Tuesday, December 29, 2015

နိုင်ငံရေး အကျဉ်းသားဟောင်းများ အဖွဲ့ကို နိုင်ငံရေး အဖွဲ့အစည်းအဖြစ် ပြောင်းလဲမည်

ဇူးဇူး


နိုင်ငံရေး အကျဉ်းသားဟောင်းများအဖွဲ့ (FPPS) အား ပြောင်းလဲလာသည့် တိုင်းပြည်အခြေအနေအရ နိုင်ငံရေး အဖွဲ့အစည်းအဖြစ် လာမည့် ၂၀၁၆ ခုနှစ် ဇန်န၀ါရီ ၁ ရက်တွင် စတင် ပြောင်းလဲဖွဲ့စည်းရန်အတွက် အဖွဲ့ဝင်များ ဖိတ်ခေါ်နေကြောင်း သိရသည်။

FPPS ကို နိုင်ငံရေး လုပ်ငန်းစဉ်များတွင် ထဲထဲဝင်ဝင် ပါဝင်လုပ်ဆောင်ရန်၊ အဖွဲ့တွင်း တာဝန်ယူမှု၊ တာဝန်ခံမှု စနစ်ကျစေရန်၊ နောင် တာဝန်ယူမည့်သူများကို အဖွဲ့အား စနစ်တကျလွှဲပြောင်းနိုင်ရန်နှင့် နိုင်ငံရေး အကျဉ်းသားဟောင်းများ အဖွဲ့အား နိုင်ငံရေး အဖွဲ့အစည်း တခုအဖြစ် အများအမြင်တွင် ရှင်းလင်းပြတ်သားစွာ ရှုမြင်လာစေရန် ရည်ရွယ်ပြီး ပြောင်းလဲ ဖွဲ့စည်းခြင်းဖြစ်ကြောင်း နိုင်ငံရေး အကျဉ်းသားဟောင်းများအဖွဲ့က ဧရာဝတီကို ပြောသည်။

“ဖြစ်နေတာက CSO(လူမှုအဖွဲ့အစည်း)လား ဆိုတော့လည်း တိတိကျကျ မဟုတ်ပြန်ဘူး။ နိုင်ငံရေး အဖွဲ့အစည်းလား ဆိုတော့လည်း တိတိကျကျ မဟုတ်ပြန်ဘူးဆိုတဲ့ အခါကျတော့ ကြားထဲမှာ အလယ်လတ်နေတဲ့ပုံစံ ဖြစ်နေတယ်။ ဒါကြောင့် အခုဟာကတော့ နိုင်ငံရေး အဖွဲ့အစည်းတခုအဖြစ် အသွင်ပြောင်းမှာပါ။ နိုင်ငံရေး အကျဉ်းသားအရေးကို လုပ်တာနဲ့အတူ တဖက်မှာလည်း နိုင်ငံရေးကို ဦးတည်ပြီး လုပ်သွားမယ်”ဟု FPPS အဖွဲ့ဝင် ဦးတင်မောင်ဦးက ပြောသည်။

ယခင်က FPPS ကို တနှစ်တကြိမ် ညီလာခံခေါ်ယူပြီး ထိုညီလာခံ၏ ဆုံးဖြတ်ချက်အရ ၁၅ ဦးကော်မတီ ရွေးချယ်၍ နိုင်ငံရေး အကျဉ်းသားများအရေးကိုသာ ဆောင်ရွက်ခဲ့ရသည့်အတွက် နိုင်ငံရေးတွင် ကျယ်ကျယ်ပြန့်ပြန် မလုပ်ဆောင်နိုင်ခဲ့သည့်အပြင် ယခုအခါ နိုင်ငံရေး အကျဉ်းသားဟောင်းများအားလုံး ပါဝင်လာစေချင်သည့်အတွက် အဖွဲ့ဝင်စနစ်ကို အခြေခံကာ ပြောင်းလဲတည်ဆောက်ခြင်းဖြစ်ကြာင်းလည်း ဦးတင်မောင်ဦးက ဆိုသည်။

FPPS ပြောင်းလဲဖွဲ့စည်းခြင်းအားဖြင့် နိုင်ငံရေး အကျဉ်းသားများ အရေးသာမက နိုင်ငံရေးအရွေ့ကို အရှိန်အဟုန်နှင့် ရွှေ့သွားနိုင် မည်ဟု ယုံကြည်ပြီး FPPS အနေဖြင့် ရည်ရွယ်ချက်တူ ဆန္ဒတူသည့် အဖွဲ့အစည်းများမှ ပုဂ္ဂိုလ်များနှင့် ပူးပေါင်း ဆောင်ရွက်မည်ဖြစ်ကြောင်း FPPS အဖွဲ့ဝင် ဦးထွန်းကြည်ကလည်း ပြောသည်။

FPPS အဖွဲ့ဝင်အဖြစ် လျှောက်ထားမည်ဆိုပါက နိုင်ငံရေး အကျဉ်းသားဟောင်းများ အဖွဲ့ (FPPS) နှင့် နိုင်ငံရေး အကျဉ်းသား ကူညီ စောင့်ရှောက်ရေး အသင်း (AAPP) တို့ ၂၀၁၄ ခုနှစ် သြဂုတ်လက ပြုလုပ်ခဲ့သည့် အလုပ်ရုံ ဆွေးနွေးပွဲမှ ထွက်ရှိလာသော နိုင်ငံရေး အကျဉ်းသား အဓိပ္ပာယ် သတ်မှတ်ချက်နှင့် ကိုက်ညီသူများသာ လျှောက်ထားနိုင်ခွင့်ရှိကြောင်း FPPS ၏ ထုတ်ပြန်ချက်တွင် ဖော်ပြ ထားသည်။

FPPS အဖွဲ့ဝင်အဖြစ် လျှောက်ထားမည့်သူများအတွက် စည်းကမ်းချက်များ အနေဖြင့် နိုင်ငံရေး အကျဉ်းသားဟောင်းများ အဖွဲ့၏ ချမှတ်ထားသော မူဝါဒများကို လက်ခံယုံကြည်သူဖြစ်ပြီး မူဝါဒနှင့် စည်းကမ်းများကို ချိုးဖောက်ခဲ့လျှင် အဖွဲ့ဝင်အဖြစ်မှ အလိုအလျောက် ပျက်ပြယ်မည် ဖြစ်သည်ဟုလည်း FPPS ၏ ထုတ်ပြန်ချက်တွင် ပါရှိသည်။

FPPS ကို နိုင်ငံရေး အကျဉ်းသားအားလုံး ခြွင်းချက်မရှိ လွတ်မြောက်ရေး၊ ပြည်တွင်းငြိမ်းချမ်းရေးနှင့် အမျိုးသား ပြန်လည်သင့်မြတ် ရေး စသည့်ရည်ရွယ်ချက်များ ချမှတ်၍ နိုင်ငံရေး အကျဉ်းသားဟောင်းများဖြင့် ၂၀၁၁ ခုနှစ် ဒီဇင်ဘာလတွင် စတင် ဖွဲ့စည်း တည်ထောင် ခဲ့ခြင်း ဖြစ်သည်။

No comments: