ဖနိဒါ
တစ်နိုင်ငံလုံး အပစ်အခတ် ရပ်စဲရေး စာချုပ်မူကြမ်း (NCA) လက်မှတ်ရေးထိုးရေး၊ မထိုးရေး ဆုံးဖြတ်ချက်ချမည့် တိုင်းရင်းသား လက်နက်ကိုင် အဖွဲ့အစည်းများ၏ ဒုတိယနေ့ ထိပ်သီးအစည်းအဝေးကို စက်တင်ဘာလ ၂၉ ရက်က ထိုင်းနိုင်ငံ ချင်းမိုင်မြို့တွင် ကျင်းပရာ အစည်းအဝေး သဘာပတိဖြစ်သူ ဗိုလ်ချုပ်ဆေထင်က ပြည်သူအတွက် အလုပ်လုပ်မည့်သူများ ချမ်းသာကြွယ်ဝ လာပြီးနောက် ပြည်သူကို မေ့သွားကြပြီဟု ဗိုလ်ချုပ်ဆေထင်က သတိပေးလိုက်သည်။
"ပြည်သူအတွက် အကျိုးစီးပွားကို ကာကွယ်မယ်ဆိုတဲ့ လူတွေဟာ နောက်ပိုင်းကျတော့ ချမ်းသာကြွယ်ဝတဲ့ သူတို့ ဆယ်သက်စာ စားဖို့ ဖူလုံတဲ့ စီးပွားရေးတွေ ရှိတဲ့နောက်ပိုင်းမှာ ပြည်သူတွေရဲ့ အကျိုးကို မေ့ပျောက်သွားပါတယ်" ဟု သူကဆိုသည်။
ရှမ်ပြည်တိုးတက်ရေးပါတီ၏ တော်လှန်ရေး အတွေ့အကြုံကို ဗိုလ်ချုပ်ဆေထင်က ပြန်လည် ပြောပြရာတွင် ၂၀၁၄ ခုနှစ်အတွင်း တာဖာဆောင်တွင် အစိုးရနှင့် တိုက်ပွဲကြီးများဖြစ်ပေါ်ခဲ့ပြီးနောက် ဒုက္ခသည် အမြောက်အများ ပေါ်ပေါက်ခဲ့သည်ဟု သူကဆိုသည်။ ထိုဒုက္ခသည်များကို အကူအညီ ပေးခဲ့ရကြောင်း သို့သော် ရှမ်ပြည်တိုးတက်ရေးပါတီမှ ခွဲထွက်သွားသည့် ပြည်သူ့စစ်များက အကူအညီမပေးဟု သူက ပြောဆိုခဲ့သည်။
"ကျနော်တို့ ခွဲထွက်သွားတဲ့ ပြည်သူ့စစ်တွေဟာ အဲဒီ ဒုက္ခရောက်နေတဲ့ ရွာသားတွေကို ဆန်တစ်စိမှ မလှူပါဘူး။ အဲဒါတွေက တော်တော်ဝမ်းနည်း စရာကောင်းတယ်" ဟု သူကပြောသည်။
ထို့ကြောင့် ထိုအခြေအနေမျိုးကို သင်ခန်းစာယူကာ ပြည်သူ့အကျိုးကိုသာ ဆောင်ရွက်ကြရန် ဗိုလ်ချုပ်ဆေထင်က တိုက်တွန်းခဲ့သည်။ "ဒါမျိုးကို ကျနော်တို့လည်း သင်ခန်းစာယူပြီးတော့မှ ကျနော်တို့ ဘာဘဲလုပ်လုပ် ပြည်သူတွေရဲ့ အကျိုးကို ဦးထိပ်ပန်ဆင်ပြီးတော့မှ ပြည်သူတွေရဲ့ အကျိုးစီးပွားကို ကာကွယ်ရမယ်" ဟု သူက ဆိုသည်။
"ကိုယ်ကျိုး စီးပွားတွေ လွှမ်းမိုးသွားမယ်ဆိုရင် ကျနော်တို့ ကြွေးကြော်ခဲ့တဲ့ ကျနော်တို့ အသက်ပေးခဲ့တဲ့ တိုင်းပြည်အတွက်၊ ပြည်သူတွေအတွက် အသက်ပေးလှူမယ်ဆိုတဲ့ ရည်ရွယ်ချက်က ပျောက်ဆုံးသွားနိုင်မယ်" ဟု သတိပေးခဲ့သည်။
ထိုင်းနိုင်ငံ ချင်းမိုင်မြို့ရှိ The Park ဟိုတယ်တွင် ကျင်းပနေသည့် ထိပ်သီး အစည်းအဝေးတွင် ဒုတိယ ဗိုလ်ချုပ်ကြီး ဆေထင်၊ အရံသဘာပတိ(၁) ပူးနန်လျန်ထန်းနှင့် အရံသဘာပတိ (၂) ဗိုလ်ချုပ်အိုက်ဘုန်း တို့က တာဝန်ယူခဲ့ကြသည်။ အကျိုးဆောင်အဖြစ် ပဒိုကွယ်ထူးဝင်းနှင့် စောမြရာဇာလင်းတို့ လုပ်ဆောင်ခဲ့သည်။
NCA လက်မှတ်ရေးထိုးမည့် တိုင်းရင်းသား လက်နက်ကိုင် အဖွဲ့အစည်း ၆ ဖွဲ့ခန့် လက်မှတ် ရေးထိုးနိုင်မည်ဟု တစ်ချို့ တိုင်းရင်းသား ခေါင်းဆောင်များထံမှ သိရသည်။ အစိုးရဘက်မှ NCA လက်မှတ်ရေးထိုးရန် တိုင်းရင်းသား လက်နက်ကိုင် အဖွဲ့အစည်း ၁၅ ကို ကမ်းလှမ်းထားသည်။
No comments:
Post a Comment