေး သမားများ၏ လယ်မြေသိမ်းယူခြင်းခံနေရသည့် လယ်သမားများဖက်မှ ကူညီဆောင်ရွက်ပေးရန် ရန်ကုန်မြို့တော်ပြင်ပသို့ ဦးဝင်းချို မကြာခဏ ခရီးသွားရသည်။

“ကျနော်တို့ ဆန္ဒပြပွဲ လုပ်တော့မယ် ဆိုရင် သတင်းတပ်ဖွဲ့ကို ဖုန်းဆက်ပြီးတော့ ဘယ်အချိန်၊ ဘယ်နေရာမှာ ဘာအတွက် လုပ်မယ်ဆိုတာ ပြောပြလိုက်တယ်။ ဒီတော့ သူတို့ ကျနော့်နောက်ကို ဒုက္ခခံပြီး မလိုက်ရတော့ဘူးပေါ့။ သူတို့ အားလုံးသိ ပြီးသွားပြီလေ” ဟု ဦးဝင်းချိုက ဆိုသည်။

ဒေသဆိုင်ရာ ရဲအဖွဲ့တွေကလည်း ကိုယ်ပိုင် ထောက်လှမ်းရေးတွေ ထားကြသည်။ အေပီ သတင်းထောက်တွေကို နောက် ယောင်ခံလိုက်ခဲ့သူ တယောက်က လွန်ခဲ့သော လများအတွင်းက လွှတ်တော်ကိုယ်စားလှယ် ဦးဝင်းထိန်၏ နောက်သို့ လိုက်ခဲ့ရကြောင်း ၀န်ခံခဲ့သည်။ မည်သည့်အတွက်ကြောင့် ထိုသို့ ပြုလုပ်ရသည် ဆိုခြင်းကိုပြောပြရန်တော့ သူက ငြင်း သည်။ အတိုက်အခံ လွှတ်တော်ကိုယ်စားလှယ် ဦးဝင်းထိန်သည် မိတ္ထီလာတွင် ဖြစ်ပွားခဲ့သော လူမျိုးရေး ဘာသာရေး အဓိကရုဏ်းများတွင် ရဲအဖွဲ့နှင့် ဒေသအာဏာပိုင်များ၏ အကာအကွယ်ပေးရန် ပျက်ကွက်မှုကို ဝေဖန် ပြောကြားခဲ့သူ လည်း ဖြစ်သည်။

ထို့နည်းတူပင် မြန်မာနိုင်ငံ အနောက်ဖက်ခြမ်းရှိ စစ်တွေမြို့မှ မူဆလင်ရပ်ကွက်များသို့ အေပီက သွားရောက် လေ့လာခဲ့စဉ်ကလည်း ဒါဇင်ဝက်ခန့် ရှိမည့် လက်နက်ကိုင်ရဲတပ်ဖွဲ့ဝင်များက နောက်မှ ထပ်ကြပ်လိုက်ခဲ့သည်။ သူတို့ကြားသမျှကိုလည်း မှတ်စု စာအုပ်များနှင့် ရေးမှတ်ကြသည်။ အဓိကရုဏ်းကြောင့် အိမ်ယာမဲ့ဖြစ်ခဲ့သူများ၏ ဒုက္ခသည် စခန်းသို့ သွားရောက်တွေ့ဆုံ မေးမြန်းနေစဉ်တွင်လည်း ရဲအရာရှိများ ရောက်ရှိလာကြပြီး တခါတရံတွင် “ဂျာနယ်လစ်တွေက ဘယ်သူနှင့် စကားပြော သွားသလဲ၊ ဘာတွေမေးသွားသလဲ” အစရှိသဖြင့် လိုက်လံမေးမြန်းတတ်ကြသည်။

ယခုနှစ် အစောပိုင်းကလည်း အေပီသတင်းအဖွဲ့တခု ကုလသမဂ္ဂ မူးယစ်ဆေးဝါး တိုက်ဖျက်ရေး အဖွဲ့နှင့်အတူ ရှမ်းပြည်နယ် အရှေ့ပိုင်းမှ တောင်တန်းများပေါ်သို့ ခရီးသွားစဉ် မူးယစ်အထူးတပ်ဖွဲ့မှ အစောင့် ၃ ယောက်က ခရီးစဉ် တလျှောက်လုံး လိုက်ပါခဲ့သည်။

သူတို့က တိုင်းရင်းသား လက်နက်ကိုင် တပ်ဖွဲ့များ နှစ်ပေါင်းများစွာ ကြီးစိုးခဲ့သည့် နယ်မြေတွင် သတင်းထောက်များ၏ လုံခြုံရေးအတွက် လိုက်ပါခဲ့ရခြင်း ဖြစ်သည်ဟု ဆိုကြသည်။ သို့သော်လည်း သတင်းထောက်များက ကျေးရွာသူ ကျေးရွာသားများနှင့် တွေ့ဆုံမေးမြန်းနေစဉ်တွင် ၎င်းတို့က ဗွီဒီယို ရိုက်ပြီး မှတ်တမ်းတင်ကြသည်။ ညစဉ် ညတိုင်း ထိုရဲအဖွဲ့ဝင်များက စာမျက်နှာ အတော်များသည့် လက်ရေးနှင့်ရေးထားသော အစီရင်ခံစာများကို နေပြည်တော်ရှိ ဌာနချုပ်သို့ ဖက်စ်ဖြင့် ပို့ကြသည်။

အဘယ်ကြောင့် ဤကဲ့သို့ ပြုလုပ်ရသနည်းဟု သူတို့၏ အကြီးအကဲဖြစ်သူ ရဲမှူး ဇော်မင်းဦး ကိုမေးကြည့်သောအခါ “ ကျနော်တို့က ခင်ဗျားတို့ ဘာတွေလုပ်တယ်၊ ဘယ်သူနဲ့ စကားပြောတယ်၊ ဘာတွေ စားတယ် ဆိုတာတွေကို မှတ်တမ်း လုပ်ထားချင်ပါတယ်၊ ခင်ဗျားတို့က ကျနော်တို့ရဲ့ ဧည့်သည်တွေလေ” ဟု ဖြေဆိုသည်။

(အေပီသတင်းထောက် Todd Pitmann ၏ In Myanmar, internal spy network lives on ကို နိုင်မင်းသွင် ဘာသာပြန်သည်)

စစ်တွေတွင် ဒုက္ခသည် လုံခြုံရေးစခန်းများ ဆောက်လုပ်ရန် ကျပ်သိန်းငါးရာ အကုန်ကျခံမည်

ကေဇင်ဦး | ဗုဒ္ဓဟူးနေ့၊ ဇူလိုင်လ ၃၁ ရက် ၂၀၁၃

စစ်တွေမြို့နယ်ရှိ ဘင်္ဂါလီ ဒုက္ခသည်စခန်းများ၏ အနီးကပ်လုံခြုံရေးအတွက် စခန်းများ ဆောက်လုပ်ရန် ရခိုင်ပြည်နယ်အစိုးရက ငွေကျပ်သိန်းငါးရာ အကုန်အကျခံမည်ဟု ထိုအစိုးရအဖွဲ့၏ သတင်းပြန်ကြားရေး ကော်မတီဥက္ကဋ္ဌ ဦးလှသိန်းက ဇူလိုင် ၃၀ ရက်တွင် မဇ္ဈိမကို ပြောသည်။

“ဒါဟာ ဘင်္ဂါလီဒုက္ခသည်တွေကိုပဲ လုံခြုံရေးချပေးတဲ့သဘော မဟုတ်ပါဘူး။ ဘင်္ဂါလီ ဒုက္ခသည်တွေကို ဒီလို လုံခြုံရေးတွေနဲ့ ထားခြင်းအားဖြင့် ပြဿနာတွေ၊ တစ်ဖက်နဲ့တစ်ဖက် ပဋိပက္ခဖြစ်မယ့် ကိစ္စတွေကို ကာကွယ်ပြီးသားဖြစ်တာပေါ့”ဟု ရခိုင်ပြည်နယ် ဥပဒေချုပ်ဖြစ်သည့် ဦးလှသိန်းက ဆက်ပြောသည်။

ဘင်္ဂါလီ ဒုက္ခသည်စခန်းများတွင် ထိုကဲ့သို့ လုံခြုံရေးစခန်းများအပြင် အုပ်ချုပ်မှုလုပ်ငန်းများ အဆင်ပြေစေရန် စီမံခန့်ခွဲရေးရုံးများ၊ စခန်းလုံခြုံရေးရုံးများ တာဝန်ယူ တည်ဆောက်သွားမည်ဟုလည်း ရခိုင်ပြည်နယ် အစိုးရအဖွဲ့က သတင်းထုတ်ပြန်ထားသည်။

လုံခြုံရေးစခန်းများ တည်ဆောက်ရာတွင် စစ်တွေမှ ဒုက္ခသည်စခန်းများ၏ လုံခြုံရေးကို အဓိကထားပြီး ထိုနေရာများတွင် အခိုင်အမာ တည်ဆောက်ရန် လျာထားသည်ဟု ပြည်နယ်အစိုးရအဖွဲ့၏ ပြန်ကြားရေး အတွင်းရေးမှူး ဦးဝင်းမြိုင်က ဆိုသည်။


ရခိုင်ပြည်နယ်တွင် ဒုက္ခသည်တစ်သိန်းကျော်ရှိသည့်အနက် ဘင်္ဂါလီဒုက္ခသည်ဦးရေမှာ ရှစ်သောင်းကျော် ရှိသည်။

ထို့ပြင် ပဋိပက္ခများတွင် နေအိမ် မဆုံးရှုံးသော်လည်း အလုပ်အကိုင်အခွင့်အလမ်း ဆုံးရှုံးခဲ့သည့် ပြည်နယ် အစိုးရက တာဝန်ယူထားသည့် ဘင်္ဂါလီဒုက္ခသည်ဦးရေ ခုနစ်သောင်းရှိသည်ဟုလည်း ဦးလှသိန်းက ပြောသည်။

ယင်းဒုက္ခသည် အားလုံးအတွက် နိုင်ငံတကာအဖွဲ့အစည်းများ၏ အလှူငွေနှင့် ပြည်ထောင်စုအစိုးရက ချထားပေးသည့် ဘတ်ဂျက် စုစုပေါင်း ကျပ်သိန်းပေါင်း ငါးသောင်းရှိပြီး ယင်းငွေအများစုကို ဒုက္ခသည်စခန်းများ ဆောက်လုပ်ရာတွင် အသုံးပြုထားရသည်ဟု ဦးလှသိန်းက ဆိုသည်။

အဓိပ္ပါယ် မဲ့လာနေသည့် KIO Technical Team အဖွဲ့

အဲာပိုန်

လက်ရှိ ကချင် လွတ်လပ်ရေး တပ်မတော် KIA နှင့် အစိုးရတို့ တိုက်ပွဲ ဖြစ်နေဆဲ အခြေအနေ များကြောင့် KIO လုပ်ငန်း အထောက် အကူပြု အဖွဲ့ ဖွဲ့ခြင်းသည် အဓိပ္ပါယ် မဲ့နေကြောင်း KIO အဖွဲ့ တွေ့ဆုံ ဆွေးနွေးရေး အဖွဲ့ ခေါင်းဆောင် ဆရာ ဆွမ်လွတ်ဂမ်က ပြောသည်။

“Technical Team ရုံးဖွင့်တဲ့ နေ့မှာ ပဲကို တိုက်ပွဲ ဖြစ်လို့ ဦးအောင်မင်းကို ဒီကိစ္စ ဖြေရှင်း ပေးဖို့ တင်ပြ ထားပါတယ်။ ဒီလို ဆက်မဖြစ်အောင် သမ္မတကို တင်ပြ ပေးဖို့ပါ။ အဲဒီလို တိုက်ပွဲတွေ ဆက်ဖြစ် နေမှတော့ Technical Team က အဓိပ္ပါယ် မဲ့လာ သလို ဖြစ်နေတယ်” ဟု ဆရာ ဆွမ်လွတ်ဂမ် က ဆိုပါသည်။

စစ်ရှိန် လျော့ချ နိုင်ရန် နှစ်ဖက် သဘောတူညီချက် အရ လုပ်ငန်းအထောက်အကူပြု အဖွဲ့ ပေါ်လာခြင်း ဖြစ်ပါသည်။ သို့သော်လည်း တိုက်ပွဲများ နေ့စဉ် နှင့်အမျှ ဖြစ်လာ ရာမှ တဖြည်းဖြည်း များလာသည့် အတွက် ဆရာ ဆွမ်လွတ်ဂမ်က ယခု ကဲ့သို့ ထုတ်ဖော် ပြောကြား လိုက်ခြင်း ဖြစ်သည်။

ဤတိုက်ပွဲ ပြသနာကို ဖြေရှင်းရန် KIO သည် ဇူလိုင်လ(၂၃) ရက်နေ့က ကချင်ပြည်နယ် မြစ်ကြီးနား မြို့တွင် လုပ်ငန်း အထောက် အကူပြု အလုပ်အဖွဲ့ ရုံးကို စတင် ဖွင့်လှစ် ခဲ့ပါသည်။ သို့သော်လည်း ထိုနေ့၌ပင် ရှမ်းပြည် မြောက်ပိုင်းရှိ ကချင် KIA တပ်မဟာ (၄) တပ်ရင်း(၈) နယ်မြေတွင် တိုက်ပွဲ ဖြစ်ပွား ခဲ့သည်။

လုပ်ငန်း အထောက်အကူပြု အဖွဲ့ ဖွဲ့စည်းရေး သဘော တူညီချက်သည် ပြီးခဲ့သည့် မေလ ကုန်တွင် မြစ်ကြီးနား တွေ့ဆုံ ပွဲ၏ သဘော တူညီချက် (၇) ချက်အနက် (၆) ချက်မြောက် သဘော တူညီချက် ဖြစ်ပါသည်။

လက်ရှိ KIO ဆက်ဆံရေး ရုံးဟောင်း၌ ဖွင့်ထားသည့် လုပ်ငန်းအထောက်အကူပြု အဖွဲ့တွင် KIO အမြဲတမ်း ကိုယ်စားလှယ် (၁၂) ဦး ရှိပါသည်။ ဤအဖွဲ့မှ KIO လျာထားသည့် ပြည်သူလူထု၊ ပြည်တွင်း ပညာရှင်များနှင့် နိုင်ငံတကာ ပညာရှင်များ ကိုယ်စားလှယ် (၁၅) ဦး ပါဝင်သည့် လုပ်ငန်း အထောက် အကူပြု အဖွဲ့ကို ဖွဲ့စည်း နိုင်ရန် ကြိုးပမ်း နေပါသည်။

“အကောင်ဆုံး ဖြစ်အောင်ကျွန်တော်တို့ KIO ဘက်က (Technical Team) အဖွဲ့ ဖွဲ့နိုင်ဖို့ အချိန်ယူ ကြိုးစား ခဲ့တာဘဲ။အခု အောင်မြင်မှု ရရှိ ခါနီးပြီ ဖြစ်တယ်။ သြဂုတ် လဆန်း ပိုင်းလောက်မှာ ကိုယ်စားလှယ် အားလုံး ပါဝင်နိုင်တဲ့ နည်းပညာ အထောက် အကူပြု အဖွဲ့ကို ဖွဲ့စည်း နိုင်ဖို့ မှန်းထားတယ်” ဟု ဆရာ ဆွမ်လွတ်ဂမ် က ဆိုပါသည်။

KIO ဘက်က အားလုံး ပါဝင်သည့် (Technical Team) အဖွဲ့ ဖွဲ့စည်း နိုင်ရေးမှာ သတ်မှတ်ထားသော အရည်အချင်းများ အပြည့် အဝ ရရှိရေး အတွက် ဆောင်ရွက် နေရ၍ အချိန် ကြန့်ကြာ နေသည်ဟု ၄င်းမှ ရှင်းပြသည်။

ထိုသို့ ဖွဲ့စည်း နိုင်ရေး အတွက် နည်းပညာ အထောက်အကူပြု ရုံးဖွင့်ပြီး နောက်ပိုင်း ကချင် ပြည်သူများနှင့်၂ ကြိမ်ခန့် တွေ့ဆုံ ဆွေးနွေးပွဲ ကျင်းပ ခဲ့ပြီး ဖြစ်သော်လည်း ယနေ့တိုင် ဖွဲ့စည်း နိုင်သေးခြင်း မရှိသေးပေ။

KIO သည် အစိုးရ၏ ငြိမ်းချမ်းရေး အဖွဲ့နှင့် ကချင်ပြည်နယ် အတွင်း ဖြစ်ပွား နေသော တိုက်ပွဲများ လျှော့ချရေး အတွက် တရားဝင် (၉) ကြိမ်နှင့် အလွတ်သဘော (၅) ကြိမ်ခန့် တွေ့ဆုံ ဆွေးနွေး ခဲ့ပြီး ဖြစ်ပါသည်။ သို့သော်လည်း တိုက်ပွဲ များသည် ယနေ့ အထိ ရှိနေ ဆဲပင် ဖြစ်ပါသည်။

