မြန်မာတောင်တက်သမားများ ဧ၀ရက် တောင်ထိပ် တက်ရန် ပြင်ဆင်

ငြိမ်းငြိမ်း

ဂေဟအခြေပြု ခရီးသွားလုပ်ငန်းနှင့် စွန့်စားဆောင်ရွက်ရသည့် အားကစားကဏ္ဍ တိုးတက်စေရန် ရည်ရွယ်ပြီး တောင်တက်သမားနှင့် စုဖွဲ့ထားသည့် Technical Climbing Club of Myanmar (TCCM) မှ တောင်တက်သမား သုံးဦးသည် နီပေါနိုင်ငံ ဟိမ၀န္တာတောင်တန်းပေါ်ရှိ ဧ၀ရတ်ထောင်ထိပ်သို့ ၂ လကျော်ကြာ တက်ရောက်ရန် စီစဉ်ထားကြောင်း သိရသည်။ ယခုလ နောက်ဆုံးအပတ်တွင် စတင်မည့် ဧ၀ရက် တောင်ထိပ်သို့ တက်ရောက်မည့် ခရီးစဉ်သည် ၆၄ ရက်ကြာမည် ဖြစ်ပြီး ခရီးစဉ်အောင်မြင်ပါက ဧ၀ရတ်တောင်ထိပ်သို့ တက်ရောက်နိုင်သည့် ပထမဆုံးသော မြန်မာတောင်တက်သမားများ ဖြစ်လာမည် ဖြစ်သည်။

မတ်လ ၂၄ ရက်နေ့က ရန်ကုန်မြို့တွင် ပြုလုပ်သော ဧ၀ရတ်တောက်တက်သွားမည့် တောင်တက်သမားများ၏ သတင်းစာရှင်းလင်းပွဲတွင် TCCM မှ ၀ါရင့် တောင်တက်သမားများဖြစ်သော ကိုပြည့်ဖြိုးအောင်၊ ကိုညီညီအောင်နှင့် ကိုဝင်းကိုကိုတို့က အမြင့်ပေပေါင်း ၂၉၀၃၅ ကျော် (၈၈၄၈ မီတာ) မြင့်သော ကမ္ဘာ့အမြင့်ဆုံး ဧ၀ရက် တောင်ထိပ်သို့ တက်ရောက်ရန်စီစဉ်ထားသည့် အကြောင်းများကို ရှင်းလင်းပြောကြားခဲ့သည်။

မတ်လ ၂၉ ရက်တွင် စတင်မည့် ဧ၀ရက် တောင်တက်အဖွဲ့နှင့်ပူးပေါင်းရန် ၎င်းတို့ ၃ ဦးသည် ရန်ကုန်မှ မတ်လ ၂၆ ရက် စနေနေ့တွင် နီပေါနိုင်ငံ ခတ္တမန္ဒူမြို့တော်သို့ ထွက်ခွာမည် ဖြစ်သည်။ နီပေါတွင် ဘရာဇီးနိုင်ငံသား ၀ါရင့်တောင်တက်သမား ၃ ဦးနှင့် အတူ၊ နီပေါတောင်တက်လမ်းပြသမားများနှင့် ပူးပေါင်းကာ စုစုပေါင်း လူ ၇၀ ခန့်ဖြင့် ၆၄ ရက်ကြာ ဧ၀ရက် တောင်တက်ခရီးစဉ်ကို ဇွန်လ ပထမအပတ်တွင် ပြီးဆုံးမည် ဖြစ်သည်။

TCCM အဖွဲ့မှ နည်းပြတစ်ဦးဖြစ်ပြီး အဖွဲ့ကို လက်ရှိ ဦးဆောင်နေသည့် ကိုပြည့်ဖြိုးအောင်က တောင်တက်ခရီးစဉ်အတွင်း နီပေါ နိုင်ငံ၏ ဂေဟအခြေပြုခရီးသွားလုပ်ငန်းဆိုင်ရာ အတွေ့အကြုံများ သင်ယူနိုင်ရန် ပြင်ဆင်ထားကြောင်း ပြောကြားသည်။ ကိုပြည့်ဖြိုးအောင်သည် တောင်တက်အားကစားကို ၂၀၀၅ ခုနှစ်က စတင်ခဲ့သူ ဖြစ်ပြီး မြန်မာပြည် ကချင်ပြည်နယ်ရှိ မဒွဲတောင်၊ ဂန်လန်ရာဇီတောင်နှင့် ချင်းပြည်နယ် ၀ိတိုရိယတောင်တို့အပြင် တရုပ်ပြည်ယူနန်ရှိ ဟာဘာဇူရှန် တောင်တို့ကိုလည်း တက်ရောက်ခဲ့ဖူးသူ ဖြစ်သည်။

