ပြည်သူတွေ ကြိုက်သည်ဖြစ်စေ၊ မကြိုက်သည်ဖြစ်စေ လက်ရှိသမ္မတ ဦးသိန်းစိန်ကတော့ ၂၀၁၆ ခုနှစ်မှာ သမ္မတရာထူးကို ဝင်ပြိုင်ဖို့ အကောင်းဆုံး အခြေအနေမှာ ရှိနေပုံပေါ်ပါတယ်။
ဒီလိုယူဆနိုင်တဲ့ အဓိက အကြောင်းရင်းကတော့ ဒီအသက် ၇၀ အရွယ် ဗိုလ်ချုပ်ကြီးဟောင်းဟာ နိုင်ငံရဲ့အာဏာကို အဓိက ရယူထားပြီး အပြောင်းအလဲကို မလိုလားတဲ့ လူပုဂ္ဂိုလ်တွေနဲ့ အဖွဲ့အစည်းတွေ အပေါ် ခြိမ်းခြောက်မှု မဖြစ်စေဘဲ အပြောင်းအလဲ တချို့ကို ဆောင်ရွက်နိုင်အောင် ပါးပါးနပ်နပ်နဲ့ စီစဉ်ညွှန်ကြားနိုင်ခဲ့လို့ပဲ ဖြစ်ပါတယ်။
မြန်မာနိုင်ငံရဲ့ နိုင်ငံရေးဇာတ်ခုံပေါ်မှာ တပ်မတော် အပါအဝင် အပြောင်းအလဲကို မလိုလားသူတွေရဲ့ အရိပ်က အုပ်မိုးနေဆဲ ဖြစ်ပြီး လက်ရှိနိုင်ငံရေး အခြေအနေမျိုးမှာ ခေါင်းဆောင်အနည်းငယ်သာ ဆက်လက်ရှင်သန်နိုင်လိမ့်မယ် လို့ လက်တွေ့ဝါဒီ သမားတွေက ပြောဆိုကြပါတယ်။
စစ်အာဏာသိမ်း အစိုးရခေါင်းဆောင် ဗိုလ်ချုပ်မှူးကြီးဟောင်း ဦးသန်းရွှေရဲ့ “လမ်းညွှန်မှု” နဲ့ ဆောင်ရွက်တဲ့ ပြုပြင်ပြောင်းလဲမှု ဖြစ်စဉ်ဟာ “ချောချောမွေ့မွေ့” နဲ့ အကောင်အထည် ပေါ်လာဖို့ လက်ရှိအစိုးရက မျှော်လင့်ခဲ့ပါတယ်။ တနည်းအားဖြင့် ဒီပြုပြင်ပြောင်းလဲရေး ဖြစ်စဉ်ဟာ ၂၀ဝ၈ ဖွဲ့စည်းပုံ အခြေခံဥပဒေနဲ့ လက်ရှိနိုင်ငံရေး အခင်းအကျင်း မှာ စစ်တပ်ရဲ့ အခန်းကဏ္ဍကို ထိခိုက်ခြင်း မရှိဘဲ ဆောင်ရွက်နိုင်ဖို့ ဖြစ်ပါတယ်။
၂၀၁၁ ခုနှစ် အစောပိုင်းမှာ စစ်အာဏာသိမ်း အစိုးရ လက်ထက် ဝန်ချုပ်ကြီးတာဝန် ထမ်းဆောင်ခဲ့တဲ့ ဦးသိန်းစိန် သမ္မတရာထူးကို ရယူချိန်ကစလို့ နိုင်ငံရဲ့အာဏာကို အဓိကရယူထားပြီး အပြောင်းအလဲကို မလိုလားတဲ့ သူတွေကို ထိခိုက်မှု မရှိစေဘဲ ပြုပြင်ပြောင်းလဲရေးတွေကို ဘောင်အတွင်းက ဆောင်ရွက်ခဲ့ပါတယ်။
