ဝတ်ရည်မွန်(AMIA)
“ပြောရမယ်ဆိုရင် ပိုးတွေက မျက်စိလည်သွားတာပေါ့။ တစ်ချိန်လုံးတစ်မျိုးထဲပဲ စိုက်မယ်ဆိုရင် တစ်ချိန်လုံးပဲ အဲ့ဒီပိုးက နေမှာလေ၊ နောက်တစ်မျိုးကို လှည့်ပြီးစိုက်မယ်ဆိုရင် ဥပမာ စပါးကို ကြိုက်တဲ့ပိုးဟာ ပြောင်းဖူးကို ပြောင်းစိုက်လိုက်ရင် မရှိတော့ဘူးပေါ့။ ပြောင်းဖူးပြီးတော့ တစ်ခြား ခရမ်းချဉ်တွေထပ်ပြီး ပြောင်းစိုက်မယ်ဆိုရင်လည်းအဲ့လိုပဲ ပိုးကကြာကြာမနေရတော့ သက်သာသွားတာပါ” ဟု ဒေါက်တာထက်ကြူကပြောသည်။
မြန်မာနိုင်ငံတွင် စိုက်ပျိုးဧက ၂၅ သန်းရှိပြီး ၁၈ သန်းမှာ စပါးကို အဓိကစိုက်ပျိုးပြီး ပဲနှင့်သီးနှံတို့ကို ဒေသအလိုက် စိုက်ပျိုးကြောင်း စိုက်ပျိုးရေးဦးစီးဌာနက ထုတ်ပြန်မှုများအရ သိရသည်။ စပါးတစ်မျိုးကိုသာ အများဆုံး စိုက်ပျိုးတဲ့အတွက် ပိုးကျမှုနှုန်းများပြီး ပိုးသတ်ဆေးများကို အလွန်အကျွံသုံးစွဲခြင်းကြောင့် ပိုးသတ်ဆေးယဉ်ပါးမှုပြဿနာကို ရင်ဆိုင်နေရတာဖြစ်ကြောင်းလည်း ဖော်ပြထားသည်။
ဒေါက်တာထက်ကြူက “ပြီးတော့ သီးလှည့်စိုက်ပျိုးတာအပြင် သီးထပ်စိုက်ပျိုးတာဆိုရင်လည်း ပိုးကျမှုကို ကာကွယ်နိုင်ပြီးတော့ ဆုံးရှုံးမှုကိုလည်း ကာကွယ်နိုင်မယ်။ ပြောင်းနဲ့ခရမ်းရောစိုက်ထားရင် ပိုးကိုက်တာကြောင့် အထွက်နှုန်းလျော့သွားရင် နောက်တစ်ခုက ကိုယ့်အတွက် ကျန်နေမယ်”ဟု ပြောသည်။
လက်ရှိမြန်မာနိုင်ငံတွင် ငမြှောင်တောင်ပိုး၊ ဆစ်ပိုး၊ ရွက်ဖြတ်ပိုး၊ နှံစုတ်ပိုး၊ စပါးရွက်လိပ်ပိုး အစရှိသော သီးနှံဖျက်ပိုးများရှိပြီး အဆိုပါဖျက်ပိုးများသည် စပါးအထွက်နှုန်းကို ၂၀ ရာခိုင်နှုန်းမှ ၅၀ ရာခိုင်နှုန်းထိ ထိခိုက်စေကြောင်း သိရသည်။ အဆိုပါ ဖျက်ပိုးများကို မြန်မာနိုင်ငံ အနှံအပြားတွေတွေ့ရပြီး မန္တလေးတိုင်း၊ မကွေးတိုင်း၊ စစ်ကိုင်းတိုင်း၊ ပဲခူးတိုင်း၊ ဧရာဝတီတိုင်း၊ရန်ကုန်တိုင်း၊ မွန်ပြည်နယ်၊ ကရင်ပြည်နယ်၊ ရှမ်းပြည်နယ် နှင့် ကချင်ပြည်နယ်တို့တွင် အဖြစ်များကြောင်းသိရသည်။
No comments:
Post a Comment