TCCM အသင်းကို ၂၀၁၁ ခုနှစ်က စတင်တည်ထောင်ခဲ့ပြီး ခေတ်မှီတောင်တက်နည်းလမ်းများ လေ့လာရန်နှင့် စွန့်စားလိုသူ တောင်တက်သမားများအား မွေးထုတ်ပေးနိုင်ရန် ရည်ရွယ်သည်။ ၎င်းသည် မြန်မာပြည်ရှိ အတက်ကြွဆုံး တောင်တက်အသင်းအဖွဲ့ ၅ ဖွဲ့တွင် တဖွဲ့အဖြစ် ပါဝင်သည်။

၎င်းအသင်းသည် သဘာဝပတ်ဝန်းကျင် ထိန်းသိမ်းရေးလှုပ်ရှားမှုအဖြစ် သဘာဝပတ်ဝန်းကျင် ထိန်းသိမ်းရေးဆိုင်ရာ ပညာပေးမှုများလည်း လုပ်ဆောင်သည်။ တောင်တက်သူများအား တောတွင်း ခရီးထွက်ရာတွင်ဖြစ်စေ၊ တောင်တက်ရာတွင် ဖြစ်စေရန် ကိုယ့်အမှိုက်ကိုယ်သိမ်းရန် ဆော်သြသည့်အနေဖြင့် “သဲလွန်စ မကျန်စေရ” ဟူသော ဆောင်ပုဒ်အတိုင်း ကျင့်ကြံ လိုက်နာကြရန်လည်း ဆော်သြသည်ဟု ကိုညီညီအောင်က ဆိုသည်။

တောင်တက် အားကစားကို ၂၀၀၅ ခုနှစ်ကတည်းက စတင်ခဲ့သော ကိုညီညီအောင်က ပတ်ဝန်းကျင်ထိန်းသိမ်းရေးဆိုင်ရာ ပညာပေးမှုများကို လူမှုကွန်ယက်မှ တဆင့်လည်း ဆောင်ရွက်သည်ဟု ဆိုသည်။ “ကမ္ဘာ့ရေနေ့မှာ ကျနော်တို့ ဖေ့ဘုတ်လူမှုကွန်ယက်ကနေ တဆင့် ပညာပေးတွေ ဖြန့်ဝေတယ်။ နောက် ပလပ်စတစ်မသုံးဖို့ လှုပ်ရှားမှုတွေလည်း လုပ်တယ်။ ကျနော်တို့ ပေ့ခ်ျက လိုက်ခ်အရေအတွက် နည်းသေးပေးမယ့် ဒီလိုပညာပေးဖြန့်ဝေမှုတွေကို ကြည့်သူတွေကတော့ များပါတယ်။” ဟု သူက ဆိုသည်။

TCCM သည် ဧ၀ရတ်တောင်တက်ခရီးစဉ်တွင် နီပေါနှင့် Sherpa (ဟိမ၀န္တာတောင်တန်းများပေါ်တွင်နေထိုင်သောလူမျိုး) တောင်တက်သမားများနှင့် လမ်းပြများဖြင့်ဖွဲ့ထားသော “ဟိမ၀န္တာတောင်တက်သူများအသင်း” Himalayan Ascent နှင့် အရေးပေါ်ရွှေ့ပြောင်းမှုများလိုအပ်ပါက ဆောင်ရွက်ပေးသော Global Rescue တို့နှင့် ချိတ်ဆက်ပီး သွားရောက်မည့် ခရီးစဉ်ဖြစ်သည်။