သမ္မတ ဦးသိန်းစိန် အနေနဲ့ နိုင်ငံကို နိုင်ငံရေး အရရော၊ စီးပွားရေးအရပါ အတိုင်းအတာတခု အထိ တံခါးဖွင့်ပေးခဲ့ပြီး ဒီလို ဆောင်ရွက်မှုတွေကြောင့် နိုင်ငံတကာရဲ့ ချီးကျူးမှုကို ရရှိခဲ့သလို အနောက်နိုင်ငံ တွေကလည်း သူတို့ရဲ့ စီးပွားရေး ပိတ်ဆို့မှု အများစုကို ဖယ်ရှားပေးခဲ့ပါတယ်။
သမ္မတ ဦးသိန်းစိန်ဟာ နိုင်ငံရဲ့ အဓိက အတိုက်အခံ ပါတီခေါင်းဆောင် ၂၀၁၂ ခုနှစ် ကြားဖြတ်ရွေး ကောက်ပွဲကို ဝင်ပြိုင် လာအောင်လည်း သိမ်းသွင်း စည်းရုံးနိုင်ခဲ့ပါတယ်။ ရလဒ်အနေနဲ့ ကတော့ မဲမသမာမှုတွေ ရှိတယ်လို့ အများက ထင်မြင်ယူဆကြတဲ့ ၂၀၁၀ ရွေးကောက်ပွဲမှာ အနိုင်ရပြီး လွှတ်တော်ထဲ ရောက်လာတဲ့ အာဏာရပါတီ လွှတ်တော် အမတ်တွေနဲ့ ရွေးကောက်ခံ မဟုတ်တဲ့ တပ်မတော်သား ကိုယ်စားလှယ် အများစုနဲ့ ဖွဲ့စည်းထားတဲ့ လွှတ်တော်ဟာ ဒေါ်အောင်ဆန်းစုကြည် ရောက်လာတဲ့အတွက် တရားဥပဒေနှင့် အညီ ဖြစ်တယ်လို့ ပိုပြီး ထင်မြင်လာ ရပါတယ်။
ဦးသိန်းစိန်အနေနဲ့ နိုင်ငံရေး အပြောင်းအလဲမှာ စစ်တပ်က ရေးဆွဲခဲ့တဲ့ အငြင်းပွားဖွယ် ၂၀ဝ၈ ဖွဲ့စည်းပုံ အခြေခံဥပဒေ ကို ဦးဆောင် အကောင်အထည် ဖော်ပြီး အပြောင်းအလဲတရပ်ကို အကန့်အသတ်နဲ့ ဆောင်ရွက်နိုင်ခဲ့ပါတယ်။
တချို့သူတွေက ဒါတွေကို ဦးသိန်းစိန်ရဲ့ အရပ်သားအမည်ခံ အစိုးရရဲ့ အောင်မြင်မှုတခု အဖြစ် မှတ်ယူခဲ့ကြပါတယ်။
သမ္မတအာဏာ တည်မြဲရေး ဆောင်ရွက်မှု
ဦးသိန်းစိန် သမ္မတတာဝန် ထမ်းဆောင်နေစဉ် အတွင်း အဓိက နိုင်ငံရေး လူအပြောင်းအလဲ နှစ်ရပ် ဖြစ်ပေါ်ခဲ့ပြီး အဲဒီ အပြောင်းအလဲ နှစ်ခုမှာ သူ့ရဲ့ နိုင်ငံရေး ခံနိုင်ရည်နဲ့ သူရဲ့ဝါစဉ်အရ နေရာကို ခြိမ်းခြောက်ခြင်း မခံရမီ ပြိုင်ဘက်တွေကို ရှင်းထုတ်လိုတဲ့ ဆန္ဒရှိတာကို တွေ့မြင်ရပါတယ်။
