ရခိုင်ပြည်နယ် ကျောက်တော်မြို့နယ် ငစရိုင်းကိုင်း ကျေးရွာသို့ စစ်ပြေးရှောင်များ ထပ်မံ ရောက်ရှိလာသည်ဟု သတင်းရရှိသည်။
စစ်ပြေးရှောင် ဒုက္ခသည် တစ်ဦးဖြစ်သူ ဦးလှမောင်သိန်းက “ မနေ့ ညနေ ခြောက်နာရီခွဲမှာ အမျိုးသား အမျိုးသမီး စုစုပေါင်း ၁၇ ဦးထပ်မံ ရောက်ရှိလာပါတယ်။ သူတို့က လိပ်ဖားရွာက ဖြစ်ပါတယ်” ဟု ပြောသည်။
ယမန်နေ့က ထပ်မံ ရောက်ရှိလာသူ ၁၇ ဦးထဲတွင် အမျိုးသား ၇ ဦးနှင့် အမျိုးသမီး ၁၀ ဦးဖြစ်ကြောင်း သိရသည်။
အလားတူ လွန်ခဲ့သော အပတ်ကလည်း ကင်းပိ ကျေးရွာမှ အမျိုးသား ၁၉ ဦး၊ အမျိုးသမီး ၁၇ ဦး၊ စုစုပေါင်း ၃၆ ဦးရောက်ရှိလာပြီး မီးကျောင်းခုတ်ကျေးရွာကလည်းအမျိုးသား ၇ ဦး၊ အမျိုးသမီး ၆ ဦး၊ စုစုပေါင်း ၁၃ ဦး ရောက်ရှိလာခဲ့သည်ဟု ပြောသည်။
“ သူတို့ထွက်ပြေးလာတာက ဟိုမှာ စစ်ကြောင်းတွေရှိနေတယ်။ လုပ်ကိုင်စားသောက်ဖို့ ကျပ်တည်းလာတယ်။ ဒီလို အခြေအနေတွေကြောင့် သူတို့ ထွက်ပြေးလာကြတာ ဖြစ်ပါတယ်” ဟု သူက ဆက်လက် ပြောဆိုသည်။
ယခုလက်ရှိ ငစရိုင်းကိုင်းတွင် စစ်ပြေးရှောင် ဒုက္ခသည် စုစုပေါင်းမှာ ၁၇၁ ယောက်ရှိပြီး စားရေး သောက်ရေး အဆင်ပြေသော်လည်း မိုးစရွာနေပြီ ဖြစ်သဖြင့် နေထိုင်ရန် အိမ်များမရှိ၍ အထူးအခက်အခဲ ဖြစ်နေသည်ဟု သိရသည်။
No comments:
Post a Comment