တောင်တက်ခရီးစဉ်တွင် တောင်တက်သမားများ၏ လုံခြုံရေးအတွက် အကောင်းဆုံးပြင်ဆင်ထားပြီး၊ အပူချိန် အနှုတ် ၆၀ ဒီဂရီစင်တီဂရိတ်အောက်ရှိ ဧ၀ရက် တောင်ပေါ်တွင် ကြိုတင်မခန့်မှန်းနိုင်သော ရာသီဥတု ဆိုးရွာမှုဆိုင်ရာ အန္တာရာယ်များအတွက်လည်း အရေးပေါ် ကယ်ဆယ်ရေးအတွက် ပြင်ဆင်ထားကြောင်း ကိုညီညီအောင်က ဆိုသည်။

၂၀၁၄ ခုနှစ်က ထူးကုမ္ပဏီမှ တောင်တက်အဖွဲ့ (တိဘက်လူမျိုးတစ်ဦးအပါအ၀င် မြန်မာတောင်တက်သမား ၅ ဦးအဖွဲ့) သည် ဧ၀ရတ်တောင်ထိပ်သို့ တက်ရောက်ရန် ကြိုးပမ်းခဲ့ဖူးသည်။ သို့သော် တောင်ခြေစခန်း အမြင့်ပေ ၁၇၅၀၀ အရောက်တွင် တောင်ပေါ်မှ နှင်းထု၊ ရေခဲထုနှင့် ကျောက်တုံးများ ပြိုကျခဲ့သောကြောင့် ဧ၀ရတ်တောင်သို့ တက်ခွင့်မရတော့ဘဲ ပြန်လှည့်ခဲ့ကြရသည်။

ယခုနှစ် ဧ၀ရတ်တောင်တက်ခရီးစဉ် အစအဆုံးကိုလည်း ထူးကုမ္ပဏီများဥက္ကဌ ဦးတေဇ ဦးစီးတည်ထောင်ထားသည့် ထူးဖောင်ဒေးရှင်းက ကူညီထောက်ပံ့ပေးသည်။

ထူးဖောင်ဒေရှင်းမှ CEO ဦးပေါ်မြင့်ဦးက “မြန်မာနိုင်ငံတောင်တက်အသင်းရဲ့ နာယက ဖြစ်တဲ့ ဦးတေဇကနေ ကမ္ဘာ့အမြင့်ဆုံးတောင်ထိပ်ဖြစ်တဲ့ ဧ၀ရတ်တောင်ကို တက်ဖို့ မြန်မာတောင်တက်သမား ၃ ယောက်ကို (sponsor) ထောက်ပံ့ရခြင်းက မြန်မာနိုင်ငံအလံကို မြန်မာနိုင်ငံသားများအနေနဲ့ ဧ၀ရတ်တောင်ထိပ်မှာ လွှင့်ထူနိုင်အောင် ဖြစ်ပါတယ်။ ပြီးတော့ မြန်မာတောင်တက်သမားတွေအကြောင်း ကမ္ဘာကို သိစေချင်တာလည်း ပါပါတယ်” ဟု ဧရာဝတီသို့ ပြောသည်။

၎င်း၏ အဖွင့်မိန့်ခွန်းတွင်လည်း “ရာဇ၀င်တွင်တဲ့ တောင်တက်ခရီးစဉ်တခုဖြစ်အောင် စပွန်ဆာ ပေးတာဖြစ်ပါတယ်။ မြန်မာနိုင်ငံသားတွေ ပထမဆုံးတက်တဲ့ ခရီးစဉ်။ ဒီဟာကလည်း လွယ်လွယ်ကူကူ တက်ရတာမဟုတ်ပါဘူး။ အဟန့်အတားမျိုးစုံ၊ အခက်အခဲမျိုးစုံတွေ ကျော်လွှားပြီး တက်ရတာ။ ခရီးစဉ်အတွင်း တွေ့ရမယ့် သဘာ၀၀န်းကျင်သန့်ရှင်းမှု၊ တောင်တက်ရတဲ့ခက်ခဲမှု၊ အတွေ့အကြုံတွေကို မြန်မာနိုင်ငံကို ပြန်ရောက်တဲ့အခါ ပြန်လည် မျှဝေပေးဖို့ အတွက်ပါပဲ” ဟု ဆိုသည်။