အစိုးရသစ် ဖွဲ့စည်းပြီးနောက် တနှစ်ကျော်သာ ကြာသေးတဲ့ ၂၀၁၂ ခုနှစ်၊ ဇူလိုင်လမှာ ဦးသိန်းစိန်လိုပဲ ဗိုလ်ချုပ်ကြီး ဟောင်း တဦးဖြစ်တဲ့ ဒုသမ္မတ ဦးတင်အောင်မြင့်ဦးဟာ ကျန်းမာရေး အခြေအနေအရ ရာထူးမှ အနားယူခွင့် ပြုခြင်းခံရပါတယ်။
အဲဒီ အချိန်တုန်းက ဦးတင်အောင်မြင့်ဦးဟာ လည်ချောင်းကင်ဆာ ခံစားနေရတယ် လို့ သတင်းတွေ ထွက်ခဲ့ပေမယ့် ဒီနေ့ အချိန်မှာတော့ ဒီ ဒုသမ္မတဟောင်းဟာ ကျန်းကျန်းမာမာ ရှိနေတုန်းပဲလို့ ဆိုကြပါတယ်။
တကယ်တမ်းမှာတော့ ဦးတင်အောင်မြင့်ဦးဟာ ဦးသိန်းစိန်က တင်ပြတဲ့ ပြုပြင်ပြောင်းလဲရေး အစီအစဉ်တချို့ကို ဆန့်ကျင်ခဲ့ပြီး နောက်ဆုံးမှာ အထုတ်ခံခဲ့ရတာလို့ သတင်းတွေက ဆိုပါတယ်။
သူတို့ နှစ်ယောက်စလုံးဟာ သူတို့ရဲ့ ခေါင်းဆောင်ဟောင်း ဦးသန်းရွှေနဲ့ ရင်းနှီးတဲ့ဆက်ဆံရေး ရှိပါတယ်။ ဒါပေမယ့်လို့ ဦးတင်အောင်မြင့်ဦးဟာ ဦးသိန်းစိန်နဲ့ သူရဲ့မဟာမိတ်တွေ တခြားနိုင်ငံတွေက မြန်မာနိုင်ငံအပေါ် လက်ခံလာအောင် ဆောင်ရွက်တဲ့ ဟန်ဆောင်သရုပ်ပြ အပြောင်းအလဲတွေကိုတောင် ဆန့်ကျင်ခဲ့တာမို့ နောက်ဆုံးမှာ ဖယ်ရှားခံခဲ့ရခြင်း ဖြစ်ပါတယ်။
အဲဒီနောက် သိပ်မကြာခင် ပြီးခဲ့တဲ့ ဩဂုတ်လမှာပဲ သမ္မတဦးသိန်းစိန် ပါဝင်ပြန်တဲ့ နိုင်ငံရေး ထိပ်တိုက်တွေ့မှုတခု ဖြစ်ပွားခဲ့ပြန် ပါတယ်။ ဒီတခါတော့ အာဏာရ ကြံ့ခိုင်ရေးနဲ့ ဖွံ့ဖြိုးရေးပါတီရဲ့ ပါတီအဆောက်အအုံထဲမှာ ပါ။
နေပြည်တော်မှာ ရှိတဲ့ ပါတီဌာနချုပ်ကို လုံခြုံ ရေးတွေရဲ့ ဝန်းရံမှုနဲ့ အတူ ဖြစ်ပွားခဲ့တဲ့ ဒီသန်းခေါင်ယံ အပြောင်းအလဲ မှာ အာဏာကြီးမားတဲ့ လွှတ်တော် နာယက ဦးရွှေမန်းဟာ ပါတီဥက္ကဋ္ဌ ရာထူးကနေ ဖယ်ရှားခံခဲ့ရပြီး တခြားသော သူ့ရဲ့ မဟာမိတ်တွေ ဟာလည်း ဖယ်ရှားခံခဲ့ရပါတယ်။
လေ့လာသူတွေ ကတော့ ဒီအနေအထားကို သမ္မတနဲ့ လွှတ်တော်နာယက အကြား နိုင်ငံရေး အငြင်းပွားမှုရဲ့ နောက်ဆုံး ဖြစ်ရပ် အဖြစ် သတ်မှတ်ခဲ့ကြပြီး ဒီအခြေအနေမှာ တပ်မတော်ကတော့ သမ္မတဘက်မှာရှိနေတာ ဖြစ်ပါတယ်။
