ဖနိဒါ
ရှမ်းပြည်နယ် မြောက်ပုိုင်း မန်တုံမြို့နယ်နှင့် နမ့်ခမ်းမြို့နယ်အတွင်း တအာင်းအမျိုးသားလွတ်မြောက်ရေးတပ်(TNLA) နှင့် ရှမ်းပြည်ပြန်လည်ထူထောင်ရေးကောင်စီ၊ ရှမ်းပြည်နပ်မတော် (RCSS/SSA) တုို့အကြား မေလ ၁ ရက်က ပြင်းပြင်းထန်ထန် တုိုက်ပွဲ ထပ်မံ ဖြစ်ပွားခဲ့သည်ဟု နှစ်ဖက် ပြောရေးဆုိုခွင့်ရှိသူများက ပြောသည်။
မေလ ၁ ရက် နံနက် ၈ နာရီ ၄၅ မိနစ်တွင် ရှမ်းပြည်နယ်မြောက်ပုိုင်း မုိုင်းဝီးမြို့နယ် ဆုိုင်းလိန်ကျေးရွာအနောက်ဘက်ရှိ RCSS/SSA တပ်ဖွဲ့အား TNLA မှ ထုိုးစစ်ဆင်တုိုက်ခုိုက်ခဲ့သဖြင့် တုိုက်ပွဲ ဖြစ်ပွားခဲ့ရသည်ဟု RCSS/SSA ဒုဗုိုလ်မှူးကြီး စိုင်းမိန်းက ပြောသည်။
“တအာင်းတပ်က ကျွန်တော်တုို့ကုို ပြန်ပြီးတော့ တုိုက်ခုိုက်လာတာ ဖြစ်ပါတယ်။ မုိုင်းဝီးမြို့နယ်မှာပါ။ မနက် ၈ နာရီ ၄၅ မိနစ်ကစပြီးတော့ မုိုင်းဝီးမြို့နယ် ဆုိုင်းလိန်ကျေးရွာအုပ်စု ဆုိုင်းလိန်ရဲ့ အနောက်ဘက်မှာ ရှိတဲ့ ကျွန်တော်တုို့ရဲ့ တပ်ဖွဲ့ တစ်ဖွဲ့ကုို TNLA က စစ်ကြောင်း နှစ်ကြောင်းနဲ့ နှစ်ဖက် ညှပ်ပြီးတော့ ထုိုးစစ်ဆင်တုိုက်ခုိုက်ခဲ့ပါတယ်။ မွန်းလွဲပုိုင်းထိလဲ တုိုက်ပွဲ ဖြစ်တယ်လုို့ ကြားသိနေရပါတယ်”ဟု သူက မဇ္စျိမကို ပြောသည်။
ယခုတုိုက်ပွဲသည် TNLA ဘက်မှ ၆၀ မမ လက်နက်ကြီးဖြစ် တုိုက်ခုိုက်ဖြစ်ခတ်၍ ထုိုးစစ်ဆင်တုိုက်ခုိုက်ခဲ့သဖြင့် စီမံချက်ဖြင့် တုိုက်ခုိုက်ခြင်း ဖြစ်သည်ဟု ယူဆကြောင်း သူက ပြောသည်။
“ကျွန်တော်တို့ ဘက်ကတော့ တွေ့ဆုံဆွေးနွေးရေးအတွက် ကမ်းလှမ်းထားတဲ့အခြေအနေမှာ ရှိတယ်။ ဒီကြားထဲမှာ တွေ့ဆုံ ဆွေးနွေးဖို့ လုိုလားသလုို၊ TNLA ကုို ရန်သူအနေနဲ့ မထားဘူးဆုိုတဲ့အတွက်ကြောင့် တွေ့ဆုံဆွေးနွေးမှုကို လက်ခံတယ်။ က်ျတုို့ကော်မတီလည်း ဖွဲ့ထားပြီးသားဖြစ်ပါတယ်”ဟု သူက ပြောသည်။
ယနေ့ မေလ ၁ ရက်တွင် မန်တုံမြို့နယ်၊ နမ့်ခမ်းမြို့နယ်အတွင်း တုိုက်ပွဲ သုံးနေရာဖြစ်ပွားခဲ့ပြီး မန်တုံမြို့နယ် ဆုိုင်းလိန် ကျေးရွာတွင် ဖြစ်ပွားခဲ့သော တုိုက်ပွဲသည် နံနက် ၈ နာရီခွဲမှာ ညနေ မုိုးချုပ်သည်အထိ ဖြစ်ပွားခဲ့ပြီး နမ့်ခမ်းမြို့နယ် လွယ်ဟောမ် ကျေးရွာ အနီးဖြစ်ပွားသော တုိုက်ပွဲသည် မွန်းလွဲ တစ်နာရီတွင် နာရီဝက်ကြာ ဖြစ်ပွားခဲ့ပြီး၊ မုိုင်းဝီးကျေးရွာ အနီးဖြစ်ပွားသော တုိုက်ပွဲသည် နံနက် ၁၁ နာရီမှ ညနေ ၇ နာရီထိ တုိုက်ပွဲ ဖြစ်ပွားခဲ့သည်ဟု TNLA မှ ပြန်ကြားရေးတာဝန်ခံ မုိုင်းအုိုက်ကျော်က ပြောသည်။