KIO/KIA သည် ၁၉၉၄ ခုနှစ် အစိုးရနှင့် အပစ်အခတ် ရပ်စဲရေး ရယူ ခဲ့သည်။ ပြီးခဲ့သည့် ၂၀၁၁ ခုနှစ် ဇွန်လ ၉ ရက်နေ့တွင် နှစ်ဖက် တိုက်ပွဲများ ပြန်လည် ဖြစ်ပွား ခဲ့ကြသည်။

လပြည့်ဝန်းပလာဇာတွင် မီးလောင်မှုဖြစ်ပွား

ချိုကို၊ နန်းမြင့် | ဗုဒ္ဓဟူးနေ့၊ ဇူလိုင်လ ၃၁ ရက် ၂၀၁၃

ဆေးလိပ်တိုပစ်ချရာက စတင်လောင်ကျွမ်းခြင်းဟု ဆို

ဇူလိုင် ၃၀ ရက် နေ့လည် ၁၂ နာရီခန့်က ရန်ကုန်မြို့၊ အလံပြဘုရားလမ်းရှိ လပြည့်ဝန်း ပလာဇာ ခြောက်လွှာတွင် မီးလောင်မှုဖြစ်ပွားခဲ့ပြီး အဆိုပါမီးလောင်မှုသည် တစ်စုံတစ်ဦးက ဆေးလိပ်တိုပစ်ချရာက စတင် လောင်ကျွမ်းခြင်းဖြစ်နိုင်သည်ဟု ရန်ကုန်တိုင်း မီးသတ်ဦးစီးဌာနမှ သတင်းထုတ်ပြန်သည်။

ယင်းမီးလောင်ကျွမ်းမှုကြောင့် ဆုံးရှုံးမှုတန်ဖိုးမှာ ကျပ်လေးသောင်းခန့် ဖြစ်သည်ဟုလည်း မီးသတ်ဦးစီးဌာနမှ သိရသည်။

မီးလောင်မှုဖြစ်ပေါ်သည့် အခန်းသည် ပေခြောက်ဆယ် ပတ်လည်ခန့်မျှရှိပြီး လောင်ကျွမ်းမှုတွင် ရှစ်ပေခန့် ပါဝင်သွားခဲ့သည်။

လောင်ကျွမ်းသည့်ပစ္စည်းများမှာ ပိုက်အချို့နှင့် အိမ်သုတ်ဆေးကဲ့သို့သော ဆေးဗူးများသာဖြစ်ပြီး ပစ္စည်းအနည်းငယ်သာ ထားရှိသည့် အခန်းဖြစ်ကြောင်း မီးငြိမ်းသတ်ခဲ့သည့် မီးသတ်သမားတစ်ဦးက ပြောသည်။

ရန်ကုန်တိုင်း၊ ကျောက်တံတားမြို့နယ် အရန်မီးသတ်တပ်ဖွဲ့မှ ဒုတပ်ရင်းမှူး ဇော်ထွန်းက “မီးလောင်တဲ့ အထဲမှာ ပိုက်အိတ်လိုမျိုးတွေပဲ ရှိတယ်။ လူနေတဲ့ပုံစံမျိုးတော့မဟုတ်ဘဲ ဟောခန်းလိုပုံမျိုး ဖြစ်နေတယ်။ နောက် တစ်ဂါလံပတ်လည် အိမ်သုတ်ဆေးဗူးလို ဗူးခွံတွေပဲရှိတယ်”ဟု ပြောသည်။

လပြည့်ဝန်းပလာဇာ၏ အရှေ့ဘက်အခြမ်းတွင် ဈေးဆိုင်များသာရှိပြီး မီးလောင်မှု ဖြစ်ပွားခဲ့သည့် နေရာသည် ပလာဇာ အဆောက်အဦ၏ အနောက်ဘက်အခြမ်းတွင် ဖြစ်ပြီး ယင်းနေရာသည် ရုံးခန်းများသာရှိသည်ဟု လပြည့်ဝန်းပလာဇာရှိ လုံခြုံရေးဝန်ထမ်းတစ်ဦးက ပြောသည်။

၎င်းက “လူတွေက မီးလောင်တယ်ဆိုပြီး ပြေးဆင်းလာလို့ မီးလောင်တာသိလိုက်တယ်။ နောက် မီးသတ်ကို တွေ့တဲ့လူတွေက အကြောင်းကြားလိုက်တယ်။ ဒီအောက်ဘက်ကို လူတွေက ပြေးဆင်းလာပြီး တချို့လူတွေကလည်း မီးသတ်ဆေးဗူးယူပြီး အပေါ်ပြေးတက်သွားတယ်။ နောက် ချက်ချင်း လျှပ်စစ်မီးတွေကို မိန်းချပစ်လိုက်တယ်” ဟုပြောသည်။

အဆိုပါ မီးလောင်မှုသည် နေ့လည် ၁၂ နာရီ ၇ မိနစ်ခန့်က ဖြစ်ပွားခဲ့ပြီး ၁၂ နာရီ ၃၁ မိနစ်ခန့်တွင် မီးငြိမ်းသွားခဲ့သည်။

မီးလောင်ရာနေရာသို့ မီးသတ်ဌာနပေါင်းစုံမှ မီးသတ်ယာဉ် ၁၁ စီး လာရောက် မီးငြိမ်းသတ်ပြီး လူနာတင်ယာဉ် နှစ်စီးအပါအ၀င် အထောက်အကူပြုယာဉ်ငါးစီး၊ အုပ်ချုပ်မှုယာဉ်ငါးစီး၊ စုစုပေါင်းယာဉ် ၂၁ စီး လာရောက်ခဲ့သည်။

မီးလောင်မှုအတွက် ပ-၁၇၃/၂၀၁၃ ပုဒ်မ ၂၈၅ ဖြင့် အရေးယူ ဆောင်ရွက်သွားမည်ဟု ရန်ကုန်တိုင်း မီးသတ်ဦးစီးဌာနမှ သိရသည်။

ကျောက်ဖြူတွင် တစ်နေ့ သဘာဝ ဓါတ်ငွေ့ ကုဗပေ သန်း ၂၀ သုံးစွဲမည်ဟု ဆို

နိရဉ္စရာ

ရခိုင်ကမ်းလွန်ပြင်မှ ထွက်သော သဘာဝ ဓါတ်ငွေ့ကို တစ်နေ့ ဓါတ်ငွေ့ ကုဗပေ သန်း ၅၀၀ ပို့လွှတ်မည် ဖြစ်ရာ ထိုအထဲမှ ကုဗပေ သန်း ၂၀ ကို ကျောက်ဖြူတွင် သုံးစွဲမည် ဖြစ်ကြောင်း ယမန်နေ့ထုတ် ကြေးမုံသတင်းစာက ဖေါ်ပြသည်။

တစ်နေ့ကို စုစုပေါင်း ဓါတ်ငွေ့ကုဗပေ သန်း ၅၀၀ ပို့လွှတ်မည် ဖြစ်ကြောင်း၊ ထိုအထဲမှ ကုဗပေ သန်း ၄၀၀ ကို တရုတ်ပြည်သို့ နေ့စဉ် ပို့လွှတ်မည် ဖြစ်ကြောင်း၊ ပြည်တွင်း အတွက် ကုဗပေ သန်း ၁၀၀ အသုံးပြုရန် စီမံချက် ချထားကြောင်း၊ အဆိုပါ ပြည်တွင်းတွင် အသုံးပြုရန် ကုဗပေ သန်း ၁၀၀ ထဲမှ မြန်မာပြည် အလယ်ပိုင်း တောင်သာတွင် ကုဗပေ ၅၇ သန်း သုံစွဲမည် ဖြစ်ပြီး ရေနံချောင်းတွင် ကုဗပေ ၂၃ သန်း အသုံးပြုမည်ဟု ဆိုသည်။

သဘာဝဓါတ်ငွေ့ အဓိက ထွက်ရှိရာ ရခိုင်ပြည်နယ် ကျောက်ဖြူတွင် ကုဗပေ သန်း ၂၀ အသုံးပြုရန် စီမံချက်ချထားသည်ဟု ကြေးမုံ သတင်းစာက ဖေါ်ပြသည်။

ယခုအခါ ရခိုင်မှ နေပြီး တရုတ်နိုင်ငံသို့ အရှည် ၇၉၃ ကီလိုမီတာနှင့် အချင်းလက်မ ၄၀ ရှိသော ပိုက်လုံးမှ တဆင့် ဓါတ်ငွေ့ စတင် ပို့လွှတ်နေပြီး တစ်နေ့လျှင် သဘာဝဓါတ်ငွေ့ ကုဗပေသန်း ၁၀၀ နှုန်းဖြင့် လိုင်းဖြည့်လျက်ရှိသည်ဟု ဆိုသည်။

ပိုက်လိုင်းတစ်ခုလုံး သဘာဝ ဓါတ်ငွေ့ဖြည့်ပြီးပါက သဘာဝဓါတ်ငွေ့ တစ်နေ့ကို ကုဗပေ သန်း ၅၀၀ ပို့လွှတ်မည်ဖြစ်ပြီး ထိုအထဲမှ ကုဗပေ သန်း ၄၀၀ ကို တရုတ်သို့၎င်း၊ သန်း ၁၀၀ ကို ပြည်တွင်း အတွက်၎င်း ပို့လွှတ်မည်ဟု သတင်းစာတွင် ရေးသားသည်။

ဇူလိူင်လ ၂၉ ရက်နေ့က သဘာဝ ဓါတ်ငွေ့ကို စတင်ပိုိ့လွှတ်သည့် အခမ်းးအနားကို မန္တလေးမြို့ အမရပူရမြိ်ု့နယ်ရှိ Control Station ခန်းမ၌ ကျင်းပရာ နိုင်ငံတော် ဒုတိယသမ္မတ ဦးညဏ်ထွန်းနှင့် အဖွဲ့ တက်ရောက်ခဲ့သည်။

၎င်းပြင် တရုတ်ပြည်သူ့သမ္မတနိုင်ငံ အမျိုးသားစွမ်းအင်ဗျုရိုမှ ဒုတိယ၀န်ကြီး Mr.Zhang Yunqing၊ ကိုးရီးယား နိုင်ငံကုန်သွယ်ရေး၊ စက်မှုနှင့် စွမ်းအင်ဝန်ကြီးဌာန ဒုတိယ၀န်ကြီး Mr.Jin Hyun Han၊ Darwoo ကုမ္ပဏီ၊ ONGC ကုမ္ပဏီ၊ GAIL ကုမ္ပဏီ၊ POSCO ကုမ္ပဏီ၊ SEAGP ကုမ္ပဏီတို့မှ ဥက္ကဋ္ဌများ၊ အမှုဆောင် အရာရှိ ချုပ်များလည်း တက်ရောက်ခဲ့ကြသည်။

အဆိုပါ အခမ်းအနားအား ရခိုင်ပြည်နယ် ကျောက်ဖြူမြို့တွင်လည်း ကျင်းပရန် စီစဉ်ထားရာ ရာသီဥတုဆိုးဝါးမူကြောင့် ဒု သမ္မတ ဦးဥာဏ်ထွန်း မလာရောက်နိုင်သဖြင့် အခမ်းအနား အစီအစဉ်ကို ဖျက်သိမ်းခဲ့ရသည်။

ဒု သမ္မတ ရောက်ရှိလာခြင်း မရှိသဖြင့် ဒေသအတွင်းမှ ကျေးရွာပေါင်း ၂၃ ရွာမှ ဒေသခံ ပြည်သူများမှ ရွှေသဘာဝဓါတ်ငွေ့ဖြင့် ရခိုင်ပြည်နယ်တွင် လျှပ်စစ်မီး ရရှိရေးအတွက် တောင်းဆို ဆန္ဒပြရန် စီစဉ်ထားသည့် အစီအစဉ်ကိုလည်း ရပ်ဆိုင်းခဲ့ရသည်ဟု သိရသည်။

မြန်မာ အစိုးရသည် ရွှေသဘောဓါတ်ငွေ့ကို တရုတ်ပြည်သို့ တင်ပို့ရောင်းချခြင်းဖြင့် အမေရိကန် ဒေါ်လာ ၂၄ ဘီလီယံ ရရှိမည် ဖြစ်ပြီး နှစ်ပေါင်း ၂၀ တင်ပို့မည်ဖြစ်သည်။

နိုင်ငံတ၀န်း ရေလွှမ်းမှု အန္တရာယ် ကြုံနိုင်သည့် ဒေသများ တိုးလာရန်ရှိ

ကျော်ခ


ဘင်္ဂလား ပင်လယ်အော်တွင် မုတ်သုံလေ အားကောင်းနေသဖြင့် မြန်မာနိုင်ငံ အတွင်း ရေလွှမ်းမိုးမှု အန္တရာယ်နှင့် ကြုံတွေ့ နိုင်သည့် ဒေသများ တိုးလာမည်ဖြစ်ကြောင်း မိုးလေဝသနှင့် ဇလဗေဒ ပညာရှင်များက ယနေ့ ပြောဆိုလိုက်သည်။

ရခိုင်ပြည်နယ်၊ ဧရာဝတီတိုင်း၊ မွန်ပြည်နယ်၊ ကရင်ပြည်နယ်၊ တနင်္သာရီတိုင်း၊ ကယား ပြည်နယ်၊ ရှမ်းပြည်နယ်နှင့် ကချင် ပြည် နယ် က နေရာတချို့တွင် ယခုလ ၂၃ ရက်နေ့မှစပြီး မိုးရွာသွန်းခဲ့ရာ ရခိုင်ပြည်နယ်၊ မွန်ပြည်နယ်နှင့် ကရင်ပြည်နယ် တို့တွင် ရေလွှမ်းမှုဖြင့် ကြုံခဲ့ရသည်။ မိုးရွာသွန်းနိုင်သည့် ဖြစ်စဉ်ကြောင့် ကျန်ပြည်နယ်နှင့်တိုင်း ဒေသတချို့တွင်ပါ ရေလွှမ်းမှု အန္တရာယ်နှင့် ဆက် လက် ကြုံနိုင်ကြောင်း မိုးလေဝသ ပညာရှင် ဒေါက်တာ ဦးထွန်းလွင် ထုတ်ပြန်ထားသည်။

ဒေါက်တာ ထွန်းလွင် က “လောလောဆယ် ရေကြီးနိုင်တဲ့ ဒေသက ရခိုင်ပြည်နယ် မြောက်ပိုင်း၊ ချင်းပြည်နယ် တောင်ပိုင်း၊ မကွေးတိုင်း အနောက်ပိုင်း၊ ဧရာဝတီတိုင်း တောင်ပိုင်း၊ ပဲခူးတောင်ပိုင်း၊ ရန်ကုန်တောင်ပိုင်း၊ မွန်ပြည်နယ်၊ ကရင် ပြည်နယ် တောင်ပိုင်းနဲ့ တနင်္သာရီမြောက်ပိုင်း အဲဒီဒေသတွေက ရေကြီးမှုအန္တရာယ် အများဆုံးနေရာပဲ၊ အဓိက ကတော့ မုတ်သုံ ကောင်းလို့ပါ၊ မိုးကတော့ သြဂုတ်လဆန်း ၄ ရက်နေ့ လောက် အထိ ကောင်းနိုင်ပါသေးတယ်”ဟု ဧရာဝတီသို့ ပြောသည်။

ဒေါက်တာ ထွန်းလွင်သည် မိုးလေ၀သနှင့် ဇလဗေဒညွှန်ကြားမှုဦးစီးဌာန၏ ယခင် ညွှန်ကြားရေးမှူးချုပ် ဖြစ်ခဲ့ပြီး မိုးလေဝသ အခြေ အနေ များကို စောင့်ကြည့်လေ့လာ၍ ၎င်း၏ အင်တာနက် ဝက်ဘ်ဆိုက်နှင့် လူမှုကွန်ရက် Facebook တို့မှတဆင့် ထုတ်ပြန်ပေး လျက် ရှိသည်။

ယခုလအတွင်း ဘင်္ဂလားပင်လယ်အော်၌ လေဖိအားနည်း ရပ်ဝန်း ၄ ကြိမ်ဖြစ်ပွားခဲ့ရာ ထိုမှတဆင့် မုတ်သုံလေ အားကောင်းမှုဖြစ် လာပြီး မြန်မာနိုင်ငံတွင်းရှိ ပြည်နယ်နှင့်တိုင်း တချို့တွင် မိုးရွာသွန်းမှုများ ဖြစ်ပေါ်ခဲ့ခြင်းဖြစ်ကြောင်း မိုးလေဝသနှင့် ဇလဗေဒ ဦးစီးဌာန ဒုတိယ ညွှန်ကြားရေးမှူး ဦးချစ်ကျော် ကလည်း ပြောသည်။

ယခုအခါ ဘင်္ဂလား ပင်လယ်အော် အနောက်မြောက်ပိုင်း၌ ၅ ကြိမ်မြောက် လေဖိအားနည်း ရပ်ဝန်းတခု ဖြစ်ပေါ်လာနိုင်သော အခြေအနေတခုအား ယနေ့ မွန်းလွဲပိုင်းတွင် တွေ့မြင်နေရကြောင်း အဆိုပါ လေဖိအားနည်း ရပ်ဝန်း အားကောင်းလာပါက မြန်မာနိုင်ငံ တွင်း မိုးပိုမို ရွာသွန်းနိုင်ပြီး ရေလွှမ်းမှု ပိုလာနိုင်ကြောင်း ဦးချစ်ကျော်က ဆက်ပြောသည်။