ဦးရွှေမန်း ဘာကြောင့် အဖယ်ရှားခံရသလဲ
အပေါ်ယံ ခြုံငုံသုံးသပ် ကြည့်လိုက်ရင်တောင် ဦးရွှေမန်းဟာ လမ်းကြောင်း ပြောင်းသွားခဲ့တာ တွေ့ရမှာ ဖြစ်ပါတယ်။ သူရဲ့ အနာဂတ် ပိုသေချာစေဖို့ အတွက် ဒီလိုလုပ်တာလည်း ဖြစ်နိုင်ပါတယ်။
ဒီအာဏာရပါတီ ဥက္ကဋ္ဌဟောင်းဟာ ၁၉၈၈ ခုနှစ် ကတည်းက စလို့ စစ်အာဏာသိမ်း အစိုးရ အဆက်ဆက်ကို ဆန့်ကျင်ခဲ့တဲ့ လူထုခေါင်းဆောင် ဒေါ်အောင်ဆန်းစုကြည်နဲ့ ရင်းနှီးတဲ့ ဆက်ဆံရေးတရပ်ကို တည်ဆောက်နေခဲ့တယ် ဆိုတာ တော်တော်များများက သိကြပါတယ်။
ပြီးခဲ့တဲ့ စစ်အာဏာသိမ်း အစိုးရမှာ တတိယအကြီးဆုံး ဖြစ်တဲ့ ဦးရွှေမန်းဟာ ဖွဲ့စည်းပုံအခြေခံဥပဒေ ပြင်ဆင်ရေးနဲ့ ပတ်သက်ပြီး လွှတ်တော်မှာ သူကိုယ်တိုင် ဆန္ဒမဲပေးခဲ့ရာမှာ ဒီအဆိုပြု ပြင်ဆင်မှုထဲမှာ ဖွဲ့စည်းပုံပြင်ဆင်ရေး အပေါ် စစ်တပ်ရဲ့ အာဏာချုပ်ကိုင်ထားမှုကို ပယ်ဖျက်တဲ့ အချက် ပါဝင်နေခဲ့တာပါ။
သူနဲ့ ဒေါ်အောင်ဆန်းစုကြည်ရဲ့ ဆက်ဆံရေးဟာ ဦးသိန်းစိန်ရဲ့ စစ်တပ် ကျောထောက်နောက်ခံ အစိုးရ အတွက် ဆူးတချောင်း ဖြစ်လာခဲ့ပြီး တချို့က သူ့ကို သစ္စာဖောက် အဖြစ် ရှုမြင်ခဲ့ကြပါတယ်။ ဒါပေမယ့် အစိုးရကတော့ ဘာမှ မလုပ်သေးဘဲ သူ့ကို စောင့်ကြည့်နေခဲ့ပါတယ်။
သူနဲ့ ဒေါ်အောင်ဆန်းစုကြည်ရဲ့ ကြားက ဆက်ဆံရေးနဲ့ ပတ်သက်ပြီး ဒီနှစ် အစောပိုင်းက နေပြည်တော်မှာ အစိုးရဝန်ကြီး တယောက်က စာရေးသူကို ဒီလိုပြောပါတယ်။
“သူတို့နှစ်ယောက် ဘယ်နှကြိမ်လောက် တွေ့ခဲ့သလဲ မှတ်တမ်းတင်ဖို့ ကျနော် ကြိုးစားခဲ့တယ်။ ဒါပေမယ့် မလုပ်နိုင်ခဲ့ဘူး။ သူတို့နှစ်ယောက် အကြိမ်ပေါင်းများစွာ သီးသန့်တွေ့ဆုံခဲ့ကြတယ်”
လေ့လာသူတွေ အကုန်လုံးကတော့ အဲဒီလို မမြင်ပေမယ့် ပါတီတွင်း အုပ်စုကွဲတချို့ ကတော့ ဦးရွှေမန်းကို ပြုပြင် ပြောင်းလဲရေး သမား တယောက်နဲ့ အုပ်ချုပ်ရေး အာဏာပိုင်တွေကို ခြိမ်းမြောက်မှုတခု အဖြစ် ရှုမြင်ခဲ့ကြပါတယ်။