“ဒီမနက် ၈ နာရီခွဲကျော်လောက်က စတာ မုိုင်းတုံမြို့နယ်မြို့နယ် ဆုိုင်းလိန်အထက်မှာ ဖြစ်တယ်။ ၂၀၁၅ နုိုဝင်ဘာလ တတိယပတ်မှ တုိုက်ပွဲစဖြစ်တယ်။ အဲဒီမှာ မြန်မာ့တပ်မတော်က ကြားကနေ ဝင်ရှင်းတော့ ထုိုးစစ်တော်တော်များတယ်။ ကျွန်တော်တို့လည်း အဲဒီ နယ်မြေမှာ ရှောင်သွားတယ်။ အဲဒီမှာ တုိုက်ပွဲ ငြိမ်သွားတယ်။ နောက်ပုိုင်းမှာ RCSS က ပြန်မသွားဘူး။ ကျနော်တုို့ လှုပ်ရှားနယ်မြေမှာ စခန်းအခုိုင်အမာဆောက်လုပ်ပြီး လှုပ်ရှားမှု ပုိုမုို ပြုလုပ်လာတာရှိတယ်တယ်။ အဲဒါကြောင့်မို့ နှစ်ဖက် ရင်ဆုိုင်တုိုက်ပွဲ ၃ နေရာဖြစ်တယ်”ဟု သူက မဇ္စျိမကုို ပြောသည်။
လက်ရှိ တုိုက်ပွဲဖြစ်ပွားသော နယ်မြေများတွင် ယခင်က RCSS အခြေချခြင်းမရှိသော်လည်း ၂၀၁၅ ခုနှစ် အောက်တုိုဘာလ ၁၅ ရက်က NCA လက်မှတ်ရေးထုိုးပြီးနောက် ၄င်းတုို့ နယ်မြေသုို့ ကျူးကျော်ဝင်ရောက်လာသဖြင့် တုိုက်ပွဲ ဖြစ်ပွားရခြင်း ဖြစ်သည်ဟု သူက ပြောသည်။
ဧပြီလ ၂၃ ရက်ကလည်း UNFC နှင့် ဝ ပြည်သွေးစည်းညွတ်ရေးပါတီ (UWSP)တုို့ကုိုလည်း တုိုက်ပွဲဖြစ်ပွားမှုအား ညှိနှိုင်းပေးရန်အတွက် စာရေးသားပေးပုို့ ထားသည်ဟု ဒုဗုိုလ်မှူးကြီး စုိုင်မိဏ်းက မဇ္စျိမကုို ပြောသည်။
“UWSA ကလည်း အကျိုးဆောင်ပေးမယ်ဆုိုတဲ့ စေတနာမျိုးရှိတဲ့ ပုံစံမျိုးရှိတယ်ဆုိုတာ ကြားသိရတယ်။ ဒါကြောင့် ကျနော်တုို့ တွေ့ဆုံဆွေးနွေးရေးအတွက် သူတို့ အကျုိးဆောင်ပေးမယ်ဆုိုရင်လည်း ကျနော်တို့ကတော့ လက်ကမ်းကြိုဆုိုပါကြောင်း ပြန်ပြီး အကြောင်းကြားထားတာ ဖြစ်ပါတယ်”ဟု ဒုဗုိုလ်မှူးကြီး စုိုင်မိဏ်းက ပြောသည်။
ပြီးခဲ့သည့် ၂၀၁၅ ခုနှစ် နုိုဝင်ဘာလ ၂၇ ရက်မှစတင်၍ တုိုက်ပွဲ စတင်ဖြစ်ပွားခဲ့ပြီနောက် နှစ်ဖက် တုိုက်ပွဲ ဖြစ်ပွားနေမှုနှင့် ပတ်သက်၍ ကြားဝင် ညှိနှိုင်းပေးရန်အတွက် ညီညွတ်သော တုိုင်းရင်းသားလူမျိုးများ ဖက်ဒရယ် ကောင်စီ(UNFC)က ကြားဝင် ညှိနှိုင်းဆွေးနွေးမှုများ ပြုလုပ်ခဲ့သော်လည်း ယခုထိ နေရာနှင့် အချိန်ကုို ညှိနှိုင်းနေဆဲ ဖြစ်သည်ဟု သိရသည်။
၎င်းတုို့ တုိုက်ပွဲကြောင့် အုိုးအိမ်စွန့်ခွာ ထွက်ပြေးနေရသော ထောင်နှင့်ချီသည့် စစ်ပြေးဒုက္ခသည်များမှာ ယခုထိ နေရပ်ပြန်နုိုင်ခြင်း မရှိသေးပေ။
TNLA သည် အခြားလက်နက်ကုိုင် တုိုင်းရင်းသားများနှင့်အတ တစ်နုိုင်ငံလုံး အပစ်အခတ် ရပ်စဲရေးသဘောတူစာချုပ်မူကြမ်း( NCA )တွင် ယခင်အစုိုးရနှင့် တွေ့ဆုံဆွေးနွေးမှုတွင် ပါဝင်ခဲ့သော်လည်း အစုိုးရဘက်မှ လက်မခံခဲ့သည့် အဖွဲ့ဖြစ်သည်။
No comments:
Post a Comment