သူက “ဒီလေဖိအားနည်းရပ်ဝန်းလေး ဖြစ်မယ့် တိမ်တိုက်ဟာ မဖြစ်ဘဲနဲ့ ပင်လယ်ထဲမှာပဲ မိုးရွာချပြီး ပျက်သွားတယ်ဆိုရင်တော့ အခုမိုးရွာနေတဲ့ ဖြစ်စဉ်ဟာ နောက် ၁ ရက် ၂ ရက်ဆိုရင်လျော့သွားပြီ၊ အဲဒါဆိုရင်တော့ ဘေးအန္တရာယ်က မြန်မြန်လွတ်မြောက် သွားမှာပေါ့”ဟု ဧရာဝတီသို့ ပြောသည်။

မိုးလေဝသနှင့် ဇလဗေဒ ဦးစီးဌာန ၏ ယနေ့ညနေ ၃ နာရီခွဲ ထုတ်ပြန်ချက်အရ အဆိုပါ လေဖိအားနည်းရပ်ဝန်းသည် ဆက်လက် တည်ရှိနေပြီး ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် မုတ်သုံလေ ပိုမိုအားကောင်းလားကြောင်း နောက်ဆုံး ထုတ်ပြန်ချက်၌ တွေ့ရှိရသည်။

မိုးလေဝသနှင့် ဇလဗေဒ ဦးစီးဌာန၏ ယနေ့အထိ ခန့်မှန်း ထုတ်ပြန်ချက်တွင် စစ်ကိုင်းတိုင်း အောက်ပိုင်း၊ မန္တလေးတိုင်း တို့တွင် နေရာကျဲကျဲ၊ စစ်ကိုင်းတိုင်း အထက်ပိုင်း၊ မကွေးတိုင်း၊ တနင်္သာရီတိုင်း၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်နှင့် ကယားပြည်နယ် တို့တွင် နေရာစိပ်စိပ်နှင့် ကျန်တိုင်းနှင့်ပြည်နယ်တို့တွင် နေရာအနှံ့အပြား မိုးထစ်ချုန်းရွာနိုင်ကြောင်း ထုတ်ပြန် ထားသည်။

ကရင်ပြည်နယ်နှင့် မွန်ပြည်နယ် တို့တွင် ဒေသအလိုက်နှင့် ပဲခူးတိုင်းဒေသကြီး၊ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်း၊ ရှမ်းပြည်နယ်နှင့် ရခိုင်ပြည်နယ် တို့တွင် နေရာကွက်၍ မိုးကြီးနိုင်ကြောင်း ရွာရန်ရာနှုန်းပြည့် ဖြစ်ကြောင်း ထုတ်ပြန်ထားပြီး မြန်မာ့ ကမ်းရိုးတန်း တလျှောက်နှင့် ကမ်းလွန်ပင်လယ်ပြင် တို့တွင် ရံဖန်ရံခါ မိုးသက်လေပြင်းများ ကျရောက်ပြီး လှိုင်းကြီးမည်ဖြစ်ကြောင်းနှင့် မိုးသက်လေပြင်းကျစဉ် ရေပြင်/မြေပြင်လေသည် တနာရီလျှင် မိုင် ၄၀ အထိ တိုက်ခတ်နိုင်ကြောင်းလည်း ထုတ်ပြန်ချက်တွင် ပါရှိသည်။

မိုးအဆက်မပြတ် ရွာသွန်းပြီး ရေကြီးမှုဖြစ်ပွားရာ နေရာများတွင် မြေပြိုမှု၊ မြစ်ရေလျှံမှု၊ လမ်းများပြိုကျ ပျက်စီးမှု၊ လယ်ကွင်းများ ရေမြှုပ်မှုနှင့် လူနှင့် တိရစ္ဆာန်များ ရွှေ့ပြောင်းခိုလှုံနေရမှုတို့ ရှိနေကြောင်း၊ ယမန်နေ့က တိုင်းထွာချက်အရ ရှမ်းပြည်နယ် အရှေ့ပိုင်း မိုင်းဆတ်မြို့နယ် နှင့် ကရင်ပြည်နယ် ကော့ကရိတ်မြို့နယ်တို့တွင် မိုးရေချိန် စံချိန်သစ် တင်သည်အထိ ရွာသွန်းခဲ့ပြီး ရေလွှမ်းခဲ့ကြောင်း ဦးချစ်ကျော် ကပြောပြသည်။

နိုင်ငံအတွင်း မိုးကြီးနိုင်ကြောင်း နိုင်ငံပိုင် သတင်းစာများ၊ ရုပ်သံများနှင့် ရေဒီယိုများမှတဆင့် ယခုလဆန်းပိုင်း ကတည်းက မကြာ ခဏ အသိပေး ကြေညာထားသကဲ့သို့ ပြည်တွင်း၊ ပြည်ပ သတင်းဌာနများနှင့်လည်း မိုးလေဝသ အခြေအနေများနှင့် ပတ်သက်ပြီး ဖြေကြားခဲ့ကြောင်း ယနေ့အထိ ရေကြီးမှုကြောင့် လူသေဆုံးမှု မရှိသေးကြောင်း အစိုးရ မိုးလေဝသနှင့် ဇလဗေဒ ဦးစီးဌာန က ပြောသည်။

ထို့အတူ မိုးလေဝသနှင့် ဇလဗေဒ ဦးစီးဌာန ၏ အင်တာနက် ဝက်ဘ်ဆိုက်တွင်လည်း ရာသီဥတု နောက်ဆုံးအခြေအနေများကို ထုတ်ပြန်ထားပြီး ဧရာဝတီ၊ ဒုဋ္ဌဝတီ၊ ချင်းတွင်း၊ စစ်တောင်း၊ ရွှေကျင်၊ သံလွင်၊ ပဲခူးနှင့် ငဝန်မြစ် များ၏ ရေကြီးနိုင်မှုအခြေအနေများ ကိုလည်း ထုတ်ပြန်ထားသည်ကို တွေ့ရသည်။

မြန်မာနိုင်ငံအတွင်း မြို့များ၊ ကျေးရွာများနှင့် လမ်းများ မိုးရွာသွန်းမှုကြောင့် ရေကြီးမှုအန္တရာယ်နှင့် ရင်ဆိုင်နေရချိန်တွင် ထိုင်း-မြန်မာ နယ်စပ်ရှိ တာချီလိတ်မြို့နှင့် မြဝတီမြို့များတွင်လည်း ရေလွှမ်းမှု ဒဏ်ကိုခံနေရပြီး ဈေးဆိုင်များ၊ စားသောက်ဆိုင်များ နှင့် ကျောင်းများကို သွားလာရန် အခက်ကြုံနေကြကြောင်း စုံစမ်းသိရှိရသည်။

ကရင်ပြည်နယ် ကော့ကရိတ်မြို့နယ်နှင့် မြဝတီမြို့တို့တွင် ရေကြီးမှုကြောင့် ထောင်နှင့်ချီသော ရေဘေးဒုက္ခသည်များ ရေဘေးလွတ် ရာသို့ သွားရောက်ခိုလှုံ နေကြရပြီး မြန်မာနိုင်ငံသား အများစု အလုပ်လုပ်ကိုင်နေကြသော ထိုင်း-မြန်မာနယ်စပ် မဲဆောက်မြို့တွင်လည်း ရေကြီးမှုကြောင့် စက်ရုံ၊ စားသောက်ဆိုင်၊ ဆောက်လုပ်ရေး လုပ်ငန်းနှင့် တောင်ယာလုပ်ငန်းများ လုပ်ကိုင်ရန် အခက်ကြုံနေရကြောင်းလည်း သိရသည်။

ဒုတိယ ပင်လုံဖြင့်သာ ပြဿနာများ ဖြေရှင်းနိုင်မည်ဟု ဦးအောင်မင်းနှင့် ဆွေးနွေးမည့် ရဲဘော်သံခဲ ပြော

ဟင်္သာနီ (မွန်မြေ)

ဒုတိယ ပင်လုံ ညီလာခံသည် လက်ရှိ ဖြစ်ပွားနေသည့် ပြဿနာရပ်များအား ဖြေရှင်းနိုင်မည့်သော့ချက်ဖြစ်ကြောင်း သြဂုတ်လ ၄ ရက်နေ့တွင် ဝန်ကြီး ဦးအောင်မင်းတို့နှင့် တွေ့ဆုံဆွေးနွေးမည့်မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF) ဥက္ကဋ္ဌ ရဲဘော်သံခဲ က ယနေ့ မဇ္ဈိမကို ထုတ်ဖော် ပြောကြားလိုက်သည်။

“တိုင်းပြည်ရဲ့ ပြဿနာကို အဓိက ဖြေရှင်းတဲ့နေရာမှာ တိုင်းရင်းသားတွေရဲ့ အခန်းကဏ္ဍ တန်းတူရေးနဲ့ ကိုယ်ပိုင်ပြဋ္ဌာန်းခွင့်ကိစ္စကိုလည်း မလွဲမသွေ ဖြေရှင်းဖို့ လိုနေပါတယ်။ ကျနော်တို့ ရည်ရွယ်ထားတာက ဒီဆွေးနွေးပွဲမှာ တနိုင်ငံလုံး အရေးကိစ္စနဲ့ ပတ်သက်လာရင် အားလုံး ပြောနေတဲ့ ဒုတိယ ပင်လုံလို ညီလာခံမျိုးနဲ့မှပဲ သင့်တော်တဲ့ အချိန်မှာ ခေါ်ယူကျင်းပပြီး ဖြေရှင်းနိုင်မှပဲ ပြေလည်နိုင်ပါလိမ့်မယ်” ဟု မဇ္ဈိမကို ပြောသည်။

ထိုသို့ ပြည်တွင်း ငြိမ်းချမ်းရေး ရရှိရန်နှင့် အမျိုးသား ပြန်လည်သင့်မြတ်ရေးအတွက် ဝန်ကြီး ဦးအောင်မင်း ဦးဆောင်သည့် ငြိမ်းချမ်းရေး ဆွေးနွေးရေးအဖွဲ့ ကိုယ်စားလှယ်များနှင့် သြဂုတ်လ ၄ ရက်နေ့တွင် ဘားအံမြို့၌တွေ့ဆုံဆွးနွေးရန် ရှိကြောင်း ABSDF မှ ယနေ့ ထုတ်ပြန်ကြေညာသည်။

“မိမိတို့အနေဖြင့် အဆိုပါ နှစ်ဖက် ငြိမ်းချမ်းရေး ဆွေးနွေးမှုများတွင် ပြည်တွင်း ငြိမ်းချမ်းရေးနှင့် အမျိုးသား ပြန်လည်သင့်မြတ်ရေးတို့ကို ဦးတည်၍ ညှိနှိုင်း ဆောင်ရွက်သွားမည် ဖြစ်ကြောင်း” ဇူလိုင်လ ၃၀ ရက်နေ့ ရက်စွဲနှင့် ထုတ်ပြန်သည့် ကြေညာချက်တွင် ဖော်ပြပါရှိသည်။

ဝန်ကြီး ဦးအောင်မင်းနှင့် သွားရောက် တွေ့ဆုံမည့် ABSDF ဆွေးနွေးရေး ကိုယ်စားလှယ်အဖွဲ့ကို မကဒတ အနောက်ပိုင်း၊ မြောက်ပိုင်း၊ ထိုင်းနိုင်ငံ အခြေစိုက် နယ်မြေ အသီးသီးမှ ကိုယ်စားလှယ် များဖြင့် စုဖွဲ့ ထားပြီး ၃၅ ဦး ပါဝင်ကာ ဥက္ကဋ္ဌ ရဲဘော် သံခဲ က ဦးဆောင်မည် ဖြစ်သည်။

မကဒတ၏ ကိုယ်စားလှယ် အဖွဲ့များ မည်သည့်နေ့တွင် ထိုင်းနိုင်ငံမှ စတင် ထွက်ခွာ မည်ကိုမူ မပြောနိုင်ကြောင်း ၎င်းက ဆိုသည်။

ထိုတွေ့ဆုံရန် ရှိသည့် ဘားအံ ဆွေးနွေးပွဲ ရလဒ်များကိုလည်း တိုင်းရင်းသား ပြည်သူလူထု တရပ်လုံးထံ တင်ပြပေးသွားမည် ဖြစ်ကြောင်း ကြေညာချက်တွင် ဖော်ပြထားသည်။

မေလ ၂၁ ရက်နေ့ကလည်း အဖွဲ့ဝင် ငါးဦးပါ ABSDF ကိုယ်စားလှယ် အဖွဲ့နှင့် ဗိုလ်မှူးကြီး ကျော်စိုးဝင်း ခေါင်းဆောင်သည့် မြန်မာ့ ငြိမ်းချမ်းရေးစင်တာ အဖွဲ့ (Technical team) တို့ တွေ့ဆုံ ဆွေးနွေးခဲ့ကြသည်။

ထို့မတိုင်ခင် ABSDF နှင့် ပြည်ထောင်စု ငြိမ်းချမ်ရေး ဖော်ဆောင်ရေး အဖွဲ့မှ ဝန်ကြီး ဦးအောင်မင်း တို့သည် ၂၀၁၂ ဇွန်လက ထိုင်းနိုင်ငံ၊ မဲဆောက်မြို့တွင် တကြိမ်၊ ထိုနှစ် နိုဝင်ဘာလ ၉ ရက်နေ့က ချင်းမိုင်မြို့တွင် တကြိမ် တွေ့ဆုံခဲ့ကြပြီး ဖြစ်သည်။

ချင်းမိုင်မြို့၌ ဆွေးနွေးခဲ့ကြပြီးနောက် ပြည်တွင်းသို့ လေ့လာရေး ခရီးစဉ် သွားရောက်ရန် ဦးအောင်မင်း က သဘောတူခဲ့သဖြင့် ၂၀၁၂ ခုနှစ်၊ ဒီဇင်ဘာလ ၁၈ ရက်နေ့တွင် ABSDF ကိုယ်စားလှယ်များ ပြည်တွင်း ခရီးစဉ် သွားရောက်ခဲ့ကာ ဦးအောင်မင်း အပါအဝင် ပြည်တွင်းနိုင်ငံရေး ပါတီများ၊ အလွှာစုံမှ လူထု လူတန်းစားများနှင့်တွေ့ဆုံခဲ့သည်။

ယခုကဲ့သို့ ABSDF မှ ပြည်တွင်း ခရီးစဉ် သွားရောက်ရန် ထုတ်ပြန်သည့် အချိန်သည် ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ (UNFC) မှ တိုင်းရင်းသား ညီလာခံ တရပ်ကို ခေါ်ယူကျင်းပနေသည့် ကာလနှင့်လည်း တိုက်ဆိုင်နေသည်။

ယခု ချင်းမိုင်မြို့တွင် ကျင်းပနေဆဲ ဖြစ်သည့် ပြည်တွင်း ပြည်ပ တိုင်းရင်းသား ညီလာခံမှ နိုင်ငံရေး ပြဿနာ ဖြေရှင်းနိုင်မည့် နည်းလမ်း ရှာကြရန် ကြိုးပမ်းမှုများကို ကြိုဆိုထောက်ခံကြောင်း ကျောင်းသား တပ်မတော် အတွင်းရေးမှူး ရဲဘော် မျိုးဝင်း က သုံးသပ် ပြောကြားသည်။

“နိုင်ငံရေး ပြသနာကို ဖြေရှင်းတဲ့ နေရာမှာ တဦးကောင်း တယောက်ကောင်း ဖြေရှင်းလို့ မရနိုင်ပါဘူး။ အဲဒီ အခြေခံပေါ်ကနေပြီးတော့ အခုလိုမျိုး အင်အားစု အားလုံး ပါဝင်တဲ့ တွေ့ဆုံမှုကနေ တဆင့် နိုင်ငံရေး ပြဿနာ ဖြေရှင်းဖို့ စုပေါင်း အားထုတ်တာမျိုးကို ကျနော်တို့ အဖွဲ့က ကြိုဆိုပါတယ်။ တိုင်းပြည်မှာ ဖြစ်နေတဲ့ ပြည်တွင်းစစ်ကို ရပ်စဲနိုင်ဖို့အတွက်ဆိုရင် နိုင်ငံရေး ပြဿနာကို ဖြေရှင်းနိုင်ဖို့ မဖြစ်မနေ ကြိုးပမ်းသွားရမယ်” ဟု မဇ္ဈိမကို ပြောသည်။

လက်ရှိ တိုင်းရင်းသား အဖွဲ့များ ရရှိထားသည့် ပဏာမ အပစ်အခတ် ရပ်စဲရေး သဘောတူညီချက်မှ ခိုင်မာသည့်နိုင်ငံရေးဆိုင်ရာ သဘောတူညီချက် ရရှိနိုင်ရန် တိုင်းရင်းသားအဖွဲ့များ၏ အမြင်များ တူညီရန် လိုအပ်ပြီး လုပ်ငန်းစဉ်များ တူညီရန်လည်း လိုအပ်ကြောင်း ရဲဘော်မျိုးဝင်း က ဆက်လက်ပြောဆိုသည်။