ဦးရွှေမန်းဟာ သူရဲ့ သမ္မတ ဖြစ်လိုတဲ့ ဆန္ဒကိုလည်း ထုတ်ဖော် ပြောဆိုခဲ့ပါတယ်။ အာဏာရပါတီရဲ့ နိုင်ငံရေး အာဏာကို ချုပ်ကိုင် ခွဲဝေပေးသူတွေ အတွက် ဦးရွှေမန်း သမ္မတရာထူးရယူတာ လက်ခံနိုင်စရာ ဖြစ်ကောင်း ဖြစ်နိုင် ပေမယ့် အတိုက်အခံ ခေါင်းဆောင်နဲ့ မဟာမိတ်ဖွဲ့တာ ကတော့ ဘယ်လိုမှ လက်ခံနိုင်စရာမရှိ ဖြစ်ခဲ့ပါတယ်။
သမ္မတ ဦးသိန်းစိန် အနေနဲ့ ၂၀၁၆ ခုနှစ်မှာ သမ္မတရာထူး အတွက် ဝင်ရောက်ယှဉ်ပြိုင်မှာ မဟုတ်ဘူး လို့ ဦးရွှေမန်းက ပြောဆိုခဲ့ ရာမှာတော့ ဒါဟာ စည်းကျော်ခဲ့တဲ့ပုံ ပေါ်ပါတယ်။
နောက်ဆုံးကျန်ရစ်သူ
အဓိက ရာထူးဖြုတ်ချမှု နှစ်ခုနဲ့ အတူ ဦးသိန်းစိန်ဟာ ပိုမို အင်အားကြီးမား လာခဲ့ပြီး သူဆောင်ရွက်နေတဲ့ ပြုပြင် ပြောင်းလဲရေး ဖြစ်စဉ် အပေါ်မှာလည်း ပိုပြီး ထိန်းချုပ်မှု ရှိလာပါတယ်။ ဒီပြုပြင်ပြောင်းလဲရေး ဖြစ်စဉ်မှာ သူဟာ အခြေအနေ အချိန်အခါ အလိုက် ပြောင်းလဲ ဆောင်ရွက်နေတာ ဖြစ်ပြီး သူ့ရဲ့ ဆောင်ရွက်မှုဟာ ဆိုရင် အပြောင်းအလဲကို ဆန့်ကျင်တဲ့ ရှေးရိုးစွဲတွေ အပေါ် ခြိမ်းခြောက်မှု အများကြီး မရှိစေခဲ့သလို သူသမ္မတရာထူး ထမ်းဆောင်ချိန်မှာ စတင်ဆောင်ရွက်တဲ့ အထက်ကနေ အောက်ကို သွားတဲ့ ပြုပြင်ပြောင်းလဲရေး ဖြစ်စဉ်ကို ဦးဆောင်သူ အဖြစ်လည်း တရားဝင် အသိအမှတ်ပြုခြင်း ခံရအောင် လုပ်ဆောင်နိုင်ခဲ့ပါတယ်။
ဦးရွှေမန်း ရာထူးက အထုတ်ခံခဲ့ရပြီး နောက်မှာတော့ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီနဲ့ တပ်မတော်ကသာ နိုဝင်ဘာ ရွေးကောက်ပွဲပြီး နောက်မှာ အာဏာကို အဓိကဆုပ်ကိုင်ထားနိုင်ဦးမယ် ဆိုရင် ဒီသမ္မရာထူး အတွက် ဦးသိန်းစိန်ရဲ့ ပြိုင်ဘက် ဖြစ်လာနိုင်သူတွေ ကတော့ သိပ်မရှိပါဘူး။
