ရခိုင်ပြည်နယ် ကျောက်ဖြူမြို့၌ တည်ဆောက်မည့် ကျောက်ဖြူ အထူးစီးပွားရေးဇုန် စီမံကိန်းအား ၂၀၁၆ ခုနှစ် နှစ်ဆန်းပိုင်းတွင် စတင် အကောင်အထည်ဖော်မည် ဖြစ်ကြောင်း သိရသည်။
ကျောက်ဖြူ အထူး စီးပွားရေးဇုန် စီမံကိန်း တည်ဆောက်မည့် နယ်မြေဧရိယာကို သတ်မှတ်ထားပြီးဖြစ်၍ ဇုန်တွင် ပါဝင်မည့် စီမံကိန်း တချို့ကို ၂၀၁၆ ခုနှစ် ဖေဖော်ဝါရီလတွင် စတင် တည်ဆောက်သွားမည်ဖြစ်ကြောင်း၊ ကျောက်ဖြူ အထူးစီးပွားရေးဇုန် စီမံခန့်ခွဲမှု ဆပ်ကော်မတီ ဥက္ကဋ္ဌ၊ ရထား ၀န်ကြီးဌာန ဒု ၀န်ကြီး ဦးမြင့်သိန်း က ဒီဇင်ဘာ ၃ ရက်တွင် ကျင်းပသည့် ပြည်ထောင်စု လွှတ်တော် အစည်းအဝေး၌ တင်ပြခဲ့သည်။
ကျောက်ဖြူ စီးပွားရေးဇုန်၌ ရေနက်ဆိပ်ကမ်း အမှတ် (၁)၊ (၂) နှင့် စက်ရုံများ တည်ဆောက်မည့် စီမံကိန်း၊ လူနေထိုင်ရန် အဆင့်မြင့် အိမ်ရာ စီမံကိန်းများ ပါဝင်ကြောင်း သိရသည်။
ထိုစီမံကိန်းများအတွက် မြေဧက ၄၂၀၀ ကျော် သတ်မှတ်ထားသော်လည်း စက်မှုဇုန်အတွက် ဧက ၂၅၀ ကိုသာ အသုံးပြုမည်ဖြစ်ပြီး ကျန်မြေများသည် နောင်နှစ်ပေါင်း ၂၀၊ ၃၀ ကာလများတွင် တိုးချဲ့ဆောင်ရွက်သွားမည့် ဧရိယာများ ဖြစ်ကြောင်း ဦးမြင့်သိန်း က ဆိုသည်။
ကျောက်ဖြူ အထူး စီးပွားရေးဇုန် စီမံကိန်းနှင့်ဆက်စပ်၍ ရမ်းဗြဲမြို့နယ်အား စိုက်ပျိုးရေး လုပ်ငန်းများ တည်ဆောက်မည့်ဇုန် နှင့် မာန်အောင် မြို့နယ်အား သဘ၀ကို အခြေခံသော ခရီးသွားလုပ်ငန်းများအတွက် အခြေခံတည်ဆောက်မည့်ဇုန်များ အဖြစ် ထည့်သွင်း ရေးဆွဲထားကြောင်းလည်း ဦးမြင့်သိန်း က လွှတ်တော်၌ တင်ပြခဲ့သည်။
ကျောက်ဖြူ အထူးစီးပွားရေးဇုန် စီမံကိန်းနှင့်ပတ်သက်၍ အကောင်အထည် ဖော်ဆောင်မည်ဟု အစိုးရက ဆိုသော်လည်း ဒေသခံ ပြည်သူများအား စီမံကိန်းနှင့်ပတ်သက်၍ အသေးစိတ် ရှင်းလင်းဆွေးနွေးမှု လုပ်ဆောင်ခြင်း မရှိသေးကြောင်း ဒေသခံများက ဧရာဝတီ ကို ပြောသည်။
ကျောက်ဖြူမြို့နယ်၌ တည်ဆောက်ပြီး၊ တည်ဆောက်ဆဲ စီမံကိန်းများနှင့်ပတ်သက်၍လည်း ပွင့်လင်းမြင်သာမှုမရှိဟု ဒေသခံပြည်သူ များနှင့် လူမှု အဖွဲ့အစည်းများ အကြား ဝေဖန်မှုများလည်း ရှိနေသည်။
ထို့အတူ လွှတ်တော်၌ ကျောက်ဖြူ စီမံကိန်းနှင့်ပတ်သက်၍ ရှင်းလင်း တင်ပြခဲ့ရာတွင်လည်း စနစ်တကျ မည်သို့ဆောင်ရွက်သွားမည်၊ မည်သည့် ကုမ္ပဏီများနှင့် တည်ဆောက်သွားမည်ဆိုသည့် အချက်အလက်များကို အသေးစိတ် ပြောဆိုမှုများ မရှိကြောင်း၊ အစိုးရ အနေဖြင့်စီမံကိန်းနှင့်ပတ်သက်၍ ပွင်းလင်း မြင်သာမှု၊ ရိုးသားမှုရှိရန် လိုအပ်ကြောင်း လွှတ်တော် ကိုယ်စားလှယ်များ က ဧရာဝတီ ကို ပြောသည်။
ကျောက်ဖြူမြို့နယ် ပြည်သူ့လွှတ်တော် ကိုယ်စားလှယ် ဦးဘရှိန်က “ဒီစီမံကိန်းဟာ လုပ်သင့်တာမှန်ပေမယ့် ပွင့်လင်းမြင်သာမှုရှိဖို့လိုတယ်၊ အခုဟာက ဒေသရဲ့ အကျိုးစီးပွားထက် တစုံတဦးရဲ့ အကျိုးစီးပွားအတွက် လုပ်ပိုင်ခွင့် ပေးထားခဲ့ချင်ပုံ ရတယ်လို့ပဲ မြင် တယ်”ဟု ပြောဆိုသည်။