အိန္ဒိယ အကူအညီ မြန်မာရေတပ် တောင်းခံ

ရဲနည်

အိန္ဒိယသမုဒ္ဒရာ ဒေသတွင်း ပထ၀ီနိုင်ငံရေးကို မြန်မာနိုင်ငံသည် မဟာဗျူဟာကျစွာ ကစားနေကြောင်း ပြသသည့်အနေဖြင့် တရုတ်နိုင်ငံသို့ ဓာတ်ငွေ့ စတင်ပို့လွှတ်လိုက်ချိန်တွင် အိန္ဒိယနိုင်ငံ၏ ရေတပ် အကူအညီကို တောင်းခံလိုက်သည်။

၎ရက်ကြာ အလည်အပတ်ခရီးစဉ်အဖြစ် အိန္ဒိယနိုင်ငံသို့ ယမန်နေ့က စတင်ရောက်ရှိနေသော မြန်မာရေတပ်ဦးစီးချုပ် ဒုတိယဗိုလ်ချုပ်ကြီးသက်ဆွေက အိန္ဒိယရေတပ်ဦးစီးချုပ် ဗိုလ်ချုပ်ကြီးဒီကီဂျိုရှီနှင့် တွေ့ဆုံခဲ့ပြီး “စစ်ဆင်ရေးတွင် ရေတပ်ချင်း ပူးပေါင်းဆောင်ရွက်ရန်၊ လေ့ကျင့်ရေး၊ ပစ္စည်းထောက်ပံ့ရေးနှင့် တည်ရှိနေသော ဆက်ဆံရေးကို စွမ်းဆောင်ရည် တည်ဆောက်မှုနှင့် စွမ်းအားမြှင့်တင်မှုဖြင့် ညီညီမျှမျှဖော်ဆောင်နိုင်သည့် အဆင့်အထိ တိုးမြှင့်သွားနိုင်ရန်” ဟု တရားဝင် ကြေညာချက် ထုတ်ပြန်ခဲ့သည်။

“မြန်မာဟာ ကျနော်တို့ရဲ့ အနီးစပ်ဆုံး အိမ်နီးချင်းတွေထဲက တနိုင်ငံဖြစ်ပါတယ်။ ကျနော်တို့ မြေပြင်မှာရော ရေပြင်မှာပါ နယ်နိမိတ်ချင်း ထိစပ်နေပါတယ်။ နှစ်နိုင်ငံရေတပ် အနေနဲ့ ပြောရရင်လည်း အလွန်ကို လှိုက်လှဲနွေးထွေးတဲ့ ဆက်ဆံရေး ရှိပါတယ်” ဟု အိန္ဒိယ အနောက်ဖက်ကမ်း ဆိပ်ကမ်းမြို့ ကိုချီတွင် အခြေစိုက်သော တောင်ပိုင်းရေတပ်ဌာနချုပ်သို့ ယနေ့ ရောက်ရှိလာသော ဒုတိယ ဗိုလ်ချုပ်ကြီး သက်ဆွေ ကို ကြိုဆိုရင်း အိန္ဒိယရေတပ် ဦးစီးချုပ် ဗိုလ်ချုပ်ကြီး ဒီကီဂျိုရှီကပြောကြောင်း အိန္ဒိယ သတင်းစာများအဆိုအရ သိရသည်။

မြန်မာ ရေတပ် ဦးစီးချုပ်သည် အိန္ဒိယ တောင်ပိုင်း ရေတပ်ဌာနချုပ်တွင်ရှိသော လေ့ကျင့်ရေးသင်တန်းကျောင်းများနှင့် အခြားသော ရေတပ်ဆိုင်ရာ အသုံး အဆောင်များကို ကြည့်ရှု့လေ့လာပြီး မနက်ဖြန်တွင် အရှေ့ပိုင်းရေတပ်ဌာနချုပ်သို့ သွားရောက်ဦးမည် ဖြစ်သည်။

အိန္ဒိယရေတပ်အကြီးအကဲနှင့် တွေ့ဆုံစဉ် ဒုတိယဗိုလ်ချုပ်ကြီး သက်ဆွေက ကမ်းလွန်ကင်းလှည့်ရေယာဉ်များ တည်ဆောက်ရေး အကူအညီပေးရန် တောင်းခံခဲ့ပြီး မြန်မာနိုင်ငံတွင် အသုံးပြုရန် လိုအပ်သည့် ရေတပ်ဆိုင်ရာ ပစ္စည်းစာရင်းကို ပေးအပ်ခဲ့ကြောင်း အိန္ဒိယသတင်းစာများက ဖော်ပြခဲ့ကြသည်။ အဆိုပါစာရင်းထဲတွင် အိန္ဒိယနိုင်ငံတွင် ထုတ်လုပ်သည့် ရေဒါအပါအဝင် ပင်လယ်ရေကြောင်းသုံး ပစ္စည်းများလည်း ပါဝင်ကြောင်း သိရသည်။

မြန်မာဖက်က တောင်းဆိုခဲ့သော ကမ်းလွန်ကင်းလှည့်ရေယာဉ်များ တည်ဆောက်ရေး အကူအညီပေးရန်ကိစ္စကို အိန္ဒိယဖက်မှ မူအားဖြင့် သဘောတူညီကြောင်း The Times of India သတင်းစာတွင် ဖော်ပြခဲ့သည်။ အဆိုပါ ရေယာဉ် များကို အိန္ဒိယ နိုင်ငံမှ သင်္ဘောလွန်းကျင်းတခုတွင် တည်ဆောက်ဖွယ် ရှိပြီး အိန္ဒိယနိုင်ငံတွင် လာရောက် သင်တန်းတက်နေကြသည့် မြန်မာရေတပ် အရာရှိနှင့် သင်္ဘောသား ၅၀ ခန့်ကိုလည်း နှစ်ဆ တိုးမြှင့်ဖွယ် ရှိသည်ဟု သိရသည်။

ကြည်းတပ်နှင့် လေတပ်မှ စစ်သည်များအတွက်လည်း အလားတူ အကောင်အထည်ဖော်ရန်ရှိနေရာ ရုရှားနိုင်ငံလုပ် Mi-35 တိုက်ခိုက်ရေး ရဟတ်ယာဉ်များကို မောင်းနှင်မည့် မြန်မာလေယာဉ်မှူးများကို လေ့ကျင့်ပေးရန် စီစဉ်နေခြင်းသည်လည်း “စွမ်းဆောင်ရည် တည်ဆောက်ခြင်းနှင့် မြှင့်တင်ခြင်း” အစီအစဉ်၏ အစိတ်အပိုင်းတခု ဖြစ်လာနိုင်ကြောင်းလည်း ရေးသားဖော်ပြထားသည်။

လွန်ခဲ့သည့်နှစ် ၂၀ အတွင်း အိန္ဒိယက မြန်မာသို့ ရေတပ်သုံး ကင်းလှည့် လေယာဉ်ငယ် ၄ စီး၊ အမြောက်သင်္ဘောများတွင် အသုံးပြုရန် ၁၀၅ မီလီမီတာ အပေါ့စား အမြောက်များ၊ မော်တာများ၊ လောင်ချာများ နှင့် ရိုင်ဖယ်သေနတ်များ ကဲ့သို့သော ပစ္စည်းများနှင့် ဆော့ဖ်ဝဲများ ထောက်ပံ့ပေးခဲ့သည်။ ယခုအခါ မြန်မာဖက်က ရေဒါများ၊ အာရုံခံ ပစ္စည်းများ၊ ဖရီးဂိတ် သင်္ဘောများနှင့် အသုံးပြု အသံလှိုင်း အာရုံခံ ကရိယာများကိုပါ ထပ်မံတောင်းဆိုခဲ့ခြင်းသည် မြန်မာရေတပ်က အိန္ဒိယသမုဒ္ဒရာ ကာကွယ်ရေးတည်ဆောက်ရာတွင် ၎င်း၏ အစဉ်အလာ မဟာမိတ် တရုတ်ထက် အိန္ဒိယကို ပို၍ အားထားကြောင်း ပြသလိုက်ခြင်းပင်။

အိန္ဒိယနိုင်ငံသည် ၁၉၈၈ ဒီမိုကရေစီရေး လူထုအုံကြွမှု ကာလအတွင်း မြန်မာ့ဒီမိုကရေစီရေး လှုပ်ရှားမှုများကို နှစ်ပေါင်းများစွာကူညီထောက်ပံ့ပေးနေခဲ့ပြီးမှ ၁၉၉၀ နှစ်များနှောင်းပိုင်းရောက်ချိန်တွင် ၎င်းတို့၏ မူဝါဒကို ရည်ရွယ်ချက်ရှိရှိဖြင့် ဂငယ်ကွေ့ ပြန်ချိုးပစ်လိုက်သည်။ အကြောင်းမှာ တရုတ်နိုင်ငံက မြန်မာနိုင်ငံအတွင်းတွင် လမ်းများဖောက်လုပ်ခြင်း၊ ဆိပ်ကမ်းများတည်ဆောက်ခြင်းနှင့် မြန်မာစစ်တပ်ကို လေ့ကျင့်သင်တန်းပေး ခြင်း၊ စစ်လက်နက် ပစ္စည်းများ ရောင်းချခြင်းကြောင့် ဖြစ်သည်။

မြန်မာ့မြေပေါ်တွင် အခြေစိုက်ပြီး တော်လှန်နေသည့် အဖွဲ့များ၏ ထောက်ပို့လမ်းကို ထိန်းချုပ်ရေး မျှော်လင့်ချက်ဖြင့် စစ်ဖက်ဆိုင်ရာ နှစ်နိုင်ငံဆက်ဆံရေး တည်ဆောက်မှုကို တည်ဆောက်တိုးချဲ့ခဲ့ခြင်းလည်း ဖြစ်သည်။

တချိန်တည်းတွင်ပင် တရုတ်နိုင်ငံသည် မြန်မာနိုင်ငံကို ဖြတ်ကျော်သွယ်တန်းထားသော ၈၀၀ ကီလိုမီတာရှည်သည့် ပိုက်လိုင်း စီမံကိန်းမှ တဆင့် သဘာဝဓာတ်ငွေ့များ စတင်ရရှိနေပြီဖြစ်သည်။ ထိုပိုက်လိုင်းကို ယခုလ ၂၈ ရက်နေ့က စတင်ဖွင့်လှစ်ခဲ့ပြီး တရုတ်သတင်းမီဒီယာများက တရုတ်နိုင်ငံ၏ စွမ်းအင်ထောက်ပံ့ရေး လမ်းကြောင်းအတွက် “အထင်ကရခြေလှမ်း” တခုဟု ဖော်ပြခဲ့ကြသည်။

ထိုဓာတ်ငွေ့ ပိုက်လိုင်းသည် တနှစ်လျှင် ဓာတ်ငွေ့ ကုဗမီတာ ၁၂ သန်း သယ်ဆောင်ပေးနိုင်မည်ဖြစ်ပြီး ရခိုင်ပြည်နယ် ကျောက်ဖြူမြို့မှ မြန်မာနယ်စပ်ရှိ တရုတ်နိုင်ငံ အနောက်တောင်ပိုင်း ယူနန်ခရိုင်ကို ဆက်သွယ်ထားသည်။ တရုတ်နိုင်ငံသည် ရေနံပိုက်လိုင်း တခုကိုလည်း တည်ဆောက်နေပြီး ပြီးစီးသွားပါက နှစ်စဉ် ရေနံတန်ပေါင်း ၂၂ သန်း သယ်ဆောင်ပေးနိုင်မည် ဖြစ်သည်။

ဓာတ်ငွေ့ပိုက်လိုင်း ဖွင့်လှစ်လိုက်ခြင်းသည် “တရုတ်နိုင်ငံကို ရေနံတင်သွင်းမှု ၈၀ ရာခိုင်နှုန်း မလက္ကာနဲ့ စင်္ကာပူရေလက်ကြားကို ဖြတ်သန်းပြီး အမေရိကန်ရေတပ် ဦးဆောင်သော ကင်းလှည့်တပ်ဖွဲ့ အစောင့်အရှောက်ဖြင့် သွားနေရသည့် ပင်လယ်လမ်းကြောင်း အပေါ်” မှီခိုနေရခြင်းမှ လျော့နည်းသက်သာစေသည့် အတွက် တရုတ်နိုင်ငံ၏ စွမ်းအင်ထောက်ပံ့ရေး လမ်းကြောင်းများ၏ ဗျူဟာမြောက် မြေပုံကို များစွာပြောင်းလဲစေခဲ့သည်ဟု တရုတ်အစိုးရ သတင်းဌာန ဆင်ဟွာက ဖော်ပြခဲ့သည်။

ထို့ပြင် ၂၀၁၁ ခုနှစ် စက်တင်ဘာ ၃၀ ရက်နေ့တွင် အမေရိကန် ဒေါ်လာ ၃.၆ ဘီလီယံ တန်သည့် မြစ်ဆုံဆည် စီမံကိန်းကို ၅ နှစ်ရွှေ့ဆိုင်းလိုက်ကြောင်း မြန်မာနိုင်ငံသမ္မတ ဦးသိန်းစိန်က ကြေညာပြီး တရုတ်နိုင်ငံကို အံ့သြတုန်လှုပ်စေခဲ့သည့် နောက်ပိုင်း မှုန်ဝါးသွားခဲ့သည့် တရုတ်-မြန်မာ နှစ်နိုင်ငံ၏ ဆွေမျိုးပေါက်ဖော် ဆက်ဆံရေးကို ပြန်လည်ကောင်းမွန်စေနိုင်မည့် အစပျိုးမှုတခုလည်း ဖြစ်နိုင်သည်။

“ငြိမ်းချမ်းရေး ကမ်းလှမ်းဖို့ကို အမြဲ တံခါးပေါက် ဖွင့်ထားပါတယ် …”

ဧရာဝတီ

ရှမ်းပြည်နယ်မြောက်ပိုင်းမှာ အစိုးရစစ်တပ်နဲ့ မကြာခဏ တိုက်ပွဲ ဖြစ်နေတဲ့ ပလောင် (တအာင်း) အမျိုးသား လွတ်မြောက်ရေး တပ် မတော်(TNLA) နဲ့ အစိုးရ ပြည်ထောင်စု ငြိမ်းချမ်းရေး ဖော်ဆောင်ရေး ကော်မတီ ဒု ဥက္ကဋ္ဌ၊ သမ္မတရုံး ၀န်ကြီး ဦးအောင်မင်း တို့ ဒီလ ၃၁ ရက်နေ့ တရုတ်-မြန်မာနယ်စပ် မူဆယ်မြို့မှာ တွေ့ဆုံဆွေးနွေးမှုတွေ ပြုလုပ်ပါတော့မယ်။

TNLA ရဲ့ စစ်ဘက်ဆိုင်ရာ ဘက်ကလည်း ငြိမ်းချမ်းရေးဆွေးနွေးဖို့ တံခါးဖွင့်ထားတယ်လို့ ဆိုပေမယ့် သူတို့ထိန်းချုပ်ထားတဲ့ မြို့နယ် ၄ ခုမှာ အစိုးရ စစ်တပ် တပ်ရင်းပေါင်း ၃၀ ကျော် တပ်စွဲထားတဲ့ အတွက် ပွင့်လင်းရာသီ ရောက်လာရင် စစ်ထိုးတော့မယ့် အရိပ်လက္ခဏာတွေ တွေ့မြင်နေရတယ်လို့ TNLA တပ်မတော် ဘက်က ပြောပါတယ်။

TNLA ဟာ ကချင် လွတ်လပ်ရေး တပ်မတော်(KIA) နဲ့ ထာဝရ မဟာမိတ် ဖွဲ့ထားပေမယ့် အခုအခါမှာ KIA နဲ့ အစိုးရတို့က နှစ် ဘက် ဆွေးနွေးမှုတွေ ပြုလုပ်နေပါပြီ။ ဒီလိုပဲ စစ်မြေပြင်မှာ အတူ ပူးတွဲတိုက်ပွဲဝင်နေတဲ့ ရှမ်းပြည်တပ်မတော် မြောက်ပိုင်း (SSPP/SSA) ကလည်း အစိုးရနဲ့ ပဏာမအဆင့် အပစ်အခတ် ရပ်စဲထားပြီး ဖြစ်ပါတယ်။

ဒါကြောင့် TNLA ရဲ့ ဦးတည်ချက်၊ ရည်မှန်းချက်နဲ့ လုပ်ဆောင်နေမှုတွေ အပါအဝင် ဒေသတွင်းမှာ လက်တွဲ လှုပ်ရှားနေတဲ့ KIA နဲ့ SSPP/SSA တို့နဲ့ ပူးပေါင်း လှုပ်ရှားနေပုံ၊ စစ်ရေးအခြေအနေနဲ့ ငြိမ်းချမ်းရေး ဆွေးနွေးရေး အခြေအနေတွေကို ဧရာဝတီ သတင်းထောက် ကျော်ခနဲ့ မုန်ရာတို့က TNLA စစ်ဦးစီးချုပ် ဒု ဗိုလ်မှူးကြီး တာဟိုပလန် ကို တွေ့ဆုံမေးမြန်း ခဲ့ပါတယ်။