ဦးသိန်းစိန်က ရွေးကောက်ပွဲမှာ ဝင်ပြိုင်မှာတော့ မဟုတ်ပါဘူး။ ဒါပေမယ့် လက်ရှိ ဖွဲ့စည်းပုံ အခြေခံဥပဒေ အရ လွှတ်တော်အမတ် မဟုတ်သူကိုလည်း ဒုသမ္မတ အဖြစ် အမည်စာရင်း တင်သွင်းနိုင်တာမို့ ဦးသိန်းစိန်ဟာ သမ္မတ ရာထူးကို ဝင်ရောက်ယှဉ်ပြိုင်ခွင့် ရှိနေပါတယ်။
တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်ကလည်း နိုင်ငံတော်ရဲ့ အမြင့်ဆုံး ရာထူးဖြစ်တဲ့ သမ္မတ ရာထူးအတွက် ဝင်ပြိုင်မှာ မဟုတ်ဘူးလို့ ယတိပြတ် ပြောဆိုဖူးခြင်း မရှိတာကြောင့် သူ့အနေနဲ့ ဘယ်လို စိတ်ကူးမျိုး ရှိနေသလဲ ဆိုတာနဲ့ ပတ်သက်ပြီးလည်း သို့လော… သို့လော တွေးတောမှုတွေ ရှိနေပါတယ်။
ဒါပေမယ့် ဩဂုတ်လ ၁၂ ရက် ပါတီတွင်း အာဏာသိမ်းမှုကို ကြည့်ရတာတော့ တပ်မတော်နဲ့ အုပ်ချုပ်ရေးဟာ တဖက်တည်းမှာ ရှိနေတဲ့ပုံ ပေါ်ပြီး ဒါကြောင့် ဒီခေါင်းဆောင် နှစ်ယောက်ကြား တိုက်ရိုက်ပြိုင်ဆိုင်မှုကို တွေ့ရနိုင်ခြေ ကလည်း လျော့ကျခဲ့ရပါတယ်။
နောက်ထပ်ဖြစ်နိုင်တာ တခုကတော့ သမ္မတ ဦးသိန်းစိန်ဟာ နောက်သက်တမ်း ၅ နှစ်ကို အပြည့်အဝ တာဝန် မထမ်းဆောင်ဘဲ ကာကွယ်ရေး ဦးစီးချုပ်က သမ္မတရာထူးကို ထမ်းဆောင်တာမျိုး ဖြစ်နိုင်ပါတယ်။
ဘယ်လိုပဲ ဖြစ်ဖြစ် နောက် ၃ ပတ်လောက်ပဲ လိုတော့တဲ့ ရွေးကောက်ပွဲကနေပြီးတော့ တကယ့် အရပ်သား သမ္မတ တယောက် ပေါ်ပေါက်လာဖို့ ဆိုတာကတော့ မဖြစ်နိုင်သလောက်ပါပဲ။
သမ္မတ ဦးသိန်းစိန်ရဲ့ နှလုံးခုန်စက် အလုပ် လုပ်နေသမျှ ကာလပတ်လုံး ဦးသိန်းစိန်နဲ့ ဗိုလ်ချုပ်မှူးကြီး မင်းအောင်လှိုင်တို့ဟာ ဖွဲ့စည်းပုံအခြေခံဥပဒေ ကာကွယ်ရေး၊ ပြုပြင်ပြောင်းလဲရေး ဖြစ်စဉ်ကို စီစဉ် ညွှန်ကြားရေးနဲ့ ယခင် အစိုးရဟောင်းရဲ့ ဆောင်ပုဒ်ဖြစ်တဲ့ “စည်းကမ်းပြည့်ဝတဲ့ ဒီမိုကရေစီ ဖော်ဆောင်ရေး” တို့ကို အတူတကွ ပူးပေါင်း ဆောင်ရွက်သွားဖွယ် ရှိနေတာပဲ ဖြစ်ပါတယ်။ ။
No comments:
Post a Comment