ဒု ၀န်ကြီးဦးမြင့်သိန်းသည် ကျောက်ဖြူစီမံကိန်းနှင့်ပတ်သက်၍ လွှတ်တော်၌ တင်ပြသွားသော်လည်း အသေးစိတ်ရှင်းလင်း ပြောဆိုမှုမရှိကြောင်း၊ ထိုစီမံကိန်းသည် တည်ဆောက်ရန် ရည်ရွယ်ထားပြီး ဖြစ်၍ ဒေသဖွံ့ဖြိုးရေးအတွက် လုပ်ဆောင်သင့်ကြောင်း၊ သို့သော် ရိုးသားမှု ရှိရန် လိုအပ်ကြောင်း အမျိုးသားလွှတ်တော် ကိုယ်စားလှယ် ဒေါက်တာ ဗညာအောင်မိုး ကလည်း ပြောသည်။
ဒု ၀န်ကြီး ဦးမြင့်သိန်းကမူ ကျောက်ဖြူအထူး စီးပွားရေးဇုန် စီမံကိန်းအတွက် စင်ကာပူနိုင်ငံ အခြေစိုက် ကုမ္ပဏီတခုအား အကြံပေး အဖြစ် အမေရိကန်ဒေါ်လာ ၂ သန်းဖြင့် ငှားရမ်းဆောင်ရွက်နေကြောင်း၊ စီမံကိန်းအတွက် ကျေးရွာများ ပြောင်းရွှေ့မှုကိုလည်း ရှောင် ကွင်းနိုင်ခဲ့ကြောင်း လွှတ်တော်၌ တင်ပြသွားသည်။
ထို့အတူ နိုင်ငံတော်က ချမှတ်ထားသည့် ဥပဒေများအတိုင်း ဆောင်ရွက်နေပြီး ပြည်သူလူထု၏ သဘောထားကို အခြေခံသည့် နည်းလမ်းများ၊ သက်ဆိုင်ရာ မိတ်ဖက်အဖွဲ့ပေါင်းစုံနှင့် ဆွေးနွေးတိုင်ပင်သည့် နည်းလမ်း၊ ပွင့်လင်း မြင်သာသည့်နည်းလမ်း၊ တာဝန် ယူမှု၊ တာဝန်ခံနိုင်သည့် နည်းလမ်းများဖြင့်ပါ စနစ်တကျ အကောင်အထည် ဖော်ဆောင်နေကြောင်းလည်း ပြောဆိုသွားခဲ့သည်။
ကျောက်ဖြူ အထူးစီးပွားရေးဇုန် စီမံကိန်းနှင့်ပတ်သက်၍ ဆွေးနွေးမှုများကို လာမည့်ရက်ပိုင်းအတွင်း ဆွေးနွေး၍ အတည်ပြုနိုင်ဖွယ် ရှိကြောင်း လွှတ်တော် ကိုယ်စားလှယ်များက ပြောသည်။
ကျောက်ဖြူအထူးစီးပွားရေးဇုန် စီမံကိန်းတွင် ပါဝင်သည့် ရေနက်ဆိပ်ကမ်း စီမံကိန်းများသည် တည်ဆောက်ပြီးပါက ကုန် တန်ချိန် သိန်းချီ၍ တင်နိုင်သည့် နိုင်ငံတကာ ကုန်တင်သင်္ဘောကြီးများ ဆိုက်ကပ်နိုင်မည် ဖြစ်သည်။
ရခိုင် နိုင်ငံရေး အသိုင်းအ၀ိုင်းနှင့် လူမှုရေး အသိုင်းအ၀ိုင်းကမူ ထိုစီမံကိန်းနှင့်ပတ်သက်၍ လက်ရှိအစိုးရ လက်ထက်တွင် မလုပ် ဆောင်တော့ဘဲ လာမည့် အစိုးရသစ် လက်ထက်မှသာ အကောင်အထည်ဖော်ရန် လိုလားကြောင်း ပြောဆိုကြသည်။
စီမံကိန်းများနှင့်ပတ်သက်ပြီး ဆောင်ရွက်ရာတွင်လည်း ဗဟိုအစိုးရ၏ လုပ်ပိုင်ခွင့်ကို လျှော့ချ၍ ပြည်နယ် အစိုးရက တိုက်ရိုက် ကိုင်တွယ် ဆောင်ရွက်ပြီး စီမံခန့်ခွဲပိုင်ခွင့်၊ လုပ်ပိုင်ခွင့်များရရှိရန်လည်း လိုလားနေကြသည်။
ကျောက်ဖြူ အထူးစီးပွားရေးဇုန် စီမံကိန်း၊ ကျောက်ဖြူ-ယူနန်ပြည်နယ် ဆက်သွယ်ထားသည့် သဘာဝဓတ်ငွေ့ ပိုက်လိုင်းစီ မံကိန်း၊ ရေနံပိုက်လိုင်း စီမံကိန်းများနှင့်အတူ တည်ဆောက်ရန် စာချုပ် ချုပ်ဆိုထားသည့် ကျောက်ဖြူ-ကူမင်း မီးရထားလမ်း၊ ကားလမ်း စီမံကိန်း များမှာမူ စာချုပ် သက်တမ်းကျော်သွားပြီ ဖြစ်၍ ထိုစီမံကိန်းများသည်လည်း ပျက်ပြယ်သွားပြီ ဖြစ်ကြောင်း မြန်မာအစိုးရ က ယခုနှစ်အတွင်း ထုတ်ပြန်ထားသည်။
No comments:
Post a Comment