မေး။ ။ TNLA ကိုအစိုးရဘက်က ငြိမ်းချမ်ရေးကိစ္စ ကမ်းလှမ်းလာမယ်ဆိုရင် စစ်ဦးစီးချုပ်တို့ ဘက်က ဘယ်လိုသဘောထား ရှိလဲ။


ဖြေ။ ။ ကျနော်တို့ရဲ့သဘောထားက ငြိမ်းချမ်းရေး ကမ်းလှမ်းဖို့ကို အမြဲတံခါးပေါက် ဖွင့်ထားပါတယ်။ အခုလည်း စစ်ကို စုဆောင်းရတာ၊ စစ်သင်တန်းကို ပေးရတဲ့အတွက် စစ်ပညာကို အမြန်ဆုံး ရဲဘော်တွေ ထက်ထက်မြက်မြက် တိုက်ပွဲဝင်နိုင်မယ့် ဟာတွေဟာ အဓိပ္ပာယ်က ငြိမ်းချမ်းရေး တံခါးပေါက်မှာပဲလို့ ခြုံပြောလို့ ရမှာပေါ့။

မေး။ ။ အစိုးရက တခြားတိုင်းရင်းသားအဖွဲ့ တော်တော်များများနဲ့ ဆွေးနွေးပြီး အပစ်အခတ်ရပ်စဲနိုင်ခဲ့ပြီ၊ TNLA နဲ့ နှောင့်နှေးနေ ရတာ ဘာ့ကြောင့်လို့ မြင်လဲ။

ဖြေ။ ။ ကြန့်ကြာနေတဲ့ အပေါ်မှာတော့ အစိုးရက TNLA အပေါ်မှာ ဘယ်လိုမြင်လဲဆိုရင် အဖွဲ့အစည်းအကြီးကြီးတွေ မဟုတ်တဲ့ အတွက် တကယ်လို့ ကချင် လွတ်လပ်ရေး အဖွဲ(KIO) နဲ့ ပြီးသွားပြီ ဆိုလို့ရှိရင် TNLA ဘယ်လိုပဲပြောပြော ဘယ်လိုပဲဆွေးနွေးရ အဆင်ပြေသွားမှာပါလို့ သူတို့ရဲ့ အမျှော်အမြင်တွေက ဒီလိုပဲတွေ့ရတယ်။

မေး။ ။ အစိုးရနဲ့ ငြိမ်းချမ်းရေး ဆွေးနွေးနေတဲ့ KIO အပေါ်မှာရော ဘယ်လိုမြင်လဲ။

ဖြေ။ ။ ဝန်ကြီးဦးအောင်မင်းနဲ့ KIO နဲ့ မြစ်ကြီးနားမှာ ဆွေးနွေးနေတဲ့ နေရာမှာတော့ အကောင်းဆုံး ခါတိုင်းလို ပြည်တွင်းမှာ ဒီလို ဆွေးနွေးတဲ့ အပိုင်းတွေက မမြင်ရတဲ့နေရာတွေလည်း အများကြီးပေါ့နော၊ ခပ်များများက တရုတ်နယ်စပ်မှာပဲ ဆွေးနွေးတာ များတယ်၊ ဒီတစ်ခေါက်မှာ မြစ်ကြီးနားမှာဆွေးနွေးနေတဲ့ ဟာတွေက အမြန်ဆုံး အဆင်ပြေပါစေလို့ အားပေးလိုပါတယ်။

မေး။ ။ အစိုးရက တိုင်းရင်းသား တပ်တွေနဲ့ ငြိမ်းချမ်းရေး ဆွေးနွေးမှု လုပ်ငန်းစဉ်တွေ အပေါ်မှာ ဘယ်လိုမြင်လဲ။

ဖြေ။ ။ တခြား လက်နက်ကိုင် အဖွဲ့အစည်းတွေ ငြိမ်းချမ်းရေး ၁၀ ဖွဲ့လောက်ရသွားနေတဲ့ လက်နက်ကိုင် အဖွဲ့အစည်းတွေလည်း ရှိတယ်၊ တချို့ပြီးခဲ့တဲ့ ရက်ပိုင်းမှာပဲ ယွက်စစ် အဖွဲ့တွေ တောင်ပိုင်းအဖွဲ့တွေက နေပြည်တော်အထိ သွားဖြစ်တယ်၊ အဲဒီနေရာမှာလည်း အခုလောလောဆယ် စစ်ပွဲကဏ္ဍမှာပေါ့နော၊ လက်မှတ်ထိုးပြီး ပြီးငြိမ်းသွားတဲ့ စစ်ပွဲက မရှိသလောက် ဖြစ်နေတယ်၊ လက်မှတ်တော့ ထိုးထားတယ် သေနတ်သံတော့ တိတ်ဆိတ်တာ မရှိသေးဘူး၊ အဲဒီဟာတွေက အခုလက်မှတ် ထိုးထားတဲ့ အဖွဲ့တွေရော၊ အခု KIA အချက် ၇ ချက် လက်မှတ် ထိုးထားတာတွေရော အကောင်းဆုံး အမှန်တရားလမ်းကြောင်း ရောက်သွားအောင်တော့ ဖြစ် ချင်တဲ့ ဆန္ဒပေါ့နော။

မေး။ ။ TNLA ရဲ့ ရည်ရွယ်ချက်၊ ရပ်တည်ချက်၊ ရည်မှန်းချက်တွေက ဘာတွေဖြစ်မလဲဗျ။

ဖြေ။ ။ TNLA ရဲ့ နိုင်ငံရေး ဦးတည်ချက်ပေါ့နော ပလောင်(တအာင်း) အမျိုးသား အဖိနှိပ်ခံဘဝကနေ လွတ်မြောက်ရေး၊ ဒီမိုကရေစီနဲ့ လူ့အခွင့်အရေး အာမခံပြီး ပလောင်(တအာင်း) ပြည်နယ် တည်ဆောက်ရေး၊ အမျိုးသား ကိုယ်ပိုင်ပြဌာန်းခွင့်ကို အာမခံပြီး ဒီမိုကရက်တစ် ပြည်ထောင်စု နိုင်ငံ တည်ဆောက်ရေး ကျနော်တို့ရဲ့ ရပ်တည်ချက်ပေါ့နော်။

မေး။ ။ TNLA ရဲ့ အဓိက မဟာမိတ်တပ်ဖွဲ့တွေက ဘယ်အဖွဲ့တွေလဲ ခင်ဗျ။

ဖြေ။ ။ ထိထိမိမိ ပြောရမယ်ဆိုလို့ရှိရင် ဘယ်ဘက်မဆို အားလုံးအရေးကြီးတယ်၊ TNLA နဲ့ KIO က ထာဝရ မဟာမိတ် တလျှောက် လုံး ကျနော်တို့ရဲ့ ထာဝရပေါ့နော်၊ တချို့ကျနော်တို့ရဲ့ မိတ်ဆွေ မဟာမိတ်လို့ ပြောနိုင်တယ်။ ဒီ SSA ကိုလည်း ထာဝရ မဟာမိတ် လို့ မပြောတောင်မှ ကျနော်တို့နေမယ့် နေရာတွေက ရှမ်းပြည်နယ်ထဲမှာ ပါတယ်၊ ဒါကြောင့် ဘယ်ဘက်မှလည်း ကျနော် တို့ လက်လွှတ်လို့ မဖြစ်ဘူး၊ မိတ်ဆွေကောင်း မဟာမိတ်ကောင်းတွေလို့ ယူဆထားတာ။

မေး။ ။ ထာဝရ မဟာမိတ် ယူထားတဲ့ KIO က မကြာခင်ရက်ပိုင်းကပဲ အစိုးရနဲ့ဆွေးနွေးမှုတွေ လုပ်ခဲ့ကြတယ်၊ အကယ်၍ သူတို့ အပစ်ရပ်သွားကြပြီဆိုရင် အဲဒီဘက်မှာရှိတဲ့ အစိုးရစစ်တပ်တွေက TNLA ဘက်ကို ဦးတည်လာနိုင်သလား၊ ဘယ်လို အခြေအနေ ရှိလဲ။

ဖြေ။ ။ KIA ကလည်း အချက် ၇ ချက် သဘောတူ လက်မှတ်ထိုးထားတဲ့ အပိုင်းတွေလည်းရှိတယ်၊ လက်ရှိထိုးထားတဲ့ နေရာမှာတော့ စစ်ကို အမြန်ဆုံး လျှော့နိုင်အောင်ပေါ့နော၊ ဒါပေမယ့် အခုထက်ထိ စစ်လျှော့တဲ့ အနေအထားတွေတော့ မတွေ့သေးဘူး။ ဒါပေမယ့် ဘယ်လိုပဲဖြစ်ဖြစ် KIA ဦးအောင်မင်းတို့နဲ့ အဆင်ပြေသွားနိုင်တောင်မှ ကျနော်တို့ရဲ့ TNLA နည်းလမ်းနဲ့ ကိုယ့်ကိုယ်ကိုယ် ကာကွယ်ရမှာပဲ၊ အစိုးရတပ် အင်အားတွေ ဒီဘက်မှာ တိုးလာမယ်ဆိုရင် ဘယ်တတ်နိုင်မလဲ၊ တပ်ဆိုတော့ ကိုယ့်အတွက်တော့ အမြဲ ပြင်ထားတာတွေတော့ ရှိတာပေါ့။

မေး။ ။ TNLA နဲ့အရင်က ထာဝရ မဟာမိတ်အဖြစ်နဲ့ လက်တွဲ တိုက်ပွဲဝင်နေတဲ့ KIA ဆိုလည်း အစိုးရနဲ့ ဆွေးနွေးမှုတွေ လုပ်နေပြီ၊ မိတ်ဆွေ SSA ဆိုရင်လည်း အစိုးရနဲ့ အပစ်အခတ်ရပ်စဲရေး လုပ်ထားပြီးပြီ၊ တကယ်လို့ TNLA နဲ့အစိုးရတို့ တိုက်ပွဲတွေ ထိပ် တိုက် ကြုံတွေ့လာမယ်ဆိုလို့ရှိရင် TNLA ကိုဘယ်သူတွေက ဝိုင်းကူကြမလဲ။

ဖြေ။ ။ KIA ကလည်း အပစ်အခတ်ရပ်စဲရေး လုပ်သွားမယ်ဆိုရင်၊ SSA က အပစ်အခတ်ရပ်စဲရေး လုပ်ထားတဲ့ အပိုင်းတွေ လည်း ရှိတယ်၊ တကယ်လို့ ပလောင်(တအာင်း) ဒေသမှာ အစိုးရက စစ်မျက်နှာ လာဖွင့်မယ်ဆိုလို့ရှိရင် ကျနော်တို့ ရှိတဲ့အင်အား၊ ရှိတဲ့ အရည်အချင်းနဲ့ပဲ ရင်ဆိုင်ရမှာပဲ။

မေး။ ။ TNLA အနေနဲ့ KIA တို့ SSPP/SSA တို့နဲ့ ပူးတွဲစစ်ရေး လှုပ်ရှားရတဲ့ ကိစ္စကိုလည်း ရှင်းပြပေးပါဦး။

ဖြေ။ ။ ဒါက ကျနော်တို့ရဲ့ KIO/KIA နဲ့ TNLA တို့ စစ်ရေးပူးပေါင်းနေတဲ့ နေရာတွေက နယ်နိမိတ်လည်း ဆက်စပ် အပိုင်းတွေ ရှိတယ်၊ နယ်နိမိတ် တခြားစီဖြစ်တဲ့နေရာတွေကတော့ သူ့ဟာ ကိုယ့်ဟာပေါ့၊ သူ့တပ် ကိုယ့်တပ်ကိုပဲ အေးအေးဆေးဆေး လှုပ်ရှားကြ တယ်၊ ဒါပေမယ့် ဒီလို နယ်စပ်နေရာတွေမှာတော့ ဒီလိုဝိုင်းဝန်းပြီးမှပေါ့နော တခါတလေ ကိုယ်က သူတို့နယ်မြေ ဝင်လာတယ်၊ သူတို့လည်း ကိုယ့်နယ်မြေဝင်လာတဲ့ စစ်ရေးအရ ပူးပေါင်းတဲ့အပိုင်းတော့ ရှိတယ်။

မေး။ ။ အရင်တုန်းက ပလောင်(တအာင်း)ပြည်နယ် လွတ်မြောက်ရေး တပ်မတော် PSLA အနေနဲ့ ငြိမ်းချမ်းရေးယူ လက်နက်ချပြီးတော့မှ TNLA ထဲကို လာပြန် ပေါင်းစည်းသူတွေကိုလည်း တွေ့ရတယ်၊ လူငယ် ပညာတတ်ပိုင်းတွေလည်း လာရောက် ပူးပေါင်း တာတွေကို တွေ့ရတယ်၊ စုစုပေါင်းဆို TNLA ရဲ့အင်အား ဘယ်လောက်ရှိမလဲ ခင်ဗျ။

ဖြေ။ ။ ကျနော်တို့ရဲ့ ဝန်ထမ်းအသစ်တွေ၊ ပညာတတ် ဝင်လာတဲ့ကလေးတွေ၊ PSLA ဝန်ထမ်းဟောင်းတွေ ဝင်လာတယ်ဆိုလို့ရှိရင် ကျနော်တို့ လက်ရှိ လူအင်အားနေရာမှာတော့ တဖြည်းဖြည်း မမေးဖြစ်လည်း သိလာမှာပါ။ အခု လောလောဆယ်တော့ ပြောဖို့ နည်းနည်း စောသေးတယ်။

မေး။ ။ ဒါဆိုရင် TNLA မှာ ဗျူဟာ ဘယ်နှစ်ခု စုစုပေါင်း တပ်ရင်း ဘယ်နှစ်ခု ခွဲထားလဲ။

ဖြေ။ ။ အခုလက်ရှိ ကျနော်တို့ တပ်ရင်း လှုပ်ရှားနေတဲ့ဟာ တပ်ရင်း ၇ ရင်း၊ ဗျူဟာက ၁ ဗျူဟာ၊ ၂ ဗျူဟာ နှစ်ဗျူဟာ ရှိတယ်။

မေး။ ။ တပ်ရင်း တရင်းမှာဆိုရင် အနည်းဆုံးအင်အား ဘယ်လောက် ထားတာမျိုး ရှိလဲ။

ဖြေ။ ။ အခုကျနော်တို့ရဲ့ ဗျူဟာ တဗျူဟာဆိုလို့ရှိရင် တပ်ရင်း ၃ ရင်းပေါ့၊ တပ်ရင်း ၃ ရင်းမှာ အင်အားတော့ ၁၀၀၀ လောက်ရှိမှာပေါ့။

မေး။ ။ TNLA အနေနဲ့ ဒီလောက်များတဲ့ တပ်အင်အားတွေ အတွက် လက်နက်ခဲယမ်းတွေ ဝယ်ရတာရှိမယ်၊ စစ်ဝတ် စစ်စားတွေ ဝယ်ရတာတွေ၊ ရိက္ခာအတွက် ဝယ်ရတာတွေရှိမယ်၊ ဒီငွေတွေကြတော့ ဘယ်ကနေ ရရှိလဲ။

ဖြေ။ ။ ငွေ ဘဏ္ဍာရေး ကဏ္ဍမှာ ကျနော်တို့ တဖက်တလမ်းက ကျနော်တို့ ပလောင်(တအာင်း)လူမျိုးတွေ၊ ပလောင်(တအာင်း) အဖွဲ့အစည်းကို တန်ဖိုးထားတဲ့ မိတ်ဆွေတွေလည်း ရှိတယ်၊ သူတို့လာလှူတဲ့ အပိုင်းတွေလည်း ရှိတယ်၊ တချို့နေရာတွေကြတော့ ကျနော်တို့ မဟာမိတ်ကို အကူအညီတောင်းတဲ့ အပိုင်းတွေလည်းရှိတယ်၊ ကျနော်တို့ နယ်မြေမှာ စီးပွားရေးလုပ်နေတဲ့ လုပ်ငန်းရှင် တွေ ရှိတယ်၊ အဲဒီကနေ ရန်ပုံငွေတွေရပြီးတော့မှ လက်နက်ခဲယမ်းတွေ၊ ရဲဘော်တွေ စားသောက်၊ ဝတ်စုံတွေ က ဒီ သုံးနေရာမှာရ လာတဲ့ ဘတ်ဂျက်ပေါ့။

မေး။ ။ TNLA ထိန်းချုပ်ထားတဲ့ နယ်မြေတွေကရော ဘယ်နေရာတွေလဲ ခင်ဗျ။

ဖြေ။ ။ မြို့နယ်ပြောရမယ် ဆိုလို့ရှိရင် ဒီဘက်မှာတော့ မိုးမိတ်၊ မိုးကုတ်၊ မိုင်းနောင်၊ ကျောက်မဲ၊ သီပေါ၊ နမ့်ဆမ်၊ နမ္မတူ၊ ကွတ် ခိုင်၊ မူဆယ်၊ နမ့်ခမ်း၊ မန်တုံ လှုပ်ရှားနေတဲ့ နယ်မြေတွေ ဖြစ်တယ်။ အခုလက်ရှိ တပ်က လှုပ်ရှားရတဲ့ မြို့နယ်တွေက ဆယ်မြို့နယ် ရှိတယ်။

မေး။ ။ TNLA ထိန်းချုပ်တဲ့ ရှေ့တန်းနယ်မြေတွေမှာ အစိုးရစစ်တပ်တွေ၊ ပြည်သူ့စစ်တွေနဲ့ တိုက်ပွဲဖြစ်လာနိုင်တဲ့ အရိပ် အယောင် တွေ၊ စစ်ပြင်နေတဲ့ အရိပ်အယောင်တွေ တွေ့ရလား။

ဖြေ။ ။ မြင်တွေ့ရတယ်၊ KIO ကို စစ်လျှော့နေမယ့်အချိန်မှာ ကျနော်တို့ နယ်မြေမှာ တပ်ရင်း ၃၀ ကျော်တော့ ထိုးထားနေပြီ၊ စစ်ဖြစ်ဖို့ ပြောရမယ်ဆိုရင် ၇၅ ရာခိုင်နှုန်း အပြည့်ဖြစ်နိုင်မယ်၊ အခုမှာလည်း တော်တော်လေးကို ရှောင်ယူရတာပေါ့နော၊ ထိပ်တိုက် သွား တိုးမယ့်နေရာတော့ ရှောင်လို့မရဘူး၊ တိုက်ယူရတာပဲ။

မေး။ ။ အဲဒီ တပ်အင်အား တိုးချဲ့ထားတဲ့ နေရာတွေက ဘယ်မြို့နယ်တွေလဲ။

ဖြေ။ ။ အခုလောလောဆယ် မန်တုံမှာများတယ်၊ မန်တုံမြို့နယ်၊ နမ့်ဆန်မြို့နယ်၊ မိုးကုတ်မြို့နယ်၊ ကျောက်မဲမြို့နယ် ၄ မြို့နယ် တော့ ထိုးထားတဲ့ တပ်တွေများတယ်။ ခါတိုင်း လိုင်ဇာမှာ စစ်ပွဲမဖြစ်တဲ့အချိန်က စစ်ကြောင်းလောက်ပဲ လှုပ်ရှားတာ၊ ဒါပေမယ့် လိုင်ဇာမှာ စစ်ရပ်တဲ့အချိန်မှာ ကျနော်တို့နယ်မြေမှာ တပ်တွေတိုးချဲ့ထားတဲ့ အနေအထားတွေ၊ အခု မန်တုံမြို့နယ် ခိုမုန်းမှာတပ်ရင်း ၂ ရင်း ကျနော်တို့ တကယ့်လှုပ်ရှားတဲ့ နေရာတွေကို တပ်စခန်း ချထားတာ၊ ကျနော်တို့ TNLA လှုပ်ရှားတဲ့ နေရာတွေမှာ တပ်တွေချထားတာ၊ လက်နက်ကြီး စားနပ်ရိက္ခာတွေ စစ်သားတွေ၊ ခါတိုင်းဆို စစ်ကြောင်းတွေက ၆၀ မမ၊ ၇၅ မမ လောက်ပဲ သုံးတယ်၊ အခု တပ်စခန်းမှာ ၁၂၀ မမ သယ်လာပြီးမှ တပ်စခန်းမှာချထားတယ်။ ပြီးခဲ့တဲ့ ဧပြီလ တည်းက။

မေး။ ။ ဘယ်ကာလလောက်မှာ စစ်ပွဲတွေ ဖြစ်လာနိုင်မလဲ။

ဖြေ။ ။ အခုမိုးကာလတော့ သူတို့က ဒီတိုင်းပဲ ထိုးထားတယ်၊ ဆောင်းတွင်း ကာလမှာတော့ စစ်ပွဲကြီးကြီးမားမား ဖြစ်လာနိုင်မယ် လို့ မြင်တယ်၊ ကျနော်တို့က ရန်သူရဲ့ အခြေအနေကို သုံးသပ်ပြီးမှ ရန်သူဘယ်လို လှုပ်ရှားလဲ၊ ကိုယ့်ဘက်မှာလည်း ဘယ်လို ပြင် ဆင် ထားသလဲဆိုတာ နေ့စဉ်လုပ်ငန်းပါ။

မေး။ ။ TNLA ကို သမိုင်းမှာ ဘယ်လိုနာမည်မျိုး ကျန်ခဲ့စေချင်လဲ။

ဖြေ။ ။ ကျနော်တို့ TNLA က အများပြည်သူ လက်ခံနိုင်မယ့် မူဝါဒ၊ အများပြည်သူကို TNLA လုပ်ဆောင်ပေးမယ့် စနစ်မျိုး လူထု ကျေကျေ နပ်နပ် နားလည်သွားမယ့် တနေ့ကြရင် TNLA ကျေနပ်အားရ ဝမ်းသာမှာပါ။

မေး။ ။ လက်ရှိ သမ္မတ ဦးသိန်းစိန် အစိုးရအပေါ်မှာရော စစ်ဦးစီးချုပ်အနေနဲ့ ဘယ်လိုမြင်လဲ။

ဖြေ။ ။ သမ္မတ ဦးသိန်းစိန်က တဖက်တလမ်းက တိုင်းပြည် အရေး အမြန်ဆုံး ပြေလည်နိုင်မယ့် နည်းလမ်းနဲ့ သူကြိုးစား နေတဲ့ အချိန်အခါလည်း ဖြစ်တယ်၊ ပြီးခဲ့တဲ့ ၂၀၁၁-၂၀၁၂ မှာ ပြောင်းလဲလာတဲ့ အတိုင်းအတာတွေ အများကြီးမြင်တွေ့ရတယ်၊ သတင်း ဌာနတွေ အရင်တုန်းက မြန်မာနိုင်ငံရောက်လာပြီး ဘယ်လိုမှ မရနိုင်ဘူးလေ၊ အခုဟာ လွတ်လွတ်လပ်လပ် တခြားကဏ္ဍတွေ၊ အဖွဲ့စည်းတွေ ဘက်စုံကနေ လွတ်လွတ် လပ်လပ် သွားလာလှုပ်ရှားနိုင်တယ်ဆိုတာ တဖက်တလမ်းက မြန်မာနိုင်ငံမှာ အကောင်းဆုံး ရောက်သွားမယ့် နည်းလမ်းတွေ မြင်တယ်။ ။

SSPP/SSA နှင့် ဝ နယ်မြေအကြား အစိုးရတပ်အင်အားထပ်ဖြည့်

သျှမ်းသံတော်ဆင့်

သျှမ်းပြည်မြောက်ပိုင်း တန့်ယန်းမြို့ တောင်ဘက်ခြမ်း၊ သံလွင်အနောက်ခြမ်း ဝ ထိန်းချုပ်နယ်မြေ နှင့် သျှမ်းပြည် တပ်မ တော် SSPP/SSA နယ်မြေအကြားသို့ အစိုးရတပ် အင်အားဖြည့်နေကြောင်း ဒေသခံများက ပြောသည်။

“တပတ်လောက်ရှိပြီ ဝင်လာတာ။ မိုင်းရယ်ဘက်မှာတော့ တပ်ချိန်းတယ်လို့ ပြောတယ်။ ကျနော်တို့ ဘက် ဝင်လာတဲ့ စစ်ကား တွေတော့ အပြောင်းအလဲလုပ်တာမဟုတ်ဘူး။ ထပ်ဖြည့်တာ။ အခုလဲ ထပ်လာတယ်။ ကားကြီး ၆ စီး စစ်သားတွေ အပြည့်ဘဲ” - ဟု တန့်ယန်းရောက် လွယ်စေး ဒေသခံ အိုက်ဆိုက် က ပြောပါသည်။

သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA ဗဟိုကော်မတီဝင် ဗိုလ်မှူးနော်လိတ် က - ဝမ့်ဟိုင်းဒေသအနီး အစိုးရတပ်များ အပြောင်းအလဲ လုပ်ခဲ့ကြောင်း၊ သို့သော် တန့်ယန်းမြို့နယ် လွယ်ခေါက်၊ လွယ်စေး ဒေသဘက် သို့ တစီးလျှင် လူသူလက် နက် အင်အား ၃၀ ကျော်ခန့် ပါရှိသည့် အစိုးရစစ်ယာဉ်တန်း (တရုတ်လုပ် ၆ ဘီးကား/ တုန်းဖိုန်းကား) စစ်ကား ၆ စီးခန့်ရောက်ရှိကြောင်း၊ ထို့အတူ မိုင်းရှူးမြို့မှ သံလွင်မြစ်ကမ်း လွယ်ချိုဘက်သို့လည်း အစိုးရစစ်အင်အားများ ထပ်မံရောက် ရှိကြောင်း ပြောပါသည်။

“နမ္မတူ မြို့ဘက်မှာတော့ အစိုးရတပ်က ကျနော်တို့ တပ်ဖွဲ့တွေကို ခြေရာခံလိုက်နေတော့ ရှောင်မရရင် တိုက် ပွဲဖြစ်ရ တာပေါ့။ ကျနော်တို့အနေနဲ့တော့ ကိုယ့်ကိုကိုယ်ကာကွယ်တာပါဘဲ။” - ဗိုလ်မှူးနော်လိတ် က သျှမ်းသံတော်ဆင့်သို့ ဆက်၍ပြောသည်။

မိုင်းရှူးရောက် ဒေသခံ အကြီးအကဲ တဦးဖြစ်သည့် လုံး (ဦး) လိုင်းခမ်း က အစိုးရတပ် နှင့် သျှမ်းပြည်တပ် မတော်အကြား ငြိမ်းချမ်းရေးဆွေးနွေးသော်လည်း အင်အားဖြည့်ခြင်း စစ်ရေးလှုပ်ရှားမှုများ လျှော့ချခြင်း မတွေ့ရသောကြောင့် ဘ၀လုံခြုံမှု အတွက်စိုးရိမ်နေကြောင်း၊ တိုက်ခိုက်ရေးစစ်ကားများပါ ထပ်မံပို့ဆောင် လာသော ကြောင့် အစိုးရတပ် လျှို့ဝှက်စစ်ရေးပြင် ဆင်မှုများရှိနိုင်သည်ဟု သံသယ ရှိကြောင်း သျှမ်းသံတော် ဆင့် သို့ ပြောပါသည်။

၂၀၁၃ ဂျူလိုင်လ အစောပိုင်းက အစိုးရတပ် တင့်ကားများ အမှတ် ၂ (စကခ ) စစ်ဆင်ရေးကွပ်ကဲမှု ဌာနချုပ် မိုင်းနောင်မြို့ နယ်ခွဲသို့ ထပ်မံပို့ဆောင်ခဲ့သည်။ ၂၀၁၃ ဂျူလိုင် ၁၀ ရက်နေ့ခန့်ကလည်း ကျိုင်းတုံမြို့ အခြေစိုက် တြိဂံတိုင်းစစ်ဌာနချုပ် သို့လည်း တင့်ကား အစီး ၂၀ ထပ်မံရောက်ရှိလာသည်ဟု ကျိုင်းတုံမြို့ရှိ အပစ်ရပ်အရာရှိတဦးက ပြောပါသည်။

မြောက်ပိုင်း သျှမ်းပြည်တပ်မတော် ခေါ် SSPP/SSA သည် ၂၀၁၂ ဂျန္နဝါရီလ ၁၃ ရက်က ပြည်ထောင်စု အဆင့် ငြိမ်းချမ်းရေး လက်မှတ်ရေးထိုးထား၏။ သို့သော် ယနေ့တိုင်အစိုးရနှင့် တိုက်ပွဲပေါင်း အကြိမ် ၁၅၀ ထက်မနည်းဖြစ်ပွားနေခဲ့ရ သည်။ တိုက်ပွဲတိုင်းမှာလည်း အစိုးရတပ်ဘက်က ကျူးကျော်တိုက်ခိုက်ခဲ့သည်ဟု သျှမ်းပြည်တပ်မတော် အရာရှိများက ပြောသည်။

ချစ်တင်းနှောအပြီး အမျိုးသားတစ်ဦး သတိလစ်သေဆုံး

ဇော်ဇော်ထွေး

တည်းခိုခန်းတွင် ချစ်သူနှင့် ချစ်တင်းနှောအပြီးတွင် အမျိုးသားတစ်ဦး သတိလစ်သေဆုံးခဲ့မှုတစ်ခု ဇူလိုင် ၂၈ ရက်ကမြောက်ဥက္ကလာပမြို့နယ်တွင် ဖြစ်ပွားခဲ့ရာ ထိုကိစ္စကို မြို့နယ်ရဲစခန်းက အမှုဖွင့်ကာ စုံစမ်းစစ်ဆေးနေကြောင်း ရန်ကုန်တိုင်းရဲစခန်းက သတင်းထုတ်ပြန်သည်။

ရဲများက ယင်းနေ့ မွန်းလွဲ ၂ နာရီတွင် မြောက်ဥက္ကလာပ ဆေးရုံကြီးသို့ အမျိုးသားတစ်ဦး သေဆုံးပြီး ရောက်ရှိနေကြောင်း သတင်းရသဖြင့် သွားရောက်ကြည့်ရှုခဲ့ရာမှ ထိုကိစ္စစတင်ပေါ်ပေါက်ခြင်းဖြစ်သည်ဟု ထုတ်ပြန်ချက်တွင် ပါရှိသည်။

သေဆုံးသူသည် အသက် ၃၈ နှစ်အရွယ်ရှိပြီဖြစ်ပြီး ဒဂုံမြို့သစ် အရှေ့ပိုင်းမြို့နယ်တွင် နေထိုင်သူဖြစ်ပြီး သူသည်မြောက်ဥက္ကလာပမြိှု့နယ် ဃ-ရပ်ကွက်ရှိ တည်ခိုခန်းတွင်သူနှင့် အသက်အရွယ်တူ ချစ်သူနှင့်အတူ ဇူလိုင် ၂၈ ရက် မွန်းလွဲ ၁ နာရီကျော်အချိန်တွင် တည်းခိုနေထိုင်ခဲ့သည်ဟုလည်း ရဲများကအတည် ပြုထားသည်။

သေဆုံးသူသည် ချစ်သူမိန်းကလေးနှင့် နှစ်ကြိမ်ခန့် ချစ်တင်းနှောအပြီးတွင် သတိလစ်မေ့မြောသွားသဖြင့် ဆေးရုံသို့ ပို့ဆောင်ရာလမ်းတွင်ပင် သေဆုံးသွားခဲ့သည်ဟု ရဲများ၏ စုံစမ်းစစ်ဆေးမှုရလဒ်များကို သတင်းထုတ်ပြန်ချက်တွင်ဖော်ပြထားသည်။

အလောင်းတွင် ပြင်ပဒဏ်ရာတစ်စုံတစ်ရာမတွေ့ရသဖြင့် ၎င်းအမျိုးသားသေဆုံးရသည့် အကြောင်းအရင်း မှန်ကိုသေချာစွာစစ်ဆေးရန် မြောက်ဥက္ကလာပဆေးရုံကြီးကို အပ်နှံထားကြောင်း ရဲဌာနကဆိုသည်။

ယခုအမှုကို မြောက်ဥက္ကလာပရဲစခန်းမှ ဒုရဲအုပ်ဇော်မင်းခက်က တရားလိုပြုလုပ်တိုင်တန်းထားပြီး ရဲစခန်းကလည်း အမှုအမှတ်(ပ)၂၉/၁၃ဖြင့် အမှုဖွင့်ထားပြီး ဆက်လက်စစ်ဆေးဆောင်ရွက်မည်ဟု ရဲစခန်းက ထုတ်ပြန်ချက်တွင် ဆက်လက်ဖော်ပြထားသည်။

ABSDF နှင့် MPC ကိုယ်စားလှယ် တို့ ဘားအံ၌ တွေ့မည်

ရွှေဟင်္သာ

မန်မာ နိုင်ငံလုံး ဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF) နှင့် ပြည်ထောင်စု ငြိမ်းချမ်းရေး ဖော်ဆောင်ရေး အဖွဲ့ ဒု-ဥက္ကဋ္ဌ ဦးအောင်မင်းတို့ ဦးဆောင်သည့် ကိုယ်စားလှယ် အဖွဲ့တို့သည့် လာမည့် သြဂုတ်လ (၄) ရက်နေ့၌ ကရင်ပြည်နယ် ဘားအံမြို့၌ တွေ့ဆုံ ဆွေးနွေး မည်ဟု ယနေ့၌ ABSDF မှ ကြေငြာချက် ထုတ်ပြန် ခဲ့သည်။

၎င်းဆွေးနွေး ပွဲတွင် ပြည်တွင်း ငြိမ်းချမ်းရေးနှင့် အမျိုးသား ပြန်လည် သင့်မြတ် ရေးကို ရှေူးရှု ကြောင်းလည်း ဥက္ကဋ္ဌ ဖြစ်သူ ရဲဘော် သံခဲမှ ဆိုပါသည်။

“အဓိက အားဖြင့်တော့ ဗမာ့နိုင်ငံရေး ဖြစ်စဉ်တွေကို ပကတိ အတိုင်း ကြည့်တဲ့ အခါမှာ အဲဒီမှာ တနိုင်ငံလုံး အတိုင်းအတာနဲ့ ပြည်တွင်း ငြိမ်းချမ်းရေးနဲ့ အမျိုးသား ပြန်လည် သင့်မြတ်ရေးဟာ အင်မတန်မှ လိုအပ်တဲ့ အချက် ဖြစ်တယ်၊ လက်နက်ကိုင် အဖွဲ့အစည်းတွေ ရရှိ ထားတဲ့ အပစ်အခတ် ရပ်စဲရေးဟာ ပဏာမ အဆင့် ဆွေးနွေး ရမှာ ဖြစ်သလို၊ တစ်ဖက်မှာလည်း တနိုင်ငံလုံး အတိုင်းအတာ ဆောင်တဲ့ နိုင်ငံရေး ဆိုင်ရာ ဆွေးနွေး ပွဲကြီး ကိုလည်း ဆက်လက် ဆွေးနွေး သွားရမယ်” ဟု ဥက္ကဋ္ဌ ကိုသံခဲမှ ပြောသည်။

အဓိက နိုင်ငံရေး ဆွေးနွေး နိုင်သည့် လုပ်ငန်းစဉ်သို့ မရောက်မချင်း ပြည်တွင်းစစ် ကိုသော် လည်းကောင်း၊ တိုင်းရင်းသား တို့၏ တန်းတူရေးနှင့် ကိုယ်ပိုင် ပြဌာန်းခွင့် ပြသနာ ရပ်များ ကိုသော် လည်းကောင်း၊ အမျိုးသား ပြန်လည် သင့်မြတ်ရေး လုပ်ငန်းစဉ် များကို လည်းကောင်း အကောင် အထည် ဖော်နိုင်မည် မဟုတ် ဟုလည်း ၄င်းမှ သုံးသပ် ပြောကြားသည်။

ABSDF ၏ ဆွေးနွေးရေး ကိုယ်စားလှယ် အဖွဲ့ကို မကဒတ အနောက်ပိုင်း၊ မြောက်ပိုင်း၊ ထိုင်းနိုင်ငံ အခြေစိုက် နယ်မြေ အသီးသီးမှ ကိုယ်စားလှယ်များဖြင့် စုဖွဲ့ ထားပြီး (၃၅) ဦး ပါဝင်မည် ဖြစ်ကာ ဥက္ကဋ္ဌ ရဲဘော် သံခဲမှ ဦးဆောင်မည် ဖြစ်သည်။

ထိုတွေ့ဆုံရန် ရှိသည့် ဘားအံ ဆွေးနွေးပွဲ ရလာဒ် များကိုလည်း တိုင်းရင်းသား ပြည်သူလူထု တရပ် လုံးထံ တင်ပြပေးသွားမည် ဖြစ်ကြောင်း ကြေငြာချက်၌ ဖော်ပြ ထားပါသည်။

ABSDF နှင့် အစိုးရ ငြိမ်းချမ်းရေး ကိုယ်စားလှယ် အဖွဲ့တို့၏ နောက်ဆုံး တွေ့ဆုံ မှုကား ပြီးခဲ့သည့် ၂၀၁၃ ခုနှစ် မေလ ၂၁ ရက်နေ့တွင် ဖြစ်ပြီး အဖွဲ့ဝင် ငါးဦးပါ ABSDF ကိုယ်စားလှယ် အဖွဲ့နှင့် ဗိုလ်မှူးကြီး ကျော်စိုးဝင်း အဖွဲ့ ခေါင်းဆောင်သည့် မြန်မာ့ ငြိမ်းချမ်းရေး စင်တာ အဖွဲ့ (Technical team) တို့ နှစ်ဘက် တွေ့ဆုံ ဆွေးနွေးနိုင်ခဲ့ ကြသည်။

ထိုမတိုင်ခင် ABSDF နှင့် ပြည်ထောင်စု ငြိမ်းချမ်ရေး ဖော်ဆောင်ရေး အဖွဲ့မှ ဦးအောင်မင်း တို့သည် ပြီးခဲ့သည့် ၂၀၁၂ ဇွန်လ၌ မဲဆောက်မြို့၌ တစ်ကြိမ်၊ နိုဝင်ဘာလ (၉) ရက်နေ့၌ ချင်းမိုင်၌ တစ်ကြိမ် တွေ့ဆုံ ခဲ့ကြပြီး ဖြစ်သည်။

ချင်းမိုင် မြို့၌ တွေ့ဆုံ ဆွေးနွေးခဲ့ကြ ပြီးနောက် ပြည်တွင်းသို့ ခရီးစဉ် သွားရောက်ရန် ဦးအောင်မင်းမှ သဘောတူ ခဲ့သဖြင့် ပြီးခဲ့သည့် ၂၀၁၂ ဒီဇင်ဘာလ (၁၈) ရက်နေ့တွင် ABSDF မှ ပြည်တွင်း ခရီးစဉ် သွားရောက် ခဲ့ကာ ဦးအောင်မင်း အပါအဝင် ပြည်တွင်း နိုင်ငံရေး ပါတီများ၊ အလွှာစုံမှ လူထုလူတန်းစား များနှင့် သွားရောက် တွေ့ဆုံ ခဲ့ပြီးလည်း ဖြစ်သည်။

မကွေးနည်းပညာတက္ကသိုလ် ကထိကလေးဦးက ရွာသားငါးဦးကို အမှုဖွင့်

ဝိုင်းအောင်

မကွေးမြို့နည်းပညာတက္ကသိုလ်မှ ကထိကလေးဦးက ရွာသားငါးဦးသည် ၎င်းတို့ကို ဆဲရေးတိုင်းထွာပြီး ထိုးကြိတ်သည်ဟု စွပ်စွဲကာမကွေးနယ်မြေ ရဲစခန်း၌ ဇူလိုင် ၂၈ ရက် နေ့လည်က လာရောက်တိုင်ကြားသဖြင့် အမှုဖွင့်ထားသည်ဟု ထိုရဲစခန်းက သတင်းထုတ်ပြန်သည်။

ယခုကိစ္စကို တိုင်ကြားသည့် ကထိကလေးဦးမှာ ဦးအောင်ကိုကိုကျော်၊ ဦးဟန်ထွန်းအောင်၊ ဦးအောင်ဇင်မြင့်နှင့် ဦးအေးငြိမ်းအောင်တို့ဖြစ်သည်ဟု ရဲစခန်းကအတည်ပြုထားသည်။

ကထိကလေးဦးသည် ဇူလိုင် ၁၆ ရက်က ဂိမ်းဆိုင်မှ နည်းပညာတက္ကသိုလ်သို့ ပြန်လာကြစဉ် ဘော်ဒါဆောင်တစ်ခု အနီးအရောက်တွင် လမ်းမပေါ်တွင် ဂစ်တာနှင့် ဘီယာပုလင်းများကို ဆောင်လာကြသော ကျောင်းအနီးရှိ ကန်ပြားအရှေ့ရွာမှ ရွာသားငါးဦးနှင့် ဆုံခဲ့ကြသည်ဟု ဆိုသည်။

ထိုသို့တွေ့ဆုံစဉ် ရွာသားများက ကထိကများကို "What is your name"ဟု အော်ဟစ်မေးမြန်းကြောင်း၊ ထို့ကြောင် ကထိကများက “မင်းတို့ ကျောင်းသားတွေလား” ဟု ပြန်မေးမိစဉ် ရွာသားများက မချေမငံဆဲ ရေးတိုင်းထွာမှုများပြုလုပ်ကြောင်းကထိကများက ရဲကို ထွက်ဆိုသည်။

ထို့နောက် ကထိကများကကျောင်းသို့ ပြန်လာစဉ် တက္ကသိုလ်အ၀အထိ ရွာသားများကနောက်မှ လိုက်လာပြီး ဆဲရေးတိုင်းထွာကာ ကထိကတစ်ဦးဖြစ်သည့် ဦးအောင်ကိုကိုကျော်၏ နောက်ကျောကို ဘီယာပုလင်းဖြင့် ပစ်ပေါက်သည်ဟုလည်း ကာယကံရှင်က ရဲကိုတိုင်တန်းထားသည်။

ထို့ပြင် အခြားကထိကတစ်ဦးဖြစ်သည့် ဦးဟန်ထွန်းအောင်ကိုလည်း ရွာသားများက လက်သီးများဖြင့် ချိန်ရွယ်ကာ “သတ်ပစ်ရင်တော့ မင်းတို့သေတော့မယ်”ဟု နှုတ်မှပြောကြောင်းလည်း သူတို့ကရဲဌာနတွင် ပြောကြားခဲ့သည်။

ထို့ကြောင့် ယခုကိစ္စနှင့် ပတ်သက်၍ ကထိကများက အသက် ၂၄ နှစ်အရွယ် ကိုအောင်စိုးမိုး၊ အသက် ၂၅ နှစ်အရွယ် ကိုအောင်ကိုမြင့်၊ အသက် ၂၇နှစ်အရွယ် ကိုအောင်လွင်၊ အသက် ၂၇ နှစ်အရွယ် ကိုအောင်ဆန်းမိုးနှင့် အသက်၂၅ နှစ်အရွယ် ကိုရန်နောင်စိုးတို့ ငါးဦးကို ဆဲရေးမှု၊ ထိုးကြိတ်မှုတို့ဖြင့် ရဲဌာန တွင်စွပ်စွဲတိုင်ကြားထားသည်။

မကွေးနယ်မြေ ရဲစခန်းကလည်း ကထိကများ၏ တိုင်ကြားမှုကို အမှုအမှတ်(ပ)၁၄၂/ ၂၀၁၃ ဖြင့် အမှုဖွင့်ထားပြီး စွပ်စွဲခံရသည့် ရွာသားငါးဦးကို ပြစ်မှုဆိုင်ရာ ဥပဒေပုဒ်မ ၁၁၄ ပြစ်မှုကျူးလွန်ရန် အားပေးကူညီမှု၊ ပုဒ်မ ၂၉၄ ဆဲရေးမှု၊ ပုဒ်မ ၃၂၃ နာကျင်စေမှု၊ ပုဒ်မ ၅၀၆ ရာဇ၀တ် မကင်းသောချောက်လှန့်မှုတို့ဖြင့် တရားစွဲဆိုရန် ဆောင်ရွက်မည်ဟု သတင်းထုတ်ပြန်သည်။

ဘ၀ရှင်မင်းတရားကြီး အန္တရာယ်

ညီစောလွင်

ဒီခေါင်းစဉ်ကို နိုင်ငံရေးသိပံ္ပပညာရှင် နှစ်ယောက်ဖြစ်တဲ့ အဲဖရက် စတီဗင်နဲ့ ဂျူအန် လူဝစ်တို့ရဲ့ စာတမ်း ခေါင်းစဉ်ကနေ ပွားယူထားတာပါ။ ပထမတယောက်ကတော့ ကိုလံဗီယာ တက္ကသိုလ်က ပါမောက္ခဖြစ်ပြီး ဒုတိယတယောက်က ယေးလ်တက္ကသိုလ် ပါမောက္ခပါ။

လွန်ခဲ့တဲ့ ၁၅ နှစ်လောက်က သူတို့ နှစ်ယောက် ပူးတွဲရေးခဲ့တဲ့ စာအုပ် ဒီမိုကရက်တိုက်ဇေးရှင်း ပြသနာများ (Problems of Democratic Transition and Consolidation: Southern Europe, South America, and Post-Communist Europe) စာအုပ်က ထင်ရှားပါတယ်။ ဥရောပတောင်ပိုင်း၊ တောင်အမေရ်ိကနဲ့ ဥရောပ ကွန်မြူနစ်နိုင်ငံဟောင်းတွေရဲ့ ဒီမိုကရေစီ အသွင်ကူးပြောင်းရေး ဖြစ်စဉ်တွေအပေါ် ချဉ်းကပ်တင်ပြခဲ့ပါတယ်။ အာရပ်နွေဦး မတိုင်ခင်အထိ ထပ်ဖြည့်စရာ မလိုအပ်သေးတဲ့ သီအိုရီလို့ ဆိုနိုင်ပါလိမ့်မယ်။

ဒါပေမယ့် လက်ရှိ အာရပ်နွေဦးရဲ့ ထူးခြား ဖြစ်စဉ်တွေအပေါ် အခြေခံပြီး သူတို့ မူရင်း သီအိုရီအပေါ်မှာ ထပ်ဖြည့်စွက်စရာပေါ်လာလုိ့ နောက်ထပ် စာတမ်းငယ်တစ်စောင်ကို ရေးပါတယ်။ အခု စာစုမှာ ပညာရှင်နှစ်ယောက်ရဲ့ အာဘော်တွေကို မိတ်ဆက်ရင်း မြန်မာ့နွေဦးအပေါ် တင်ကြည့်ချင်တဲ့ သဘောပါပဲ။

အမေရိကန် သမ္မတ ဘားရတ်အိုဘားမားဆီကနေ သမ္မတ ဦးသိန်းစိန် ငှားသုံးထားတဲ့ စကားတခွန်းကို သိကြမယ်ထင်ပါတယ်။ ဦးသိန်းစိန်နဲ့ အိုဘားမားတို့ ရန်ကုန်မှာ ခဏတွေ့တဲ့ အချိန်မှာ ဦးသိန်းစိန်ရဲ့ တခွန်းတည်းသော အင်္ဂလိပ်စကားက Move Forward ဆိုတဲ့စကားပါ။ အနာဂတ်ကို မျက်နှာမူပြီး “ရှေ့သို့ချီတက်” နေပါတယ်ဆိုတဲ့ အဓိပ္ပါယ်လို့ ကောက်ယူနိုင်ပါလိမ့်မယ်။

ဒီမှာ မေးစရာ မေးခွန်းက ဘယ်ကနေ လာလို့ ဘယ်ကို ချီတက်မှာလဲ ဆိုတဲ့ မေးခွန်းပါပဲ။ ဒီမိုကရေစီအသွင်ကူးပြောင်ရေးမှာ ဘယ်ကလာသလဲဆိုတဲ့ မေးခွန်းက အခြေခံ ကျပါတယ်၊ ဒီအခြေခံ (ရေခံမြေခံ) အပေါ် မူတည်ပြီး တနိုင်ငံနဲ့ တနိုင်ငံ အတွေ့အကြုံတွေကလည်း ခြားနားပါတယ်။

သီအိုရီသဘောအရ ဒီမိုကရေစီမဟုတ်တဲ့ အစိုးရ ၅ မျိုး ရှိပါတယ်။

(၁) တစိတ်တပိုင်း အာဏာပိုင်စနစ် (authoritarianism)
(၂) အကြွင်းမဲ့ အာဏာရှင်စနစ် (totalitarianism)
(၃) အကြွင်းမဲ့ အာဏာရှင်စနစ် အလွန် (post-totalitarianism)
(၄) ဘ၀ရှင်မင်းတရား စနစ် (sultanism)
(၅) ဒီမိုကရေစီတပိုင်း အာဏာရှင်စနစ် (authoritarian democratic hybrid)။

အထက်က ငါးမျိုးအပြင်၊ အရောအစပ်၊ အလျှော့အတင်းနဲ့ မူကွဲတွေလည်း ဖြစ်နိုင်ပါတယ်။ စာရှည်မှာစိုးလို့ အသေးစိတ်အထိ မသွားတော့ပါဘူး။ ဥပမာ အခု လှုပ်လှုပ်ရှားရှားဖြစ်နေတဲ့ အီဂျစ်၊ လစ်ဗျား၊ တူနီးရှား၊ ဆီးရီးယား တို့မှာ ရှိခဲ့တဲ့၊ ရှိနေတဲ့ ဒီမိုကရေစီမကျတဲ့ အုပ်ချုပ်မှုစနစ်တွေကို ကြည့်ရင် နံပါတ် (၄) နဲ့ (၅) လက္ခဏာတွေ ရှိနေတယ်လို့ ပညာရှင်နှစ်ဦးက သတ်မှတ်ပါတယ်၊ မြန်မာပြည်ရဲ့ အခြေအနေကို ကြည့်ရင်လည်း ဒီသဘောမျိုးပဲ တွေ့ရပါတယ်။

သတင်းကောင်းကတော့ ဒီမိုကရေစီတပိုင်း အာဏာရှင်စနစ် (authoritarian democratic hybrid) ပုံစံဟာ ဒီမိုကရေစီ အသွင်ကူးပြောင်းရေးအတွက် လမ်းကြောင်း ဖြောင့်ဖြူးနိုင်တဲ့ပုံစံ ဆိုတာပါပဲ။ “Four-Player Game” လို့ ခေါ်တဲ့ အာဏာရှင်အစိုးရအဖွဲ့ထဲက သဘောထား ပျော့ပျောင်းသူတွေနဲ့ အတိုက်အခံက သဘောထား ပျော့ပျောင်းသူတွေ ပေါင်းမိ၊ နှစ်ဘက်စလုံးက သဘောထားတင်းမာသူတွေကို ဘေးဖယ်ပြီး ဒီမိုကရေစီ အသွင် ကူးပြောင်းရေးကို ဖန်တီးတဲ့ ပုံစံမျိုးဖြစ်ပါတယ်။

ဒါပေမယ့် အာရပ်နိုင်ငံတွေမှာ အပြောင်းအလဲက “Four-Player Game” ပုံစံနဲ့ မဖြစ်ခဲ့ဘဲ အာဏာရှင် ဖြုတ်ချရေးအထိ ခရီးကြမ်းကို ဖြတ်သန်းနေရပါတယ်၊ ဒါက သတင်းဆိုးဖြစ်သလို မြန်မာပြည် ဒီမိုကရေစီ အသွင်ကူးပြောင်းရေးအတွက် စိုးရိမ်စရာ ကိစ္စလည်း ဖြစ်နေပါတယ်။ အခုလို ဒီမိုကရေစီအသွင်ကူးပြောင်းဖို့ ခက်ခဲနေရတဲ့ အကြောင်းအရင်းက ဘ၀ရှင်မင်းတရားစနစ် (sultanism) ကြောင့်လို့ ဆိုနိုင်ပါတယ်။

Max Weber ရဲ့ အဓိပ္ပါယ်ဖွင့်ဆိုချက်အရ Sultanism ဆိုတာ အဖေ့အရိုက်အရာကို သားက ဆက်ခံတဲ့ စနစ်၊ အုပ်ချုပ်ရေးကို လက်ဝါးကြီးအုပ်ချယ်လှယ်ပြီး စစ်တပ်ကလည်း အရှင်သခင်ရဲ့ တစ်လက်ကိုင်တပ်ဖွဲ့ ဖြစ်နေတာကို ဆိုလိုပါတယ်။ တနိုင်ငံလုံးမှာ အာဏာရှင်က သူ့လက် သူ့ခြေ၊ တနိုင်ငံလုံးကို သူပိုင်ပစ္စည်းလို သဘောထားတာမျိုးပါ။

ဒါကြောင့် Sultanism အမာဖြစ်နေရင် “Four-Player Game” မရှိပါဘူး။ အုပ်စိုးတဲ့ စနစ်ထဲက သဘောထား ပျော့ပျောင်းတယ်လို့ သံသယရှိသူတွေကို အပြတ် ချေမှုန်းဖို့ပဲ ရှိပါတယ်။ ဒါကြောင့် အတိုက်အခံဘက်ကလည်း သူသေကိုယ်သေ အပြတ်ချရေးကလွဲလို့ တခြားနည်းလမ်း မရှိပါဘူး။ အတိုက်အခံကို မလှုပ်နိုင်အောင် ဖိထားရေးဟာ ဒီစနစ်ကို တည်မြဲစေဖုိ့ အဓိက သော့ချက်ဖြစ်သလို၊ အတိုက်အခံတွေဘက်ကလည်း အသွင်ကူးပြောင်းရေးအတွက် အကြမ်းဖက် နည်းလမ်းကလွဲလို့ တခြား ရွေးစရာ မရှိတဲ့ ပုံစံမျိုးဖြစ်ပါတယ်။ ဒီစနစ်အောက်မှာ အာဏာရှင်ရဲ့ အဓိက ဖိနှိပ်ရေး လက်နက်ဟာ စစ်တပ်ပါပဲ၊ စစ်တပ်ဟာ အရှင်သခင်ကို သက်ပေးကာကွယ်တဲ့ တလက်ကိုင် အဖွဲ့ဖြစ်ပါတယ်။

အထက်က ပုံစံထက် ပျော့ပျောင်းတဲ့ စနစ်ကတော့ သက်ဦးဆံပိုင်စနစ်ဆိုပေမယ့် တချို့သော စီးပွားရေးလုပ်ငန်း၊ ဘာသာရေး အုပ်စုတွေကို အတိုင်းအတာတခုအထိ လွတ်လပ်ခွင့်ပေးထားတဲ့ အနေအထားမျိုးပါ။ ဒီစနစ်အောက်မှာလည်း “Four-Player Game” နဲ့ ချောမွေ့တဲ့ ဒီမိုကရေစီ အသွင်ကူးပြောင်းရေး ဖြစ်စဉ်မျိုးကို ဖြစ်နိုင်ပေမယ့် မြင်ရခဲပါတယ်။ ဖိလစ်ပိုင်မှာ ဖြစ်သွားတဲ့ ဖာဒီနန် မားကို့စ် အစိုးရ ပြုတ်ကျသွားတဲ့ (၁၉၈၆) အခြေအနေက ဖြစ်တောင့် ဖြစ်ခဲ ပုံစံပါပဲ။ ဖိလစ်ပိုင်အခြေအနေမှာ ဒီမိုကရေစီအင်အားစုဘက်က ဖိအားပေးလာတဲ့အခါ စစ်တပ်ကလည်း မားကို့စ်ကို စွန့်စားပြီး အကာအကွယ်မပေးခဲ့တဲ့ အခြေအနေမျိုးပါ။ ၂၀၁၁ အီဂျစ်မှာ တွေ့ရတဲ့ ပုံစံနဲ့ ဆင်တူပါတယ်။

မူဘာရတ်လက်အောက်က အီဂျစ်၊ ကဒါဖီ လက်အောက်က လစ်ဗျား၊ ဘန်အာလီ လက်အောက်က တူနီးရှား၊ အာဆတ် လက်အောက်က ဆီရီးယားတို့မှာ Sultanism စနစ်တွေကို ဒီဂရီအမျိုးမျိုးနဲ့ တွေ့ရပါတယ်။

ကဒါဖီရဲ့ လစ်ဗျားက Sultanism စနစ်ရဲ့ အပီပြင်ဆုံး ပုံစံပါပဲ။ သူ့ကို ဖြုတ်ချဖို့အတွက် အတိုက်အခံဘက်က သူပုန်ထခဲ့ရသလို၊ ကုလသမဂ္ဂ ဦးဆောင်တဲ့ နေတိုးတပ်ကလည်း စစ်ကူပေးမှ ပြုတ်ကျသွားပါတယ်။ ကဒါဖီ အလွန် လစ်ဗျားမှာ လက်နက်ကိုင် စစ်သွေးကြွအဖွဲ့တွေ အနည်းဆုံး ၆၀ လောက် ရှိပါတယ်။ ကိုယ့်နယ်မှာ ကိုယ်ထင်သလို ပါဝါပြနေကြတယ်။ ဗဟိုအစိုးရက အစိုးရတရပ်အနေနဲ့ တိုင်းပြည်မှာ အာဏာသက်ရောက်နိုင်စွမ်း မရှိပါဘူး။ No State = No Democracy လို့ ဆိုတဲ့ အတိုင်း လစ်ဗျား ဒီမိုကရေစီက အလှမ်းဝေး ပါသေးတယ်။

အာဆတ်လက်အောက်မှာလည်း ဆီရီးယားက ကဒါဖီလောက် တင်းတင်းကျပ်ကျပ်မဟုတ်ပေမယ့် Sultanism ပုံစံမျိုးပါပဲ။ တိုင်းပြည်ထဲမှာ စီးပွားရေးအရ အတိုင်းအတာတစ်ခုအထိ လွတ်လပ်ခွင့်ပေးထားတာပဲ လျှော့ရဲပါတယ်။ အာဆတ်က သူ့အဖေဆီက တိုင်းပြည်အာဏာကို ဆက်ခံပြီး စစ်တပ်ထဲက ခေါင်းဆောင်မှန်သမျှ အာဆတ်ရဲ့ လူယုံတွေချည်းပါပဲ။ သူနဲ့ အနွယ်တူတဲ့ အာလ၀ိုက် ဘာသာရေး ကိုးကွယ်သူတွေကိုပဲ စစ်တပ်ထဲမှာ နေရာပေးထားတယ်။ ဒါကြောင့် အာဆတ်ရဲ့အကျိုးစီးပွားက စစ်တပ်ရဲ့ အကျိုးစီးပွားလည်း ဖြစ်နေပါတယ်။ အာဆတ်ပြုတ်ရင် စစ်တပ်ကလည်း ဒုက္ခရောက်မယ်ဆိုတာကို စစ်တပ်က ကောင်းကောင်း သဘောပေါက်ပါတယ်။ ဒါကြောင့် ဆီရီးယားမှာ ပြည်တွင်းစစ်ကြီးကျယ်ပြန့်နေတုန်း၊ ဒီမိုကရေစီ အသွင်ကူးပြောင်းရေးနဲ့ အလှမ်းဝေး နေတုန်းပါပဲ။

မူဘာရတ်လက်အောက်က အီဂျစ်မှာလည်း ခရိုနီ အရင်းရှင်ဝါဒကို ကျင့်သုံးသလို အသက် ၉၀ တန်း ရောက်နေတဲ့ မူဘာရတ် လွန်တဲ့အခါ သူ့သား ဂမ်မေး မူဘာရတ်ကို အာဏာလွှဲပေးဖို့ လျာထားခဲ့တယ်။ ဒါပေမယ့် ထူးခြားချက်က လစ်ဗျားနဲ့ ဆီရီးယား စစ်တပ်တွေနဲ့ နှိုင်းယှဉ်ရင် အီဂျစ်စစ်တပ်ဟာ အော်တိုနိုမီနဲ့ အင်စတီကျူးရှင်း ပုံစံနဲ့ ရပ်တည်နိုင်တယ်။ နိုင်ငံထဲက နိုင်ငံငယ်လေးလို လည်ပတ်နေတယ်လို့တောင် ဆိုကြပါတယ်။ စီးပွားရေးကဏ္ဍ အတော်များများကို စစ်တပ်က လက်ဝါးကြီး အုပ်ထားပါတယ်။

ဒီကြားထဲမှာ မူဘာရတ်ရဲ့သား ဂမ်မေးက စစ်တပ် အကျိုးစီးပွားရေးတွေကို ဆန့်ကျင်ပြီး စီးပွားရေး ပြုပြင်ပြောင်းလဲမှုတွေကို ဖော်ဆောင်ဖို့ ခြေလှမ်းပြင်တဲ့အခါ စစ်တပ်နဲ့ ရန်စောင်လာတယ်။ လူထုအုံကြွမှုတွေ ပေါ်ပေါက်လာတဲ့အခါ စစ်တပ်က ပြည်သူတွေဘက်ကနေ ၀င်ရပ်ပြီး နာမည်ကောင်းဝင်ယူတယ်။ မူဘာရတ်ကို အကာအကွယ်မပေးတော့ဘူး။ မူဘာရတ် ပြုတ်ကျသွားတယ်၊ ရွေးကောက်ပွဲ နည်းလမ်းနဲ့ အာဏာရလာတဲ့ မော်စီ တက်လာတယ်။ ဒီကြားထဲမှာ လစ်ဘရယ်တွေနဲ့ အစ္စလမ္မစ် ၀ါဒီတွေကြားမှာ သဘောကွဲရာကနေ စစ်တပ်က နောက်ထပ် တကြိမ် အာဏာသိမ်းပြန်ပါတယ်။

ဒီမိုကရေစီ အသွင်ကူးပြောင်းရေးမှာ တွေ့ရလေ့ရှိတဲ့ အန္တရာယ် နှစ်ရပ်ရှိပါတယ်။ လူမျိုးရေး ဘာသာရေး ပဋိပက္ခနဲ့ စီးပွားရေး ဖွံ့ဖြိုးတိုးတက်ဖို့ လူတွေရဲ့ မျှော်လင့်ချက်တွေ မြင့်မားလွန်းနေတဲ့ ကိစ္စလို့ ဆိုပါတယ်။ အီဂျစ်မှာ ဖြစ်သွားတဲ့ ကိစ္စဟာ ဒီပြသနာ နှစ်ရပ်စလုံးနဲ့ ဆိုင်ပါတယ်။

စီးပွားရေး ဖွံ့ဖြိုးတိုးတက်ရေးဆိုတာကလည်း စစ်တပ် အကျိုးစီးပွားတွေကို ဘယ်အတိုင်းအတာအထိ အထိခိုက်ခံပြီး ပြောင်းလဲမလဲဆိုတဲ့အပေါ်မှာ မူတည်နေ ပါတယ်၊ အာရပ်နိုင်ငံတွေထဲမှာ Sultanism စနစ် အပျော့ပျောင်းဆုံး နိုင်ငံက တူနီးရှားလို့ ဆိုနိုင်ပါတယ်။ ဘန်အာလီ မိသားစုက တူနီးရှားရဲ့ စီးပွားရေးကို သူတို့ အပိုင်လို ထင်တိုင်းကျဲတဲ့ ကိစ္စက လွဲလို့ တူနီးရှား စစ်တပ်ဟာ ပရော်ဖက်ရှင်နယ်စစ်တပ်အဖြစ် ရပ်တည်ပါတယ်။ အင်အားကလည်း ၄ သောင်း မပြည့်ပါဘူး။ အစိုးရရဲ့ အဓိက လက်ကိုင်တုတ်က ရဲတပ်ဖွဲ့ ဖြစ်ခဲ့ပါတယ်။

နောက်ဆုံး လူထု အုံကြွမှုတွေ ပေါ်ပေါက်လာတဲ့အခါ ရဲတပ်ဖွဲ့က အကြမ်းဖက်တာမျိုး မကျူးလွန်အောင် စစ်တပ်က ဟန့်တားနိုင်ခဲ့ပါတယ်၊ အာဏာရှင်ကို စစ်တပ်က အကာအကွယ်မပေးဘဲ တိုင်းပြည်ကနေ ထွက်ပြေးဖို့ပဲ အခွင့်အရေး ပေးခဲ့ပါတယ်။ အီဂျစ်မှာလို စစ်တပ်အနေနဲ့ အခွင့်ထူးခံ အနေအထားမရှိတဲ့အတွက် ဒီမိုကရေစီ အသွင်ကူးပြောင်းရေးကို စစ်တပ်က ထောက်ခံသွားမယ့် သဘောရှိပါတယ်။ ဒါကြောင့် တူနီးရှားရဲ့ ဒီမိုကရေစီ အသွင်ကူးပြောင်းရေး ခရီးက တခြား နိုင်ငံတွေထက် အခြေအနေ ကောင်းတယ်လို့ ဆိုနိုင်ပါတယ်။

အထက်က ဥပမာတွေကို ကြည့်ရင် မြန်မာပြည်နဲ့ တနည်းမဟုတ် တနည်းနဲ့ ဆင်တူနေတာကို တွေ့နိုင်ပါတယ်။ ဒါကြောင့် မြန်မာပြည်ရဲ့ အသွင်ကူးပြောင်းရေးဟာလည်း ဒီနိုင်ငံတွေနည်းတူ ခက်ခဲမယ်လို့ သဘောပေါက်နိုင်ပါတယ်။

အစက မေးခွန်းကို ပြန်ကောက်ရရင် မြန်မာပြည် ဒီမိုကရက်တိုက်ဇေးရှင်းက ဘယ်ကနေ လာပြီး ဘယ်ကို သွားမှာလဲ။ မြန်မာပြည် ဒီမိုကရေစီတည်ဆောက်ရေး လမ်းကြောင်း ဖြောင့်ဖြူးမယ်၊ မဖြောင့်ဖြူးဘူး၊ ငြိမ်းချမ်းတဲ့ ပဋိညာဉ်အရ အပြောင်းအလဲ (peaceful “pacted” transition) ဖြစ်မဖြစ်၊ မေးခွန်းတွေနဲ့ အကဲဖြတ်နိုင်ပါတယ်။ မြန်မာပြည်မှာ Sultanism စနစ် အသက်ဝင်နေသလား၊ တည့်တည့်ပြောရရင် ဘ၀ရှင် မင်းတရားကြီး နောက်ကွယ်မှာ ရှိနေသေးသလား။ စစ်တပ်က ခေတ်အဆက်ဆက် ရခဲ့တဲ့ နိုင်ငံရေးနဲ့စီးပွားရေး အခွင့်ထူးခံတာတွေကို ဆက်ပြီး ကာကွယ်နေသလား။ ဘ၀ရှင်မင်းတရားကြီး (Sultan) နဲ့ အပေါင်းအပါတွေရဲ့ အကျိုးစီးပွားကိုပဲ အသေအလဲ အကွယ်ပေးနေတာလား ဆိုတဲ့မေးခွန်းတွေပါပဲ။

Move Forward လို့ ပြောနေပေမယ့် ဦးသိန်းစိန် အစိုးရအဖွဲ့ဟာ အရင်စစ်အစိုးရအဖွဲ့ထဲက ထိပ်တန်းခေါင်းဆောင်တွေနဲ့ ဖွဲ့ထားတဲ့အဖွဲ့ ဖြစ်နေလို့ ဒီမေးခွန်းက ပိုပြီး အရေးကြီးပါတယ်။ ဘဝရှင်မင်းတရားကြီး အနားယူသွားပြီ၊ စာဖတ်နေပြီလို့ ဆိုပေမယ့် သူ ချန်သွားခဲ့တဲ့ စနစ်နဲ့ ယန္တရားတွေက မြန်မာပြည် ရှေ့ခရီးအတွက် အန္တရာယ်ရှိနေဆဲပဲလို့ ကျနော် ထင်မြင်နေမိပါတယ်။


(ညီစောလွင်သည် မြန်မာ့အရေးနှင့် ကမ္ဘာ့ရေးရာ သုံးသပ်ချက်များကို ရေးသားနေသူ ဖြစ်သည်။ ထိုင်းနိုင်ငံ ချင်းမိုင်မြို့တွင် လတ်တလော နေထိုင်သူဖြစ်သည်။)